نائب صدر جمہوریہ ہند جناب سی پی رادھا کرشنن نے آج انڈمان اور نکوبار جزائر میں سیلولر جیل کا دورہ کیا اور ہندوستان کی آزادی کے لیے بے پناہ مصائب برداشت کرنے والے آزادی پسندوں کو خراج عقیدت پیش کیا ۔ انہوں نے شہید کالم پر پھولوں کی چادر چڑھائی ، ویر ساورکر کے سیل پر خراج عقیدت پیش کیا اور سوتنتر جیوتی ، سنٹرل ٹاور ، گیلوز اور میوزیم اور نمائشی گیلری کا دورہ کیا ۔ انہوں نے لائٹ اینڈ ساؤنڈ شو بھی دیکھا جس میں جدوجہد آزادی کی بہادری کی داستان کو دکھایا گیا تھا ۔

دورے کے دوران خطاب کرتے ہوئے نائب صدر جمہوریہ نے ویر ساورکر کو ایک منفرد اور بے خوف انقلابی قرار دیا جن کی بھڑکتی ہوئی حب الوطنی نے نوجوان ہندوستانیوں کی نسلوں کو متاثر کیا ۔ ساورکر کی سیلولر جیل میں برسوں کی قید اور سخت سلوک کو یاد کرتے ہوئے ، انہوں نے کہا ، ’’آزادی پسندوں کو جیل بھیجنے کا مقصد ان کا حوصلہ پست کرنا تھا ؛ ساورکر جی کبھی مایوس نہیں ہوئے ۔ آخرکار برطانوی راج مایوس ہو گیا ۔‘‘ انہوں نے چھوت چھات اور سماجی امتیاز کے خلاف جنگ میں ساورکر کے تعاون پر بھی روشنی ڈالی ۔

جناب سی پی رادھا کرشنن نے اس بات پر زور دیا کہ ہندوستان کی زیادہ طاقتور بننے کی جستجو دوسروں کے لیے شرائط طے کرنا نہیں ہے ، بلکہ اس بات کو یقینی بنانا ہے کہ  ’’ہم کبھی بھی اس دنیا میں کسی کے حکم پر چلنا نہیں چاہتے ، یہی حقیقی آزادی ہے‘‘ ۔

آج اس سے قبل، جناب سی۔ پی۔ رادھا کرشنن جب آئی این ایس اتکروش، شری وجیا پورم پہنچے تو انڈمان و نکوبار جزائر کے لیفٹیننٹ گورنر، ایڈمرل دیویندر کمار جوشی (ریٹائرڈ)، نے سینئر حکام اور معزز شخصیات کے ہمراہ ان کا پرتپاک استقبال کیا۔ اس موقع پر انہیں باوقار گارڈ آف آنر بھی پیش کیا گیا۔

جناب سی پی رادھا کرشنن انڈمان اور نکوبار جزائر کے دو روزہ دورے پر ہیں ، جس کے دوران وہ ’ہر گھر ترنگا‘ کے آغاز سمیت مختلف پروگراموں میں شرکت کریں گے اور نیتا جی سبھاش چندر بوس جزیرے کا دورہ کریں گے ۔

۔۔۔۔

ش ح۔ا س۔ ت ح ۔                                              

U 1666–