કેન્દ્રશાસિત પ્રદેશ દાદરા અને નગર હવેલી અને દમણ અને દીવ માટે એક ઐતિહાસિક ક્ષણમાં, કેન્દ્રીય નાગરિક ઉડ્ડયન મંત્રી શ્રી રામ મોહન નાયડુ કિંજારાપુએ, દાદરા અને નગર હવેલી અને દમણ અને દીવના પ્રશાસક શ્રી પ્રફુલ પટેલ સાથે મળીને 16 જુલાઈ, 2026ના રોજ દમણના નવનિર્મિત કાર્યરત નમો (NAMO) એરપોર્ટથી દમણ-દિલ્હી-દમણ રૂટ પર ઉદ્ઘાટન ફ્લાઇટને લીલી ઝંડી બતાવી પ્રસ્થાન કરાવ્યું હતું. સરકારી માલિકીની પ્રાદેશિક વિમાન સેવા એલાયન્સ એરે આ ફ્લાઇટ શરૂ કરી છે, જે દમણના પ્રથમ સીધા હવાઈ સંપર્કને ચિહ્નિત કરે છે.

પ્રધાનમંત્રી શ્રી નરેન્દ્ર મોદી દ્વારા પરિકલ્પિત દમણ એરપોર્ટ એ ભારતીય કોસ્ટ ગાર્ડ એર સ્ટેશન (ICGAS), દમણથી કાર્યરત એક દ્વિ-હેતુક સુવિધા છે. સિવિલ ટર્મિનલનો શિલાન્યાસ પ્રધાનમંત્રી દ્વારા 25 એપ્રિલ 2023ના રોજ કરવામાં આવ્યો હતો અને એરપોર્ટનું ઉદ્ઘાટન પ્રધાનમંત્રી દ્વારા 5 જૂન 2026ના રોજ કરવામાં આવ્યું હતું.

કેન્દ્રશાસિત પ્રદેશ પ્રશાસન દ્વારા 25 એકરની જગ્યા પર ₹124 કરોડના ખર્ચે વિકસાવવામાં આવેલ, જેમાં નાગરિક ઉડ્ડયન મંત્રાલયે આ પ્રોજેક્ટ માટે ₹88 કરોડની ભરપાઈ કરી છે, આ ટર્મિનલ 3,700 ચોરસ મીટરમાં ફેલાયેલું છે અને તે હાલમાં દરરોજ 14 ATR ફ્લાઇટ્સનું સંચાલન કરી શકે છે, જે વાર્ષિક 3.67 લાખ મુસાફરોની ક્ષમતા ધરાવે છે.

ફ્લાઇટ કામગીરીની શરૂઆતના આ કાર્યક્રમમાં કેન્દ્રશાસિત પ્રદેશ પ્રશાસન, એરપોર્ટ ઓથોરિટી ઓફ ઈન્ડિયા (AAI), એલાયન્સ એર અને ભારતીય કોસ્ટ ગાર્ડના વરિષ્ઠ અધિકારીઓ તેમજ દમણના સ્થાનિક રહીશો ઉપસ્થિત રહ્યા હતા.

આ અવસર પર શ્રી રામ મોહન નાયડુએ જણાવ્યું હતું કે, "આ ઐતિહાસિક અવસરે  હું દમણના લોકોને હાર્દિક શુભકામનાઓ પાઠવું છું. તેની પ્રથમ ફ્લાઇટ સાથે જ દમણ સીધું રાષ્ટ્રીય રાજધાની સાથે જોડાઈ રહ્યું છે. હવે સુરત અથવા મુંબઈ થઈને જવા અને 8 થી 10 કલાક વિતાવવાને બદલે દિલ્હી દમણથી માત્ર 2.5 કલાક દૂર રહેશે. પ્રધાનમંત્રી શ્રી નરેન્દ્ર મોદીની પરિવર્તનકારી ઉડાન (UDAN) યોજનાને કારણે જ આ શક્ય બન્યું છે."

મંત્રીશ્રીએ ઉમેર્યું હતું કે છેલ્લાં 12 વર્ષોમાં, પ્રધાનમંત્રીના નેતૃત્વ હેઠળ, દાદરા અને નગર હવેલી અને દમણ અને દીવને ₹13,000 કરોડથી વધુના 450થી વધુ પ્રોજેક્ટ્સનો લાભ મળ્યો છે, આથી જ દમણના લોકોએ પ્રધાનમંત્રીની દીર્ઘદ્રષ્ટિ પ્રત્યે આદરના પ્રતીક રૂપે અને દમણની લાંબા સમયની માંગને પૂર્ણ કરવા બદલ તેમના નવા એરપોર્ટનું નામ 'નમો (NAMO) એરપોર્ટ' રાખ્યું છે.

આ પ્રદેશ દમણ, દીવ અને દાદરા અને નગર હવેલીમાં 7,000થી વધુ ઉદ્યોગોનું ઘર છે, અને પાડોશી વાપી અને વલસાડમાં વધુ 15,000થી વધુ ઉદ્યોગો કાર્યરત છે. સુધરેલી હવાઈ કનેક્ટિવિટીથી વેપારને વેગ મળશે, રોકાણ આકર્ષિત થશે અને પ્રદેશના યુવાનો માટે રોજગારીની નવી તકો ઊભી થશે.

