জয় বাবা তাৰকনাথ! হৰ হৰ মহাদেৱ!

এই মঞ্চত উপবিষ্ট  ৰাজ্যপাল আৰ এন ৰবি জী, জনপ্ৰিয় আৰু শক্তিশালী মুখ্যমন্ত্ৰী শুভেন্দু  অধিকাৰী জী, অন্যান্য বিশিষ্ট বিশিষ্ট ব্যক্তিসকল  আৰু বংগৰ মোৰ ভাই-ভনী - বাবা তাৰকনাথৰ এই পবিত্ৰ ভূমি, ঐতিহাসিক পশ্চিম বংগ দিৱসত ইমান বৃহৎ সমাৱেশৰ উপস্থিতিত, নিৰ্বাচনৰ পিছত আৰু শপতগ্ৰহণ কৰাৰ পিছত  প্ৰথমবাৰৰ বাবে আপোনালোকৰ মাজত থাকিবলৈ পাই মই সন্মানিত অনুভৱ কৰিছো । বংগৰ বতাহে এতিয়া এক নতুন সতেজতা কঢ়িয়াই লৈ ফুৰে, প্ৰতিটো কণাই যেন এক নতুন সুগন্ধি বিয়পাই দিয়ে।  এনে লাগে যেন বংগ শিকলিৰ পৰা মুক্ত হৈছে, যেন বংগৰ গৌৰৱ ঘূৰি আহিবলৈ আৰম্ভ কৰিছে।

আজিৰ কাৰ্যসূচী, এই প্ৰকল্পসমূহৰ উদ্বোধনী, বংগৰ নতুন ভৱিষ্যত গঢ়ি তোলাৰ প্ৰতিশ্ৰুতিৰ সাক্ষী। ৰাইজৰ মুখৰ জিলিকনি, প্ৰতিখন গাঁৱৰ আনন্দ আৰু বিশ্বাস - মই ইয়ালৈ আহিছো আপোনালোকৰ সুখৰ ভাগ ল'বলৈ। এটা ভোট, এটা নিৰ্বাচন, ই কিমান পৰিৱৰ্তন আনিব পাৰে - এয়া বংগত স্পষ্টকৈ দেখা যায়।

পৰিবৰ্তন ভালো লাগছে তো?

 পশ্চিম বংগ দিৱসৰ এই উদযাপনৰ বাবে বংগবাসীলৈ আৰু দেশৰ সকলো নাগৰিকলৈ মোৰ আন্তৰিক অভিনন্দন জ্ঞাপন কৰিলোঁ।

বন্ধুসকল,

লগতে আপোনালোকৰ “স্বচ্ছতা সে স্বাগত” পদক্ষেপৰ প্ৰশংসা কৰি ইয়াৰ উষ্ম শলাগ ল’ব বিচাৰিছো। পৰিষ্কাৰ-পৰিচ্ছন্নতা আমাৰ দৈনন্দিন জীৱনৰ এক অবিচ্ছেদ্য অংগ হ’ব লাগিব। য'ত পৰিষ্কাৰ-পৰিচ্ছন্নতা আছে তাত উন্নয়ন আৰু সুন্দৰকৈ জিলিকি উঠিব। পৰিষ্কাৰ-পৰিচ্ছন্নতাৰে আদৰণি জনোৱাৰ বাবে আপোনালোকক আন্তৰিকতাৰে অভিনন্দন জনাইছো।

