ইকায়খুম্নরবা, দোক্তর পেত্রিক ইর্মিনি,

লৈবাক অনিমক্কী মীহুৎকাংবুশিং,

মেদিয়াগী মরুপশিং,

খুরুমজরি,

ঐখোয় তরাম্না ওকখিবা অমসুং নুংঙাইনা থম্বীখিবগীদমক ঐনা রাষ্ট্রপতি ইর্মিনি থাগৎপা ফোঙদোকচরি।

ঐঙোন্দা “গার্জিয়ান ওফ ব্লু হোরাইজন” পীরকপা অসি ঐ অমসুং ভারতমচা করোর ১৪০ গী য়াম্না হরাওবা অমনি। ইকায়খুম্নবগা লোয়ননা ঐনা মনা অসি লৌজরি অমসুং অইং-অশাগী খল হোংলকপগী খুদোংচাদবা মায়োক্নরিবা অমসুং তুংগী মীরোলশিংগীদমক মহৌশাগী অকোয়বগী ফিবম ঙাক-শেনবা হায়বসি মখোয়গী তঙাইফদবা থবক্নি হায়না খনবা লৈবাকশিংদা মনা অসি কৎথোকচরি।

মরুপশিং,

সেচেলনা নিংতম্বা চহি ৫০ মপুংফারকপগী পুৱারি ওইরবা থৌরম অমদা ঐ লাক্লি অমসুং ঐখোয়না ইন্দিয়া-সেলচেল কুতনিতিগী মরী লৈনরকপা চহি ৫০ মপুংফারকপগী থৌরমসু পাংথোক্লি।

চহি ৫০ গী খোঙচৎশিং অসিদা, মীয়ামগী য়াইফনবগীদমক ঐখোয়না মরুপ-মপাংগী মরী অসি থাজনবা, থাজনবা অসি মতেং পাংনবা অমসুং পুন্না থবক তৌমিন্নবদা ওন্থোক্লে।

মরুপশিং,

চহি চা কয়া ভারত অমসুং সেলচেলগী মরীশিং ভারত মহাসাগরনা ঈথৈ পীরে। মসিগী ইথকশিংনা ঐখোয়গী মরক্ত লৈনরিবা ললোন-ইতিক, নাৎ অমসুং মীওইবগী মরীশিং ফগৎহল্লে।

ভারত মহাসাগর অসি ঐখোয়গী লৈমিন্নরিবা য়ুমনি হায়না ঐখোয়না খল্লি; মসিগী সেকুরিতি, তুংকোইনা লৈহনবা অমসুং নুংঙাই য়াইফবা ঐখোয়গী থৌদাংনি। মসিগী ৱাখল্লোন অসি ঐখোয়গী মহাসাগর ভিজনগী য়ুম্ফমনি।

মরুপশিং,

চহি অসিগী ফেব্রুৱারিদা রাষ্ট্রপতিগী ভারত খোঙচৎ মনুংদা ফোঙখিবা জোইন্ত ভিজন্না ঐখোয়গী তুংগী মরীগী ব্লুপ্রিন্ত শেম্লে। মাঙলোমদা চঙশিন্দুনা, হিরম খুদিংমক্ত ঐখোয় পুন্না থবক তৌমিন্নবা হেনগৎলক্লে।

ঐখোয়গী শেন-থুমগী মতেং পাংনবা হেন্না অৱাবা মায়োক্নবা ঙম্নবা অমসুং তুংগীদমক থৌরাং তৌনবা ঙসি ঐখোয় খন্নরে। লৈবাক অনিমক্কী উদ্যোগশিংগী অনৌবা খুদোংচাবশিং ঐখোয়না মখা তানা থিগনি।

ভারত অমসুং সেলচেলগী মরক্ত চৎথোক-চৎশিন ফগৎহন্নবসু ঐখোয়না থবক পায়খৎকনি। মসিনা ললোন-ইতিক চাউখৎহনবা খক নত্তনা, নোংপোক অফ্রিকা অমসুং ভারত মহাসাগর লমদমগা লৈনবা মরীশিংসু ফগৎহনগনি।

লৈবাক অনিগী মরক্ত লৈনরিবা অরাপ্পা হন্থহনবদা দিজিতেল তেক্নোলোজিনা অফবা পাম্বৈ অমনি হায়বা ঐখোয়না থাজৈ। দিজিতেল পব্লিক ইনফ্রাষ্ট্রকচরদা ভারতকী মাইপাক্লবা থবকশিং ঐখোয়না সেলচেলদা পীগনি। সেচেলদা য়ু.পি.আই চৎনবা হৌনবা ঙসি এম.ও.য়ু অমা খুৎয়েক পীনবদা ঐ অপেনবা ফাওই।

মরুপশিং,

চাউখৎ-থৌরাংগী মতেং পাংনবা অসি ঐখোয়গী মরীগী অকনবা শক্তম অমনি। সেচেলগী মরুওইবশিং, অনিংবশিং অমসুং দরকার ওইবশিং ভারতনা মতম পুম্নমক্ত মরুওইনা লৌরি।

রাষ্ট্রপতিগী ভারত খোঙচৎ মনুংদা, ঐখোয়না দোল্লর মিল্লিয়ন ১৭৫ গী অখন্নবা ইকোনোমিক পেকেজ অমা লাউথোকখ্রে। পেকেজ অসিগী মখাদা, মীয়ামগী য়ুম শাবা, ত্রান্সপোর্ত, স্কিল লৈহনবা, চীঞ্জাক ফংহনবা, লাইরিক-লাইশু অমসুং ঙাক-শেনগুম্বা হিরমশিংদা ঐখোয় থবক পায়খৎলি। সেচেলগী হুমেন রিছোর্স দিবলপমেন্তদা মতেং পাংনবা অসি ভারতকী অখন্নবা মরুওইবা অমনি।

