એક મોટા ઓપરેશનમાં ડિરેક્ટોરેટ ઓફ રેવન્યુ ઈન્ટેલિજન્સ (DRI) ના અધિકારીઓએ સરહદ પારના સોનાની દાણચોરીના સિન્ડિકેટનો સફળતાપૂર્વક પર્દાફાશ કર્યો છે અને દિલ્હીથી ઓપરેટ થતા આશરે રૂ. 21.40 કરોડની કિંમતનું 15 કિલો વિદેશી મૂળનું દાણચોરીનું સોનું જપ્ત કર્યું છે.

DRIના અધિકારીઓએ કુરિયર ટર્મિનલ, દિલ્હી ખાતે થાઈલેન્ડથી આવતા એક આંતરરાષ્ટ્રીય કુરિયર કન્સાઇનમેન્ટને અટકાવ્યું હતું. આ કન્સાઇનમેન્ટ એક વિદેશી નાગરિક સાથે જોડાયેલી પેઢીના નામે હતું.

"વોર્ન ગિયર" તરીકે જાહેર કરાયેલા કન્સાઇનમેન્ટની ઝીણવટભરી તપાસ દરમિયાન, ગિયરના ભાગોની અંદર ચતુરાઈપૂર્વક છુપાવેલા વિદેશી મૂળના સોનાના આઠ ડિસ્ક આકારના ટુકડાઓ મળી આવ્યા હતા, જેમાંથી દરેકનું વજન 1.5 કિલો હતું. કુરિયર કન્સાઇનમેન્ટમાંથી કુલ 12 કિલો દાણચોરીનું વિદેશી મૂળનું સોનું મળી આવ્યું હતું.

નિયત પ્રાપ્તકર્તા અને કથિત માસ્ટરમાઇન્ડના રહેઠાણ પર એકસાથે હાથ ધરવામાં આવેલા સર્ચ ઓપરેશન દરમિયાન વિદેશી મૂળના સોનાના વધુ બે સમાન ડિસ્ક આકારના ટુકડાઓ મળી આવ્યા હતા, જેમાંથી દરેકનું વજન 1.5 કિલો હતું.

આ કેસના સંબંધમાં માસ્ટરમાઇન્ડ, જે અગાઉ પણ ગુનો કરી ચૂક્યો છે, અને એક વિદેશી નાગરિક સહિત ચાર વ્યક્તિઓની ધરપકડ કરવામાં આવી છે.

પ્રાથમિક તપાસમાં એવો પણ ખુલાસો થયો છે કે આ દાણચોરીના ફાઇનાન્સિંગ માટે સરહદો પાર નાણાં ટ્રાન્સફર કરવા માટે ક્રિપ્ટો-કરન્સીનો ઉપયોગ કરવામાં આવી રહ્યો હતો.

SM/IJ/JD