বন্ধুসকল,

এইবাৰৰ পশ্চিম বংগ দিৱসৰ দিনটো আৰু বিশেষ। স্বাধীনতাৰ পিছত বংগৰ উজ্জ্বল ভৱিষ্যতৰ বাবে কল্পনা কৰা সপোন, বংগৰ মহান আত্মাৰ দৃষ্টিভংগী - আজি প্ৰথমবাৰৰ বাবে আমি পশ্চিম বংগ দিৱসত সেই সপোনবোৰ বাস্তৱত পৰিণত হোৱা দেখিবলৈ পাইছো। এই ঐতিহাসিক তাৰিখ বংগৰ বিকাশৰ প্ৰেৰণা হওক, আমি এক নতুন আৰু গৌৰৱময় ইতিহাস সৃষ্টি কৰোঁ। আজি বিজেপি-এনডিএ চৰকাৰৰ অধীনত উন্নয়নৰ এক ভৱিষ্যৎ প্ৰচাৰ অভিযান আৰম্ভ হৈছে ঠিক এই উদ্দেশ্যে।

বন্ধুসকল,

দশক দশক ধৰি প্ৰথমে বাওঁপন্থী আৰু তাৰ পিছত টিএমচিয়ে বংগত দ গাঁত খান্দিছিল। সেই গাঁতবোৰ পূৰণ কৰিবলৈ ডাবল ইঞ্জিন চৰকাৰে তীব্ৰ গতিত  কাম আৰম্ভ কৰিছে। বজ্ৰপাতৰ গতিৰে সিদ্ধান্ত লোৱা হৈছে, স্তব্ধ প্ৰকল্প আগবাঢ়িছে। এই ধাৰাবাহিকত আজি শ শ কোটি টকাৰ উন্নয়নমূলক প্ৰকল্প উদ্বোধন কৰি ইয়াত আধাৰশিলা স্থাপন কৰা হৈছে। ৰে’ল, পথ, কৃষি, মীন পালন - এই প্ৰকল্পসমূহে বংগৰ উন্নয়নক নতুন গতি প্ৰদান কৰিব। ইয়াত গ্ৰাম্য অৰ্থনীতি শক্তিশালী কৰিব। এই প্ৰকল্পসমূহৰ বাবে বংগবাসীক অভিনন্দন জনাইছো। আজি প্ৰধানমন্ত্ৰী কিষাণ সন্মান নিধিৰ ২৩ সংখ্যক কিস্তিও মুকলি কৰা হৈছে। সমগ্ৰ দেশৰ ৯ কোটিৰো অধিক কৃষকৰ বেংক একাউণ্টত প্ৰায় ১৯ হাজাৰ কোটি টকা পোনপটীয়াকৈ হস্তান্তৰ কৰা হৈছে। সকলো হিতাধিকাৰী কৃষক পৰিয়াললৈ মোৰ শুভেচ্ছা জ্ঞাপন কৰিলোঁ।

বন্ধুসকল,

দাসত্বৰ যুগত বংগই অপৰিসীম দুখ-কষ্ট, অগণন ত্যাগ, অপৰিসীম ত্যাগ সহ্য কৰিছিল। ১৯৪৬ চনত কলকাতাত সংঘটিত হিংসাত্মক পৰিস্থিতি, নোৱাখালিৰ সংঘৰ্ষ  - কিমান নিৰীহ বঙালী মানুহ, কিমান বংগৰ লোকৰ  প্ৰাণ হেৰাই গ'ল।

ভাই-ভনীসকল,

বংগই  ৰক্তপাত সহ্য কৰিলে, বংগই নিজৰ বহু  হেৰুৱালে, বংগই দেখিলে নিজৰ মাতৃভূমি ছিন্নভিন্ন হৈ পৰিছে। তথাপিও বংগই নিজৰ পৰিচয় আৰু সত্তাক ধ্বংস হ’বলৈ নিদিলে। ফলত যেতিয়া সমগ্ৰ বংগক ভাৰতৰ পৰা পৃথক কৰাৰ ষড়যন্ত্ৰ চলিছিল, তেতিয়া পশ্চিম বংগৰ সৃষ্টিয়ে সেই পৰিকল্পনাবোৰ  সফল হ’বলৈ বাধা দিছিল। হাজাৰ হাজাৰ বছৰৰ সভ্যতা আৰু সংস্কৃতি, ইয়াৰ মূল বিশ্বাস আৰু পৰম্পৰা বহু সংগ্ৰামৰ অন্তত জীয়াই থাকিল। আৰু আজি সেই মূল্যবোধ আৰু পৰম্পৰা কেৱল পশ্চিমবংগতে সংৰক্ষিত হোৱাই নহয়, সেইবোৰ সজীৱ আৰু প্ৰাণৱন্ত। সেয়ে পশ্চিম বংগ দিৱস উদযাপনত আমি কেৱল এটা তাৰিখ স্মৰণ কৰা নাই - আমি এটা সম্পূৰ্ণ ইতিহাস মনত ৰাখিছো। আমি বংগৰ হাজাৰ বছৰীয়া ঐতিহ্যক শ্ৰদ্ধা জনাইছো।

