ਭਾਰਤ ਸਰਕਾਰ ਦੇ ਵਣਜ ਅਤੇ ਉਦਯੋਗ ਮੰਤਰਾਲੇ ਦੇ ਤਹਿਤ ਖੇਤੀਬਾੜੀ ਅਤੇ ਪ੍ਰੋਸੈੱਸਡ ਫੂਡ ਪ੍ਰੋਡਕਟਸ ਐਕਸਪੋਰਟ ਡਿਵੈਲਪਮੈਂਟ ਅਥਾਰਿਟੀ (APEDA) ਨੇ ਮੱਧ ਪ੍ਰਦੇਸ਼ ਤੋਂ ਸੰਯੁਕਤ ਅਰਬ ਅਮੀਰਾਤ (UAE) ਨੂੰ ਭੂਗੋਲਿਕ ਸੰਕੇਤ (GI) ਟੈਗ ਵਾਲੇ ਰੀਵਾ ਸੁੰਦਰਜਾ ਅੰਬਾਂ ਦੇ ਪਹਿਲੇ ਵਪਾਰਕ ਨਿਰਯਾਤ ਦੀ ਸਹੂਲਤ ਦਿੱਤੀ ਹੈ, ਜੋ ਕਿ ਵਿਸ਼ਵ ਬਜ਼ਾਰਾਂ ਵਿੱਚ ਭਾਰਤ ਦੇ ਵਿਸ਼ੇਸ਼ ਖੇਤੀਬਾੜੀ ਉਤਪਾਦਾਂ ਨੂੰ ਉਤਸ਼ਾਹਿਤ ਕਰਨ ਵਿੱਚ ਇੱਕ ਮਹੱਤਵਪੂਰਨ ਉਪਲੱਬਧੀ ਹੈ।

ਪਿਛਲੇ ਕਈ ਮਹੀਨਿਆਂ ਤੋਂ, APEDA ਨੇ ਮੱਧ ਪ੍ਰਦੇਸ਼ ਸਰਕਾਰ ਦੇ ਬਾਗਬਾਨੀ ਵਿਭਾਗ, ਨਿਰਯਾਤਕਾਂ, ਕਿਸਾਨ ਉਤਪਾਦਕ ਸੰਗਠਨਾਂ (FPOs), ਪੈਕਿੰਗ ਹਾਊਸ ਸੰਚਾਲਕਾਂ ਅਤੇ ਅੰਤਰਰਾਸ਼ਟਰੀ ਖਰੀਦਦਾਰਾਂ ਨਾਲ ਇਸ ਸ਼ਾਨਦਾਰ ਅੰਬ ਦੀ ਕਿਸਮ ਦੇ ਨਿਰਯਾਤ ਲਈ ਸੰਪਰਕ ਸਥਾਪਿਤ ਕਰਨ ਲਈ ਕੰਮ ਕੀਤਾ ਹੈ। ਇਨ੍ਹਾਂ ਤਾਲਮੇਲ ਵਾਲੇ ਯਤਨਾਂ ਦੇ ਨਤੀਜੇ ਵਜੋਂ ਸੰਯੁਕਤ ਅਰਬ ਅਮੀਰਾਤ ਵਿੱਚ ਇੱਕ ਖਰੀਦਦਾਰ ਦੀ ਪਛਾਣ ਹੋਈ, ਜਿਸ ਨਾਲ ਪ੍ਰਸਿੱਧ ਰੀਵਾ ਸੁੰਦਰਜਾ ਅੰਬ ਦੀ ਅੰਤਰਰਾਸ਼ਟਰੀ ਮਾਰਕੀਟਿੰਗ ਲਈ ਰਾਹ ਪੱਧਰਾ ਹੋਇਆ।

ਜੀਆਈ ਟੈਗ ਵਾਲੇ ਰੇਵਾ ਸੁੰਦਰਜਾ ਅੰਬਾਂ ਦੀ ਪਹਿਲੀ ਵਪਾਰਕ ਨਿਰਯਾਤ ਖੇਪ ਵਿੱਚ ਇੱਕ ਮੀਟ੍ਰਿਕ ਟਨ ਅੰਬ ਸ਼ਾਮਲ ਸਨ ਅਤੇ 26 ਜੂਨ 2026 ਨੂੰ ਮੈਸਰਜ਼ ਸਾਲਟ ਰੇਂਜ ਫੂਡਜ਼ ਪ੍ਰਾਈਵੇਟ ਲਿਮਿਟੇਡ ਦੁਆਰਾ ਯੂਏਈ ਨੂੰ ਨਿਰਯਾਤ ਕੀਤਾ ਗਿਆ ਸੀ। ਇਹ ਇਤਿਹਾਸਕ ਖੇਪ ਰੀਵਾ ਸੁੰਦਰਜਾ ਅੰਬਾਂ ਦੀ ਅੰਤਰਰਾਸ਼ਟਰੀ ਯਾਤਰਾ ਦੀ ਸ਼ੁਰੂਆਤ ਨੂੰ ਦਰਸਾਉਂਦੀ ਹੈ ਅਤੇ ਆਉਣ ਵਾਲੇ ਸਮੇਂ ਵਿੱਚ ਨਿਯਮਤ ਨਿਰਯਾਤ ਲਈ ਰਾਹ ਪੱਧਰਾ ਕਰਨ ਦੀ ਉਮੀਦ ਹੈ।

