ಭಾರತದ ಜಾಗತಿಕ ಆರ್ಥಿಕ ತೊಡಗಿಸಿಕೊಳ್ಳುವಿಕೆಯಲ್ಲಿ ಒಂದು ಪ್ರಮುಖ ಹೆಜ್ಜೆಯಾಗಿ, ಸಮಗ್ರ ಆರ್ಥಿಕ ಮತ್ತು ವ್ಯಾಪಾರ ಒಪ್ಪಂದವು (CETA) 15 ಜುಲೈ 2026 ರಂದು ಜಾರಿಗೆ ಬರಲಿದೆ ಎಂದು ಭಾರತ ಮತ್ತು ಯುನೈಟೆಡ್ ಕಿಂಗ್‌ ಡಮ್ ಇಂದು ಪ್ರಕಟಿಸಿವೆ. ಇದು ದೇಶದ ಆರ್ಥಿಕ ರಾಜತಾಂತ್ರಿಕತೆಯಲ್ಲಿ ಹೊಸ ಅಧ್ಯಾಯವೊಂದಕ್ಕೆ ನಾಂದಿ ಹಾಡಲಿದೆ. ಅದೇ ಸಮಯದಲ್ಲಿ, ಸಾಮಾಜಿಕ ಭದ್ರತೆಯ ಮೇಲಿನ ಒಪ್ಪಂದ ಕೂಡ 15 ಜುಲೈ 2026 ರಂದು ಜಾರಿಗೆ ಬರಲಿದೆ. ಈ ಒಪ್ಪಂದವನ್ನು  ಡಬಲ್ ಕಾಂಟ್ರಿಬ್ಯೂಷನ್ ಕನ್ವೆನ್ಷನ್ (DCC) ಎಂದೂ ಕರೆಯಲಾಗುತ್ತದೆ. ಇದು ಯುನೈಟೆಡ್ ಕಿಂಗ್‌ಡಮ್‌ ನಲ್ಲಿರುವ ಭಾರತೀಯ ವೃತ್ತಿಪರರ ಚಲನಶೀಲತೆ ಮತ್ತು ಸ್ಪರ್ಧಾತ್ಮಕತೆಯನ್ನು ಬಲಪಡಿಸುತ್ತದೆ. ಅಲ್ಲದೆ, DCC ಅಡಿಯಲ್ಲಿನ ವಿನಾಯಿತಿ ಅವಧಿಯನ್ನು 3 ವರ್ಷಗಳಿಂದ 5 ವರ್ಷಗಳಿಗೆ ಹೆಚ್ಚಿಸಲಾಗಿದೆ, ಇದು ಭಾರತದ ತಾತ್ಕಾಲಿಕ ಕಾರ್ಮಿಕರಿಗೆ ಒಂದು ಪ್ರಮುಖ ಲಾಭವನ್ನು ತಂದುಕೊಟ್ಟಿದೆ.

ಎರಡೂ ಸರ್ಕಾರಗಳಿಂದ ಆಂತರಿಕ ಕಾರ್ಯವಿಧಾನಗಳು ಮತ್ತು ಅನುಮೋದನೆಗಳು ಯಶಸ್ವಿಯಾಗಿ ಪೂರ್ಣಗೊಂಡ ನಂತರ, ಈ ಒಪ್ಪಂದಗಳು 15 ಜುಲೈ 2026 ರಂದು ಅಧಿಕೃತವಾಗಿ ಜಾರಿಗೆ ಬರಲಿವೆ. "ವಿಕಸಿತ ಭಾರತ 2047"ರ ರಾಷ್ಟ್ರೀಯ ದೃಷ್ಟಿಕೋನಕ್ಕೆ ಅನುಗುಣವಾಗಿರುವ ಈ ಮೈಲಿಗಲ್ಲು, ಅತ್ಯಂತ ಅತ್ಯಾಧುನಿಕ ಹಾಗೂ ಸಮತೋಲಿತ ಆರ್ಥಿಕ ಚೌಕಟ್ಟನ್ನು ಕಾರ್ಯಗತಗೊಳಿಸುತ್ತದೆ, ಇದು ಪ್ರಮುಖ ಜಾಗತಿಕ ಆರ್ಥಿಕತೆಯೊಂದಿಗೆ ನೀತಿಯನ್ನು ಸಕ್ರಿಯ ದೈನಂದಿನ ವಾಣಿಜ್ಯವನ್ನಾಗಿ ಪರಿವರ್ತಿಸುತ್ತದೆ.

