କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଆଜି ଭିଡିଓ କନଫରେନ୍ସିଂ ମାଧ୍ୟମରେ ଗୁଜରାଟର ଗାନ୍ଧୀନଗର ଲୋକସଭା ନିର୍ବାଚନମଣ୍ଡଳୀର ପାଠାଗାରଗୁଡ଼ିକୁ ସମନ୍ୱିତ କରିବା ପାଇଁ ବିକଶିତ 'ଗ୍ରାମୀଣ ଜ୍ଞାନ ସେତୁ' ଆପ୍ ର ଶୁଭାରମ୍ଭ କରିଛନ୍ତି।

ଏହି କାର୍ଯ୍ୟକ୍ରମକୁ ଭର୍ଚୁଆଲ ମାଧ୍ୟମରେ ସମ୍ବୋଧିତ କରି କେନ୍ଦ୍ର ଗୃହ ମନ୍ତ୍ରୀ ଶ୍ରୀ ଅମିତ ଶାହ ଉଲ୍ଲେଖ କରିଥିଲେ ଯେ ଆଜି ଏସ୍. ଆର୍. ରଙ୍ଗନାଥନଙ୍କ ଜୟନ୍ତୀ। ସେ କହିଥିଲେ ଯେ ସମଗ୍ର ଦେଶ ପଦ୍ମଶ୍ରୀ ରଙ୍ଗନାଥନଙ୍କ ଜୟନ୍ତୀକୁ ଜାତୀୟ ପାଠାଗାର ଦିବସ ଭାବେ ପାଳନ କରୁଛି ଏବଂ ତାଙ୍କ ଲୋକସଭା କ୍ଷେତ୍ରରେ 'ଗ୍ରାମୀଣ ଜ୍ଞାନ ସେତୁ ’ ନାମକ ଏକ ନୂତନ ବିଚାର ଓ ଧାରଣାର ଶୁଭାରମ୍ଭ କରାଯାଇଛି। ଶ୍ରୀ ଶାହ କହିଥିଲେ ଯେ ଏହାର ଉଦ୍ଦେଶ୍ୟ ହେଉଛି ପ୍ରତ୍ୟେକ ଗ୍ରାମରେ ଏକ ପାଠାଗାର ପ୍ରତିଷ୍ଠା କରିବା-ଯାହା କେନ୍ଦ୍ରୀୟ ଭାବେ ଏବଂ ବିଦ୍ୟାଳୟ ନିକଟରେ ଅବସ୍ଥିତ-ଯାହାଦ୍ୱାରା ପିଲାମାନେ ପଢ଼ିବା ଏବଂ ଶିଖିବା ସହିତ ଜଡ଼ିତ ହେବା ପାଇଁ ଉତ୍ସାହିତ ହୋଇପାରିବେ। ସେ ଉଲ୍ଲେଖ କରିଥିଲେ ଯେ ପାଖାପାଖି ୬୩ଟି ପାଠାଗାର ପ୍ରତିଷ୍ଠା ହୋଇସାରିଛି। ଗାନ୍ଧୀନଗର, କଲୋଲ ଏବଂ ସାନନ୍ଦ ବିଧାନସଭା ନିର୍ବାଚନମଣ୍ଡଳୀର ସମସ୍ତ ଗ୍ରାମରେ ପାଞ୍ଚରୁ ଛଅ ହଜାର ପୁସ୍ତକ ଥିବା ଛୋଟ ପାଠାଗାର ଖୋଲିବା ପାଇଁ ପଦକ୍ଷେପ ନିଆଯାଇଛି।କେନ୍ଦ୍ର ଗୃହ ମନ୍ତ୍ରୀ ଉଲ୍ଲେଖ କରିଛନ୍ତି ଯେ ସେ ବ୍ୟକ୍ତିଗତ ଭାବେ ଏହି ବହୁମୁଖୀ ପାଠାଗାରଗୁଡ଼ିକ ପାଇଁ ଏକ ପୁସ୍ତକ ତାଲିକା ପ୍ରସ୍ତୁତ କରିଛନ୍ତି-ଯେଉଁ ପୁସ୍ତକଗୁଡ଼ିକ ପିଲାମାନଙ୍କ ମଧ୍ୟରେ ପଢ଼ିବା ପ୍ରତି ଆଗ୍ରହ ସୃଷ୍ଟି କରିବା ଏବଂ ଧୀରେ ଧୀରେ ସେମାନଙ୍କୁ ଜ୍ଞାନର ବିଶାଳ ସାଗରରେ ନିମଗ୍ନ ହେବାକୁ ପ୍ରେରଣା ଦେବା ପାଇଁ ପ୍ରସ୍ତୁତ କରାଯାଇଛି। ଏହାବ୍ୟତୀତ, ଏହି ପାଠାଗାରଗୁଡ଼ିକରେ କିଶୋର ଏବଂ ଯୁବକମାନଙ୍କ କ୍ୟାରିଅର ବିକାଶ ପାଇଁ ଉପଯୋଗୀ ପୁସ୍ତକ ଏବଂ ରାଜ୍ୟ ତଥା ଜାତୀୟ ସ୍ତରର ପ୍ରତିଯୋଗିତାମୂଳକ ପରୀକ୍ଷା ପାଇଁ ସମ୍ବଳ ମହଜୁଦ ରହିବ। ଗୁଜରାଟର ଇତିହାସ, ଦେଶର ଇତିହାସ, ସ୍ୱାଧୀନତା ସଂଗ୍ରାମର କାହାଣୀ ଏବଂ ୧୮୫୭ର ବିପ୍ଳବକୁ ନେଇ ଗାଁ ଭିତରେ ପୁସ୍ତକ ଉପଲବ୍ଧ କରାଇବା ପାଇଁ ମଧ୍ୟ ବ୍ୟବସ୍ଥା କରାଯାଇଛି।