বন্ধুসকল,

আজিৰ প্ৰজন্মক পশ্চিমবংগ দিৱসৰ গুৰুত্বৰ কথা বাৰে বাৰে সোঁৱৰাই দিয়াটো প্ৰয়োজনীয়। সেই সময়ত কি হৈছিল যুৱক-যুৱতীসকলে নিশ্চয় জানে। যেতিয়া সমগ্ৰ বংগক পাকিস্তানৰ অংশ হিচাপে গঢ়ি তোলাৰ প্ৰয়াস কৰা হৈছিল, তেতিয়া কংগ্ৰেছে সেই ষড়যন্ত্ৰকাৰীসকলৰ আগত শিৰণত কৰিছিল। আৰু তেতিয়াই ড° শ্যামা প্ৰসাদ মুখাৰ্জীয়ে ইয়াৰ বিৰুদ্ধে মাত মাতিছিল। ১৯৪৭ চনৰ এপ্ৰিল মাহত তেওঁ এক ঐতিহাসিক প্ৰস্তাৱ গ্ৰহণ কৰে। তেওঁ ঘোষণা কৰিলে যে সমগ্ৰ বংগ পাকিস্তানৰ অংশ নহ’ব। ইয়াৰ বাবে ড° শ্যামা প্ৰসাদ মুখাৰ্জীৰ নেতৃত্বত বঙালী হিন্দু গৃহভূমি আন্দোলন আৰম্ভ কৰা হয়। এই আন্দোলনত বিজ্ঞানী মেঘনাদ সাহা, ইতিহাসবিদ আৰ চি মজুমদাৰ আৰু যদুনাথ সৰকাৰ, ভাষাবিদ সুনীতি কুমাৰ চেটাৰ্জী, বংগৰ আন বহু বুদ্ধিজীৱী আদি বিশিষ্ট ব্যক্তিসকলে এই আন্দোলনত যোগদান কৰে। জি ডি বিৰলাৰ দৰে উদ্যোগীয়ে ইয়াক আগুৱাই লৈ গৈছিল। মতুৱা নেতা পি আৰ ঠাকুৰে সমৰ্থন কৰিছিল। বাতৰি কাকতত লেখা লিখা হৈছিল, গল্প প্ৰকাশ হৈছিল, বন্দে মাতৰমৰ মনোভাৱ পুনৰ জাগ্ৰত হৈ  উঠিছিল। সাম্প্ৰদায়িক এজেণ্ডাৰে দমন কৰা বংগৰ কণ্ঠ পুনৰ এই জন আন্দোলনৰ জৰিয়তে উঠি আহিল। ফলত ভাৰত বিৰোধী শক্তিসমূহে উপলব্ধি কৰিলে যে সমগ্ৰ বংগক ভাৰতৰ পৰা আঁতৰাই ৰখাটো অসম্ভৱ। আৰু এনেকৈয়ে পশ্চিম বংগ ভাৰত মাতৃৰ লগত থাকি গ’ল।