ਨਿਰਯਾਤ ਖੇਪ ਵਿੱਚ ਉੱਚ-ਗੁਣਵੱਤਾ ਵਾਲੇ GI-ਟੈਗ ਵਾਲੇ ਰੇਵਾ ਸੁੰਦਰਜਾ ਅੰਬ ਸ਼ਾਮਲ ਸਨ, ਜੋ ਕਿ ਸੀ (Seondha) ਫਾਰਮਰ ਪ੍ਰੋਡਿਊਸਰ ਕੰਪਨੀ ਲਿਮਿਟੇਡ ਅਤੇ ਮੱਧ ਪ੍ਰਦੇਸ਼ ਦੇ ਰੀਵਾ ਜ਼ਿਲ੍ਹੇ ਦੇ ਗੋਵਿੰਦਗੜ੍ਹ ਦੇ ਵਸਨੀਕ ਪ੍ਰਗਤੀਸ਼ੀਲ ਕਿਸਾਨ ਸ਼੍ਰੀ ਸੋਨੂੰ ਗੁਪਤਾ ਤੋਂ ਪ੍ਰਾਪਤ ਕੀਤੇ ਗਏ ਸਨ। ਅੰਬਾਂ ਦੀ ਕਟਾਈ ਨਿਰਧਾਰਿਤ ਗੁਣਵੱਤਾ ਮਾਪਦੰਡਾਂ ਅਨੁਸਾਰ ਕੀਤੀ ਗਈ ਸੀ ਅਤੇ ਉੱਤਰ ਪ੍ਰਦੇਸ਼ ਦੇ ਭਦੋਹੀ ਵਿੱਚ ਤ੍ਰਿਸਾਗਰ ਫਾਰਮਰ ਪ੍ਰੋਡਿਊਸਰ ਕੰਪਨੀ ਦੇ APEDA-ਸਹੂਲਤ ਵਾਲੇ ਪੈਕਹਾਊਸ ਵਿੱਚ ਗ੍ਰੇਡ, ਛਾਂਟੀ ਅਤੇ ਨਿਰਯਾਤ-ਯੋਗ ਪੈਕ ਕੀਤੀ ਗਈ ਸੀ। ਨਿਰਯਾਤ ਪੈਕੇਜਿੰਗ ਅਤੇ ਪੌਦਿਆਂ ਦੀ ਸਫਾਈ ਦੀਆਂ ਜ਼ਰੂਰਤਾਂ ਨੂੰ ਪੂਰਾ ਕਰਨ ਤੋਂ ਬਾਅਦ, ਅੰਬਾਂ ਦੀ ਖੇਪ ਵਾਰਾਣਸੀ ਹਵਾਈ ਅੱਡੇ 'ਤੇ ਲਿਆਂਦੀ ਗਈ ਜਿੱਥੋਂ ਇਸਨੂੰ ਅੱਗੇ ਯੂਏਈ ਲਈ ਹਵਾਈ ਜਹਾਜ਼ ਰਾਹੀਂ ਭੇਜਿਆ ਗਿਆ।