ଶ୍ରୀ ଅମିତ ଶାହ କହିଥିଲେ ଯେ ପିତାମାତାଙ୍କ ପ୍ରୋତ୍ସାହନ ବିନା ପିଲାମାନଙ୍କ ମଧ୍ୟରେ ପଠନ ଅଭ୍ୟାସ ସୃଷ୍ଟି କରିବା ସମ୍ଭବ ନୁହେଁ; ତଥାପି, ଯେଉଁ ପିଲାମାନେ ଅଧ୍ୟୟନ ପାଇଁ ପ୍ରେରିତ ହୋଇଛନ୍ତି, ସେମାନଙ୍କ ପାଇଁ ଚାରୋଟି ପାଠାଗାର-ସାମୂହିକ ଭାବେ ୨.୮୦ ଲକ୍ଷ ପୁସ୍ତକ, ଯାହା ଭବିଷ୍ୟତରେ ସେମାନଙ୍କୁ ଉପକୃତ କରିବ-ଏହି ଗ୍ରାମୀଣ ପାଠାଗାରଗୁଡ଼ିକ ସହିତ ଯୋଡ଼ି ଦିଆଯାଇଛି। କେନ୍ଦ୍ର ଗୃହମନ୍ତ୍ରୀ ଉଲ୍ଲେଖ କରିଛନ୍ତି ଯେ ସେ ତାଙ୍କ ସାଂସଦ ସ୍ଥାନୀୟ କ୍ଷେତ୍ର ବିକାଶ (ଏମପି ଲାଡ୍‍) ପାଣ୍ଠି ବ୍ୟବହାର କରି ଗାଡିର ବ୍ୟବସ୍ଥା କରି ଏହି ସେବାକୁ ସୁଗମ କରିଛନ୍ତି। ପୂର୍ବରୁ ଜାରି କରାଯାଇଥିବା ପୁସ୍ତକ ସଂଗ୍ରହ କରିବା ଏବଂ ଏହି ଆପରେ ପଞ୍ଜୀକୃତ ପୁସ୍ତକଗୁଡ଼ିକୁ ଗ୍ରାମ ପାଠାଗାରକୁ ପହଞ୍ଚାଇବା ପାଇଁ ଏହି ଭ୍ୟାନଗୁଡ଼ିକ ପ୍ରତି ପନ୍ଦର ଦିନ ଅନ୍ତରରେ ଗ୍ରାମଗୁଡ଼ିକୁ ଗସ୍ତ କରିବେ। ସେ ଉଲ୍ଲେଖ କରିଥିଲେ ଯେ ଯେଉଁ ପିଲାମାନେ ୬୦୦୦ ରୁ ୭୦୦୦ ପୁସ୍ତକ ଥିବା ପାଠାଗାର ପରିଦର୍ଶନ କରିବାରେ ଅଭ୍ୟସ୍ତ, ସେମାନେ ଏବେ ୨.୮୦ ଲକ୍ଷ ପୁସ୍ତକ ସଂଗ୍ରହ କରିପାରିବେ।

