પ્રધાનમંત્રી શ્રી નરેન્દ્ર મોદી 29થી 30 ઓગસ્ટ દરમિયાન દ્વિપક્ષીય મુલાકાત માટે ઉઝબેકિસ્તાન અને 31 ઓગસ્ટથી 1 સપ્ટેમ્બર દરમિયાન 26મી શાંઘાઈ કોઓપરેશન ઓર્ગેનાઈઝેશન (SCO) સમિટમાં ભાગ લેવા કિર્ગિઝ રિપબ્લિકની મુલાકાત લેશે.

ઉઝબેકિસ્તાનના રાષ્ટ્રપતિ મહામહિમ શ્રી શવકાત મિર્ઝિશ્યોયેવના નિમંત્રણ પર, પ્રધાનમંત્રી 29-30 ઓગસ્ટ 2026ના રોજ તાશકંદની રાજ્ય મુલાકાતે (State Visit) જશે. પ્રધાનમંત્રીની ઉઝબેકિસ્તાનની આ ચોથી મુલાકાત હશે. મુલાકાત દરમિયાન, પ્રધાનમંત્રી બંને દેશો વચ્ચેની વ્યૂહાત્મક ભાગીદારીને વધુ મજબૂત કરવા માટે રાષ્ટ્રપતિ મિર્ઝિશ્યોયેવ સાથે પ્રતિનિધિમંડળ સ્તરની વાટાઘાટો કરશે. બંને નેતાઓ વેપાર અને રોકાણ, સંરક્ષણ, ડિજિટલ કનેક્ટિવિટી, ઊર્જા, શિક્ષણ અને લોકો વચ્ચેના સંબંધો ક્ષેત્રે સહયોગની સમીક્ષા કરશે અને ભવિષ્યનો રોડમેપ નક્કી કરશે. તેઓ 'વિકસિત ભારત 2047' અને 'ઉઝબેકિસ્તાન-2030' ના સહિયારા વિકાસલક્ષી વિઝનને આગળ ધપાવવા અંગેના દ્રષ્ટિકોણ પણ શેર કરશે. પ્રધાનમંત્રી તાશકંદમાં શાસ્ત્રી મેમોરિયલ અને તાશકંદ સ્ટેટ યુનિવર્સિટી ઓફ ઓરિએન્ટલ સ્ટડીઝ ખાતે મહાત્મા ગાંધી સેન્ટરની પણ મુલાકાત લે તેવી શક્યતા છે.

તાશકંદથી, કિર્ગિઝ રિપબ્લિકના રાષ્ટ્રપતિ મહામહિમ શ્રી સાદિર ઝાપારોવના નિમંત્રણ પર, પ્રધાનમંત્રી 31 ઓગસ્ટ - 1 સપ્ટેમ્બર 2026ના રોજ 26મી SCO સમિટમાં ભાગ લેવા માટે બિશ્કેક જશે. આ સમિટ શાંઘાઈ સહયોગ સંગઠન (SCO) ની 25મી વર્ષગાંઠ નિમિત્તે યોજાઈ રહી છે, જેમાં ભારત 2017થી પૂર્ણ સમયનું સભ્ય છે. પ્રધાનમંત્રી આ સમિટને સંબોધિત કરશે જ્યાં તેઓ આ મંચ પર ભારતની 'સુરક્ષા, કનેક્ટિવિટી અને તક'ની પ્રાથમિકતાઓને રેખાંકિત કરશે. પ્રધાનમંત્રી સમિટની સાથે સાથે SCO નેતાઓ સાથે દ્વિપક્ષીય બેઠકો પણ કરશે. તેઓ મધ્ય એશિયાના સમૃદ્ધ સાંસ્કૃતિક વારસાની ઉજવણી સમાન 'છઠ્ઠી વર્લ્ડ નોમેડ ગેમ્સ' (6th World Nomad Games) ના ઉદ્ઘાટન સમારોહમાં પણ હાજરી આપશે.

SM/BS/JD