ਇਸ ਵਪਾਰਕ ਨਿਰਯਾਤ ਨਾਲ ਰੀਵਾ ਖੇਤਰ ਦੇ ਅੰਬ ਉਤਪਾਦਕਾਂ ਨੂੰ ਮਹੱਤਵਪੂਰਨ ਆਰਥਿਕ ਲਾਭ ਮਿਲਣ ਦੀ ਉਮੀਦ ਹੈ। ਸਥਾਨਕ ਬਜ਼ਾਰ  ਵਿੱਚ ਰੀਵਾ ਸੁੰਦਰਜਾ ਅੰਬਾਂ ਦੀ ਮੌਜੂਦਾ ਕੀਮਤ ਲਗਭਗ 100 ਰੁਪਏ ਤੋਂ 110 ਰੁਪਏ ਪ੍ਰਤੀ ਕਿਲੋਗ੍ਰਾਮ ਹੈ, ਜਦੋਂ ਕਿ ਨਿਰਯਾਤਕ ਨੇ ਉਨ੍ਹਾਂ ਨੂੰ  150 ਰੁਪਏ ਪ੍ਰਤੀ ਕਿਲੋਗ੍ਰਾਮ ਦੇ ਹਿਸਾਬ ਨਾਲ ਖਰੀਦਿਆ ਹੈ। 40 ਰੁਪਏ ਤੋਂ 50 ਰੁਪਏ ਪ੍ਰਤੀ ਕਿਲੋਗ੍ਰਾਮ ਦਾ ਇਹ ਲਾਭ ਸਿੱਧੇ ਤੌਰ 'ਤੇ ਕਿਸਾਨਾਂ ਨੂੰ ਮਿਲਦਾ ਹੈ, ਜੋ ਕਿ ਉਤਪਾਦਕਾਂ ਨੂੰ ਨਿਰਯਾਤ-ਮੁਖੀ ਮੁੱਲ ਲੜੀ ਵਿੱਚ ਜੋੜਨ ਦੇ ਆਰਥਿਕ ਲਾਭਾਂ ਨੂੰ ਦਰਸਾਉਂਦਾ ਹੈ। ਇਸ ਪਹਿਲਕਦਮੀ ਤੋਂ ਹੋਰ ਕਿਸਾਨਾਂ ਨੂੰ ਗੁਣਵੱਤਾ ਉਤਪਾਦਨ ਅਤੇ ਵਾਢੀ ਤੋਂ ਬਾਅਦ ਦੇ ਅਭਿਆਸਾਂ ਨੂੰ ਅਪਣਾਉਣ ਲਈ ਉਤਸ਼ਾਹਿਤ ਕਰਨ ਅਤੇ ਅੰਤਰਰਾਸ਼ਟਰੀ ਬਜ਼ਾਰਾਂ ਤੱਕ ਉਨ੍ਹਾਂ ਦੀ ਪਹੁੰਚ ਵਧਾਉਣ ਦੀ ਵੀ ਉਮੀਦ ਹੈ।

ਇਹ ਸਫਲ ਨਿਰਯਾਤ ਅੰਤਰਰਾਸ਼ਟਰੀ ਬਜ਼ਾਰਾਂ ਵਿੱਚ ਖੇਤਰ-ਵਿਸ਼ੇਸ਼ ਖੇਤੀਬਾੜੀ ਉਤਪਾਦਾਂ ਨੂੰ ਵੱਖਰਾ ਕਰਨ ਵਿੱਚ ਭੂਗੋਲਿਕ ਸੰਕੇਤ (GI) ਰਜਿਸਟ੍ਰੇਸ਼ਨ ਦੀ ਮਹੱਤਤਾ ਨੂੰ ਹੋਰ ਵੀ ਉਜਾਗਰ ਕਰਦਾ ਹੈ। ਆਪਣੀ ਬੇਮਿਸਾਲ ਮਿਠਾਸ, ਭਰਪੂਰ ਖੁਸ਼ਬੂ, ਫਾਈਬਰ-ਮੁਕਤ ਗੁੱਦੇ ਅਤੇ ਵਿਲੱਖਣ ਸੁਆਦ ਲਈ ਮਸ਼ਹੂਰ, ਰੀਵਾ ਸੁੰਦਰਜਾ ਅੰਬ ਦੀ ਬਹੁਤ ਜ਼ਿਆਦਾ ਨਿਰਯਾਤ ਸੰਭਾਵਨਾ ਹੈ। ਵਪਾਰਕ ਨਿਰਯਾਤ ਤੋਂ ਇਸ ਸਵਦੇਸ਼ੀ ਕਿਸਮ ਦੀ ਵਿਸ਼ਵਵਿਆਪੀ ਮਾਨਤਾ ਨੂੰ ਵਧਾਉਣ ਅਤੇ ਮੱਧ ਪ੍ਰਦੇਸ਼ ਨੂੰ ਪ੍ਰੀਮੀਅਮ ਅੰਬ ਨਿਰਯਾਤ ਲਈ ਇੱਕ ਉੱਭਰ ਰਹੇ ਕੇਂਦਰ ਵਜੋਂ ਸਥਾਪਿਤ ਕਰਨ ਦੀ ਉਮੀਦ ਹੈ ।