କେନ୍ଦ୍ର ଶ୍ରୀ ଶାହ କହିଥିଲେ ଯେ ସେ ମୂଳତଃ ଏହି ପ୍ରସ୍ତାବ ଦେଇଥିବା ବେଳେ ମୁଖ୍ୟମନ୍ତ୍ରୀ ଶ୍ରୀ ଭୂପେନ୍ଦ୍ର ପଟେଲ ଏବଂ ଗୁଜରାଟ ସରକାର ଏହାକୁ ଏକ ନୂତନ ବୈଜ୍ଞାନିକ ଆଭିମୁଖ୍ୟ ସହିତ ସମନ୍ୱିତ କରିଛନ୍ତି। ସେ ଉଲ୍ଲେଖ କରିଥିଲେ ଯେ ୭୫୨ଟି ପାଠାଗାର ଏବେ 'ଗ୍ରାମୀଣ ଜ୍ଞାନ ସେତୁ’ ଆପ୍ ସହିତ ସଂଯୁକ୍ତ ହୋଇଛି। ସେ ଗୁରୁତ୍ୱାରୋପ କରିଥିଲେ ଯେ ଅଧ୍ୟୟନ ବିନା ମୌଳିକ ଜ୍ଞାନ ହାସଲ କରିବା ଅସମ୍ଭବ, କୌଣସି ବିଷୟରେ ଦକ୍ଷତା ହାସଲ କରିବା କଥା ଛାଡ଼ନ୍ତୁ। ସେ ଆହୁରି ମଧ୍ୟ କହିଛନ୍ତି ଯେ ଯେତେବେଳେ ବ୍ୟକ୍ତିମାନେ ପିଲାଦିନରୁ କିଶୋରାବସ୍ଥାକୁ, ତା 'ପରେ ଯୁବାବସ୍ଥାକୁ ଏବଂ ଶେଷରେ ବୟସ୍କତାକୁ ପରିବର୍ତ୍ତନ କରନ୍ତି, ଅଧ୍ୟୟନ ଏବଂ ସେମାନଙ୍କର ବିଭିନ୍ନ ଦିଗ ବିଷୟରେ ଦକ୍ଷ ପୁସ୍ତକାଳୟମାନଙ୍କ ମାର୍ଗଦର୍ଶନ ପାଠାଗାରଗୁଡ଼ିକୁ ରାଷ୍ଟ୍ର ପାଇଁ ମୂଲ୍ୟବାନ ନାଗରିକ ଗଠନ କରିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବାରେ ସକ୍ଷମ କରିପାରିବ।

ଶ୍ରୀ ଅମିତ ଶାହ କହିଥିଲେ ଯେ ମନସାର ମହାତ୍ମା ଗାନ୍ଧୀ ପାଠାଗାରକୁ ଏହି ପାଠାଗାର ସମ୍ବନ୍ଧୀୟ ଯୋଜନା ସହିତ ଯୋଡ଼ାଯାଇଛି। ସେ ଉଲ୍ଲେଖ କରିଥିଲେ ଯେ ମହାତ୍ମା ଗାନ୍ଧୀ ପାଠାଗାରରେ ସେ ବିଭିନ୍ନ ବିଷୟରେ ମୌଳିକ ଜ୍ଞାନ ହାସଲ କରିଥିଲେ ଏବଂ ୧୬ ବର୍ଷ ମଧ୍ୟରେ କେତେକ ବିଷୟରେ ଗଭୀର ବୁଝାମଣା ହାସଲ କରିଥିଲେ। ମନସାରୁ ଅହମ୍ମଦାବାଦ ଯିବା ପରେ ସେ ଗୁଜରାଟ ବିଦ୍ୟାପୀଠ ପାଠାଗାର ସହିତ ଯୋଡ଼ି ହୋଇଥିଲେ। ସେ ଉଲ୍ଲେଖ କରିଥିଲେ ଯେ କାକାସାହେବ କାଲେଲକର ଗୁଜରାଟ ବିଦ୍ୟାପୀଠ ପାଠାଗାର ସୃଷ୍ଟି କରିଥିଲେ, ଯାହା ତାଙ୍କ ଭଳି ଅନେକ ଯୁବପିଢ଼ିଙ୍କ ପାଇଁ ଜ୍ଞାନର ସାଗରରେ ବୁଡିବା ପାଇଁ ଏକ ମାଧ୍ୟମ ଥିଲା। ପ୍ରତ୍ୟେକ ବିଷୟ ଉପରେ ସୂଚନା ସଂଗ୍ରହ କରିବାର ଆଗ୍ରହ ଏକ ଅଭ୍ୟାସରେ ପରିଣତ ହେଲା, ଯାହା ପରବର୍ତ୍ତୀ ସମୟରେ ଅଧ୍ୟୟନର ଅଭ୍ୟାସରେ ପରିଣତ ହେଲା । ସେ କହିଥିଲେ ଯେ ଏହି ଅଧ୍ୟୟନର ଅଭ୍ୟାସ ହିଁ ତାଙ୍କୁ ଏକ ନିର୍ଦ୍ଦିଷ୍ଟ କ୍ଷେତ୍ରରେ ଯୋଗଦାନ କରିବାରେ ସକ୍ଷମ କରିଥିଲା ଏବଂ ଏହି ପ୍ରକ୍ରିୟାରେ ପାଠାଗାର ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା।