આ પ્રદેશની પ્રવાસન સંભાવનાઓ પર પ્રકાશ પાડતા મંત્રીશ્રીએ જણાવ્યું હતું કે દર વર્ષે લગભગ 20 લાખ પ્રવાસીઓ દમણની મુલાકાત લે છે અને પ્રવાસીઓ દમણને એવિએશન મેપ  પર મેળવશે તેમ આ સંખ્યા ઝડપથી વધશે. અને અમારો વિચાર રન-વેના વિસ્તરણ દ્વારા દમણમાં એરબસ A320-પ્રકારના વિમાનો સહિત મોટા વિમાનોના લેન્ડિંગને સક્ષમ કરવાનો અને મુંબઈ, સુરત, અમદાવાદ, પટના જેવા શહેરો સાથે કનેક્ટિવિટી વધારવાનો છે.

દીવ એરપોર્ટનું ઉદાહરણ આપતાં મંત્રીશ્રીએ જણાવ્યું હતું કે, ત્યાં વાર્ષિક મુસાફરોની અવરજવર 2013માં માત્ર 19,000 હતી જે વધીને આજે એક લાખથી વધુ થઈ ગઈ છે. તેમણે જણાવ્યું હતું કે મંત્રાલય વધતી જતી માંગને પહોંચી વળવા માટે દીવ એરપોર્ટ પર નવું ટર્મિનલ અને વધારાનો મોટો રન-વે વિકસાવવા માટે કામ કરી રહ્યું છે.

દમણ એરપોર્ટના મહત્વ વિશે વધુ વાત કરતા શ્રી રામ મોહન નાયડુએ જણાવ્યું હતું કે, "પીએમ સરે દમણની બ્લુ ઈકોનોમીને વાદળી આકાશની અપાર સંભાવનાઓ સાથે જોડી દીધી છે. દમણની મત્સ્યઉદ્યોગ, દરિયાઈ પેદાશો અને ફૂડ પ્રોસેસિંગની વસ્તુઓ હવે થોડા જ કલાકોમાં દેશના ખૂણે-ખૂણે પહોંચી શકશે." તેમણે જણાવ્યું હતું કે તેનાથી માછીમાર સમુદાયને ફાયદો થશે, દરિયાઈ ખેડૂતો માટે નવા બજારો ખુલશે અને અહીંના ફાર્મા ઉદ્યોગને પણ નવી ગતિ મળશે.

મંત્રીશ્રીએ પરિવર્તનકારી ઉડાન (UDAN) યોજનાને વધુ 10 વર્ષના સમયગાળા માટે લંબાવવા પર પણ પ્રકાશ પાડ્યો હતો. સુધારેલી ઉડાન યોજના હેઠળ, દેશભરમાં 100 નવા એરપોર્ટ અને 200 નવા હેલિપેડ વિકસાવવા માટે આગામી 10 વર્ષમાં ₹29,000 કરોડની અભૂતપૂર્વ જોગવાઈ કરવામાં આવી છે, જે ભારતના પ્રાદેશિક ઉડ્ડયન નેટવર્કને વધુ મજબૂત બનાવશે.

શ્રી રામ મોહન નાયડુએ નમો (NAMO) એરપોર્ટ પ્રોજેક્ટને સાકાર કરવામાં ભારતીય કોસ્ટ ગાર્ડના નોંધપાત્ર યોગદાન બદલ તેમનો વિશેષ આભાર માનીને અને આ ઐતિહાસિક પ્રસંગે દમણના લોકોને હાર્દિક અભિનંદન પાઠવીને પોતાનું સંબોધન પૂર્ણ કર્યું હતું.

આ પ્રસંગે દાદરા અને નગર હવેલી અને દમણ અને દીવના પ્રશાસક શ્રી પ્રફુલ પટેલે જણાવ્યું હતું કે, "નમો (NAMO) એરપોર્ટ ગુજરાતના વલસાડથી લઈને મહારાષ્ટ્રના પાલઘર સુધીના સમગ્ર ઔદ્યોગિક શ્રમિક પટ્ટા માટે ગેમ-ચેન્જર સાબિત થશે, જે આ પ્રદેશના યુવાનો માટે નવી તકો ખોલશે. મને ખાતરી છે કે આગામી 15 વર્ષમાં, આપણે નમો (NAMO) એરપોર્ટ, દમણનો અનેક ગણો વિસ્તાર થતો જોઈશું, જે આ પ્રદેશની અર્થવ્યવસ્થા માટે ગેમ-ચેન્જર તરીકે ઉભરી આવશે."

દમણના નમો (NAMO) એરપોર્ટ પરથી ફ્લાઇટ કામગીરીની શરૂઆત, હવાઈ મુસાફરીને લોકશાહીકરણ કરવા અને નાના શહેરોને વિકસતા ઉડ્ડયન નેટવર્કમાં સાંકળવાની સરકારની વિઝનની દિશામાં વધુ એક મહત્વપૂર્ણ સીમાચિહ્નરૂપ છે.

IJ/DK/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com