યોર એક્સલન્સી, ડૉક્ટર પેટ્રિક એર્મિની, બંને દેશોના પ્રતિનિધિઓ, મીડિયાના સાથીઓ,

નમસ્કાર

અમારા સ્નેહપૂર્ણ સ્વાગત અને આતિથ્ય-સત્કાર માટે હું રાષ્ટ્રપતિ એર્મિનીનો હાર્દિક આભાર વ્યક્ત કરું છું.

તેમના દ્વારા “બ્લુ હોરાઇઝનના રક્ષક” થી સન્માનિત કરવામાં આવવું મારા માટે અને 140 કરોડ ભારતવાસીઓ માટે અત્યંત હર્ષનો વિષય છે. હું આ સન્માનને વિનમ્રતાપૂર્વક સ્વીકારતા, તે બધા દેશોને સમર્પિત કરું છું, જે આબોહવા પરિવર્તનના પડકાર સામે લડી રહ્યા છે અને પર્યાવરણ સંરક્ષણને ભાવી પેઢીઓ પ્રત્યે પોતાની જવાબદારી માને છે.

મિત્રો,

મારી યાત્રા એવા ઐતિહાસિક અવસરે થઈ રહી છે, જ્યારે સેશેલ્સ પોતાની સ્વતંત્રતાના પચાસ વર્ષ પૂરા કરી રહ્યું છે અને આપણે ભારત-સેશેલ્સ રાજદ્વારી સંબંધોની પણ પચાસમી વર્ષગાંઠ મનાવી રહ્યા છીએ.

આ પચાસ વર્ષોની યાત્રામાં આપણે મિત્રતાને વિશ્વાસમાં, વિશ્વાસને સહયોગમાં, અને સહયોગને જન-કલ્યાણમાં બદલ્યો છે.

મિત્રો,

હિંદ મહાસાગરે સદીઓથી ભારત અને સેશેલ્સના સંબંધોને સીંચ્યા છે. જેના મોજાંઓએ આપણા વચ્ચે વ્યાપાર, સંસ્કૃતિ અને માનવીય સંબંધોને નિરંતર પોષિત કર્યા છે.

અમારો વિશ્વાસ છે કે હિંદ મહાસાગર આપણું સહિયારું ઘર છે; આની સુરક્ષા, ટકાઉપણું અને સમૃદ્ધિ આપણી સામૂહિક જવાબદારી છે. આ જ ભાવના આપણા મહાસાગર વિઝનનો આધાર છે.

મિત્રો,

આ વર્ષે ફેબ્રુઆરીમાં રાષ્ટ્રપતિજીની ભારત યાત્રા દરમિયાન જાહેર કરવામાં આવેલા સંયુક્ત વિઝનથી આપણી ભાવી ભાગીદારીની રૂપરેખા તૈયાર થઈ છે. આના પર આગળ વધતા દરેક ક્ષેત્રમાં આપણો સહયોગ મજબૂત થઈ રહ્યો છે.

આજે આપણે આપણા આર્થિક સહયોગને વધુ સ્થિતિસ્થાપક અને ભવિષ્ય માટે તૈયાર બનાવવા પર ચર્ચા કરી. આપણે બંને દેશોના ઉદ્યોગો માટે નવી તકોની શોધ ચાલુ રાખીશું.

ભારત અને સેશેલ્સ વચ્ચે જોડાણ વધારવા પર પણ કામ કરવામાં આવશે. આનાથી આપણો વ્યાપાર તો વધશે જ, સાથે-સાથે પૂર્વ આફ્રિકા અને હિંદ મહાસાગર ક્ષેત્ર સાથેના સંબંધોને પણ બળ મળશે.

અમારો વિશ્વાસ છે કે ડિજિટલ ટેક્નોલોજી બંને દેશો વચ્ચેનું અંતર ઓછું કરવાનું પ્રભાવી માધ્યમ છે. અમે ડિજિટલ પબ્લિક ઇન્ફ્રાસ્ટ્રક્ચરમાં ભારતના સફળ અનુભવને સેશેલ્સ સાથે શેર કરીશું. અને મને પ્રસન્નતા છે કે આજે યુપીઆઈને સેશેલ્સમાં લાગુ કરવા માટે સમજૂતી જ્ઞાપન કરવામાં આવી રહ્યા છે.

મિત્રો,

વિકાસ ભાગીદારી આપણા સંબંધોની મજબૂત ઓળખ રહી છે. ભારત હંમેશા સેશેલ્સની પ્રાથમિકતાઓ, આવશ્યકતાઓ અને આકાંક્ષાઓને કેન્દ્રમાં રાખીને આગળ વધી રહ્યું છે.

રાષ્ટ્રપતિજીની ભારત યાત્રા દરમિયાન આપણે 175 મિલિયન ડૉલરના વિશેષ આર્થિક પેકેજની ઘોષણા કરી હતી. જે અંતર્ગત સામાજિક આવાસ, પરિવહન, કૌશલ્ય, ખાદ્ય સુરક્ષા, શિક્ષણ અને સંરક્ષણ જેવા ક્ષેત્રોમાં કામ કરવામાં આવી રહ્યું છે. સેશેલ્સના માનવ સંસાધન વિકાસમાં સહયોગ ભારતની વિશેષ પ્રાથમિકતા રહી છે.

