భారత 2026 బ్రిక్స్ అధ్యక్షతలో భాగంగా, జూలై 22 నుంచి  24 వరకు చండీగఢ్‌లో 16వ బ్రిక్స్ ఆరోగ్య మంత్రుల సమావేశాన్ని నిర్వహించేందుకు ఏర్పాట్లు పూర్తయ్యాయి. ఆరోగ్య భద్రత, డిజిటల్ హెల్త్, మహమ్మారులను ఎదుర్కొనే సన్నద్ధత, మెరుగైన వైద్య సంరక్షణను అందరికీ సమానంగా అందుబాటులోకి తెచ్చే అంశాలపై సహకారాన్ని మరింత బలోపేతం చేసేందుకు బ్రిక్స్ సభ్యదేశాల ఆరోగ్య మంత్రులు, సీనియర్ ఆరోగ్య అధికారులు ఈ సమావేశంలో పాల్గొననున్నారు.

కేంద్ర ఆరోగ్య, కుటుంబ సంక్షేమ మంత్రిత్వ శాఖ కార్యదర్శి శ్రీమతి పుణ్య సలిల శ్రీవాస్తవ, ఆయుష్ మంత్రిత్వ శాఖ కార్యదర్శి శ్రీ వైద్య రాజేష్ కోటేచా ఈ రోజు చండీగఢ్‌లో జరిగిన విలేకరుల సమావేశంలో 16వ బ్రిక్స్ ఆరోగ్య మంత్రుల సమావేశం ఏర్పాట్లు, అజెండా ఆశిస్తున్న ఫలితాల గురించి వివరించారు.

ప్రతికూల పరిస్థితుల ప్రతిఘటనా సామర్థ్యం, ఆవిష్కరణలు, సహకారం, సుస్థిరత సూత్రాల ఆధారంగా కీలకమైన ప్రపంచ ఆరోగ్య ప్రాధాన్యతలపై ఉమ్మడి కార్యాచరణను ముందుకు తీసుకువెళ్లేందుకు 2026 బ్రిక్స్ అధ్యక్షతన భారత్ నిబద్ధతకు ఈ సమావేశం నిదర్శనమని కేంద్ర ఆరోగ్య శాఖ కార్యదర్శి అన్నారు. ఆరోగ్య భద్రత, మహమ్మారులను ఎదుర్కొనే సంసిద్ధత, డిజిటల్ హెల్త్, ఆవిష్కరణలు, నాణ్యమైన మందులు చౌకగా లభ్యమయ్యేలా చూడటం, సాంప్రదాయ, అనుబంధ, సమగ్ర వైద్య విధానాలు, క్షయ వ్యాధి నివారణ, ఆరోగ్యకరమైన జీవనశైలి, మానసిక ఆరోగ్యం,  పటిష్టమైన ఆరోగ్య వ్యవస్థల నిర్మాణం వంటి కీలక అంశాలపై ఈ సమావేశంలో ప్రధానంగా చర్చిస్తారని ఆమె చెప్పారు. అందరికీ ఆరోగ్య సంరక్షణ  అందించడంతో పాటు బ్రిక్స్ దేశాలవ్యాప్తంగా ఆరోగ్య ప్రమాణాలను మెరుగుపరచడమే లక్ష్యంగా ఈ కార్యాచరణ కొనసాగుతుందని వివరించారు. బ్రిక్స్ దేశాల మధ్య సహకారం, విజ్ఞాన మార్పిడిని మరింత పెంచడం ద్వారా అభివృద్ధి చెందుతున్న, పేద దేశాల ఆరోగ్య ప్రాధాన్యతలకు ప్రాధాన్యమిచ్చి ముందుకు తీసుకెళ్ళడానికి ఈ సమావేశం ఒక ముఖ్యమైన వేదికగా నిలుస్తుందని కూడా ఆమె పేర్కొన్నారు.

గతంలో 2012, 2016, 2021 తరువాత భారత్ నాలుగో సారి బ్రిక్స్ అధ్యక్ష బాధ్యతలు చేపట్టింది. . సామర్థ్యం, ఆవిష్కరణ, సహకారం, సుస్థిరత సూత్రాల ఆధారంగా భారత్‌, తన బ్రిక్స్‌ కార్యాచరణలో ఆరోగ్య రంగ సహకారాన్ని కీలక అంశాల్లో ఒకటిగా చేర్చింది. ప్రజాకేంద్రిత, సమ్మిళిత ప్రపంచ ఆరోగ్య వ్యవస్థ నిర్మాణానికి భారత్ కట్టుబాటును ఈ నిర్ణయం ప్రతిబింబిస్తోంది.

