ಮುಂಬೈ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ (ಎಂ.ಐ.ಎಫ್.ಎಫ್.) "ಯುವ ಚಲನಚಿತ್ರ ನಿರ್ಮಾಪಕರು ಸಾಕ್ಷ್ಯಚಿತ್ರಗಳನ್ನು ಮರು ವ್ಯಾಖ್ಯಾನಿಸುತ್ತಿದ್ದಾರೆಯೇ?" ಎಂಬ ಶೀರ್ಷಿಕೆಯ ಸಮಗ್ರ  ಚರ್ಚೆಯಲ್ಲಿ ಸಾಕ್ಷ್ಯಚಿತ್ರ ನಿರ್ಮಾಣದ ಭವಿಷ್ಯವು ಸುರಕ್ಷಿತ ಕೈಯಲ್ಲಿದೆ ಎಂದು ಸ್ಪಷ್ಟವಾದ ತೀರ್ಮಾನಕ್ಕೆ ಬರಲಾಯಿತು

ಜನಪ್ರಿಯ ಚಲನಚಿತ್ರ ನಿರ್ಮಾಪಕರಾದ ಪ್ರಬಲ್ ಖೌಂಡ್, ಬರಹಗಾರ-ಚಲನಚಿತ್ರ ನಿರ್ಮಾಪಕರಾದ ಪ್ರೀತಿ ಶರ್ಮಾ, ಉದಯೋನ್ಮುಖ ಚಲನಚಿತ್ರ ನಿರ್ಮಾಪಕರಾದ ಸಮಪ್ತಿ ದಾಸ್ ಮತ್ತು ಅನುಭವಿ ಚಲನಚಿತ್ರ ನಿರ್ಮಾಪಕ-ಶಿಕ್ಷಣ ತಜ್ಞರಾದ ಪ್ರೊ. ಹಿಮಾಂಶು ಶೇಖರ್ ಖತುವಾ ಅವರು ಸಮಗ್ರ  ಚರ್ಚೆಯಲ್ಲಿ ಭಾಗವಹಿಸಿದರು. ಹೊಸ ಪೀಳಿಗೆಯ ಕಥೆಗಾರರು ಸಾಕ್ಷ್ಯಚಿತ್ರ ಭೂದೃಶ್ಯವನ್ನು ಹೊಸ ದೃಷ್ಟಿಕೋನಗಳು, ತಾಂತ್ರಿಕ ನಾವೀನ್ಯತೆ ಮತ್ತು ಸಾಮಾಜಿಕ ವಾಸ್ತವಗಳಿಗೆ ಆಳವಾದ ಬದ್ಧತೆಯೊಂದಿಗೆ ಹೇಗೆ ಮರುರೂಪಿಸುತ್ತಿದ್ದಾರೆ ಎಂಬುದನ್ನು ಈ ಚರ್ಚೆಯು ಎತ್ತಿ ತೋರಿಸಿತು. ಎನ್.ಎಫ್.ಡಿ.ಸಿ ಯ ಚಲನಚಿತ್ರೋತ್ಸವಗಳ ಕಲಾತ್ಮಕ ನಿರ್ದೇಶಕ ಶ್ರೀ ಪಂಕಜ್ ಸಕ್ಸೇನಾ ಅವರು ಚರ್ಚಾ ಅಧಿವೇಶನವನ್ನು ನಿರ್ವಹಿಸಿಕೊಟ್ಟರು.