বন্ধুসকল,

স্বাধীনতাৰ সময়ত পশ্চিম বংগক যি মনোভাৱেৰে ৰক্ষা কৰা হৈছিল, সেই মনোভাৱ স্বাধীনতাৰ পিছতো আগুৱাই নিব লাগিছিল। দুৰ্ভাগ্যজনকভাৱে ইয়াৰ বিপৰীতহে হ’ল। পশ্চিম বংগ দিৱস আৰু ইয়াৰ প্ৰকৃত অৰ্থ পাহৰি যোৱাৰ প্ৰয়াস হৈছিল। ৰাজনৈতিক এজেণ্ডাৰ বাবে ইতিহাসক “ধূসৰ কৰি পেলোৱা হৈছিল।”

ভাই-ভনীসকল,

বিভাজনৰ সময়ত কংগ্ৰেছে বংগক পৰিত্যাগ কৰিব বিচাৰিছিল। বিভাজনৰ পিছত বাকী থকা পশ্চিম বংগতো ই তুষ্টিকৰণৰ খেল খেলিবলৈ আৰম্ভ কৰিলে। পশ্চিম বংগৰ এই ইতিহাস দমন কৰা হ’ল। কিয়নো শ্যামা প্ৰসাদ মুখাৰ্জী জনসংঘৰ প্ৰতিষ্ঠাপক হৈছিল, সেয়েহে তেওঁৰ অৱদানক অস্বীকাৰ কৰা হৈছিল। যি মনোভাৱেৰে তেওঁ বংগৰ হৈ যুঁজিছিল, সেই মনোভাৱেৰে অহৰহ লক্ষ্য কৰি লোৱা হৈছিল। গুৰুদেৱ ৰবীন্দ্ৰনাথ ঠাকুৰ, বংকিম চন্দ্ৰ চট্টোপাধ্যায়, স্বামী বিবেকানন্দ, নেতাজী সুভাষ চন্দ্ৰ বসু আৰু ঈশ্বৰ চন্দ্ৰ বিদ্যাসাগৰৰ জন্ম দিয়া ভূমিত বিদেশী মতাদৰ্শ জাপি দিয়া হৈছিল। প্ৰথমে কংগ্ৰেছ, তাৰ পিছত বাওঁপন্থী, তাৰ পিছত টিএমচি - দশক দশক ধৰি পশ্চিম বংগক লালন-পালন কৰি  শক্তিশালী কৰাৰ পৰিৱৰ্তে অবৈধ অনুপ্ৰৱেশকাৰীৰ কেন্দ্ৰ হ’বলৈ দিলে। ভাৰতৰ বিকাশৰ নেতৃত্ব দিব পৰা বংগখন আগবাঢ়ি যোৱাৰ পৰিৱৰ্তে পিছ পৰি থাকিল।

বন্ধুসকল,

পশ্চিমবংগ দিৱসত আমাৰ কৰ্তব্য হ’ল ইতিহাসৰ সেই ভুলবোৰ পুনৰাবৃত্তি নহ’ব বুলি প্ৰতিশ্ৰুতি দিয়া। পশ্চিম বংগ দিৱসৰ প্ৰেৰণাৰ পৰা ৰচিত হ’ব এক নতুন ইতিহাস।