সেচেলগী সিবিল সর্ভেন্তশিং ত্রেনিং পীবদা ঐখোয়না মতেং পাংবদা ঐ হরাওই। ঙসি ভর্চুএল ওইনা প্রোফেসনেল অমসুং তেক্নিকেল সেন্তর শানবা উরেপ-উয়ুং তম্লে। সেন্তর অসিনা লাক্লিবা চহিশিংদা সেচেলগী নহারোলশিংগী স্কিলশিং, থবক ফংবা ঙম্বা অমসুং থাজবা অনৌবা থাকশিংদা পুখৎপা ঙমগনি হায়না ঐখোয়না থাজৈ।

মরুপশিং,

হকশেলগী লমদা ঐখোয় মতেং পাংনরকপা মতম কুইরবনি। কোবিদ-১৯ গী অৱাবা মতম মনুংদা তিকাশিং ফংহন্দুনা ঐখোয়না মরুপ অমা ওইবগী থৌদাং পাংথোকখ্রে। জন ঔশাধিগী ঙসি খুৎয়েক পীনখিবা এম.ও.য়ুনা সেচেলগী মীয়ামদা অফবা অমসুং মমল হোংবা হিদাক-লাংথকশিং ফংহনবদা মতেং পাংগনি। কেপাসিতি বিল্দিং অমসুং ত্রেনিংগী খুৎথাংদা ঐখোয়না মখা তানা সেচেলগী মেদিকেল ইজুকেসন ফগৎহনগনি।

ঐখোয় মখা তানা ইনর্জি অমসুং ক্লাইমেত এক্সন্দা মতেং পাংগনি। গ্রিন হায়দ্রোজেন য়াওনা ক্লিন ইনর্জিগী অনৌবা হিরমশিংদা ঐখোয় মখা তানা মতেং পাংনগনি। ব্লু ইকোনোমি অসি ঐখোয়গী মরীগী মরুওইবা হিরম অমনি।

ওসিন ওবজার্বেসন, মেরিন সাইন্স অমসুং কোষ্টেল মেনেজমেন্তদা ভারতকী অখঙবশিং সেচেলদা পীগনি। স্পেসকী লমদা, ঐখোয় পুন্না মাঙলোমদা চৎমিন্নরি। ঙসি হিরম অসিদা লৈবাক অনিগী মরক্ত এম.ও.য়ু অমা খুৎয়েক পীনবদা ঐ অপেনবা ফাওই।

ভারত অমসুং সেচেলগী দিফেন্স অমসুং সেকুরিতি অসি তৎন-থানবা য়াদ্রবনি হায়বা ঐখোয়না থাজৈ। মাইকৈ অসিদা ঐখোয় মখা তানা চেৎনা থবক তৌমিন্নগনি।

মরুপশিং,

ভারত-সেচেলগী মরীশিংগী অশেংবা মপাঙ্গলদি ঐখোয়গী মীগা-মীগা লৈনবা মরীশিংনি। ঙসি ঐখোয় খন্ন-নৈনবা অসিনা মরী অসি মখা তানা ফগৎহনগনি। লৈবাক অনিমক্কী শান্নরোয়শিংগী মরক্ত মখা তানা মতেং পাংনবা হেনগৎহন্নবা ঐখোয়না ইন্সতিতুৎশিং মতেং পাংনগনি।

সেচেলদা য়োগ অমসুং ভারতকী ফিল্মশিং পাম্নবা অসিনা ঐখোয়গী নাৎকী মরীশিংগী মমি তারে। মসিগা চপ মান্নবা ৱাখল্লোন্দা, লৈবাক অনিগী মীওইশিং, মরুওইনা নহারোলশিংগী মরক্ত শম্নবা হেনগৎহন্নবা ঐখোয়না মখা তানা থবকশিং পায়খৎকনি।

মরুপশিং,

সেচেলদা ঐনা লাকপগী পাউজেল ময়েক শেংলে: মেরিতাইম সেকুরিতিগা লোয়ননা শেন-থুম চাউখৎপা লৈবা ভারত মহাসার অমা ভারতনা মঙ মঙলি; মসিদা ঐখোয়গী মরীশিং অমনা অমবু ইকায়খুম্নবা অমসুং থাজবদা য়ুম্ফম ওইগনি, পাক-চাউবদা ওইরোই; অমসুং অনকপা খক নত্তনা, ঐখোয়না লৈবাক খুদিংমক্কা চৎমিন্নরি।

ঐখোয়গী পান্দমদি ভারত মহাসাগর অসি খুদোংচাবগী সমুদ্র অমা ওইহনবনি।

ইকায়খুম্নরবা,

হৌখিবা চহি ৫০ দা ঐখোয়গী মরী অসি অচেৎপা থাজবা অমসুং চাউখৎপা শরুক য়ামিন্নবা অমা ওইদুনা লাক্লি। মথং চহি ৫০ অসিনা ইন্নোবেসন, তুংকোইনা চৎনবা য়াবা অমসুং নুংঙাইবা শরুক য়ামিন্নবা অমা ওইগনি।

অদোম্না ভারত্ত উৎলিবা মরুপ-মপাংগী ওইবগী মরী অমসুং ঐখোয়গী মরীশিংদা অদোমগী অচেৎপা থাজবগীদমক ঐনা অদোম অমুক হন্না থাগৎচরি।

ময়াম পুম্নমক ঙমখৈ লৈতনা থাগৎচরি।

***