ભારત સરકારના ઇન્ડિયન કાઉન્સિલ ઓફ એગ્રીકલ્ચરલ રિસર્ચ (ICAR) અને સેશેલ્સ પ્રજાસત્તાકના મત્સ્યોદ્યોગ, કૃષિ અને બ્લુ ઇકોનોમી મંત્રાલયના કૃષિ વિભાગે પ્રધાનમંત્રીની સેશેલ્સ પ્રજાસત્તાકની સત્તાવાર મુલાકાત દરમિયાન કૃષિ સંશોધન અને શિક્ષણમાં દ્વિપક્ષીય સહયોગને મજબૂત કરવા માટે એક સમજૂતી કરાર (MoU) પર હસ્તાક્ષર કર્યા છે.

બંને દેશો વચ્ચે કૃષિ સંશોધન, શિક્ષણ, ક્ષમતા નિર્માણ અને ટેકનોલોજી ટ્રાન્સફર (ટેકનોલોજી હસ્તાંતરણ) માં સહયોગ વધારવા માટે આ એમઓયુ પર હસ્તાક્ષર કરવામાં આવ્યા હતા. તે સંયુક્ત સંશોધન કાર્યક્રમોને પ્રોત્સાહન આપવા, વૈજ્ઞાનિકો, સંશોધકો અને વિદ્યાર્થીઓની અદલાબદલી કરવા તેમજ અદ્યતન કૃષિ ટેકનોલોજીઓ અને શ્રેષ્ઠ પદ્ધતિઓ શેર કરવા માટેનું એક માળખું પૂરું પાડે છે.

આ કરારને અમલમાં લાવવા માટે, બંને પક્ષોએ પાંચ વર્ષીય કાર્ય યોજના (2026–2031) પર પણ હસ્તાક્ષર કર્યા છે. આ કાર્ય યોજના ક્લાયમેટ-સ્માર્ટ એગ્રીકલ્ચર (હવામાન-અનુકૂળ કૃષિ), બાગાયત, લણણી પછીનું વ્યવસ્થાપન (પોસ્ટ-હાર્વેસ્ટ મેનેજમેન્ટ), પશુધન વિકાસ અને ટકાઉ ખાદ્ય તેમજ પોષણ સુરક્ષા સહિતના મુખ્ય ક્ષેત્રો પર ધ્યાન કેન્દ્રિત કરે છે.

આ સહયોગનો ઉદ્દેશ્ય સંસ્થાકીય જોડાણોને મજબૂત કરવાનો, કૃષિ ઉત્પાદકતામાં સુધારો કરવાનો, તકનીકી ક્ષમતાનું નિર્માણ કરવાનો અને આબોહવા પરિવર્તન તથા ખાદ્ય સુરક્ષા જેવા ઉભરતા પડકારોનો સામનો કરતી વખતે ટકાઉ કૃષિ વિકાસને ટેકો આપવાનો છે.

વિશ્વભરની ભાગીદાર સંસ્થાઓ સાથે 100થી વધુ સમજૂતી કરારો પર હસ્તાક્ષર કરીને, ICAR ભારતની વૈશ્વિક કૃષિ ભાગીદારીનો વિસ્તાર કરવાનું ચાલુ રાખે છે. સેશેલ્સ સાથેના આ એમઓયુ ગ્લોબલ સાઉથ (વિકાસશીલ દેશો) સાથે ભારતના જોડાણને વધુ મજબૂત બનાવે છે અને આંતરરાષ્ટ્રીય સહયોગ દ્વારા ટકાઉ કૃષિ, ઇનોવેશન તેમજ વૈશ્વિક ખાદ્ય અને પોષણ સુરક્ષાને આગળ વધારવા માટેની તેની પ્રતિબદ્ધતાને પુનઃપુષ્ટ કરે છે.

SM/BS/JD