લોકસભા અધ્યક્ષ શ્રી ઓમ બિરલાએ આજે પૂર્વ લોકસભા અધ્યક્ષ શ્રી સોમનાથ ચેટર્જીની જન્મજયંતી પર સંવિધાન સદનના સેન્ટ્રલ હોલમાં તેમને પુષ્પાંજલિ અર્પણ કરી હતી.

સંસદસભ્યો, પૂર્વ સંસદસભ્યો અને અન્ય મહાનુભાવોએ પણ આ અવસરે સંવિધાન સદનના સેન્ટ્રલ હોલમાં શ્રી સોમનાથ ચેટર્જીને પુષ્પાંજલિ અર્પણ કરી હતી.

લોકસભાના મહાસચિવ શ્રી ઉત્સવ કુમાર સિંહે પણ શ્રી ચેટર્જીને શ્રદ્ધાંજલિ અર્પણ કરી હતી.

શ્રી સોમનાથ ચેટર્જીનો જન્મ 25 જુલાઈ 1929 ના રોજ આસામના તેઝપુરમાં થયો હતો. વ્યવસાયે એક પ્રતિષ્ઠિત વકીલ, તેમણે 1968માં સક્રિય રાજકારણમાં પ્રવેશ કર્યો અને 1971માં પ્રથમ વખત લોકસભામાં ચૂંટાયા. એક અસાધારણ સંસદીય કારકિર્દી દરમિયાન, તેમણે સંસદસભ્ય તરીકે સતત દસ ટર્મ સેવા આપી. 4 જૂન 2004ના રોજ, શ્રી ચેટર્જી સર્વસંમતિથી 14મી લોકસભાના અધ્યક્ષ તરીકે ચૂંટાયા હતા, આ પદ પર તેઓ 31 મે 2009 સુધી ખૂબ જ ગૌરવ સાથે રહ્યા હતા.

તેમની બુદ્ધિમત્તા, વક્તૃત્વ અને સંસદીય મૂલ્યો પ્રત્યેની ઊંડી નિષ્ઠા માટે જાણીતા, શ્રી ચેટર્જીએ ગૃહમાં ચર્ચાઓની ગુણવત્તા સુધારવામાં નિર્ણાયક ભૂમિકા ભજવી હતી. ભારતીય સંસદીય પ્રણાલીમાં તેમના ઉત્કૃષ્ટ યોગદાનની માન્યતા રૂપે, તેમને 1996માં ઉત્કૃષ્ટ સંસદસભ્ય પુરસ્કારથી નવાજવામાં આવ્યા હતા.

અધ્યક્ષ તરીકેના તેમના કાર્યકાળ દરમિયાન, તેમણે સંસદીય કામગીરીને આધુનિક બનાવવા માટે ઘણી મુખ્ય પહેલોની શરૂઆત કરી હતી. નોંધનીય છે કે, તેમણે જુલાઈ 2006માં 24-કલાકની સંસદીય ચેનલ લોકસભા ટેલિવિઝન (LSTV)ના પ્રારંભનું નિરીક્ષણ કર્યું હતું અને ઓગસ્ટ 2006માં હાઇ-ટેક પાર્લામેન્ટરી મ્યુઝિયમનું ઉદ્ઘાટન કર્યું હતું.

સંવિધાન સદનમાં ભૂતપૂર્વ લોકસભા ચેમ્બરની બહારની લોબીમાં શ્રી સોમનાથ ચેટર્જીનું એક તૈલચિત્ર સુશોભિત છે. તે શ્રી મનીષ કુમાર રાવ દ્વારા દોરવામાં આવ્યું હતું અને 10.02.2014ના રોજ ભારતના તત્કાલીન રાષ્ટ્રપતિ શ્રી પ્રણવ મુખર્જી દ્વારા તેનું અનાવરણ કરવામાં આવ્યું હતું.

IJ/DK/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com