ಇಂದಿನ ಯುವ ಚಲನಚಿತ್ರ ನಿರ್ಮಾಪಕರು ಚಲನಚಿತ್ರ ನಿರ್ಮಾಣ ಪರಿಕರಗಳು ಮತ್ತು ವೇದಿಕೆಗಳಿಗೆ ಅಭೂತಪೂರ್ವ ಪ್ರವೇಶವನ್ನು ಆನಂದಿಸುತ್ತಾರೆ ಎಂದು ಪ್ರೊ. ಹಿಮಾಂಶು ಶೇಖರ್ ಖತುವಾ ಅವರು ಹೇಳಿದರು. "ಅವರು ಒಂದು ಕಲ್ಪನೆಯನ್ನು ಬೆಳೆಸಿಕೊಳ್ಳುತ್ತಾರೆ ಮತ್ತು ತಕ್ಷಣವೇ ಸೃಷ್ಟಿಯನ್ನು ಪ್ರಾರಂಭಿಸುತ್ತಾರೆ. ಹಿಂದಿನ ತಲೆಮಾರುಗಳಿಗಿಂತ ಭಿನ್ನವಾಗಿ, ಅವರು ಗೋಚರತೆಗಾಗಿ ಚಲನಚಿತ್ರೋತ್ಸವಗಳ ಮೇಲೆ ಸಂಪೂರ್ಣವಾಗಿ ಅವಲಂಬಿತವಾಗಿಲ್ಲ. ಡಿಜಿಟಲ್ ಪ್ಲಾಟ್ಫಾರ್ಮ್ಗಳು ಪ್ರೇಕ್ಷಕರನ್ನು ತಲುಪಲು ಹೊಸ ಮಾರ್ಗಗಳನ್ನು ತೆರೆದಿವೆ" ಎಂದು ಅವರು ಹೇಳಿದರು ಮತ್ತು ಸಾಕ್ಷ್ಯಚಿತ್ರ ಕಥೆ ಹೇಳುವಿಕೆಯ ಮೇಲೆ ಎಐ ಮತ್ತು ಉದಯೋನ್ಮುಖ ತಂತ್ರಜ್ಞಾನಗಳ ಹೆಚ್ಚುತ್ತಿರುವ ಪ್ರಭಾವವು ಚಲನಚಿತ್ರ ನಿರ್ಮಾಣದಲ್ಲಿ ಗುಣಮಟ್ಟ ಮತ್ತು ಬಹುಮುಖತೆಯನ್ನು ತರುತ್ತದೆ ಎಂದು ಹೇಳಿದರು.

ಪ್ರಸ್ತುತ ಒಡಿಶಾದ ಬಿಜು ಪಟ್ನಾಯಕ್ ಚಲನಚಿತ್ರ ಮತ್ತು ದೂರದರ್ಶನ ಸಂಸ್ಥೆಯ ಮುಖ್ಯಸ್ಥರಾಗಿರುವ ಅನುಭವಿ ಚಲನಚಿತ್ರ ನಿರ್ಮಾಪಕರಾದ ಇವರು, ಅರ್ಥಪೂರ್ಣ ಕಥೆ ಹೇಳುವಿಕೆಗೆ ಯುವ ಪೀಳಿಗೆಯ ಬದ್ಧತೆಯ ಬಗ್ಗೆ ವಿಶ್ವಾಸ ವ್ಯಕ್ತಪಡಿಸಿದರು. "ಯುವ ಚಲನಚಿತ್ರ ನಿರ್ಮಾಪಕರು ತಮ್ಮ ಸ್ವಂತ ಜೀವನ ಮತ್ತು ತಮ್ಮ ಸುತ್ತಲಿನ ಸಮಾಜದ ಬಗ್ಗೆ ಹೆಚ್ಚು ಆತ್ಮಾವಲೋಕನ ಮಾಡಿಕೊಳ್ಳುತ್ತಾರೆ. ಅವರು ಸಾಮಾಜಿಕ ಕಾಳಜಿಗಳಿಗೆ ಆಳವಾಗಿ ಬದ್ಧರಾಗಿದ್ದಾರೆ. ಸಾಕ್ಷ್ಯಚಿತ್ರ ನಿರ್ಮಾಣದ ಭವಿಷ್ಯವು ಅತ್ಯಂತ ಉಜ್ವಲವಾಗಿದೆ ಮತ್ತು ಮುಂಬರುವ ವರ್ಷಗಳಲ್ಲಿ ಮಹತ್ತರವಾಗಿ ಬೆಳೆಯುತ್ತದೆ ಎಂದು ನಾನು ನಂಬುತ್ತೇನೆ" ಎಂದು ಹೇಳಿದರು.

