ભારતના ઉપરાષ્ટ્રપતિ શ્રી સી. પી. રાધાકૃષ્ણને આજે હિમાચલ પ્રદેશના શિમલા સ્થિત રાષ્ટ્રપતિ નિવાસ ખાતે ઇન્ડિયન ઇન્સ્ટિટ્યૂટ ઓફ એડવાન્સ્ડ સ્ટડી (IIAS) દ્વારા આયોજિત વંદે માતરમ પર કાયમી પ્રદર્શન અને સરદાર પટેલના એકતા, એકીકરણ અને સંઘવાદના વિઝન પર ત્રણ દિવસીય આંતરરાષ્ટ્રીય સેમિનારના ઉદ્ઘાટન પ્રસંગે વર્ચ્યુઅલી સંબોધન કર્યું હતું.

ઉપરાષ્ટ્રપતિએ જણાવ્યું હતું કે રાષ્ટ્ર બે ઐતિહાસિક સીમાચિહ્નો - રાષ્ટ્રીય ગીત વંદે માતરમની 150મી વર્ષગાંઠ અને સરદાર વલ્લભભાઈ પટેલની 150મી જન્મજયંતિની ઉજવણી કરી રહ્યું છે. તેમણે ટિપ્પણી કરી હતી કે આવા પ્રસંગો માત્ર ઇતિહાસને યાદ રાખવાની જ નહીં પરંતુ તેના આત્મા સાથે પુનઃજોડાણ કરવાની તક પૂરી પાડે છે, જ્યારે રાષ્ટ્રીય આત્મનિરીક્ષણ અને ઉજવણીને પ્રેરણા આપે છે.

ઇન્ડિયન ઇન્સ્ટિટ્યૂટ ઓફ એડવાન્સ્ડ સ્ટડીને છ દાયકાથી સર્વોચ્ચ કક્ષાની વિદ્વત્તાને પોષનારી સંસ્થા તરીકે ગણાવતા, ઉપરાષ્ટ્રપતિએ કાયમી પ્રદર્શન અને આંતરરાષ્ટ્રીય સેમિનારના આયોજન બદલ સંસ્થાની પ્રશંસા કરી હતી.

ઉપરાષ્ટ્રપતિએ અવલોકન કર્યું કે જ્યારે નવીનતાઓ રાષ્ટ્રને સમૃદ્ધ બનાવી શકે છે, ત્યારે તે વિચારો જ છે જે રાષ્ટ્રને ખરેખર મહાન બનાવે છે. ભારતના સ્વતંત્રતા સંગ્રામ દરમિયાન વંદે માતરમની ભૂમિકાને યાદ કરતા તેમણે જણાવ્યું હતું કે આ રાષ્ટ્રીય ગીતે સ્વતંત્ર ભારતના સહિયારા સ્વપ્ન દ્વારા વિવિધ પ્રદેશો, ભાષાઓ, ધર્મો અને સામાજિક પૃષ્ઠભૂમિના લોકોને એક કર્યા હતા. તેમણે નોંધ્યું હતું કે અસંખ્ય સ્વાતંત્ર્ય સેનાનીઓ માટે, વંદે માતરમ સાહસ, બલિદાન અને આશાનો સ્ત્રોત બન્યું હતું, જેણે માતૃભૂમિ પ્રત્યેના પ્રેમને એક પવિત્ર રાષ્ટ્રીય કર્તવ્યમાં પરિવર્તિત કર્યો હતો.

તમિલનાડુના ઉદાહરણો શેર કરતાં, ઉપરાષ્ટ્રપતિએ વી.ઓ. ચિદમ્બરમ પિલ્લઈ, તિરુપુર કુમારન, વંચીનાથન અને મહાકવિ સુબ્રમણ્યમ ભારતી જેવા સ્વતંત્રતા સેનાનીઓના યોગદાન પર પ્રકાશ પાડ્યો, જેમણે વંદે માતરમની ભાવનાથી પ્રેરણા લીધી હતી. તેમણે ટિપ્પણી કરી કે દેશભક્તિ સંઘર્ષની ક્ષણો સુધી મર્યાદિત ન રહેવી જોઈએ પરંતુ આચરણમાં પ્રામાણિકતા, કાર્યમાં શ્રેષ્ઠતા અને હેતુની એકતા દ્વારા દરરોજ અભિવ્યક્તિ મેળવવી જોઈએ. તેમણે વિશ્વાસ વ્યક્ત કર્યો કે કાયમી પ્રદર્શન આવનારી પેઢીઓને, ખાસ કરીને યુવાનોને પ્રેરણા આપશે.

સરદાર વલ્લભભાઈ પટેલને શ્રદ્ધાંજલિ અર્પણ કરતા ઉપરાષ્ટ્રપતિએ જણાવ્યું હતું કે વંદે માતરમે રાષ્ટ્રના જન્મને પ્રેરણા આપી હતી, જ્યારે સરદાર પટેલે સેંકડો રજવાડાઓને એક અખંડ પ્રજાસત્તાકમાં પરિવર્તિત કર્યા હતા. તેમણે નોંધ્યું હતું કે સરદાર પટેલે માત્ર પ્રદેશોનું એકીકરણ જ નહોતું કર્યું પરંતુ હૃદયોને પણ જોડ્યા હતા, અને એક રાષ્ટ્ર, એક બંધારણ તથા એક સમાન ભાગ્યનો પાયો નાખ્યો હતો.

ઉપરાષ્ટ્રપતિએ વિશ્વાસ વ્યક્ત કર્યો હતો કે આગામી ત્રણ દિવસ દરમિયાનની ચર્ચાઓ અર્થપૂર્ણ આંતરદૃષ્ટિ ઉત્પન્ન કરશે અને રાષ્ટ્રનિર્માણ માટે સરદાર પટેલના સ્થાયી વિઝનની ઊંડી સમજણમાં યોગદાન આપશે.

પોતાના સમાપન સંબોધનમાં, ઉપરાષ્ટ્રપતિએ નાગરિકોને એક સંયુક્ત, આત્મવિશ્વાસુ અને સમાવેશી ભારત પ્રત્યેની તેમની પ્રતિબદ્ધતાને નવીકરણ કરીને વંદે માતરમના શાશ્વત સંદેશ અને સરદાર વલ્લભભાઈ પટેલના સ્થાયી વારસાને આગળ ધપાવવાનો આગ્રહ કર્યો હતો.

SM/BS/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com