বন্ধুসকল,

দশক দশক ধৰি চলি থকা অপশাসনে পশ্চিমবংগক বহু  মাইল পিছলৈ ঠেলি দিলে। আপোনালোকে  দেখিছে যে পূৰ্বৰ চৰকাৰসমূহৰ দিনত কেনেকৈ পৰিস্থিতিৰ অৱনতি ঘটিছিল। বৃহৎ উদ্যোগ বন্ধ হৈ  গ’ল, ক্ষুদ্ৰ ব্যৱসায়ৰ পতন ঘটিল, যুৱক-যুৱতীসকলে কৰ্মসংস্থাপন হেৰুৱালে, সম্পদসমূহ অনুপ্ৰৱেশকাৰীয়ে দখল কৰিলে। এসময়ত সুযোগৰ দেশ হিচাপে পৰিগণিত হোৱা বংগ  কেৱল অৱনতিৰ কেন্দ্ৰবিন্দু হৈ পৰিল। এই পৰিৱেশত আপোনালোকে  এটা প্ৰতিশ্ৰুতি লৈছিল - টিএমচি চৰকাৰক অপসাৰণ কৰা। আপোনালোকে  বিজেপিক অভিলেখ সংখ্যক  আসনেৰে আশীৰ্বাদ দিলে আৰু আজি সমগ্ৰ দেশেই প্ৰত্যক্ষ কৰিছে যে কেনেকৈ বংগই ইয়াৰ  ফলাফল লাভ কৰিছে। বছৰ বছৰ ধৰি আপোনালোকৰ পৰা বঞ্চিত হৈ থকা অধিকাৰ এতিয়া আপোনালোকৰ দুৱাৰমুখত উপনীত হৈছে। নিৰ্বাচনৰ সময়ত আয়ুষ্মান ভাৰত আঁচনিৰ নিশ্চয়তা দিছিলোঁ। এতিয়া বংগৰ প্ৰতিজন দৰিদ্ৰ ব্যক্তিয়ে লাভ কৰিব ইয়াৰ সুবিধা। অন্নপূৰ্ণা যোজনাৰ পৰা মাতৃ-ভগ্নীসকলে প্ৰত্যক্ষ সুবিধা লাভ কৰিবলৈ আৰম্ভ কৰিছে। প্ৰতিটো ঘৰতে বিশুদ্ধ পানী পোৱাটো নিশ্চিত কৰিবলৈ জল জীৱন অভিযানৰ অধীনত পশ্চিম বংগ চৰকাৰ আৰু কেন্দ্ৰীয় চৰকাৰৰ মাজত বুজাবুজি চুক্তি স্বাক্ষৰিত হৈছে। আমি নিৰ্বাচনৰ সময়ত বংগৰ যুৱক-যুৱতীসকলক প্ৰতিশ্ৰুতি দিছিলোঁ যে চাকৰিৰ বয়সৰ সীমা শিথিল কৰা হ’ব - সেই প্ৰতিশ্ৰুতি পূৰণ হ’ল৷ মহিলাসকলৰ বাবে বিনামূলীয়া বাছ যাত্ৰাৰ প্ৰতিশ্ৰুতিও পূৰণ হৈছে।

বন্ধুসকল,

বছৰ বছৰ ধৰি ৰাজনৈতিক প্ৰতিদ্বন্দ্বিতাই বহু আঁচনি আবদ্ধ কৰি ৰাখিছিল আৰু বিলম্ব ঘটিছিল। আজি সেই সকলোবোৰ বাধা ভাঙি জন কল্যাণ শিৱিৰৰ জৰিয়তে প্রতিখন চৰকাৰী আঁচনি আপোনালোকৰ ওচৰলৈ পোনপটীয়াকৈ গৈ আছে৷ কোনো মধ্যভোগী নাই, কোনো বাধা নাই -  আপোনালোকৰ অধিকাৰৰ ওপৰত, বংগৰ উন্নয়নৰ ওপৰত  আৰু বংগ তথা দেশৰ  নিৰাপত্তাৰ ওপৰত গুৰুত্ব দিয়ক। আপোনালোকে নিশ্চয় দেখিছে, পূৰ্বৰ চৰকাৰসমূহে দশক দশক ধৰি বাধা দি থকা সীমান্ত বেৰৰ বাবে ভূমি হস্তান্তৰ - নতুন চৰকাৰ গঠন হোৱাৰ লগে লগে ইয়াৰ কাম আৰম্ভ হৈছে।

