પ્રધાનમંત્રી શ્રી નરેન્દ્ર મોદી અને ઓસ્ટ્રેલિયાના માનનીય પ્રધાનમંત્રી શ્રી એન્થોની અલ્બેનિસે 9 જુલાઈ 2026ના રોજ મેલબોર્નમાં ઓસ્ટ્રેલિયા-ભારત સીઇઓ ફોરમ અને ઇકોનોમિક રોડમેપ બિઝનેસ ઇવેન્ટને સંયુક્ત રીતે સંબોધિત કરી હતી. ભારત અને ઓસ્ટ્રેલિયાના અગ્રણી સીઇઓ અને બિઝનેસ લીડર્સ, ઓસ્ટ્રેલિયાના મુખ્ય સુપરએન્યુએશન ફંડ્સ અને સંસ્થાકીય રોકાણકારોના પ્રતિનિધિઓ તેમજ ઓસ્ટ્રેલિયાની અગ્રણી યુનિવર્સિટીઓના વાઇસ-ચાન્સેલર્સે આ બંને કાર્યક્રમોમાં ભાગ લીધો હતો.

સીઇઓ ફોરમને સંબોધતા પ્રધાનમંત્રી મોદીએ રેખાંકિત કર્યું હતું કે ભારતનો મજબૂત આર્થિક વિકાસ, નીતિગત સુધારા, ડિજિટલ પરિવર્તન અને વિસ્તરી રહેલી ઇનોવેશન ઇકોસિસ્ટમ ઓસ્ટ્રેલિયાના ભાગીદારો માટે વ્યાપારની નવી તકો ઉભી કરી રહ્યા છે. ભારત અને ઓસ્ટ્રેલિયાના અર્થતંત્રો વચ્ચેની પૂરકતાઓનો ઉલ્લેખ કરીને પ્રધાનમંત્રી મોદીએ ઉત્પાદન, સ્વચ્છ ઊર્જા, મહત્વપૂર્ણ ખનિજો, ખનન, ઇન્ફ્રાસ્ટ્રક્ચર, શહેરી વિકાસ, નાગરિક ઉડ્ડયન, લોજિસ્ટિક્સ, અદ્યતન ટેકનોલોજી, આર્ટિફિશિયલ ઇન્ટેલિજન્સ, ફિનટેક, ફૂડ પ્રોસેસિંગ અને ડિજિટલ ઇકોનોમી ક્ષેત્રોમાં ભારતમાં ઉપલબ્ધ વિશાળ તકો પર ભાર મૂક્યો હતો. તેમણે જણાવ્યું હતું કે ભારતનું મોટા પાયા પરનું કામ અને ઓસ્ટ્રેલિયાની કુશળતા બંને પક્ષે ફાયદાકારક દરખાસ્ત સમાન છે.

પ્રધાનમંત્રી મોદીએ ઓસ્ટ્રેલિયાના રોકાણકારોને ભારતમાં લાંબા ગાળાના રોકાણ માટેની તકોનો લાભ લેવા આમંત્રણ આપ્યું હતું. તેમણે ભારતમાં ઓસ્ટ્રેલિયાની યુનિવર્સિટીઓની વધતી જતી ઉપસ્થિતિને આવકારી હતી અને નોંધ્યું હતું કે ઉચ્ચ શિક્ષણ, સંશોધન, ઇનોવેશન અને કૌશલ્ય વિકાસમાં વધુ ગાઢ સહયોગ બંને દેશોની પ્રતિભાને ભવિષ્ય માટે સજ્જ બનાવશે એટલું જ નહીં, પરંતુ તેમને વૈશ્વિક તકોનો લાભ લેવામાં પણ મદદ કરશે.

સીઇઓ ફોરમ બાદ, પ્રધાનમંત્રી મોદીએ ઇકોનોમિક રોડમેપ બિઝનેસ ઇવેન્ટને પણ સંબોધિત કરી હતી, જે બંને પક્ષોના 200 થી વધુ સીઇઓ અને બિઝનેસ લીડર્સનો મોટો મેળાવડો હતો. ભારત અને ઓસ્ટ્રેલિયા વચ્ચેના કુદરતી સમન્વય વિશે વાત કરતા તેમણે હાઇલાઇટ કર્યું હતું કે સહિયારી લોકશાહી મૂલ્યો, ઇન્ડો-પેસિફિક માટે સમાન વિઝન, લોકોથી લોકો વચ્ચેના જીવંત સંબંધો અને મજબૂત રાજકીય સમજણ બંને દેશો વચ્ચેના વ્યાપારિક જોડાણને સાથે મળીને આગળ વધવા અને સમૃદ્ધ થવા માટે ફળદ્રુપ ભૂમિ પૂરી પાડે છે. વર્ષ 2022 ના ઇકોનોમિક કોઓપરેશન એન્ડ ટ્રેડ એગ્રીમેન્ટ (ECTA) ના આધારે વ્યાપાર અને રોકાણ સંબંધોના વિકાસ પર સંતોષ વ્યક્ત કરતા, તેમણે પ્રસ્તાવિત કોમ્પ્રિહેન્સિવ ઇકોનોમિક કોઓપરેશન એગ્રીમેન્ટ (CECA) ને વહેલી તકે પૂર્ણ કરવા માટે આહવાન કર્યું હતું, જેથી વ્યાપારિક સંબંધોને એક નવા સ્તરે લઈ જઈ શકાય. તેમણે બિઝનેસ લીડર્સને બંને પક્ષોની પૂરક શક્તિઓનો લાભ લેવા અને ખાસ કરીને રેર અર્થ્સ, લિથિયમ, બેટરી, ઇલેક્ટ્રોનિક્સ, ઇવી (EVs), સેમિકન્ડક્ટર્સ, એઆઈ (AI) અને સંરક્ષણ સપ્લાય ચેઇનના ક્ષેત્રોમાં વૈશ્વિક ઉકેલો તૈયાર કરવા વિનંતી કરી હતી. પ્રધાનમંત્રી મોદીએ એવો પણ સુઝાવ આપ્યો હતો કે દ્વિપક્ષીય વ્યાપારિક સંબંધોને આગામી સ્તરે લઈ જવા માટે એ મહત્વનું છે કે ભારતીય રાજ્યો અને ઓસ્ટ્રેલિયાના પ્રાંતો તેમની મુખ્ય ક્ષમતાઓના આધારે ગતિશીલ આર્થિક ભાગીદારી બનાવે. આ બંને ફોરમમાં થયેલી ચર્ચાઓથી ઉત્પન્ન થયેલા આશાવાદ અને સાર્થક વિચારોની નોંધ લેતા પ્રધાનમંત્રી મોદીએ વિશ્વાસ વ્યક્ત કર્યો હતો કે ભારત-ઓસ્ટ્રેલિયાના આર્થિક સંબંધો સતત સમૃદ્ધ થતા રહેશે.

SM/IJ/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com