এগ্রীকলচর & ফারমর্স ৱেলফেয়র, অমসুং রুরেল দিভেলপমেন্তকী কেন্দ্রগ মন্ত্রি শ্রী সিবরাজ সিংহ চৌহান ঙরাং অরুনাচল প্রদেশতা য়ৌরকখি, অদুবু নোংজু-নুংশাগী ফিভম ফত্তবনা মরম ওইদুনা সেদ্যুল তৌরবা এয়র সর্ভে অসি পাংথোকপা ঙমখিদে। মহাক্না হৌজিক জুলাই ১দা অরুনাচল প্রদেশ অমসুং অসামগী ইশিং ইচাওনা শোকহল্লবা মফমশিংদা পাক শন্না ​​গ্রাওন্দ অমসুং এয়র ইন্সপেক্সন অমা পাঙথোক্কনি, নুমীৎ চুপ্পা অমা শোকহল্লবা লৌমীশিং অমসুং অতোপ্পা ইমুং মনুংগী ফীভম য়েংশিন্দুনা, অমাং-অতা থোকপগী চাং অদু মশা মথন্তা য়েংশিনবা অমসুং খুদক্কী ওইবা অৱাবা কোক্নবা অমসুং মতম শাংনা তেংবাং পিনবা দরকার ওইবা খোঙথাংশিং খঙদোক্কনি। খোঙচৎ অসিগী মনুংদা পার্লিয়ামেন্তরি এফেয়র্স অমসুং মাইনোরিতি এফেয়র্সকি কেন্দ্রগী মন্ত্রি শ্রী কিরন রিজিজু অমসুং অরুনাচল প্রদেশকি মুখ্য মন্ত্রি শ্রী পেমা খান্দুগা লোয়ননা চৎমিন্নগনি।

নিংথৌকাবা নুমীৎকি নুমীদাংৱাইরমদা অরুনাচল প্রদেশতা য়ৌরবা মতুংদা শ্রী চৌহান্না মফম অদুগী মীয়ামগা মীৎকুপ নাহুম শিংনা উনখি অমসুং মখোয়গী অৱাবশিং তাখি। মহাক্না হায়খি মদুদি অরুবা নোংজু-নুংশানা হেলিকোপ্তর অসি পাইবা ঙমদ্রবসু, মসিনা সরকারগী ৱারেপ অদুদা অকায়বা পীহল্লোই। মহাক্না হায়খি, “ঙসি নোংজু-নুংশানা হেলিকোপ্তর অসি গ্রাওন্দেদ তৌরম্বা য়াই, অদুবু মসিনা ঐখোয়গী ৱারেপ অসি থিংবা ঙম্লোই, হয়েং ঐখোয় নুমীৎ পুম্বা ইশিং ইচাওনা শোকহল্লবা অরুনাচল প্রদেশ অমসুং অসামগী লমদমশিংদা য়ৌশিনগনি, ফীভম অসি গ্রাওন্দদগী নত্তনা নুংশিত্তগীসু এসেস তৌগনি, মদুনা মরম ওইরগা শোকহল্লবা লৌমী খুদিংমক অমসুং শোকহল্লবা ইমুং খুদিংমক্তা মথৌ তাবা মতেং ফংগনি।”

শ্রী চৌহান্না দিল্লীদগী ইতানগরদা চৎখি, মফম অদুদা মহাক্না অহানবা ওইনা ইশিং ইচাওনা শোকহল্লবা মফমশিংদগী লাকপা মীওইশিং অমসুং মীয়ামগী মীহুৎশিংগা ৱারি শানখি। মীয়াম্না মতৌ করম্না ইশিং ইচাওনা মখোয়গী লৌউ-শিংউগী লমশিং ইশিংদা চেন্থখিবগে, অরেপ্পা মহৈ-মরোংশিং মাংহনখিবগে, য়ুমশিংদা অমাং-অতা থোকহনখিবগে অমসুং মখোয়গী পুন্সী মহিংদা অকায়বা পিবগে হায়বদু ৱারি শাখি। কয়া অমনা মখোয়গী ইমুং মনুংনা মায়োক্নরিবা চাওনা মাংজবা অমসুং মখোয়না মখা তানা থেংনরিবা অৱাবশিংগী মতাংদা ৱা ঙাংখি। কেন্দ্রগী মন্ত্রিনা রিপ্রজেন্তেসন খুদিংমক নিংথিনা তাখি অমসুং রিলিফ অমসুং রিহেবিলিতেসনগী থৌওংদা শোকহল্লবা ইমুং অমত্তা তুংদা লৈরোয় হায়না থাজবা পিখি। মহাকনা অমুক হন্না হায়খি মদুদি সরকারগী তেংবাং অসি মাংজৌননা শোকহল্লবা মীওই খুদিংমক্তা য়ৌহন্নবা হোৎনবা য়াবা পুম্নমক হোৎনগনি।