26 ਜੂਨ 2026 ਨੂੰ ਯੂਏਈ ਨੂੰ ਜੀਆਈ ਟੈਗ ਵਾਲੇ ਰੀਵਾ ਸੁੰਦਰਜਾ ਅੰਬਾਂ ਦੀ ਪਹਿਲੀ ਵਪਾਰਕ ਨਿਰਯਾਤ ਖੇਪ ਦੀ ਇਤਿਹਾਸਕ ਪ੍ਰਾਪਤੀ ਦੀ ਯਾਦ ਵਿੱਚ ਇੱਕ ਝੰਡਾ ਲਹਿਰਾਉਣ ਦੀ ਰਸਮ ਆਯੋਜਿਤ ਕੀਤੀ ਗਈ। ਇਹ ਸਮਾਗਮ ਮੱਧ ਪ੍ਰਦੇਸ਼ ਤੋਂ ਖੇਤੀਬਾੜੀ ਨਿਰਯਾਤ ਨੂੰ ਉਤਸ਼ਾਹਿਤ ਕਰਨ ਲਈ ਏਪੀਈਡੀਏ ਦੇ ਨਿਰੰਤਰ ਯਤਨਾਂ ਵਿੱਚ ਇੱਕ ਮਹੱਤਵਪੂਰਨ ਮੀਲ ਪੱਥਰ ਸੀ ਅਤੇ ਏਪੀਈਡੀਏ, ਮੱਧ ਪ੍ਰਦੇਸ਼ ਸਰਕਾਰ ਦੇ ਬਾਗਬਾਨੀ ਵਿਭਾਗ, ਨਿਰਯਾਤਕ, ਕਿਸਾਨ ਉਤਪਾਦਕ ਸੰਗਠਨ, ਪੈਕ ਹਾਊਸ ਸੰਚਾਲਕਾਂ ਅਤੇ ਕਿਸਾਨਾਂ ਵਿਚਕਾਰ ਸਫਲ ਸਹਿਯੋਗ ਨੂੰ ਪ੍ਰਦਰਸ਼ਿਤ ਕਰਦਾ ਸੀ।

ਏਪੀਈਡੀਏ ਨਿਰਯਾਤ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ​​ਕਰਕੇ, ਅੰਤਰਰਾਸ਼ਟਰੀ ਗੁਣਵੱਤਾ ਮਾਪਦੰਡਾਂ ਦੀ ਪਾਲਣਾ ਨੂੰ ਯਕੀਨੀ ਬਣਾ ਕੇ, ਬਜ਼ਾਰ  ਸਬੰਧ ਵਿਕਸਿਤ ਕਰਕੇ, ਅਤੇ ਵਿਸ਼ਵ ਬਜ਼ਾਰਾਂ ਵਿੱਚ ਭਾਰਤ ਦੇ ਖੇਤੀਬਾੜੀ ਉਤਪਾਦਾਂ ਨੂੰ ਉਤਸ਼ਾਹਿਤ ਕਰਕੇ ਜੀਆਈ-ਟੈਗਡ ਅਤੇ ਮੁੱਲ-ਵਰਧਿਤ ਖੇਤੀਬਾੜੀ ਉਤਪਾਦਾਂ ਦੇ ਨਿਰਯਾਤ ਨੂੰ ਸੁਚਾਰੂ ਬਣਾਉਣ ਵਿੱਚ ਮੁੱਖ ਭੂਮਿਕਾ ਨਿਭਾ ਰਿਹਾ ਹੈ। ਰੀਵਾ ਸੁੰਦਰਜਾ ਅੰਬਾਂ ਦੇ ਵਪਾਰਕ ਨਿਰਯਾਤ ਦੀ ਸਫਲ ਸ਼ੁਰੂਆਤ ਨਾਲ ਭਾਰਤ ਤੋਂ ਜੀਆਈ ਉਤਪਾਦਾਂ ਲਈ ਨਵੇਂ ਮੌਕੇ ਪੈਦਾ ਹੋਣ, ਖੇਤੀਬਾੜੀ ਨਿਰਯਾਤ ਵਾਤਾਵਰਣ ਪ੍ਰਣਾਲੀ ਨੂੰ ਮਜ਼ਬੂਤ ​​ਕਰਨ ਅਤੇ ਰੀਵਾ ਖੇਤਰ ਵਿੱਚ ਅੰਬ ਉਤਪਾਦਕਾਂ ਲਈ ਟਿਕਾਊ ਆਮਦਨੀ ਵਾਧੇ ਵਿੱਚ ਯੋਗਦਾਨ ਪਾਉਣ ਦੀ ਉਮੀਦ ਹੈ।

***

ਅਭਿਜੀਤ/ਗਰਿਮਾ/ਇਸ਼ਿਤਾ/ਏਕੇ