ಈ ಐತಿಹಾಸಿಕ ಒಪ್ಪಂದಕ್ಕೆ ಮೇ 2021ರಲ್ಲಿ ವರ್ಧಿತ ವ್ಯಾಪಾರ ಪಾಲುದಾರಿಕೆ ಮತ್ತು ಭಾರತ-ಯುಕೆ ಮಾರ್ಗಸೂಚಿ 2030 ಅನ್ನು ಅಳವಡಿಸಿಕೊಳ್ಳುವ ಮೂಲಕ ಅಡಿಪಾಯ ಹಾಕಲಾಯಿತು, ಇದು ದ್ವಿಪಕ್ಷೀಯ ಸಂಬಂಧಗಳನ್ನು ಸಮಗ್ರ ಕಾರ್ಯತಂತ್ರದ ಪಾಲುದಾರಿಕೆಯ ಮಟ್ಟಕ್ಕೆ ಏರಿಸುವ ಮತ್ತು 2030 ರ ವೇಳೆಗೆ ವ್ಯಾಪಾರವನ್ನು 100 ಶತಕೋಟಿ ಅಮೆರಿಕನ್ ಡಾಲರ್‌ಗಳಿಗೆ ದ್ವಿಗುಣಗೊಳಿಸುವ ಗುರಿಯನ್ನು ಹೊಂದಿದೆ.

ಹದಿನಾಲ್ಕು ತೀವ್ರ ಸುತ್ತಿನ ಮಾತುಕತೆಗಳ ನಂತರ, 6 ಮೇ 2025 ರಂದು CETA ವನ್ನು ಅಂತಿಮಗೊಳಿಸಲಾಯಿತು. ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಮತ್ತು ಬ್ರಿಟಿಷ್ ಪ್ರಧಾನಮಂತ್ರಿ ಸರ್ ಕೀರ್ ಸ್ಟಾರ್ಮರ್ ಅವರ ಸಮ್ಮುಖದಲ್ಲಿ, ಭಾರತದ ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವರಾದ ಶ್ರೀ ಪಿಯೂಷ್ ಗೋಯಲ್ ಮತ್ತು ಯುಕೆನ ವ್ಯವಹಾರ ಮತ್ತು ವ್ಯಾಪಾರ ಕಾರ್ಯದರ್ಶಿ ಶ್ರೀ ಜೊನಾಥನ್ ರೆನಾಲ್ಡ್ಸ್ ಅವರಿಂದ 24 ಜುಲೈ 2025 ರಂದು ಲಂಡನ್‌ ನಲ್ಲಿ ಈ ಒಪ್ಪಂದಕ್ಕೆ ಅಧಿಕೃತವಾಗಿ ಸಹಿ ಹಾಕಲಾಯಿತು. ಈ ಚೌಕಟ್ಟನ್ನು ಪೂರ್ಣಗೊಳಿಸಲು, 10 ಫೆಬ್ರವರಿ 2026 ರಂದು ಜೊತೆಗಿನ ಒಪ್ಪಂದವಾದ ಡಬಲ್ ಕಾಂಟ್ರಿಬ್ಯೂಷನ್ ಕನ್ವೆನ್ಷನ್ (DCC) ಗೆ ಸಹಿ ಹಾಕಲಾಯಿತು.

ಈ ಒಪ್ಪಂದವನ್ನು 'ಆರ್ಥಿಕ ರಾಜತಾಂತ್ರಿಕತೆಯ ವಿಜಯ' ಎಂದು ಬಣ್ಣಿಸಿದ ಭಾರತದ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವರಾದ ಶ್ರೀ ಪಿಯೂಷ್ ಗೋಯಲ್ ಅವರು ಹೀಗೆ ಹೇಳಿದ್ದಾರೆ:

"15 ಜುಲೈ 2026 ರಂದು CETA ಮತ್ತು ಡಬಲ್ ಕಾಂಟ್ರಿಬ್ಯೂಷನ್ ಕನ್ವೆನ್ಷನ್ ಒಪ್ಪಂದಗಳು ಏಕಕಾಲದಲ್ಲಿ ಜಾರಿಗೆ ಬರುವುದರಿಂದ ಭಾರತದ ರಫ್ತು ವಲಯಕ್ಕೆ ಮಹತ್ವದ ಹೊಸ ಅವಕಾಶಗಳು ತೆರೆದುಕೊಳ್ಳಲಿವೆ. ನಮ್ಮ ಶೇ. 99ರಷ್ಟು ಉತ್ಪನ್ನಗಳಿಗೆ ತಕ್ಷಣದ ಸುಂಕ-ಮುಕ್ತ ಪ್ರವೇಶವನ್ನು ಖಚಿತಪಡಿಸಿಕೊಳ್ಳುವ ಮೂಲಕ, ದೀರ್ಘಕಾಲದಿಂದ ಅಸ್ತಿತ್ವದಲ್ಲಿದ್ದ ಸುಂಕದ ಗೋಡೆಗಳನ್ನು ನಾವು ವ್ಯವಸ್ಥಿತವಾಗಿ ಕೆಡವಿದ್ದೇವೆ. ಇದು ಪರಿಣಾಮಕಾರಿಯಾಗಿ ಸಮಾನ ಅವಕಾಶಗಳ ವೇದಿಕೆಯನ್ನು ಸೃಷ್ಟಿಸಲಿದ್ದು, ನಮ್ಮ ಜವಳಿ, ಚರ್ಮ, ಸಾಗರೋತ್ಪನ್ನ, ಎಂಜಿನಿಯರಿಂಗ್ ಮತ್ತು ಸಂಸ್ಕರಿಸಿದ ಆಹಾರ ವಲಯಗಳು ಯಾವುದೇ ಹಿನ್ನಡೆಯಿಲ್ಲದೆ ಸ್ಪರ್ಧಿಸಲು ಹಾಗೂ ತಮ್ಮ ವಿಶ್ವದರ್ಜೆಯ ಉತ್ಪನ್ನಗಳನ್ನು ಜಗತ್ತಿಗೆ ಪೂರೈಸಲು ಅನುವು ಮಾಡಿಕೊಡುತ್ತದೆ.

ಅತ್ಯಂತ ಪ್ರಮುಖವಾಗಿ, ಈ ಚೌಕಟ್ಟನ್ನು ಸಂಪೂರ್ಣ ಆರ್ಥಿಕ ಭದ್ರತೆಯ ತಳಹದಿಯ ಮೇಲೆ ನಿರ್ಮಿಸಲಾಗಿದೆ; ಆಮದುಗಳ ಏರಿಳಿತದಿಂದ ನಮ್ಮ ಸೂಕ್ಷ್ಮವಾದ ಕೃಷಿ ಮತ್ತು ಗ್ರಾಮೀಣ ಆರ್ಥಿಕತೆಯನ್ನು ರಕ್ಷಿಸುವ ನಿಟ್ಟಿನಲ್ಲಿ ಕಠಿಣವಾದ 'ಹೊರಗಿಡುವಿಕೆಯ ಪಟ್ಟಿಗಳನ್ನು' (exclusion lists) ಸಕ್ರಿಯವಾಗಿ ಬಳಸಿಕೊಳ್ಳಲಾಗಿದೆ. ಅದೇ ಸಮಯದಲ್ಲಿ, ನಮ್ಮ ವೃತ್ತಿಪರರಿಗೆ ಎರಡು ಕಡೆ ವಿಮಾ ವಂತಿಗೆ ಪಾವತಿಸುವುದರಿಂದ ವಿನಾಯಿತಿ ನೀಡುವ ಮೂಲಕ, ನಮ್ಮ ಪ್ರತಿಭಾವಂತರ ಆರ್ಥಿಕ ಹಿತಾಸಕ್ತಿಗಳನ್ನು ನಾವು ಕಾಪಾಡುತ್ತಿದ್ದೇವೆ. ಈ ಇಮ್ಮಡಿ ಸಾಧನೆಯು ನಮ್ಮ ಜಾಗತಿಕ ವಾಣಿಜ್ಯ ವ್ಯಾಪ್ತಿಯನ್ನು ಬಲವಾಗಿ ವಿಸ್ತರಿಸುವುದರ ಜೊತೆಗೆ, ದೇಶೀಯ ಸೂಕ್ಷ್ಮತೆಗಳನ್ನು ಅತ್ಯಂತ ದೃಢವಾಗಿ ರಕ್ಷಿಸುತ್ತದೆ."