ఈ సమావేశం సందర్భంగా పదకొండు బ్రిక్స్ సభ్యదేశాలైన బ్రెజిల్, రష్యా, ఇండియా, చైనా, దక్షిణాఫ్రికా, ఈజిప్ట్, ఇథియోపియా, ఇరాన్, సౌదీ అరేబియా, యునైటెడ్ అరబ్ ఎమిరేట్స్, ఇండోనేషియా నుంచి ఆరోగ్య శాఖ మంత్రులు, సీనియర్ ప్రభుత్వ అధికారులు, సాంకేతిక నిపుణులు ఒకే వేదికపైకి రానున్నారు. ఈ దేశాలన్నీ కలిసి ప్రపంచ జనాభాలో దాదాపు సగం మందికీ, ప్రపంచ స్థూల జాతీయోత్పత్తిలో సుమారు 40 శాతానికీ ప్రాతినిధ్యం వహిస్తున్నాయి. ఇది అంతర్జాతీయ ఆరోగ్య రంగంలో సహకారాన్ని పెంపొందించడంలో పెరుగుతున్న బ్రిక్స్ పాత్రను స్పష్టంగా సూచిస్తోంది.

అధికారిక కార్యక్రమం జూలై 22న జరిగే సీనియర్ అధికారుల సమావేశంతో ప్రారంభమవుతుంది. ఈ సమావేశంలో సీనియర్ ఆరోగ్య అధికారులు ‘బ్రిక్స్ ఆరోగ్య సంభాషణ‘  కింద ప్రాధాన్యతా రంగాలపై సుదీర్ఘంగా చర్చించి, ఆరోగ్య శాఖ మంత్రుల డిక్లరేషన్ ముసాయిదాను ఖరారు చేస్తారు.

జూలై 23న 16వ బ్రిక్స్ ఆరోగ్య మంత్రుల సమావేశం జరగనుంది. కేంద్ర ఆరోగ్య, కుటుంబ సంక్షేమ శాఖ మంత్రి శ్రీ జగత్ ప్రకాష్ నడ్డా అధ్యక్షతన జరిగే ఈ సమావేశంలోసభ్యదేశాల ఆరోగ్య శాఖ మంత్రులు అంతర్జాతీయ, ప్రాంతీయ ప్రజారోగ్య ప్రాధాన్యతలపై సమగ్రంగా చర్చించి, 16వ బ్రిక్స్ ఆరోగ్య మంత్రుల డిక్లరేషన్ ఆమోదిస్తారు. 

జూలై 24న "బ్రిక్స్ సంభాషణ: డిజిటల్ ఆరోగ్య రికార్డుల నుంచి ఏఐ ఆధారిత వైద్య సంరక్షణ వరకు - పరస్పరం అనుసంధానించదగిన డేటా మౌలిక వసతులు,  బాధ్యతాయుతమైన ఏఐ ద్వారా నిరంతర ఆరోగ్య సంరక్షణను బలోపేతం చేయడం" అనే అంశంపై ఉన్నత స్థాయి ప్రత్యేక చర్చా కార్యక్రమాన్ని నిర్వహిస్తారు. బ్రిక్స్ వ్యాప్తంగా నిరంతర వైద్య సంరక్షణను పటిష్టం చేయడానికీ, భవిష్యత్తు సవాళ్లను ఎదుర్కొనే సమర్థవంతమైన ఆరోగ్య వ్యవస్థలను నిర్మించడానికీ పరస్పరం అనుసంధానించదగిన డిజిటల్ హెల్త్ మౌలిక సదుపాయాలు, బాధ్యతాయుతమైన ఏఐలను సమర్థవంతంగా వినియోగించుకోవడంపై ఈ కార్యక్రమం ప్రధానంగా దృష్టి సారిస్తుంది.

బ్రిక్స్ గత అధ్యక్షతల కాలంలో చేపట్టిన పనులను మరింత ముందుకు తీసుకెళ్తూ, పాత ప్రాధాన్యతలను కొనసాగించడంతో పాటు ఆరోగ్యకరమైన జీవనశైలి కోసం బ్రిక్స్ మిషన్,  మానసిక ఆరోగ్య వికాసాన్ని ప్రోత్సహించే రెండు కొత్త ప్రాధాన్యతా రంగాలను ప్రవేశపెట్టడం ద్వారా నివారణ,  ఆరోగ్య అభివృద్ధి వైద్య విధానాలపై తనక పటిష్టమైన కట్టుబాటును భారత్ పునరుద్ఘాటించింది.

