રેકજાવિકમાં ભારતીય દૂતાવાસે, એગ્રીકલ્ચરલ એન્ડ પ્રોસેસ્ડ ફૂડ પ્રોડક્ટ્સ એક્સપોર્ટ ડેવલપમેન્ટ ઓથોરિટી (APEDA)ના સહયોગથી, 24 જૂન 2026ના રોજ આઇસલેન્ડની રાજધાની રેકજાવિકમાં અને 25 જૂન 2026ના રોજ ઉત્તર આઇસલેન્ડના અકુરેરીમાં ઇન્ડિયન મેંગો પ્રમોશન ઇવેન્ટ્સનું આયોજન કર્યું હતું, જેમાં ભારતીય કેરીઓની સમૃદ્ધ વિવિધતા અને નિકાસ ક્ષમતાનું પ્રદર્શન કરવામાં આવ્યું હતું. આઇસલેન્ડમાં યોજાયેલા આ સૌપ્રથમવારના ઇન્ડિયન મેંગો પ્રમોશન કાર્યક્રમો હતા.

રાજદૂત આર. રવીન્દ્રએ ભારતની વિશ્વ વિખ્યાત કેરીની જાતોના વિશિષ્ટ ગુણો પર પ્રકાશ પાડ્યો હતો અને આઇસલેન્ડમાં ભારતીય કેરીની નિકાસ વધારવા માટેની નોંધપાત્ર તકો પર ભાર મૂક્યો હતો.

આઇસલેન્ડના વિદેશ મંત્રાલયના ટ્રેડ એગ્રીમેન્ટ્સના ડાયરેક્ટર શ્રી સ્વેન કે. આઈનારસને ભારત-EFTA ટ્રેડ એન્ડ ઈકોનોમિક પાર્ટનરશિપ એગ્રીમેન્ટ (TEPA) દ્વારા મળનારી તકો અને આઇસલેન્ડમાં ભારતીય કેરીની વધુ આયાત સુગમ બનાવવા માટેની તેની ક્ષમતા વિશે વાત કરી હતી.

આઇસલેન્ડિક ફેડરેશન ઓફ ટ્રેડના સેક્રેટરી જનરલ શ્રી ઓલાફુર સ્ટેફન્સને ભારતમાં આઇસલેન્ડિક વ્યવસાયો વચ્ચે વધી રહેલી રસરૂચિની નોંધ લીધી હતી અને ભારતીય કૃષિ ઉત્પાદનો, ખાસ કરીને કેરીની આયાત વધારવા માટેની ઉજ્જવળ સંભાવનાઓ પર પ્રકાશ પાડ્યો હતો.

દ્વિતીય સચિવ સુશ્રી અનીશા તોમરે ભારતના કેરીના ઉત્પાદન પર એક પ્રેઝન્ટેશન આપ્યું હતું, જેમાં વિશ્વમાં કેરીના સૌથી મોટા ઉત્પાદક તરીકે ભારતના સ્થાન પર પ્રકાશ પાડવામાં આવ્યો હતો. તેમણે ગુણવત્તા આશ્વાસન, બજાર પહોંચ અને આંતરરાષ્ટ્રીય પ્રમોશન દ્વારા કેરીની નિકાસને પ્રોત્સાહન આપવા માટે ભારત સરકારની પહેલોની રૂપરેખા પણ આપી હતી.

આ કાર્યક્રમોમાં ઉત્સાહજનક હાજરી જોવા મળી હતી, જેમાં આયાતકારો, રાજદ્વારી કોર્પ્સના સભ્યો, આઇસલેન્ડિક વ્યવસાયોના પ્રતિનિધિઓ અને આઇસલેન્ડના વિદેશ મંત્રાલયના અધિકારીઓ એકઠા થયા હતા.

મહેમાનોને ચાર પ્રીમિયમ ભારતીય કેરીની જાતો—દશેરી, ચૌસા, લંગડો અને કેસર પીરસવામાં આવી હતી—જેના અસાધારણ સ્વાદ, સુગંધ અને ગુણવત્તા માટે વ્યાપક પ્રશંસા કરવામાં આવી હતી. આ કાર્યક્રમોએ વ્યાપારી જોડાણોને મજબૂત કરવા, ભારતીય કૃષિ નિકાસને પ્રોત્સાહન આપવા અને ભારત તેમજ આઇસલેન્ડ વચ્ચે વધી રહેલી આર્થિક ભાગીદારીને વધુ ગાઢ બનાવવા માટે એક મૂલ્યવાન પ્લેટફોર્મ પૂરું પાડ્યું હતું.

આઇસલેન્ડ હાલમાં મુખ્યત્વે થાઇલેન્ડ, બ્રાઝિલ, કમ્બોડિયા, ઘાના અને પેરુથી કેરીની આયાત કરે છે. વૈકલ્પિક સપ્લાયર્સની મર્યાદિત ઉપલબ્ધતાને કારણે આ કેરીઓએ આઇસલેન્ડિક માર્કેટમાં પોતાની હાજરી ઊભી કરી છે. આઇસલેન્ડ દ્વારા 2025માં આશરે USD 3.3 મિલિયનની કિંમતની કેરીની આયાત કરવામાં આવી હતી, જેમાંથી આશરે USD 1 મિલિયનની કિંમતની કેરી માત્ર થાઇલેન્ડથી આયાત કરવામાં આવી હતી. સ્થાનિક ગ્રાહકો સાથે મિશનની વાતચીત દરમિયાન જાણવા મળ્યું હતું કે આઇસલેન્ડના લોકો કેરીના શોખીન છે અને ખાસ કરીને સ્મૂધી, ડેઝર્ટ અને ફ્રૂટ સલાડમાં તેનો આનંદ માણે છે, જે આઇસલેન્ડિક માર્કેટમાં ભારતીય કેરી માટે આશાસ્પદ ક્ષમતા દર્શાવે છે.

SM/BS/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com