ಮುಂದಿನ ಪೀಳಿಗೆಯ ವ್ಯಾಪಾರ ಚೌಕಟ್ಟು

30 ಅಧ್ಯಾಯಗಳನ್ನು ಒಳಗೊಂಡಿರುವ CETA, ಮುಂದಿನ ಪೀಳಿಗೆಯ ವ್ಯಾಪಾರ ಒಪ್ಪಂದಗಳಿಗೆ ಒಂದು ಹೊಸ ಮಾದರಿಯನ್ನು ರೂಪಿಸುತ್ತದೆ ಮತ್ತು ಭಾರತದ "ವಿಕಸಿತ ಭಾರತ 2047" ದೂರದೃಷ್ಟಿಗೆ ನೇರ ಬೆಂಬಲವನ್ನು ನೀಡುತ್ತದೆ. ಸಾಂಪ್ರದಾಯಿಕ ಸುಂಕ ಕಡಿತದ ಆಚೆಗೆ, ಈ ಒಪ್ಪಂದವು ಸಾಂಪ್ರದಾಯಿಕ ಸರಕು ಮತ್ತು ಸೇವೆಗಳನ್ನು ಡಿಜಿಟಲ್ ವ್ಯಾಪಾರ, ದೂರಸಂಪರ್ಕ, ಹಣಕಾಸು ಸೇವೆಗಳು, ಬೌದ್ಧಿಕ ಆಸ್ತಿ ಮತ್ತು—ದ್ವಿಪಕ್ಷೀಯವಾಗಿ ಇದೇ ಮೊದಲ ಬಾರಿಗೆ—ಸರ್ಕಾರಿ ಸಂಗ್ರಹಣೆಯಂತಹ (government procurement) ಸುಧಾರಿತ ವಿಭಾಗಗಳೊಂದಿಗೆ ಸಂಯೋಜಿಸುವ ಮೂಲಕ ದ್ವಿಪಕ್ಷೀಯ ಬಾಂಧವ್ಯವನ್ನು ಆಧುನೀಕರಿಸುತ್ತದೆ. ಇದು ಸಮಗ್ರ ಬೆಳವಣಿಗೆಯನ್ನು ಖಚಿತಪಡಿಸಿಕೊಳ್ಳಲು ನಾವೀನ್ಯತೆ, ಸಣ್ಣ ಮತ್ತು ಮಧ್ಯಮ ಉದ್ಯಮಗಳು (SMEs), ಸುಸ್ಥಿರತೆ ಹಾಗೂ ಪಾರದರ್ಶಕತೆಯ ಕುರಿತಾದ ಭವಿಷ್ಯದ-ದೃಷ್ಟಿಯ ಅಧ್ಯಾಯಗಳನ್ನು ಸಹ ಇದು ಒಳಗೊಂಡಿದೆ. ಅಂತಿಮವಾಗಿ, ಈ ಚೌಕಟ್ಟನ್ನು ನಿರ್ಣಾಯಕ ಪೂರೈಕೆ ಸರಪಳಿಗಳನ್ನು ಸುರಕ್ಷಿತಗೊಳಿಸಲು, ತಾಂತ್ರಿಕ ಸಹಯೋಗವನ್ನು ವೇಗಗೊಳಿಸಲು ಮತ್ತು ಭಾರತದ ಭವಿಷ್ಯದ ಆರ್ಥಿಕ ರಾಜತಾಂತ್ರಿಕತೆಗೆ ಪಾರದರ್ಶಕ ಹಾಗೂ ನಿಯಮ ಆಧಾರಿತ ಮಾನದಂಡವನ್ನು ಸ್ಥಾಪಿಸಲು ರೂಪಿಸಲಾಗಿದೆ.