ಎಂ.ಐ.ಎಫ್.ಎಫ್. ನಲ್ಲಿ ಎರಡು ಚಲನಚಿತ್ರಗಳನ್ನು ಪ್ರದರ್ಶಿಸಿದ ಯುವ ಚಲನಚಿತ್ರ ನಿರ್ಮಾಪಕಿ ಸಮಪ್ತಿ ದಾಸ್ ಅವರು, ಯುವಕರಲ್ಲಿ ಸಾಕ್ಷ್ಯಚಿತ್ರ ನಿರ್ಮಾಣದ ಬಗ್ಗೆ ಹೆಚ್ಚಿನ ಜಾಗೃತಿ ಮೂಡಿಸಬೇಕೆಂದು ಕರೆ ನೀಡಿದರು. ಅನೇಕ ಮಹತ್ವಾಕಾಂಕ್ಷಿ ಚಲನಚಿತ್ರ ನಿರ್ಮಾಪಕರು ಮಾಧ್ಯಮವು ನೀಡುವ ಅವಕಾಶಗಳ ಬಗ್ಗೆ ತಿಳಿದಿಲ್ಲ ಎಂದು ಅವರು ಹೇಳಿದರು. "ಸಾಕ್ಷ್ಯಚಿತ್ರಗಳು ವಾಣಿಜ್ಯ ಸಿನಿಮಾಗೆ ಪರ್ಯಾಯವಲ್ಲ; ಅವು ಚಲನಚಿತ್ರ ನಿರ್ಮಾಪಕರನ್ನು ಗಮನಾರ್ಹ ಎತ್ತರಕ್ಕೆ ಕೊಂಡೊಯ್ಯಬಹುದು" ಎಂದು ಅವರು ಹೇಳಿದರು. ಅದೇ ಸಮಯದಲ್ಲಿ, ದಾಸ್ ಸಾಕ್ಷ್ಯಚಿತ್ರ ನಿರ್ಮಾಣದ ಕಠಿಣ ಸ್ವರೂಪವನ್ನು ಒತ್ತಿ ಹೇಳಿದರು ಮತ್ತು ಉದಯೋನ್ಮುಖ ಪ್ರತಿಭೆಗಳ ಮೇಲೆ ಹೆಚ್ಚಿನ ನಂಬಿಕೆ ಇಡುವಂತೆ ನಿರ್ಮಾಪಕರಿಗೆ ಕರೆ ನೀಡಿದರು.

ಸ್ವತಂತ್ರ ಚಲನಚಿತ್ರ ನಿರ್ಮಾಪಕಿ ಮತ್ತು ಬರಹಗಾರ್ತಿ ಪ್ರೀತಿ ಶರ್ಮಾ ಸಾಕ್ಷ್ಯಚಿತ್ರಗಳನ್ನು ನಿರ್ಮಿಸುವಲ್ಲಿನ ಸಮರ್ಪಣೆಯನ್ನು ಎತ್ತಿ ತೋರಿಸಿದರು, ಆಗಾಗ್ಗೆ ಸವಾಲಿನ ಸಂದರ್ಭಗಳಲ್ಲಿ. "ಹಲವು ಚಲನಚಿತ್ರ ನಿರ್ಮಾಪಕರು ಸೀಮಿತ ಸಂಪನ್ಮೂಲಗಳು, ಹಣಕಾಸಿನ ನಿರ್ಬಂಧಗಳು ಮತ್ತು ಮಾನವಶಕ್ತಿಯ ಕೊರತೆಯ ಹೊರತಾಗಿಯೂ ಸಾಕ್ಷ್ಯಚಿತ್ರವನ್ನು ರಚಿಸಲು ವರ್ಷಗಳನ್ನು ಕಳೆಯುತ್ತಾರೆ. ಪ್ರಯತ್ನವು ಅದ್ಭುತವಾಗಿದೆ. ಈ ಚಲನಚಿತ್ರಗಳು ಪ್ರೇಕ್ಷಕರನ್ನು ತಲುಪುವುದನ್ನು ಖಚಿತಪಡಿಸಿಕೊಳ್ಳುವುದು ದೊಡ್ಡ ಸವಾಲಾಗಿದೆ" ಎಂದು ಅವರು ಹೇಳಿದರು, ಯೂಟ್ಯೂಬ್  ಅನ್ನು ಮೀರಿದ ಇನ್ನೂ ಉತ್ತಮ ಹಾಗೂ  ಹೆಚ್ಚು ಔಪಚಾರಿಕ ಪ್ರದರ್ಶನ ಮತ್ತು ವಿತರಣಾ ವೇದಿಕೆಗಳಿಗಾಗಿ ಅವರು ಪ್ರತಿಪಾದಿಸಿದರು.

ಈಶಾನ್ಯ ಭಾರತದ ಸ್ಥಳೀಯ ಸಮುದಾಯಗಳನ್ನು ದಾಖಲಿಸುವ ತಮ್ಮ ಅನುಭವಗಳಿಂದ, ರಾಷ್ಟ್ರೀಯ ಪ್ರಶಸ್ತಿ ವಿಜೇತ ಚಲನಚಿತ್ರ ನಿರ್ಮಾಪಕ ಪ್ರಬಲ್ ಖೌಂಡ್ ಸಾಕ್ಷ್ಯಚಿತ್ರ ನಿರ್ಮಾಣದಲ್ಲಿ ಅಗತ್ಯವಿರುವ ತಾಳ್ಮೆ, ಸಾಂಸ್ಕೃತಿಕ ಸಂವೇದನೆ ಮತ್ತು ಪರಿಶ್ರಮದ ಬಗ್ಗೆ ಮಾತನಾಡಿದರು. ಬುಡಕಟ್ಟು ಸಂಪ್ರದಾಯಗಳು ಮತ್ತು ಆಚರಣೆಗಳನ್ನು ಚಿತ್ರೀಕರಿಸುವ ಸವಾಲುಗಳನ್ನು ವಿವರಿಸುತ್ತಾ, ಸಾಕ್ಷ್ಯಚಿತ್ರ ನಿರ್ಮಾಪಕರ ಕೆಲಸವನ್ನು ಸುಲಭ ಮತ್ತು ಹೆಚ್ಚು ಪ್ರಭಾವಶಾಲಿಯಾಗಿ ಮಾಡಲು ತಾಂತ್ರಿಕ ಪ್ರಗತಿಯನ್ನು ಅಳವಡಿಸಿಕೊಳ್ಳಬೇಕು ಎಂದು ಹೇಳಿದರು.

