প্রধান মন্ত্রী শ্রী নরেন্দ্র মোদীনা ঙসি জাকার্তাদা ইন্দোনেসিয়াগী পার্লিয়ামেন্তদা ৱা ঙাংখ্রে। মহাক্না ইন্দোনেসিয়াগী পার্লিয়ামেন্তদা ৱা ঙাংখিবা অহানবা ভারতকী প্রধান মন্ত্রীনি।

প্রধান মন্ত্রীনা ইন্দোনেসিয়াগী রাস্ত্রপতি, ঐচ.ই. প্রাবোৱো সুবিয়ান্তোনা শরুক য়াবা অমসুং পার্লিয়ামেন্তকী স্পিকর, ঐচ.ই. পুৱান মহারানিনা বর্তন তৌরকপা অমসুং মহাক্না ভারত-ইন্দোনেসিয়া পার্তনরশিপকীদমক চাউনা শরুক তমখিবা অদুগীদমক্তা থাগৎপা ফোংদোক্লদুনা ৱারোল পীবা হৌখি। ভারতকী মীওই বিল্লিয়ন ১.৪গী মায়কৈদগী পার্লিয়ামেন্তরিয়নশিংদা য়াইফ-পাউজেল পীরদুনা মহাক্না হায়খি মদুদি ভারত অসি দেমোক্রেসীগী মমা ওইবনা ইন্দোনেসিয়াগা লোয়ননা দেমোক্রেতিক ওইবা মরী মপাঙ্গল কনখৎহন্নবা হোৎনরি।  লৈবাক অনিগী মরক্তা লৈরিবা অচেৎপা সভ্যতা অমসুং সমুদ্রগী ওইবা মরীশিং অদু পল্লদুনা প্রধান মন্ত্রীনা হায়খি মদুদি চহি লিশিং অনিরোম অসিদা ভারত মহাসাগরনা ভারত অমসুং ইন্দোনেসিয়াবু ৱাখল্লোন, ললোন-ইতিক, কলচর অমসুং লাইনীংগী খুত্থাংদা শম্নহল্লি। বসুধৈব কুতুমবকম অমসুং ভিন্নিকা তুঙ্গাল ইকা (য়ুনিতী ইন দাইবর্সিতী) গী মান্নবা ৱাখল্লোনশিং পনদুনা মহাক্না হায়খি মদুদি হায়রিবা মগুনশিং অসিনা লৈবাক অনিগী মরক্তা লৈরিবা পার্তনরশিপ অসি লমজিংলি। মহাক্না মখা তারদুনা হায়খি মদুদি পুৱারীগী ওইবা ত্রেজেক্তরীশিং, মান্নবা শীংনবশিং অমসুং মখোয়গী মীয়ামগী মান্নবা আশাশিং অসিনা ভারত অমসুং ইন্দোনেসিয়াবু মহৌশাগী ওইবা অমসুং থাজবা য়াবা পার্তনরশিং ওইনা পুনশিলহল্লি।

ভারতকী চাউখৎ-থৌরাংগী খোঙচৎ অমসুং ভিক্সিত ভারত ২০৪৭ অমসুং গোল্দন ইন্দোনেসিয়া ২০৪৫ (ইন্দোনেসিয়া ইমাস ২০৪৫) গী ভিজনগী মরক্তা লৈরিবা সিনর্জীশিং অদু পল্লদুনা প্রধান মন্ত্রীনা ললোন-ইতিক, ইনভেস্তমেন্ত, কন্নেক্তিবিতী, চিঞ্জাক অমসুং ইনর্জী সেক্যুরিতী, দিজিতেল পব্লিক ইনফ্রাস্ত্রকচর অমসুং অনৌবা তেক্নোলোজীশিংদা হেন্না অচেৎপা মতেং পীননবা হায়খি। গ্লোবেল সাউথকী মপাঙ্গল কনখৎহন্নবা অমসুং ফ্রী, ওপন, ইনক্লুসিব অমসুং রুলস-বেজ ইন্দো-পেসিফিক অমগীদমক ইন্দোনেসিয়াগা লোয়ননা থবক তৌমিন্নবগীদমক মহাক্না ভারতকী ফিরেপ অদু অমুক হন্না ফোংদোকখি। চহি চা কয়াগী মমাংদগী লৈরক্লবা সভ্যতাগী মরীশিং অদু ঙাক্না চৎতুনা, প্রধান মন্ত্রীনা গঙ্গা-মহাকম ভিজনগী মখাদা নাকল অনিগী ওইবা এঙ্গেজমেন্তকীদমক ভারত-ইন্দোনেসিয়াগী মরীদা অনৌবা অহৌবা অমা শেম্নবা হায়খি। মসিগী এপ্রোচ অসিগী শরুক অমা ওইনা, লৈবাক অনিমক্না মখোয়গী সিভিলাইজেস্নেল কন্নেক্ততা য়ুম্ফম ওইদুনা; মখোয়গী চাউখৎপগী লম্বীশিং পুন্না চৎমিন্নবা; সেক্যুরিতী অমসুং স্ত্রেতেজিক ত্রস্ত মপাঙ্গল কনখৎহনবা; মেরিতাইম চাউখৎহন্নবগীদমক্তা থবক তৌবা; অমসুং গ্লোবেল সাউথকী ভোইসপু মপাঙ্গল কনখৎহনবা মথৌ তাই হায়না মহাক্না ফোংদোকখি।

ভারত অমসুং ইন্দোনেসিয়াগী মরক্তা লৈনরিবা অচেৎপা সভ্যতাগী মরীশিং অমসুং মান্নবা দেমোক্রেতিক ভেল্যুশিং অদু মহাক্কী ৱারোলদা ফোংদোকখি অমসুং লৈবাক অনিমক্না মখোয়গী কম্প্রিহেন্সিব স্ত্রেতেজিক পার্তনরশিপ মখা তানা চেৎশিলহন্নবা অচেৎপা ৱাফম থমখি।

*****