ঔদ্যোগিক আৰু বাণিজ্যিক এলপিজি গ্ৰাহকসকলৰ বাবে এক ডাঙৰ সকাহ দি চৰকাৰে অনা-ঘৰুৱা এলপিজি যোগানৰ ওপৰত থকা সকলো খণ্ডভিত্তিক নিষেধাজ্ঞা আঁতৰাই দিছে আৰু পশ্চিম এছিয়া সংকটৰ পূৰ্বে থকা পৰ্যায়লৈ যোগান পুনৰ ঘূৰাই আনিছে। তদুপৰি, সংকটৰ আৰম্ভণিতে বন্ধ কৰি দিয়া বাল্ক এলপিজি যোগানো সংকটৰ পূৰ্বৰ ব্যৱহাৰৰ তুলনাত ৫০% লৈ শিথিল কৰা হৈছে, যিয়ে বাণিজ্যিক আৰু ঔদ্যোগিক গ্ৰাহকসকলক বিশেষ সকাহ দিছে। অলপতে এলপিজি যোগান ব্যৱস্থাৰ উন্নতি হোৱাৰ পৰিপ্ৰেক্ষিতত এই যোগান পুনৰ সক্ৰিয় কৰা হৈছে।

পশ্চিম এছিয়া সংকটৰ সময়ত দেশীয় এলপিজি উৎপাদন বৃদ্ধি কৰাৰ বাবে চৰকাৰে অত্যাৱশ্যকীয় সামগ্ৰী আইনৰ অধীনত নিৰ্দেশ জাৰি কৰিছিল, য’ত C3-C4 ষ্টিমসমূহ  পেট্ৰ’কেমিকেল আৰু অন্যান্য ডাউনষ্ট্ৰীম ব্যৱহাৰৰ পৰা আঁতৰাই আনি একমাত্ৰ এলপিজি উৎপাদনৰ বাবে ব্যৱহাৰ কৰাটো বাধ্যতামূলক কৰা হৈছিল।

দেশীয় এলপিজি উৎপাদনৰ উন্নতি আৰু আমদানিকৃত এলপিজি কাৰ্গ’ৰ সম্ভাৱ্য উপলব্ধতাৰ প্ৰতি লক্ষ্য ৰাখি চৰকাৰে C3/C4 ষ্টিমসমূহ এলপিজি পুললৈ কৰা ডাইভাৰ্চন হ্ৰাস কৰাৰো সিদ্ধান্ত লৈছে।

অনা-এলপিজি ব্যৱহাৰৰ বাবে C3-C4 ষ্টিমৰ এই বৰ্ধিত আবণ্টন এনেদৰে কাৰ্যকৰী কৰা হ’ব যাতে ঘৰুৱা এলপিজিৰ উপলব্ধতা অপৰিৱৰ্তিত থাকে আৰু সৰ্বমুঠ দেশীয় এলপিজি উৎপাদন দৈনিক মৰ্যাদা ৪০ টিএমটিতকৈ কম নহয়।

মন্ত্ৰালয়ৰ অধীনস্থ 'চেণ্টাৰ অৱ হাই টেকন’লজী'ক পেট্ৰ’কেমিকেল আৰু অন্যান্য গুৰুত্বপূৰ্ণ খণ্ডসমূহৰ বাবে এই বৰ্ধিত C3/C4 ষ্টিমৰ প্ৰতিষ্ঠানভিত্তিক আবণ্টন জাৰি কৰিবলৈ আৰু মন্ত্ৰালয়লৈ নিয়মীয়া প্ৰতিবেদন দাখিল কৰিবলৈ নিৰ্দেশ দিয়া হৈছে।