ಪ್ರೇಕ್ಷಕರ ಗ್ರಹಿಕೆಯಲ್ಲಿನ ಬದಲಾವಣೆಯನ್ನು ಎತ್ತಿ ತೋರಿಸುತ್ತಾ, ಮಾಡರೇಟರ್ ಪಂಕಜ್ ಸಕ್ಸೇನಾ ಅವರು, ಸಾಕ್ಷ್ಯಚಿತ್ರಗಳು ಹೆಚ್ಚಾಗಿ ಬೇಸರದೊಂದಿಗೆ ಸಂಬಂಧ ಹೊಂದಿದ್ದ ಸಮಯವಿತ್ತು ಎಂದು ಹೇಳಿದರು. "ಇಂದು, ಯುವ ಚಲನಚಿತ್ರ ನಿರ್ಮಾಪಕರು ವೈಯಕ್ತಿಕ ಅನುಭವಗಳು, ಮಾನವ ಹೋರಾಟಗಳು ಮತ್ತು ಸಾಮಾಜಿಕ ಬದಲಾವಣೆಯಲ್ಲಿ ಬೇರೂರಿರುವ ಕಥೆಗಳನ್ನು ಹೇಳುತ್ತಿದ್ದಾರೆ. ಅವರ ಉತ್ಸಾಹ ಮತ್ತು ವಿಶ್ವಾಸಾರ್ಹತೆ ಮಾಧ್ಯಮವನ್ನು ಪರಿವರ್ತಿಸುತ್ತಿವೆ" ಎಂದು ಅವರು ಹೇಳಿದರು.

ಚರ್ಚೆಯು ಮಿಶ್ರಿತ (ಹೈಬ್ರಿಡ್) ಸಾಕ್ಷ್ಯಚಿತ್ರಗಳು ಮತ್ತು ಸಾಕ್ಷ್ಯಚಿತ್ರ-ಕಾಲ್ಪನಿಕತೆಯಂತಹ ಉದಯೋನ್ಮುಖ ಸ್ವರೂಪಗಳನ್ನು ಸಹ ಅನ್ವೇಷಿಸಿತು. ಸಂಭಾಷಣೆಯ ಉದ್ದಕ್ಕೂ ಹೊರಹೊಮ್ಮಿದ ಒಂದು ಸಾಮಾನ್ಯ ನಂಬಿಕೆಯೆಂದರೆ ಸಮಕಾಲೀನ ಸಾಕ್ಷ್ಯಚಿತ್ರ ನಿರ್ಮಾಪಕರು ಸಾಂಪ್ರದಾಯಿಕ ವರದಿಗಾರಿಕೆಯನ್ನು ಮೀರಿ ಮಾನವ ಭಾವನೆಗಳು, ವೈಯಕ್ತಿಕ ಪ್ರಯಾಣಗಳು ಮತ್ತು ಜೀವಂತ ಅನುಭವಗಳೊಂದಿಗೆ ಆಳವಾಗಿ ತೊಡಗಿಸಿಕೊಳ್ಳುತ್ತಿದ್ದಾರೆ. ತಾಂತ್ರಿಕ ನಾವೀನ್ಯತೆ ಮತ್ತು ಸಾಮಾಜಿಕ ಬದ್ಧತೆಯೊಂದಿಗೆ ಸೇರಿಕೊಂಡು ಈ ಭಾವನಾತ್ಮಕ ದೃಢೀಕರಣವು ಸಾಕ್ಷ್ಯಚಿತ್ರಗಳು ಹಿಂದೆಂದಿಗಿಂತಲೂ ಹೆಚ್ಚಿನ ಪ್ರೇಕ್ಷಕರೊಂದಿಗೆ ಸಂಪರ್ಕ ಸಾಧಿಸಲು ಸಹಾಯ ಮಾಡುತ್ತಿದೆ.

*****