ಪ್ರಮುಖ ಆರ್ಥಿಕ ಲಾಭಗಳು

ಸಮಗ್ರ ಆರ್ಥಿಕ ಮತ್ತು ವ್ಯಾಪಾರ ಒಪ್ಪಂದ (CETA) ಮತ್ತು ಅದರ ಜೊತೆಯಲ್ಲೇ 'ಡಬಲ್ ಕಾಂಟ್ರಿಬ್ಯೂಷನ್ ಕನ್ವೆನ್ಷನ್' (DCC) ಜಾರಿಗೆ ಬರುವುದು ಭಾರತದ ಜಾಗತಿಕ ವ್ಯಾಪಾರ ರಚನೆಯಲ್ಲಿ ಒಂದು ರಚನಾತ್ಮಕ ರೂಪಾಂತರವನ್ನು ಗುರುತಿಸಲಿದೆ. ಈ ಸಮಗ್ರ ಚೌಕಟ್ಟು ಭಾರತದ ಉತ್ಪಾದನಾ ಸಾಮರ್ಥ್ಯ, ಸೇವಾ ದಕ್ಷತೆ ಮತ್ತು ತಳಮಟ್ಟದ ಉತ್ಪಾದನೆಯನ್ನು ವಿಶ್ವದ ಪ್ರಮುಖ ಗ್ರಾಹಕ ಮಾರುಕಟ್ಟೆಗಳಲ್ಲಿ ಒಂದಕ್ಕೆ ನೇರವಾಗಿ ಸಂಯೋಜಿಸುತ್ತದೆ.

1. ಭಾರತೀಯ ರಫ್ತುಗಳಿಗೆ ಮಾರುಕಟ್ಟೆ ಪ್ರವೇಶದಲ್ಲಿ ಕ್ರಾಂತಿಕಾರಿ ಬದಲಾವಣೆ

ಈ ಒಪ್ಪಂದವು ಜಾರಿಗೆ ಬರುವುದರೊಂದಿಗೆ, ಹಲವು ಪ್ರಮುಖ ವಲಯಗಳಲ್ಲಿ ಯುಕೆಯು ವಿಧಿಸುತ್ತಿದ್ದ ಸುಂಕಗಳ ಸಂಪೂರ್ಣ ನಿರ್ಮೂಲನೆಯಿಂದ ಭಾರತೀಯ ರಫ್ತುದಾರರು ಪ್ರಯೋಜನ ಪಡೆಯಲಿದ್ದಾರೆ. ಸಂಸ್ಕರಿಸಿದ ಆಹಾರ ಉತ್ಪನ್ನಗಳ ಮೇಲಿನ ಶೇ. 70 ರಷ್ಟು, ಸಾಗರೋತ್ಪನ್ನಗಳ ಮೇಲಿನ ಶೇ. 21.5 ರಷ್ಟು, ಎಂಜಿನಿಯರಿಂಗ್ ಸರಕುಗಳು ಮತ್ತು ವಾಹನ ಬಿಡಿಭಾಗಗಳ ಮೇಲಿನ ಶೇ. 18 ರಷ್ಟು, ಚರ್ಮ ಮತ್ತು ಪಾದರಕ್ಷೆಗಳ ಮೇಲಿನ ಶೇ. 16 ರಷ್ಟು, ಜವಳಿ ಮತ್ತು ಉಡುಪುಗಳ ಮೇಲಿನ ಶೇ. 12 ರಷ್ಟು, ಹಾಗೂ ರಾಸಾಯನಿಕ ಮತ್ತು ಔಷಧೀಯ ಉತ್ಪನ್ನಗಳ ಮೇಲಿನ ಶೇ. 8 ರವರೆಗಿನ ಸುಂಕವನ್ನು ಶೂನ್ಯಕ್ಕೆ ಇಳಿಸಲಾಗುತ್ತದೆ. CETA ಅಡಿಯಲ್ಲಿ ಲಭ್ಯವಾಗಿರುವ ಈ ತ್ವರಿತ ಸುಂಕ-ಮುಕ್ತ ಪ್ರವೇಶವು, ಯುಕೆ ಮಾರುಕಟ್ಟೆಯಲ್ಲಿ ಭಾರತೀಯ ರಫ್ತುಗಳ ಸ್ಪರ್ಧಾತ್ಮಕತೆಯನ್ನು ಗಣನೀಯವಾಗಿ ಹೆಚ್ಚಿಸಲಿದೆ. ಅಲ್ಲದೆ, ರೈತರು, ಮೀನುಗಾರರು, ಕಾರ್ಮಿಕರು, MSME ಗಳು ಹಾಗೂ ಉತ್ಪಾದಕರಿಗೆ ಹೊಸ ಅವಕಾಶಗಳನ್ನು ಸೃಷ್ಟಿಸುವುದರ ಜೊತೆಗೆ, ಜಾಗತಿಕ ಮೌಲ್ಯ ಸರಪಳಿಯೊಂದಿಗೆ ಭಾರತದ ಜೋಡಣೆಯನ್ನು ಬಲಪಡಿಸುವ ನಿರೀಕ್ಷೆಯಿದೆ.