బ్రిక్స్ అధ్యక్షత 2026 కింద భారత్  తన ఆరోగ్య విభాగాన్ని ఈ క్రింది తొమ్మిది ప్రాధాన్యత రంగాల ప్రాతిపదికన రూపొందించింది.

1. బ్రిక్స్ క్షయ పరిశోధనా వ్యవస్థ

2. బ్రిక్స్ వైద్య ఉత్పత్తుల నియంత్రణ సంస్థల మధ్య సహకారం

3. సామూహిక అంటువ్యాధులనివారణ ప్రతిస్పందన కోసం బ్రిక్స్ సమగ్ర ముందస్తు హెచ్చరిక వ్యవస్థ 

4. ఆరోగ్య సంరక్షణ, మారుమూల ప్రాంతాలకు వైద్య సేవలను అందించడంతో సహా డిజిటల్ హెల్త్ వ్యవస్థ 

5. ఆరోగ్యకరమైన జీవనశైలి కోసం బ్రిక్స్ మిషన్

6. మానసిక ఆరోగ్య శ్రేయస్సును ప్రోత్సహించడం

7. సాంప్రదాయ, అనుబంధ, సమగ్ర వైద్య పద్ధతులు 

8. సామాజిక పరిస్థితుల వల్ల వచ్చే వ్యాధులపై పోరాటం 

9. బ్రిక్స్ జాతీయ ప్రజారోగ్య సంస్థల వ్యవస్థ 

ఈ ప్రాధాన్య అంశాలు బ్రిక్స్‌ దేశాల ఉమ్మడి సంకల్పాన్ని ప్రతిబింబిస్తున్నాయి. సుస్థిర ఆరోగ్య వ్యవస్థల బలోపేతం, ఆరోగ్య రంగంలో ఆవిష్కరణలకు ప్రోత్సాహం, మహమ్మారుల సంసిద్ధతను పెంపొందించడం, అంటువ్యాధులు, ఇతర వ్యాధులను సమర్థంగా ఎదుర్కోవడం, నాణ్యమైన ఆరోగ్య సేవలను అందరికీ సమానంగా అందుబాటులోకి తీసుకురావడం, సార్వత్రిక ఆరోగ్య సేవల  లక్ష్య సాధనను వేగవంతం చేయడం వంటి అంశాల పట్ల బ్రిక్స్‌ దేశాల ఉమ్మడి నిబద్ధతను ఇవి చాటుతున్నాయి.

2026 ఏప్రిల్‌ 15 నుంచి భారత్‌ ఈ ప్రాధాన్య రంగాలకు సంబంధించిన 26 సాంకేతిక సమావేశాలు, నిపుణుల సంప్రదింపులను నిర్వహించింది. బ్రిక్స్‌ సభ్య దేశాల నిపుణులను ఒకే వేదికపైకి తీసుకువచ్చి, ఆరోగ్య రంగంలోని కీలక అంశాలపై ఏకాభిప్రాయం ఏర్పడేలా కృషి చేసింది.

16వ బ్రిక్స్‌ ఆరోగ్య మంత్రుల సమావేశం ఆరోగ్య భద్రత, మహమ్మారులను ఎదుర్కొనే సంసిద్ధత, డిజిటల్‌ ఆరోగ్యం, ఆరోగ్య రంగంలో ఆవిష్కరణలు, అందుబాటు ధరల్లో ఔషధాల లభ్యత, సుస్థిర ఆరోగ్య వ్యవస్థల బలోపేతం వంటి అంశాల్లో బ్రిక్స్‌ దేశాల మధ్య సహకారాన్ని మరింత బలోపేతం చేయనుంది. అభివృద్ధి చెందుతున్న ఆరోగ్య ప్రాధాన్యాలకు ఊతమివ్వడంతో పాటు, సార్వత్రిక ఆరోగ్య సేవల లక్ష్య సాధన, ఆరోగ్యానికి సంబంధించిన సుస్థిర అభివృద్ధి లక్ష్యాల సాధన కోసం ఉమ్మడి కార్యాచరణను ముందుకు తీసుకెళ్లేందుకు ఈ సమావేశం ఓ కీలక వేదికగా నిలవనుంది.

***