মহিলা আৰু শিশু উন্নয়ন মন্ত্ৰালয়
৮০ সংখ্যক স্বাধীনতা দিৱসত জাতিক উদ্দেশ্যি প্ৰদান কৰা ভাষণত ৰাষ্ট্ৰ নিৰ্মাণত মহিলাৰ ক্ৰমবৰ্ধমান ভূমিকাৰ ওপৰত প্ৰধানমন্ত্ৰীৰ আলোকপাত
प्रविष्टि तिथि:
15 AUG 2026 4:00PM by PIB Guwahati
প্ৰধানমন্ত্ৰী শ্ৰী নৰেন্দ্ৰ মোদীয়ে ৮০ সংখ্যক স্বাধীনতা দিৱস উপলক্ষে লালকিল্লাৰ প্ৰাচীৰৰ পৰা জাতিক উদ্দেশ্যি প্ৰদান কৰা ভাষণত দেশৰ উন্নয়নৰ যাত্ৰাত মহিলাৰ ক্ৰমবৰ্ধমান ভূমিকা আৰু অৱদানৰ ওপৰত আলোকপাত কৰে আৰু দেশৰ প্ৰগতিত তেওঁলোকৰ অংশগ্ৰহণ অধিক সুদৃঢ় কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।
প্ৰধানমন্ত্ৰীয়ে ভাৰতৰ জীয়ৰীসকলৰ সাফল্যৰ কথা উল্লেখ কৰি কয় যে মহিলাসকলে আজি বিভিন্ন ক্ষেত্ৰত নিজৰ উপস্থিতি সাব্যস্ত কৰিছে। মহিলাসকলৰ পৰিৱৰ্তিত ভূমিকাৰ প্ৰসংগ উত্থাপন কৰি তেওঁ কয় যে জীয়ৰীসকলে এতিয়া এনেবোৰ ক্ষেত্ৰত প্ৰৱেশ কৰিছে আৰু পাৰদৰ্শিতা দেখুৱাইছে যিবোৰ পূৰ্বতে তেওঁলোকৰ বাবে কঠিন বা দুৰ্গম বুলি গণ্য কৰা হৈছিল।
গ্ৰাম্য মহিলাসকলৰ আৰ্থিক সৱলীকৰণৰ ওপৰত আলোকপাত কৰি প্ৰধানমন্ত্ৰীয়ে কয় যে ৩ কোটি 'লাখপতি দিদি' সৃষ্টিৰ লক্ষ্য ইতিমধ্যে অতিক্ৰম কৰা হৈছে। তেওঁ ঘোষণা কৰে যে চৰকাৰে এতিয়া ৬ কোটি 'লাখপতি দিদি' সৃষ্টিৰ এক নতুন লক্ষ্য নিৰ্ধাৰণ কৰিছে। তেওঁ লগতে কয় যে অতিৰিক্ত ৩ কোটি 'লাখপতি দিদি' সৃষ্টিয়ে মহিলাসকলৰ আৰ্থিক শক্তিৰ জৰিয়তে গ্ৰাম্য অৰ্থনীতিলৈ এক বৃহৎ ৰূপান্তৰ কঢ়িয়াই আনিব।
প্ৰধানমন্ত্ৰীয়ে বিভিন্ন খণ্ডত মহিলাসকলৰ ক্ৰমবৰ্ধমান অংশগ্ৰহণৰ ওপৰতো আলোকপাত কৰে আৰু কয় যে ভাৰতৰ জীয়ৰীসকলে তেওঁলোকৰ সাফল্যৰ জৰিয়তে নতুন মানদণ্ড গঢ়ি তুলিছে। তেওঁলোকৰ ক্ৰমবৰ্ধমান উপস্থিতি আৰু অৱদানে মহিলাসকলৰ পৰিৱৰ্তিত আকাংক্ষা আৰু ৰাষ্ট্ৰ নিৰ্মাণৰ যাত্ৰাত তেওঁলোকৰ প্ৰসাৰিত ভূমিকাক প্ৰতিফলিত কৰে।
প্ৰধানমন্ত্ৰীয়ে লগতে বিধানসভা আৰু লোকসভাত মহিলাৰ বাবে ৩৩ শতাংশ প্ৰতিনিধিত্ব নিশ্চিত কৰিবলৈ সকলো দলকে একত্ৰিত হ'বলৈ আহ্বান জনায়। তেওঁ গুৰুত্ব আৰোপ কৰে যে সিদ্ধান্ত গ্ৰহণ প্ৰক্ৰিয়াত আৰু দেশৰ ভৱিষ্যত গঢ় দিয়াত দেশৰ জীয়ৰী, মাতৃ আৰু ভগ্নীসকলৰ অধিক অংশগ্ৰহণ থকা উচিত।
প্ৰধানমন্ত্ৰীৰ দেশবাসীক উদ্দেশ্যি প্ৰদান কৰা ভাষণে ভাৰতৰ উন্নয়নৰ যাত্ৰাত আৰু এখন উন্নত ভাৰত গঢ়াৰ প্ৰয়াসত মহিলাৰ অংশগ্ৰহণ, সৱলীকৰণ আৰু নেতৃত্বৰ গুৰুত্বক পুনৰ দৃঢ় কৰে।
***
SS/PC/RD
(रिलीज़ आईडी: 2300747)
आगंतुक पटल : 9