অরুনাচল প্রদেশ সরকারগী মকোক থোঙবা ওফিসিএলশিংগা লোয়ননা ইতানগর সেক্রেতরিয়েত্তা পাংথোকখিবা রিভিয়ু মীফম অমদা শ্রী চৌহান্না হৌজিক চত্থরিবা ইচাওগী ফীভম, রিলিফ মেতরিএলশিং ফংহনবা অমসুং য়েন্থোকপগী মতাংদা, হৌজিক চত্থরিবা রিহেবিলিতেসনগী থৌরাংশিং অমসুং তুংদা পায়খৎকদবা থবকশিংগী মতাংদা খন্নখি। মহাকনা ইশিং ইচাওনা থোকহনবা অমাং-অতাশিং, রিলিফ ওপরেশনশিংগী প্রোগ্রেশ অমসুং শোকহল্লবা কম্যুনিতিশিংদা য়ৌহনবদা লেংদনা লৈরিবা শিংনবশিং অদু য়েংশিনখি। মহাক্না হায়খি অৱাং-নোংপোক্কি লৌমীশিং অমসুং খুঙ্গংগী মীওইশিংগী অৱাবশিং অসি ন্যু দিল্লীদা সরকারগী খ্বাইদগী ৱাংবা থাক য়ৌরে অমসুং ওফিসিএলশিংদা থাজবা পিখি মদুদি প্রধান মন্ত্রি শ্রী নরেন্দ্র মোদীগী লুচিং অমসুং লমজিং মখাদা কেন্দ্র সরকারনা রিলিফ, রিহেবিলিতেসন অমসুং রিকন্সত্রক্সনগীদমক্তা মথৌ তাবা ওইথোকপা য়াবা মতেং খুদিংমক পিনবা শেম শাদুনা লৈরি।

শ্রী চৌহান্না হায়খি অরুনাচল প্রদেশ অমসুং অসামদা ইচাওনা শোকহল্লবা মফমশিংদা অকনবা ইনশপেক্সন অমা জুলাই ১দা পাঙথোক্কনি, ঙরাং অয়ুক্তগী হৌরগা অরুনাচল প্রদেশকি মফম কয়াদা ইচাওনা শোকহল্লবা খুঙ্গংশিং অমসুং রিলিফ কেম্পশিংদা চৎতুনাা শোকহল্লবা মীওইশিংগা হকথেংননা ৱারি শানগনি। মহাক মশামক্না লৌউ-শিংউগী লমশিংদা অমাং-অতাশিং অদু এসেস তৌগনি, শা-শন লোয়বগী ফীভম অদু ইভালুএৎ তৌগনি অমসুং ইচাওনা মীয়ামগী নুংতিগী পুন্সী অমসুং হিংনবগী লম্বিদা পিরিবা অপুনবা শাফু অদু য়েংশিনগনি। মহাক্না অরুনাচল প্রদেশ অমসুং অসাম শিনবা থুংনা ইশিং ইচাওনা শোকহল্লবা মফমশিংগী এয়র সর্ভে অমসু পাঙথোক্তুনা তুরেলশিং, পলশিং, লম্বিশিং, থোঙশিং অমসুং লৌউ-শিংউগী লমশিংগী ফীভম য়েংশিন্নবা অমসুং অমাং-অতাশিংগী অপুনবা এসেসমেন্ত অমা লৌগনি। তুংদা নুমিদাংৱাইরমদা মহাক্না অসাম সরকারগী মকোক থোঙবা ওফিসিএলশিংগা লোয়ননা গুৱাহতিদা রিভিয়ু মীফম অমা চেয়র তৌগনি, মসিদা ইচাও মেনেজমেন্ত, রিলিফ য়েন্থোকপা, ইম্বেঙ্কমেন্তশিং অমসুং লম্বিশিং শেমজিনবা, অমাং-অতা থোকখিবা ইনফ্রাস্ত্রকচরশিং অমুক হন্না শেমজিনবা অমসুং শোকহল্লবা লৌমীশিংদা শেলগী মতেং পিনবা খন্নগনি।