ভাই-ভনীসকল,

মই আনন্দিত যে পশ্চিমবংগৰ ঔদ্যোগিক প্ৰগতিৰ ভেটি পুনৰ নিৰ্মাণ কৰিবলৈ আৰম্ভ কৰা হৈছে। এই ভেটি দুটা অপৰিহাৰ্য স্তম্ভৰ ওপৰত নিৰ্ভৰশীল - সৎ আৰু স্বচ্ছ শাসন ব্যৱস্থা, আৰু আইনৰ শাসন। কেৱল পশ্চিম বংগেই নহয়, সমগ্ৰ দেশখনে  আজি এই পৰিৱৰ্তন সাক্ষী হৈ আছে। আপোনালোকক লুণ্ঠন কৰা সকলে এতিয়া নিজে চুৰি হোৱা ধন ঘূৰাই দিছে। ডাঙৰ ডাঙৰ লুটপাতকাৰীক জেললৈ প্ৰেৰণ কৰা হৈছে। ছিণ্ডিকেটৰ সদস্যসকলে ৰাইজৰ ওচৰত ক্ষমা বিচাৰিছে। টোলগেটত ধন দাবী কৰাসকলে পলায়ন কৰিছে। বংগৰ জনসাধাৰণে বাধা নোহোৱাকৈ মুক্তভাৱে চলাচল কৰি আছে।

বন্ধুসকল,

দুৰ্বল পথ আৰু জৰাজীৰ্ণ আন্তঃগাঁথনিৰ সৈতে যুঁজি থকা বংগই  এতিয়া দীৰ্ঘদিনীয়া প্ৰকল্পসমূহ দ্ৰুতগতিত আগবাঢ়ি যোৱা দেখিবলৈ পাইছে। চাওক - চিংৰিঘাটা ক্ৰছিঙত কলকাতা মেট্ৰ’ৰ কমলা লাইনৰ বন্ধ হৈ থকা  কাম সম্পূৰ্ণ হৈছে। হাওৰাত প্ৰায় ১০০ কোটি টকা ব্যয় সাপেক্ষে এখন নতুন বিভাগীয় ৰে’ল চিকিৎসালয়ৰ ভেটি স্থাপন কৰা হৈছে। ইয়াৰ জৰিয়তে জৰুৰীকালীন সেৱা আৰু গুৰুতৰ ৰোগৰ চিকিৎসাৰ ব্যৱস্থা কৰা হ’ব। পূৱ মেদিনীপুৰত হাউৰ আৰু ৰাধামোহনপুৰৰ মাজৰ ৰোড অভাৰব্ৰীজ, আৰু সংক্ৰাইল–সন্ত্ৰগাছি লিংক লাইনৰ দৰে প্ৰকল্পই ৰাইজৰ সুবিধা বৃদ্ধি কৰিব।

বন্ধুসকল,

আজি প্ৰধানমন্ত্ৰী কিষাণ সন্মান নিধিৰ অধীনত সমগ্ৰ দেশৰ ৯ কোটিৰো অধিক কৃষকৰ বেংক একাউণ্টলৈ ধন  হস্তান্তৰ কৰা হৈছে। আৰু পশ্চিম বংগৰ কৃষকসকলৰ বাবে আন এক সুখৰ ঘোষণা - আজিৰ পৰা ৰাজ্যত আৰম্ভ হৈছে পি এম শস্য বীমা আঁচনি। এই আঁচনিখনে কৃষকৰ পৰিয়ালক কঠিন সময়ত সহায় কৰিব। শস্যৰ ক্ষতি হ’লে কৃষকৰ ওপৰত এতিয়া আৰু বোজা নপৰে।