મને આનંદ છે કે અમે સેશેલ્સના સિવિલ સર્વન્ટ્સની તાલીમમાં યોગદાન આપી રહ્યા છીએ. આજે પ્રોફેશનલ અને ટેકનિકલ સેન્ટરનું વર્ચ્યુઅલ ભૂમિપૂજન પણ કરવામાં આવી રહ્યું છે. અમારો વિશ્વાસ છે કે આ સેન્ટર આવનારા સમયમાં સેશેલ્સના યુવાનોના કૌશલ્ય, રોજગાર અને આત્મવિશ્વાસને નવી ઊંચાઈ આપશે.

મિત્રો,

આરોગ્યના ક્ષેત્રમાં આપણી ભાગીદારી સમયની કસોટી પર ખરી ઉતરી છે. કોવિડના મુશ્કેલ સમયમાં રસીઓની આપૂર્તિથી આપણે એક મિત્રના રૂપમાં પોતાની જવાબદારી નિભાવી.

આજે જન ઔષધિ પર કરવામાં આવેલા સમજૂતી જ્ઞાપનથી સેશેલ્સના લોકોને ગુણવત્તાયુક્ત અને પરવડે તેવી દવાઓ ઉપલબ્ધ કરાવવામાં સહયોગ મળશે. આપણે ક્ષમતા નિર્માણ અને તાલીમના માધ્યમથી સેશેલ્સની તબીબી સંભાળને વધુ સશક્ત બનાવવાના પ્રયાસો કરતા રહીશું.

ઊર્જા અને આબોહવા કાર્યમાં પણ આપણો સહયોગ નિરંતર આગળ વધી રહ્યો છે. આપણે ગ્રીન હાઇડ્રોજન સહિત સ્વચ્છ ઊર્જાના નવા ક્ષેત્રોમાં પણ પરસ્પર લાભદાયી સહયોગ ચાલુ રાખીશું. બ્લુ ઇકોનોમી આપણા સંબંધોનું એક સ્વાભાવિક અને વ્યૂહાત્મક ક્ષેત્ર છે.

અમે સમુદ્ર અવલોકન, દરિયાઈ વિજ્ઞાન અને દરિયાકાંઠાના સંચાલનમાં ભારતની વિશેષજ્ઞતા સેશેલ્સ સાથે શેર કરીશું. અવકાશના ક્ષેત્રમાં આપણે મળીને આગળ વધી રહ્યા છીએ. મને ખુશી છે કે આ વિષય પર આજે બંને પક્ષો વચ્ચે સમજૂતી જ્ઞાપન કરવામાં આવ્યું છે.

અમારું માનવું છે કે ભારત અને સેશેલ્સનું સંરક્ષણ અને સુરક્ષા એકબીજાથી અભિન્ન છે. આપણે આ દિશામાં આપણો નજીકનો સહયોગ ચાલુ રાખીશું.

મિત્રો,

ભારત-સેશેલ્સ સંબંધોની અસલી શક્તિ આપણા પરસ્પર લોકો વચ્ચેના સંબંધો છે. આપણી આજની ચર્ચાઓથી આ સંબંધો વધુ મજબૂત થશે. બંને દેશોના રમતવીરો અને એથ્લેટ્સ વચ્ચે સહયોગ વધારવા માટે આપણે સંસ્થાકીય રીતે આગળ વધીશું.

સેશેલ્સમાં યોગ અને ભારતીય ફિલ્મ ઉદ્યોગની લોકપ્રિયતા આપણા સાંસ્કૃતિક જોડાણને દર્શાવે છે. આ જ ભાવના સાથે આપણે બંને દેશોના લોકો, વિશેષ કરીને યુવાનો વચ્ચે સંપર્ક વધારવાના પ્રયાસો ચાલુ રાખીશું.

મિત્રો,

મારી સેશેલ્સની યાત્રાનો સંદેશ સ્પષ્ટ છે: ભારત એવા હિંદ મહાસાગરની કલ્પના કરે છે, જ્યાં દરિયાઈ સુરક્ષા સાથે આર્થિક સમૃદ્ધિ પણ વધે; જ્યાં આપણી ભાગીદારી આકાર નહીં, પરસ્પર સન્માન અને વિશ્વાસ પર આધારિત હોય અને જ્યાં આપણે દરેક દેશની પાસે-પાસે નહીં, સાથે-સાથે ચાલીએ.

અમારું વિઝન હિંદ મહાસાગરને તકોનો મહાસાગર બનાવવાનું છે.

એક્સલન્સી,

આપણા સંબંધોના વિતેલા પચાસ વર્ષ ઊંડા વિશ્વાસ અને સહિયારી પ્રગતિના રહ્યા છે. આવનારા પચાસ વર્ષ નવીનતા, ટકાઉપણું અને સહિયારી સમૃદ્ધિના હશે.

હું એક વાર ફરી ભારત પ્રત્યે આપણી મિત્રતા અને આપણા સંબંધો પ્રત્યે આપની અતૂટ પ્રતિબદ્ધતા માટે આપનો આભાર વ્યક્ત કરું છું.

આપ સૌનો ખૂબ-ખૂબ ધન્યવાદ.

SM/IJ/JD