কেন্দ্রগী মন্ত্রিনা অকনবা ৱাফম থমখি মদুদি শোকহল্লবা মীওইশিংদা খুদক্কী ওইবা রিলিফ পিবা অসি মকোক থোঙবা প্রায়োরিতি ওইদুনা লৈরবসু তুংদা ইশিং ইচাওগী চৈথেং হন্থহনবা ঙম্বা লোং তর্ম স্ত্রেতেজিশিং শেম্বদসু চপ মান্নবা মীৎয়েং চংগদবনি। মহাক্না হায়খি তুংদা লাক্কদবা ইশিং ইচাওগী মতমদা অমাং-অতাশিং হন্থহন্নবা অমসুং খুঙ্গংগী মীয়ামগী রেজিলিয়েন্স মপাঙ্গল কনখৎহন্নবা হেন্না ফবা দ্রেনেজ সিস্তেমশিং, মপাঙ্গল কনবা পলশিং হেন্না শাফবা লৈফমশিং, ইচাও-মেনেজমেন্ত ইনফ্রাস্ত্রকচর ফগৎহনবা অমসুং হেন্না ইফেক্তিব ওইবা মহৈ-মরোংগী ইন্সুরেন্স মেকানিজম অমা য়াম্না মরুওই।

শ্রী চৌহান্না অরুনাচল প্রদেশ অমসুং অশামগী ইশিং ইচাওনা শোকহল্লবা মীয়ামদা অৱাবা তারবা মতম অসিদা থৌনা ফনা লৈনবা অপীল তৌখি। মহাক্না মখোয়দা থাজবা পিখি মদুদি কেন্দ্র সরকার অমসুং মরি লৈনবা রাজ্য় সরকারশিংনা য়াম্না নক্না থবক তৌমিন্নগনি অমসুং ক্রাইসিস অসি লাকশিনবদা মতেং পাংনবা দরকার ওইবা খোঙথাং খুদিংমক লৌখৎকনি। মহাক্না হায়খি মদুদি মতম চানা রিলিফ, রিহেবিলিতেসন অমসুং শোকহল্লবা লমদমশিংদা নোর্মেল লাইফ অমুক হন্না শেমগৎনবা হোৎনবা য়াবা খুদিংমক হোৎনগনি।

মীদিয়াদা ৱা ঙাংলদুনা শ্রী শিবরাজ চৌহান্না হায়খি অরুনাচল প্রদেশ অসি “নুংশিজরবা রাজ্য” অমনি, অদুবু হৌজিক্কী ওইনাা য়াম্না শাথিবা ক্রাইসিস অমা মায়োক্নরি মরমদি মসিনা মরম ওইদুনা য়াম্না শাথিবা ক্রাইসিস অমা মায়োক্নরি। নোং কন্না চুবা অমসুং লেন্দস্লাইদনা লম্বিশিং, থোঙশিং অমসুং য়ুম কয়া অমাং-অতা থোকহনখি, মরম অদুনা মীয়ামদা চাওনা অমাং-অতা থোকহনখি। লৌমীশিংনা অকনবা অৱাবা কয়া মায়োক্নরম্মি, মরমদি কোমলা, লফোই অমসুং চেংগুম্বা মহৈ-মরোংশিং পুল্লপ মাংহনখি। মহাক্না হায়খি, “মফম অসিদা শ্রী কিরন রিজিজু অমসুং ঐহাক মুখ্য মন্ত্রিগা লোয়ননা প্রধান মন্ত্রিগী য়াথং মতুং ইন্না লাক্তুনা শোকহল্লবা মফমশিংদা চৎনবা লাকখিবনি, ঐখোয়না অমাং-অতাশিংগী অকুপ্পা এসেসমেন্ত অমা পায়খৎকনি অমসুং কেন্দ্র সরকারদগী তৌবা য়াবা মতেং খুদিংমক শোয়দনা ফংহনগনি।” শ্রী চৌহান্না মখা তানা হায়খি, অৱাবা তারবা মতম অসিগী মনুংদা মীয়ামদা মতেং পাংবদা হোতনবা অমত্তাা কনবা ঙম্লোই। মহাক্না হায়খি মদুদি প্রধান মন্ত্রি অমসুং মুখ্য মন্ত্রিগী লুচিং মখাদা সরকারনা মপূঙ ফাবা পাঙ্গলগা লোয়ননা রাজ্য় অসিবু খুদোংথিবা অসিদগী নান্থোকহনবদা মতেং পাংগনি, অথুবা মতমদা নোর্মেল ওইবা ফীভম ফগৎহন্নবা অমসুং শোকহল্লবা ইমুং খুদিংমক্না মথৌ তাবা মতেং ফংনবা হোৎনগনি।

***