ભારતના ઉપરાષ્ટ્રપતિ શ્રી સી. પી. રાધાકૃષ્ણને આજે નવી દિલ્હીમાં ઉપરાષ્ટ્રપતિ ભવન ખાતે "VIP કલ્ચર ઇન ઇન્ડિયા: પાવર, પ્રિવિલેજ એન્ડ ધ ડિસ્ટન્સ ફ્રોમ ડેમોક્રસી" પુસ્તકનું વિમોચન કર્યું હતું અને જણાવ્યું હતું કે તેના લેખકો, અરુણાચલ પ્રદેશના પૂર્વ રાજ્યસભા સાંસદ શ્રી નબામ રેબિયા અને સહ-લેખક શ્રી સંદીપ કુમાર દ્વારા આ પુસ્તકમાં જે વિષયનું અન્વેષણ કરવામાં આવ્યું છે તે ભારતમાં લોકશાહી શાસન અને જાહેર જીવનના હાર્દને સ્પર્શે છે.

ઉપરાષ્ટ્રપતિએ જણાવ્યું હતું કે બંધારણ ન્યાય, સમાનતા, સ્વતંત્રતા અને બંધુત્વ પર આધારિત સમાજની કલ્પના કરે છે. તેમણે ભારપૂર્વક જણાવ્યું હતું કે લોકશાહીનો સાર નાગરિકો અને જાહેર સત્તા સોંપવામાં આવી હોય તેવા લોકો વચ્ચેના સંબંધોમાં રહેલો છે. તેમણે ઉમેર્યું હતું કે જ્યારે જાહેર પદને વિશેષાધિકારને બદલે એક જવાબદારી તરીકે જોવામાં આવે ત્યારે જ લોકશાહી ખીલે છે.

મહાન તમિલ સંત-કવિ તિરુવલ્લુવરને ટાંકીને ઉપરાષ્ટ્રપતિએ નોંધ્યું હતું કે સાચું નેતૃત્વ સુલભતા, કરુણા અને જવાબદારી દ્વારા ઓળખાય છે. તેમણે જણાવ્યું હતું કે જે નેતાઓ લોકો માટે સુલભ રહે છે અને તેમના પ્રત્યે આદરભાવ રાખે છે તેઓ કાયમી વિશ્વાસ અને પ્રશંસા મેળવે છે.

શ્રી સી. પી. રાધાકૃષ્ણને જણાવ્યું હતું કે આ પુસ્તકમાં અન્વેષણ કરાયેલી થીમ્સ પ્રધાનમંત્રી શ્રી નરેન્દ્ર મોદીના જાહેર પદને વિશેષાધિકારને બદલે સેવાના સાધન તરીકે જોવાના દ્રષ્ટિકોણ સાથે સુસંગત છે. મહાનુભાવો માટે લાલ બત્તીઓ નાબૂદ કરવાના પ્રધાનમંત્રીના નિર્ણય અને ટ્રાફિકના નિયંત્રણોને કારણે NEETના ઉમેદવારોને અસુવિધા ન થાય તે સુનિશ્ચિત કરવા માટે પોતાના પ્રસ્થાનમાં વિલંબ કરવાના તેમના તાજેતરના પગલાનો ઉલ્લેખ કરીને ઉપરાષ્ટ્રપતિએ જણાવ્યું હતું કે આવા કાર્યો નાગરિક-કેન્દ્રિત શાસનનું ઉદાહરણ પૂરું પાડે છે અને એ સિદ્ધાંતને વધુ મજબૂત કરે છે કે જાહેર સત્તા નાગરિકોની સેવા કરવા માટે અસ્તિત્વ ધરાવે છે. પ્રધાનમંત્રીના શબ્દોને યાદ કરતાં તેમણે કહ્યું કે, "દરેક ભારતીય વિશેષ છે. દરેક ભારતીય VIP છે." તેમણે ઉમેર્યું કે "સેવા એ જ પરમ ધર્મ છે."

ઉપરાષ્ટ્રપતિએ પૂર્વ પ્રધાનમંત્રી શ્રી લાલ બહાદુર શાસ્ત્રી અને અન્ય પ્રતિષ્ઠિત વ્યક્તિઓની સાદગી અને જાહેર સેવાના મૂલ્યો અંગે પુસ્તકમાં કરાયેલા ઉલ્લેખોની પણ પ્રશંસા કરી હતી. તેમણે નોંધ્યું હતું કે લેખકોએ ઉપનિષદ, રામચરિતમાનસ, ભગવાન બુદ્ધના ઉપદેશો અને પંચતંત્ર સહિત ભારતની સભ્યતા અને બૌદ્ધિક પરંપરાઓના સંદર્ભો દ્વારા પોતાના વિશ્લેષણને સમૃદ્ધ બનાવ્યું છે.

ગણતંત્રને વ્યાખ્યાયિત કરતા મૂલ્યો પ્રત્યે નવી પ્રતિબદ્ધતા માટે આહવાન કરતા ઉપરાષ્ટ્રપતિએ કાયદા સમક્ષ સમાનતા, દરેક નાગરિકની ગરિમા અને નમ્રતા તેમજ જવાબદારી દ્વારા માર્ગદર્શિત જાહેર સેવા પર ભાર મૂક્યો હતો. તેમણે જણાવ્યું હતું કે નેતૃત્વનું સાચું માપદંડ તે જે વિશ્વાસ મેળવે છે અને જે સેવા પ્રદાન કરે છે તેમાં રહેલું છે.

આ પ્રસંગે અરુણાચલ પ્રદેશના પૂર્વ મુખ્યમંત્રી શ્રી નબામ તુકી, મેઘાલયના પૂર્વ રાજ્યસભા સાંસદ શ્રી ડબલ્યુ. આર. ખારલુખી, લેખક શ્રી નબામ રેબિયા અને સહ-લેખક શ્રી સંદીપ કુમાર ઉપસ્થિત રહ્યા હતા.

SM/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com