ಈ ತ್ವರಿತ ಸುಂಕ-ಮುಕ್ತ ಅವಕಾಶವು ಭಾರತೀಯ ಉತ್ಪಾದನಾ ವಲಯದ ಕೇಂದ್ರಗಳಿಗೆ ಅಗಾಧವಾದ 'ಬೆಲೆ ನಿಗದಿ ಶಕ್ತಿಯನ್ನು' (pricing power) ತುಂಬಲಿದ್ದು, ಸಾಂಪ್ರದಾಯಿಕ ಕುಶಲಕರ್ಮಿಗಳು, ಬೃಹತ್ ಕಾರ್ಖಾನೆಗಳು ಮತ್ತು ಪ್ರಾದೇಶಿಕ ಕೈಗಾರಿಕಾ ಕೇಂದ್ರಗಳು ಒಪ್ಪಂದ ಜಾರಿಯಾದ ಮೊದಲ ದಿನದಿಂದಲೇ ಸಂಪೂರ್ಣವಾಗಿ ತಮ್ಮ ಸಾಮರ್ಥ್ಯದ ಆಧಾರದ ಮೇಲೆ ಸ್ಪರ್ಧಿಸಲು ಅನುವು ಮಾಡಿಕೊಡುತ್ತದೆ.

ಇದೇ ವೇಳೆ, ಡೈರಿ ಉತ್ಪನ್ನಗಳು, ಧಾನ್ಯಗಳು, ಸಿರಿಧಾನ್ಯಗಳು, ಖಾದ್ಯ ತೈಲಗಳು, ಎಣ್ಣೆಕಾಳುಗಳು, ಸೇಬು ಮತ್ತು ಹಲವಾರು ತರಕಾರಿ ಉತ್ಪನ್ನಗಳನ್ನು ಒಳಗೊಂಡಂತೆ ತನ್ನ ದೇಶೀಯ ಸೂಕ್ಷ್ಮ ವಲಯಗಳನ್ನು ಭಾರತವು ಭದ್ರವಾಗಿ ರಕ್ಷಿಸಿಕೊಂಡಿದೆ.

2. ಐತಿಹಾಸಿಕ ಸೇವಾ ಪ್ಯಾಕೇಜ್ ಮತ್ತು ಚಲನಶೀಲತೆಯ ನಿಬಂಧನೆಗಳು

ಯುಕೆ ತನ್ನ ಇತಿಹಾಸದಲ್ಲೇ ಅತ್ಯಂತ ಸಮಗ್ರವಾದ ಸೇವಾ ಬದ್ಧತೆಗಳಲ್ಲಿ ಒಂದನ್ನು ಒದಗಿಸಿದೆ, ಇದು ಭಾರತದ ರಫ್ತು ಆಸಕ್ತಿಯನ್ನು ಹೊಂದಿರುವ ಎಲ್ಲಾ ಪ್ರಮುಖ ಸೇವಾ ವಲಯಗಳನ್ನು ಮತ್ತು 137 ಉಪ-ವಲಯಗಳನ್ನು ಒಳಗೊಂಡಿದೆ.