বন্ধুসকল,

এতিয়া পশ্চিমবংগয়ো  ডিজিটেল কৃষি অভিযানত যোগদান কৰিছে। এগ্ৰি-ষ্টেকৰ জৰিয়তে কৃষকৰ পঞ্জীয়ন সৃষ্টি কৰা হ’ব। গাঁৱৰ মানচিত্ৰ আৰু শস্যৰ তথ্য ডিজিটেলভাৱে উপলব্ধ হ’ব। সাৰ ক্ৰয়, কৃষকৰ ক্ৰেডিট কাৰ্ড, ডিবিটি, আৰু নূন্যতম সমৰ্থন মূল্যত ক্ৰয়ৰ দৰে সেৱাসমূহ সহজ হৈ পৰিব।

বন্ধুসকল,

কৃষিৰ ক্ষেত্ৰত অতি পিছপৰা জিলাসমূহক উন্নীত কৰিবলৈ চৰকাৰে আৰম্ভ কৰিছে প্ৰধানমন্ত্ৰী ধন-ধান্য কৃষি যোজনা। পশ্চিম বংগৰ চাৰিখন জিলা - পুৰুলিয়া, দাৰ্জিলিং, আলিপুৰদুৱাৰ, আৰু ঝাৰগ্ৰাম - অন্তৰ্ভুক্ত কৰা হৈছে। উৎপাদনশীলতা বৃদ্ধি, মজুতকৰণৰ সুবিধা নিৰ্মাণ, কৃষকৰ বাবে ঋণ সহজ কৰি তোলাৰ কাম কৰা হ’ব। বংগত মীন পালনে কৃষক, মাছমৰীয়া, ব্যৱসায়ীক সংযোগ কৰিছে। সেয়েহে দক্ষিণ ২৪ পৰগনাত থকা ফ্ৰেজাৰগঞ্জ মাছ ধৰা বন্দৰৰ ক্ষমতা বৃদ্ধি কৰা হৈছে। বীৰভূমত এখন আধুনিক মাছৰ বজাৰো নিৰ্মাণ কৰা হৈছে। এতিয়া বংগ ৰৈ নাথাকিব।

বন্ধুসকল,

আজি দেশৰ বিভিন্ন প্ৰান্তৰ লাখ লাখ কৃষক এই কাৰ্যসূচীৰ সৈতে জড়িত হৈ আছে, লগতে বিভিন্ন ৰাজ্যৰ মুখ্যমন্ত্ৰী, ৰাজ্যপাল, মন্ত্ৰীও জড়িত হৈ আছে। সকলোতে কৃষকে অংশগ্ৰহণ কৰিছে। এই আটাইকেইজন কৃষক প্ৰধানমন্ত্ৰী কিষাণ সন্মান নিধিৰ হিতাধিকাৰী। মোৰ সকলো খেতিয়ক ভাই-ভনীলৈ এটা আন্তৰিক অনুৰোধ। অনুগ্ৰহ কৰি মন দি শুনিব। আপোনালোকৰ আগত হাতজোৰ কৰি কওঁ - আমি আমাৰ ল'ৰা-ছোৱালীক বন্যাৰ্ত পথাৰ এৰিব নালাগে, তেওঁলোকক সাৰুৱা পথাৰ এৰি দিব লাগিব। আমি আমাৰ পৃথিৱী মাতৃক বচাব লাগিব। ভাৰত চৰকাৰে চলাই আছে “খেতি বচাওক” অভিযান। ইয়াত মাটিৰ স্বাস্থ্য ৰক্ষা কৰা, ৰাসায়নিক সাৰৰ ব্যৱহাৰ হ্ৰাস কৰা, প্ৰাকৃতিক কৃষি গ্ৰহণ কৰাত গুৰুত্ব দিয়া হৈছে। মই আপোনালোকক আহ্বান জনাইছো যে এই অভিযানত বৃহৎ সংখ্যাত  যোগদান কৰক, আপোনালোকৰ পথাৰ ৰক্ষাৰ প্ৰতিশ্ৰুতি লওক, ওচৰৰ কৃষকসকলকো একে কাম কৰিবলৈ অনুপ্ৰাণিত কৰক আৰু একেলগে আমাৰ পৃথিৱী মাতৃক ৰক্ষা কৰক। তেওঁ  আমাৰ মা - ৰাসায়নিক দ্ৰব্যৰে  তেওঁক  হত্যা কৰাৰ দৰে  পাপ আমি কৰিব নোৱাৰো। আমি আমাৰ পৃথিৱী মাতৃক বচাব লাগিব।