পশ্চিম এছিয়া সংকটৰ বাবে গোলকীয় যোগান ব্যৱস্থাত হোৱা ব্যাঘাতৰ আৰম্ভণিৰে পৰা চৰকাৰে দেশজুৰি ঘৰুৱা গ্ৰাহকসকলৰ বাবে এলপিজিৰ নিৰৱচ্ছিন্ন উপলব্ধতা নিশ্চিত কৰাত সৰ্বোচ্চ অগ্ৰাধিকাৰ দি আহিছে। ইয়াৰ সৈতে সংগতি ৰাখি, বাণিজ্যিক পেকেটযুক্ত এলপিজি যোগানৰ ওপৰত সাময়িক নিষেধাজ্ঞা আৰোপ কৰা হৈছিল। সময়োপযোগী নীতিগত হস্তক্ষেপ আৰু তেল বিপণন কোম্পানীসমূহৰ সমন্বিত প্ৰচেষ্টাই গোলকীয় যোগান শৃংখলাৰ প্ৰত্যাহ্বান স্বত্বেও সুস্থিৰ যোগান বজায় ৰখাত সহায় কৰিলে।

চৰকাৰে তৈল বিপণন কোম্পানীসমূহক বাণিজ্যিক আৰু ঔদ্যোগিক এলপিজি গ্ৰাহকসকলৰ বিস্তৃত তথ্য সংৰক্ষণ কৰি থাকিবলৈ নিৰ্দেশ দিছে যাতে দক্ষ পৰিকল্পনা আৰু যোগান ব্যৱস্থাপনা সহজসাধ্য হয়। নিৰীক্ষণ আৰু কাৰ্যক্ষম সমন্বয় শক্তিশালী কৰিবলৈ তৈল বিপণন কোম্পানীসমূহৰ মাজত এটা একীকৃত খণ্ডভিত্তিক ডাটাবেচো বজায় ৰখা হ’ব।

একে সময়তে, চৰকাৰে পিএনজি সংযোগ সম্প্ৰসাৰণৰ বাবে দায়বদ্ধ হৈ আছে। যিসকল বাণিজ্যিক আৰু বাল্ক গ্ৰাহকে ইতিমধ্যে পিএনজিলৈ স্থানান্তৰিত হৈছে, তেওঁলোক পিএনজিতেই থাকিব। পিএনজি নেটৱৰ্কৰ সুবিধা থকা বা পিএনজিলৈ স্থানান্তৰিত হোৱাৰ প্ৰক্ৰিয়াত থকা অন্যান্য যোগ্য এলপিজি গ্ৰাহকসকলক নগৰ গেছ বিতৰণ সংস্থাসমূহৰ সৈতে সমন্বয় ৰাখি পৰ্যায়ক্ৰমে পিএনজিলৈ পৰিৱৰ্তন কৰা হ’ব।

এই সন্দৰ্ভত, পেট্ৰ’লিয়াম আৰু প্ৰাকৃতিক গেছ মন্ত্ৰালয়ৰ সচিবে সকলো ৰাজ্য আৰু কেন্দ্ৰীয় শাসিত অঞ্চলৰ মুখ্য সচিবসকললৈ পত্ৰ প্ৰেৰণ কৰি সংশোধিত যোগান ব্যৱস্থা সুচাৰুৰূপে ৰূপায়ণ কৰাটো নিশ্চিত কৰিবলৈ জনাইছে।

এই সিদ্ধান্তই ৰাষ্ট্ৰীয় শক্তি সুৰক্ষা নিশ্চিত কৰাৰ ক্ষেত্ৰত চৰকাৰৰ সচেতন দৃষ্টিভংগীক প্ৰতিফলিত কৰে, য’ত দেশৰ শক্তিৰ প্ৰয়োজনীয়তাৰ সমতা ৰক্ষা কৰাৰ লগতে অধিক পৰিষ্কাৰ, সুৰক্ষিত আৰু অধিক দক্ষ ইন্ধনৰ সুলভতা সম্প্ৰসাৰণৰ প্ৰতি চৰকাৰৰ নিৰন্তৰ প্ৰতিশ্ৰুতি প্ৰকাশ পাইছে।

.

****

TM/DB