ಮಾಹಿತಿ ತಂತ್ರಜ್ಞಾನ (IT) ಮತ್ತು ಐಟಿ-ಸಕ್ರಿಯಗೊಳಿಸಿದ ಸೇವೆಗಳು, ಹಣಕಾಸು ಸೇವೆಗಳು, ವೃತ್ತಿಪರ ಸೇವೆಗಳು, ಆರೋಗ್ಯ ರಕ್ಷಣೆ, ಶಿಕ್ಷಣ, ಎಂಜಿನಿಯರಿಂಗ್, ದೂರಸಂಪರ್ಕ ಮತ್ತು ಸಲಹಾ ಸೇವೆಗಳಲ್ಲಿ ತೊಡಗಿರುವ ಭಾರತೀಯ ಸೇವಾ ಪೂರೈಕೆದಾರರು ಸುಧಾರಿತ ಮಾರುಕಟ್ಟೆ ಪ್ರವೇಶ ಹಾಗೂ ಹೆಚ್ಚಿನ ನಿಯಂತ್ರಕ ಸ್ಪಷ್ಟತೆಯ ಲಾಭವನ್ನು ಪಡೆಯಲಿದ್ದಾರೆ.

ಈ ಒಪ್ಪಂದವು ಈ ಕೆಳಗಿನವರಿಗೆ ಸುಲಭವಾಗಿ ಅಂದಾಜಿಸಬಹುದಾದ ಚಲನಶೀಲತೆಯ ಮಾರ್ಗಗಳನ್ನು ಒದಗಿಸುತ್ತದೆ:

• ವ್ಯಾಪಾರ ಸಂದರ್ಶಕರು 
• ಕಾರ್ಪೊರೇಟ್ ಒಳಗಿನ ವರ್ಗಾವಣೆದಾರರು 
• ಒಪ್ಪಂದದ ಸೇವಾ ಪೂರೈಕೆದಾರರು 
• ಸ್ವತಂತ್ರ ವೃತ್ತಿಪರರು 
• ಹೂಡಿಕೆದಾರರು 

ಇದೇ ಮೊದಲ ಬಾರಿಗೆ ಮಾಡಿಕೊಳ್ಳಲಾಗಿರುವ ವಿಶೇಷ ವ್ಯವಸ್ಥೆಯೊಂದರಲ್ಲಿ, ಈ ಒಪ್ಪಂದದ ಅಡಿಯಲ್ಲಿ ವಾರ್ಷಿಕವಾಗಿ 1,800 ಭಾರತೀಯ ಬಾಣಸಿಗರು, ಯೋಗ ಶಿಕ್ಷಕರು ಮತ್ತು ಶಾಸ್ತ್ರೀಯ ಸಂಗೀತಗಾರರು ಮೀಸಲಾದ ಚಲನಶೀಲತೆಯ ಅವಕಾಶಗಳನ್ನು ಪಡೆಯಲು ಸಾಧ್ಯವಾಗುತ್ತದೆ.

3. ಸಾಮಾಜಿಕ ಭದ್ರತಾ ಒಪ್ಪಂದ: ಒಂದು ಮಹತ್ವದ ಮುನ್ನಡೆ

ಮುಖ್ಯ ಒಪ್ಪಂದದ ಜೊತೆಯಲ್ಲೇ ಜಾರಿಗೆ ಬರುತ್ತಿರುವ 'ಸಾಮಾಜಿಕ ಭದ್ರತಾ ಒಪ್ಪಂದ'ವು (Agreement on Social Security), ತಾತ್ಕಾಲಿಕ ಕಾರ್ಯಯೋಜನೆಗಳ ಮೇರೆಗೆ ಯುನೈಟೆಡ್ ಕಿಂಗ್‌ ಡಮ್‌ ನಲ್ಲಿರುವ ಭಾರತೀಯ ಕಾರ್ಮಿಕರು ಮತ್ತು ಉದ್ಯೋಗದಾತರಿಗೆ ದ್ವಿಮುಖ ಸಾಮಾಜಿಕ ಭದ್ರತಾ ವಂತಿಗೆಗಳನ್ನು ಪಾವತಿಸುವುದರಿಂದ ವಿನಾಯಿತಿ ನೀಡುತ್ತದೆ. ಈ ವಿನಾಯಿತಿಯ ಅವಧಿಯನ್ನು 3 ವರ್ಷಗಳಿಂದ 5 ವರ್ಷಗಳಿಗೆ ಹೆಚ್ಚಿಸಲಾಗಿದೆ.