বন্ধুসকল,

ভাৰতে ২০৪৭ চনৰ ভিতৰত এখন উন্নত ৰাষ্ট্ৰ হোৱাৰ লক্ষ্যৰ দিশত কাম কৰি আছে।এই সংকল্পৰ আটাইতকৈ ডাঙৰ ভেটি হৈছে পূব ভাৰতৰ উন্নয়ন। ইয়াৰ বাবে আমি মিছন পূৰ্বোদয়ৰ কাম কৰি আছো। এই অভিযানত বংগৰ ভূমিকা অতি গুৰুত্বপূৰ্ণ। বংগৰ অগ্ৰগতিৰ ফলত পূব ভাৰতৰ প্ৰগতিৰ গতি ত্বৰান্বিত হ’ব।

ভাই-ভনীসকল,

উন্নয়নৰ এই অভিযানত আমি আৰু এটা কথা মনত ৰাখিব লাগিব- উন্নয়নৰ প্ৰথম চৰ্ত, যিটো আমি কেতিয়াও পাহৰিব নালাগে, সেয়া হ’ল শান্তি, সম্প্ৰীতি, আৰু সামাজিক স্থিতিশীলতা। আমি বংগৰ সাংস্কৃতিক পৰিচয় আৰু সামাজিকতন্ত্ৰক শক্তিশালী কৰিব লাগিব। আমি একেলগে আগবাঢ়িব লাগিব।

বন্ধুসকল,

কাইলৈ ​​দেশ আৰু বিশ্বই আন্তঃৰাষ্ট্ৰীয় যোগ দিৱস পালন কৰিব। এইবাৰ মই বংগত যোগ দিৱসত অংশগ্ৰহণ কৰিম। স্বামী বিবেকানন্দ আৰু মহৰ্ষি অৰবিন্দৰ দৰে যোগীসকলৰ এই ভূমিয়ে সমগ্ৰ বিশ্বক পথ প্ৰদৰ্শন কৰিব পৰা বাৰ্তা প্ৰেৰণ কৰিব। মই বিচাৰো সমগ্ৰ বংগত, প্ৰতিটো চুকত যোগ দিৱস উদযাপনৰ আয়োজন কৰা হওক। আপোনালোক সকলোৱে যোগাসন কৰিব লাগে, যোগ দিৱসৰ অংশ হওক। এই অনুৰোধৰ সৈতে মই পুনৰবাৰ আপোনালোক সকলোকে উন্নয়নমূলক প্ৰকল্পসমূহৰ বাবে অভিনন্দন জনাইছো। আজি আমি উৎসাহ আৰু আনন্দৰে পশ্চিম বংগ দিৱস উদযাপন কৰাৰ সময়ত আপোনালোকক আহ্বান জনাইছো - মোবাইল ফোন উলিয়াই, টৰ্চ জ্বলাই লওঁক আৰু  এনেদৰে আমি সকলোৱে মিলি এই বংগ দিৱস উদযাপন কৰোঁ আহক। সকলো মোবাইলৰ লাইট জিলিকি উঠক আৰু মোৰ লগত কওক - ভাৰত মাতা কি জয়। ভাৰত মাতা কি জয়। ভাৰত মাতা কি জয়।

বন্দে মাতৰম। বন্দে মাতৰম। বন্দে মাতৰম।

বন্দে মাতৰম। বন্দে মাতৰম। বন্দে মাতৰম।

বন্দে মাতৰম।

আপোনালোকক অশেষ ধন্যবাদ।

****

MJPS/SS/VJ/ST/DM