Ka Kynhun Myntri jong ka Sorkar Pdeng ba la pyniaid da u Myntri Rangbah duh ka ri u Narendra Modi ka la mynjur ban bteng ia ka skhim Pradhan Mantri Kisan Samman Nidhi (PM-KISAN) naduh u snem 2026-27 haduh u snem 2030-31. La mynjur ia ka jingpynlut pisa baroh kan long T.3.15 lak klur na ka bynta kane ka Scheme ha kane ka samoi.

Ka jingmynjur ka pynskhem biang ia ka jingkular jong ka Sorkar ba ka roi ka par jong ki nongrep ka long ka nongrim jong ka roi ka par jong ka ri. Lyngba ka Skhim PM-KISAN la ai ka jingkyrshan ha ka kamai kajih kaba biang por bad kaba shai sha ki longiing jong ki nongrep kiba dei hok ban ioh lyngba ka Direct Benefit Transfer (DBT), kaba iarap ia ki nongrep ban kyntiew ia ka jingbei tyngka ha ka rep ka riang bad ban pynkhlain ia ka kamai kajih jong ki.

Ka PM-KISAN: Ka rukom treikam kaba jop jong ka bha ka miat jong ki nongrep kaba shai bad kaba la pyniaid da ka teknoloji

Ia ka skhim PM-KISAN la sdang ha u Rymphang 2018. Hapoh kane ka skhim, ki longiing jong ki nongrep kiba don la ka jong ka jaka ki ioh ia ka jingiarap pisa kaba T. 6,000 ha ka shi snem, kaba poi beit beit sha ka bank account jong ki ha ki lai bynta jong ka jingsiew. Lyngba ka jingpynshisha da u Aadhaar, ka jingpynshisha digital bad ka kam DBT kaba skhem, ka skhim ka la buh ia ka nuksa kaba khlain shaphang ka jingshai, ka jingtreikam bad ka jingbahkhlieh.

Ki jingjop ba kongsan jong ka skhim PM-KISAN:

• Ladep phah palat T.4.47 lak klur beit beit sha ki bank account jong ki nongrep lyngba 23 tylli ki jingpyllait jingsiew hapoh ka skhim.
• Hapoh ka jingpyllait jingsiew kaba 23, palat 9.49 klur ngut ki nongrep ki la ioh jingmyntoi haba la pyllait pisa palat T.18,984 klur.
• Ha ka por jong ka khlam COVID-19 la pyllait palat T.1.71 lak klur ban ai jingiarap pisa ia ki nongrep.
• Ki longkmie kiba dei ki nongrep ki la ioh palat T.1.06 lak klur hapoh ka PM-KISAN, bad jan iwei na man ki sw ngut kiba ioh jingmyntoi kidei ki longkmie nongrep.

Ka bynta kaba heh ha ka jingpynkhlain ia ka jingbei tyngka ha ka kam rep bad ka kamai kajih jong ki nongrep:

Ka jingai jingiarap hapoh ka PM-KISAN ka la plie lad ia ki nongrep ban bei tyngka ha ka por kaba biang na ka bynta ki symbai, ki sboh, ki jingai um, ki mashin rep bad kiwei kiwei ki jingdonkam ha ka kam rep. Kane ka la kyntiew ia ka lad jong ki nongrep ban pynmih mar, ka la pynduna ia ka jingshaniah jong ki ha ki jingshim ram bym pat pynskhem bad ka la pynkhlain ia ka jinglong jingman ha ka liang ka pisa tyngka jong ki longing ha ki jaka nongkyndong.

Ka jingktah kaba bha kaba la pynshisha da ki jingpeit ba laitluid:

Ia ka jingktah jong ka Skhim PM-KISAN la bishar bniah da ki jaka treikam bapher bapher kiba laitluid. Katkum ka jingbishar bniah ba la leh da ka Development Monitoring and Evaluation Office (DMEO) jong ka NITI Aayog.

• Palat 92% na ki nongïoh jingmyntoi ki la pynpaw ba ki pyndonkam ïa ka pisa jingïarap na ka bynta ki kam rep bad ka jingbei tyngka ha ka rep ka riang.
• Kumba 85% na ki nongïoh jingmyntoi ki pynthikna ïa ka jingkiew ha ka ïoh ka kot na ka rep ka riang bad ka jingduna ha ka jingshaniah ha ka ram bym pat pynskhem.

Ha ka samoi 2020-21 haduh 2025-26, ka jingpynmih ia ki mar rep ka la kiew bha. Ha kane ka por, ka jaka ba la rep ka la kiew kumba 9.65%, ka jingseisoh kumba 10.53%, bad ka jingmih ki mar bam baroh kumba 21.18%, kaba pyni ia ka jingkyrshan ba pura ba la ai sha ki nongrep hapoh ka PM-KISAN bad ka jinglah ban rep kaba nangroi.

Ki jingai jingmyntoi beit beit ia ki nongrep lyngba ka Digital India

Ka Skhim PM-KISAN kadei ka nuksa kaba bha eh jong ka jingpyndonkam hok ia ka Digital India. Lyngba ka jingpynshisha kaba pynshong nongrim ha u Aadhaar, ka jingpynshisha lyngba ki lad digital bad ka rukom treikam jong ka DBT, la pynpoi beit beit ia ka jingiarap pisa sha ki nongrep. Ka Scheme kam dei tang ban ai jingiarap pisa; ka pynkhlain ruh ia ka jingsngew shngain jong ki nongrep, ka jinglah ban shaniah halade bad ka jinglah ban bei tyngka ha ka rep ka riang.

Ka sienjam ba kongsan na ka bynta ka Atmanirbhar Bharat bad ki nongrep kiba riewspah:

Ka jingbteng ban pyniar ia ka Skhim PM-KISAN kan kyntiew ia ka bor jong ki nongrep ban bei tyngka ha ka rep ka riang, kan kyntiew ia ka jingseisoh, kan iarap ban pynduna ia ki jingma ha ka rep ka riang bad kan pynkhlain ia ka ioh ka kot ha ki jaka nongkyndong.

Ka Skhim PM-KISAN ka dei ka nongrim ba kongsan jong ki polisi treikam jong ka Sorkar kiba pynshong nongrim ha ki nongrep. Kane ka Skhim ka long ban ai bor ïa ki klur ngut ki nongpynmih marbam jong ka ri, da kaba pynkhlaiñ ïa ka bynta jong ki ha ka jingïaid lynti jong ka India sha ka Viksit Bharat.

****