ଗୃହମନ୍ତ୍ରୀ କହିଥିଲେ ଯେ ଏହି ପାଠାଗାର ଏବଂ ପୁସ୍ତକଗୁଡ଼ିକ ଏବେ 'ହବ୍-ଆଣ୍ଡ-ସ୍ପୋକ ’ ମଡେଲ ଜରିଆରେ ଯୁବକମାନଙ୍କ ପାଇଁ ଉପଲବ୍ଧ କରାଯାଇଛି। ଯଦିଓ ତାଙ୍କ ସମୟରେ ଏପରି ସୁବିଧା ନଥିଲା, ଏହି କାର୍ଯ୍ୟକ୍ରମ ଏବେ ବର୍ତ୍ତମାନର ପିଢ଼ି ପାଇଁ ବିଜ୍ଞାନଭିତ୍ତିକ ଭାବରେ ଉପଲବ୍ଧ । ସେ ତାଙ୍କର ଲକ୍ଷ୍ୟ ବ୍ୟକ୍ତ କରିଥିଲେ ଯେ ବିଭିନ୍ନ ଅନୁଷ୍ଠାନ ଯଥା-ସସ୍ତୁ ସାହିତ୍ୟ ମଣ୍ଡଳ, ଗୀତା ପ୍ରେସ୍, ଭୁପେନ୍ ହଜାରିକା ଇନଷ୍ଟିଚ୍ୟୁଟ୍ ଏବଂ ଥିରୁଭଲ୍ଲୁଭର୍ ଇନଷ୍ଟିଚ୍ୟୁଟ୍ ଗୁଜୁରାଟର ଗାନ୍ଧୀନଗର ଜିଲ୍ଲା ଏବଂ ରାଜ୍ୟ ସ୍ତରରେ ଥିବା ପାଠାଗାରଗୁଡ଼ିକ ସହିତ ଅନଲାଇନରେ ଯୋଡ଼ିହେବେ। ସେ ବିଶ୍ୱାସ ବ୍ୟକ୍ତ କରିଥିଲେ ଯେ ଜ୍ଞାନକୌଶଳର ଉପଯୋଗ ଦ୍ୱାରା ଛାତ୍ରଛାତ୍ରୀ ଏବଂ ପାଠକମାନଙ୍କ ପାଇଁ ଏହି ସୁବିଧା ଉପଲବ୍ଧ ହେବ।

ଶ୍ରୀ ଶାହ ଦେଶ ତଥା ରାଜ୍ୟର ଗୃହିଣୀମାନଙ୍କୁ ଅନୁରୋଧ କରିଛନ୍ତି ଯେ ସେମାନେ ବିଭିନ୍ନ ବିଷୟ ଉପରେ ଜ୍ଞାନ ଅର୍ଜନ କରି ଏବଂ ସେମାନଙ୍କ ପିଲାମାନଙ୍କୁ ଅଧ୍ୟୟନ ପାଇଁ ଉତ୍ସାହିତ କରି ସେମାନଙ୍କ ଖାଲି ସମୟର ଫଳପ୍ରଦ ଉପଯୋଗ କରନ୍ତୁ।

HS