ઔદ્યોગિક અને વ્યાપારી એલપીજી (LPG) ગ્રાહકોને મોટી રાહત આપતા, સરકારે બિન-ઘરગથ્થુ પેક્ડ એલપીજીના પુરવઠા પરના તમામ ક્ષેત્રીય પ્રતિબંધો હટાવી દીધા છે અને પશ્ચિમ એશિયા (વેસ્ટ એશિયા) ની કટોકટી પહેલા પ્રવર્તતા સ્તરે પુરવઠો પુનઃસ્થાપિત કર્યો છે. વધુમાં, બલ્ક એલપીજીનો પુરવઠો, જે કટોકટીની શરૂઆતમાં સ્થગિત કરવામાં આવ્યો હતો, તેમાં કટોકટી પૂર્વેના વપરાશના સ્તરના 50% સુધીની છૂટછાટ આપવામાં આવી છે, જેનાથી વ્યાપારી અને ઔદ્યોગિક ગ્રાહકોને નોંધપાત્ર રાહત મળશે. એલપીજી પુરવઠાની સ્થિતિમાં તાજેતરમાં થયેલા સુધારાને પગલે આ પુનઃસ્થાપન કરવામાં આવ્યું છે.

પશ્ચિમ એશિયાની કટોકટી દરમિયાન, સ્થાનિક એલપીજી ઉત્પાદન વધારવા માટે, સરકારે આવશ્યક વસ્તુ ધારો (એસેન્શિયલ કોમોડિટીઝ એક્ટ) હેઠળ આદેશો જારી કર્યા હતા, જેમાં C3-C4 સ્ટ્રીમ્સનો ઉપયોગ પેટ્રોકેમિકલ અને અન્ય ડાઉનસ્ટ્રીમ ઉપયોગોમાંથી ડાયવર્ટ કરીને (વાળીને) ખાસ કરીને એલપીજી ઉત્પાદન માટે કરવો જરૂરી બનાવ્યો હતો.

સ્થાનિક એલપીજી ઉત્પાદનમાં થયેલા સુધારા અને આયાતી એલપીજી કાર્ગોની અંદાજિત ઉપલબ્ધતાને ધ્યાનમાં લઈને, સરકારે C3/C4 સ્ટ્રીમ્સને એલપીજી પૂલ તરફ વાળવાનું પ્રમાણ ઘટાડવાનો પણ નિર્ણય કર્યો છે.

બિન-એલપીજી ઉપયોગો માટે C3-C4 સ્ટ્રીમ્સની આ વધેલી ફાળવણી એ બાબત સુનિશ્ચિત કરીને અમલમાં મૂકવામાં આવશે કે સ્થાનિક એલપીજીની ઉપલબ્ધતા અપ્રભાવિત રહે અને કુલ સ્થાનિક એલપીજી ઉત્પાદન પ્રતિ દિવસ 40 TMT થી ઓછું ન હોય તે રીતે જાળવી રાખવામાં આવે.

મંત્રાલય હેઠળના સેન્ટર ફોર હાઇ ટેકનોલોજીને પેટ્રોકેમિકલ અને અન્ય મહત્વપૂર્ણ ક્ષેત્રો માટે આ વધેલા C3/C4 સ્ટ્રીમ્સની સંસ્થાવાર ફાળવણી જારી કરવા અને મંત્રાલયને નિયમિત અહેવાલો સબમિટ કરવા સૂચના આપવામાં આવી છે.

પશ્ચિમ એશિયાની કટોકટીથી ઉદ્ભવેલી વૈશ્વિક પુરવઠાની અડચણોની શરૂઆતથી જ, સરકારે દેશભરના ઘરગથ્થુ ગ્રાહકોને એલપીજીનો અવિરત પુરવઠો સુનિશ્ચિત કરવા માટે સર્વોચ્ચ પ્રાથમિકતા આપી છે. આના અનુસંધાને, વ્યાપારી પેક્ડ એલપીજીના પુરવઠા પર કામચલાઉ પ્રતિબંધો લાદવામાં આવ્યા હતા. સમયસરના નીતિગત હસ્તક્ષેપો અને ઓઇલ માર્કેટિંગ કંપનીઓ (OMCs) દ્વારા સંકલિત પ્રયાસોએ વૈશ્વિક સપ્લાય ચેઇનના પડકારો છતાં સ્થિર પુરવઠો જાળવી રાખવામાં મદદ કરી હતી.

સરકારે ઓઇલ માર્કેટિંગ કંપનીઓને વ્યાપારી અને ઔદ્યોગિક એલપીજી ગ્રાહકોનો વ્યાપક ડેટા જાળવી રાખવા નિર્દેશ આપ્યો છે જેથી કાર્યક્ષમ આયોજન અને સપ્લાય મેનેજમેન્ટ સરળ બની શકે. મોનિટરિંગ (દેખરેખ) અને ઓપરેશનલ સંકલનને મજબૂત કરવા માટે તમામ OMCs માં એકીકૃત ક્ષેત્રીય ડેટાબેઝ પણ જાળવવામાં આવશે.

આ સાથે જ, સરકાર પીએનજી (PNG) કનેક્ટિવિટીના વિસ્તરણ માટે પ્રતિબદ્ધ છે. જે વ્યાપારી અને બલ્ક ગ્રાહકો અગાઉથી જ પાઇપ્ડ નેચરલ ગેસ (PNG) પર શિફ્ટ થઈ ગયા છે, તેઓ પીએનજી પર જ રહેશે. અન્ય પાત્ર એલપીજી ગ્રાહકો કે જેઓ પીએનજી નેટવર્ક સુધી પહોંચ ધરાવે છે, અથવા જેઓ પીએનજી પર શિફ્ટ થવાની પ્રક્રિયામાં છે, તેઓને સિટી ગેસ ડિસ્ટ્રિબ્યુશન (CGD) સંસ્થાઓના સંકલન સાથે તબક્કાવાર રીતે પીએનજી પર સ્થાનાંતરિત કરવામાં આવશે.

આ સંદર્ભમાં, પેટ્રોલિયમ અને કુદરતી ગેસ મંત્રાલયના સચિવે સુધારેલી પુરવઠા વ્યવસ્થાઓનો સુચારુ અમલ સુનિશ્ચિત કરવા માટે તમામ રાજ્યો અને કેન્દ્રશાસિત પ્રદેશોના મુખ્ય સચિવોને પત્ર લખ્યો છે.

આ નિર્ણય રાષ્ટ્રીય ઊર્જા સુરક્ષા સુનિશ્ચિત કરવા તરફના સરકારના સભાન અભિગમને પ્રતિબિંબિત કરે છે, જે દેશની ઊર્જા જરૂરિયાતોને સંતુલિત કરવાની સાથે સ્વચ્છ, સુરક્ષિત અને વધુ કાર્યક્ષમ ઇંધણ સુધી પહોંચ વધારવાની તેની સતત પ્રતિબદ્ધતાને દર્શાવે છે.

SM/DK/JD