કેન્દ્રીય પર્યાવરણ, વન અને આબોહવા પરિવર્તન મંત્રી શ્રી ભૂપેન્દ્ર યાદવે આજે અરુણાચલ પ્રદેશના ગ્લો લેક (Glaw Lake) ને ભારતની 101મી રામસર સાઇટ તરીકે જાહેર કરવાની જાહેરાત કરી હતી, જે રાજ્યને તેની પ્રથમ રામસર સાઇટ મળવાની એક નોંધપાત્ર સિદ્ધિ દર્શાવે છે. 'X' પર એક સોશિયલ મીડિયા પોસ્ટમાં, મંત્રીએ આ વિકાસને જૈવવિવિધતા સંરક્ષણ, પાણી અને આબોહવા સુરક્ષા તથા ટકાઉ આજીવિકા માટેનું એક મહત્વપૂર્ણ પગલું ગણાવ્યું હતું.

શ્રી યાદવે પ્રધાનમંત્રી શ્રી નરેન્દ્ર મોદીના નેતૃત્વ હેઠળ ભારતના રામસર નેટવર્કના નોંધપાત્ર વિસ્તરણ પર પ્રકાશ પાડ્યો હતો. તેમણે કહ્યું, "2014 માં 26 રામસર સાઇટ્સથી લઈને આજે 101 સુધી, આ નોંધપાત્ર સફર પર્યાવરણ સુરક્ષા, જૈવવિવિધતા સંરક્ષણ અને ટકાઉ વિકાસ પ્રત્યેની આપણી અચળ કટિબદ્ધતાને પ્રતિબિંબિત કરે છે." મંત્રીએ વધુમાં ભારપૂર્વક જણાવ્યું હતું કે દરેક નવી રામસર સાઇટ આ મહત્વપૂર્ણ નિવસનતંત્રો (ઇકોસિસ્ટમ્સ) પર નિર્ભર સમુદાયોના હિતોનું રક્ષણ કરવાની સાથે કુદરતનું જતન કરવાના ભારતના સંકલ્પને મજબૂત કરે છે.

આ સિદ્ધિની ઉજવણી કરતા મંત્રીએ જણાવ્યું હતું કે, "ભારત રામસર સાઇટ્સની નિયુક્તિમાં સદીથી આગળની પોતાની સફર ચાલુ રાખે છે." ગ્લો લેકના ઉમેરા સાથે, ભારતમાં રામસર સાઇટ્સની સંખ્યા 101 પર પહોંચી ગઈ છે, જે તેના અમૂલ્ય વેટલેન્ડ નિવસનતંત્રોનું જતન કરવા માટે દેશની સતત કટિબદ્ધતા દર્શાવે છે.

કામલાંગ ટાઇગર રિઝર્વ અને વાઇલ્ડલાઇફ સેન્ચ્યુરીમાં આવેલું ગ્લો લેક પૂર્વ હિમાલયમાં આવેલું એક પ્રાકૃતિક મીઠા પાણીનું સરોવર અને જૈવવિવિધતા ધરાવતું હોટસ્પોટ છે. આ સરોવર બારમાસી પર્વતીય ઝરણાઓથી ભરાય છે અને તે લીલીછમ વનસ્પતિઓથી ઘેરાયેલું છે, જે સમૃદ્ધ વનસ્પતિ વિવિધતાને ટેકો આપે છે. મંત્રીએ માહિતગાર કર્યા હતા કે આ વેટલેન્ડ સાઇટ અને તેના કેચમેન્ટ વિસ્તારમાં 150 થી વધુ વૃક્ષોની પ્રજાતિઓ અને 49 ઓર્કેડ પ્રજાતિઓ નોંધાઈ છે, જે ગ્લો લેક અને તેના આસપાસના લેન્ડસ્કેપના પર્યાવરણીય મહત્વને દર્શાવે છે.

SM/JD