ಇದರಿಂದ 75,000 ಕ್ಕೂ ಹೆಚ್ಚು ಭಾರತೀಯ ವೃತ್ತಿಪರರು ಮತ್ತು 900 ಕ್ಕೂ ಹೆಚ್ಚು ಕಂಪನಿಗಳು ಪ್ರಯೋಜನ ಪಡೆಯುವ ನಿರೀಕ್ಷೆಯಿದೆ. ಈ ಒಪ್ಪಂದವು ತಾತ್ಕಾಲಿಕ ಸಾಗರೋತ್ತರ ಕಾರ್ಯಯೋಜನೆಗಳಲ್ಲಿರುವ ಉದ್ಯೋಗಿಗಳ ಓಡಾಟ (ಚಲನಶೀಲತೆ) ಮತ್ತು ನಿರಂತರ ಸಾಮಾಜಿಕ ಭದ್ರತಾ ವ್ಯಾಪ್ತಿಯನ್ನು ಬೆಂಬಲಿಸುತ್ತದೆ. ಇದು ಎರಡೂ ದೇಶಗಳ ಉನ್ನತ ಕೌಶಲ್ಯಗಳು ಮತ್ತು ನವೀನ ಸೇವಾ ವಲಯಗಳ ಸದ್ಬಳಕೆ ಮಾಡಿಕೊಳ್ಳುವ ಮೂಲಕ ಸೇವಾ ವಲಯದಲ್ಲಿ ಭಾರತ-ಯುಕೆ ಪಾಲುದಾರಿಕೆಯನ್ನು ವೃದ್ಧಿಸಲಿದೆ.

4. ಉಕ್ಕು ರಫ್ತುದಾರರ ಹಿತಾಸಕ್ತಿಗಳ ರಕ್ಷಣೆ

'ಭಾರತ-ಯುಕೆ ಸಮಗ್ರ ಆರ್ಥಿಕ ಪಾಲುದಾರಿಕೆ ಒಪ್ಪಂದ'ದ (CETA) ಸಹಯೋಗದ ಬಲವನ್ನು ಪ್ರದರ್ಶಿಸುತ್ತಾ, ದ್ವಿಪಕ್ಷೀಯ ಉಕ್ಕಿನ ವ್ಯಾಪಾರವನ್ನು ರಕ್ಷಿಸಲು ಮತ್ತು ಉತ್ತೇಜಿಸಲು ಭಾರತ ಹಾಗೂ ಯುನೈಟೆಡ್ ಕಿಂಗ್‌ ಡಮ್ ಯಶಸ್ವಿಯಾಗಿ ಒಂದು ಐತಿಹಾಸಿಕ ಒಮ್ಮತಕ್ಕೆ ಬಂದಿವೆ. ಜುಲೈ 1, 2026 ರಿಂದ ಜಾರಿಗೆ ಬರಲಿರುವ ಯುಕೆಯ ಮುಂಬರುವ ಉಕ್ಕಿನ ಕ್ರಮಗಳ ಕುರಿತು ನಡೆದ ರಚನಾತ್ಮಕ ಸಮಾಲೋಚನೆಗಳ ನಂತರ, ವಾಣಿಜ್ಯ ಹಿತಾಸಕ್ತಿಗಳನ್ನು ರಕ್ಷಿಸಲು, ಮಾರುಕಟ್ಟೆಯ ಅಡಚಣೆಗಳನ್ನು ಕಡಿಮೆ ಮಾಡಲು ಮತ್ತು ರಫ್ತುದಾರರಿಗೆ ಒಟ್ಟಾರೆ ಸಮತೋಲಿತ ಹಾಗೂ ಸ್ಥಿರವಾದ ವ್ಯಾಪಾರ ವಾತಾವರಣವನ್ನು ಖಚಿತಪಡಿಸಿಕೊಳ್ಳಲು ಎರಡೂ ಕಡೆಯವರು ಪರಸ್ಪರ ಒಪ್ಪಿಕೊಂಡಿದ್ದಾರೆ.

ಭಾರತದ ಶೇ. 85 ರಷ್ಟು ರಫ್ತುಗಳು ಉಕ್ಕಿನ ಮೇಲಿನ ಕ್ರಮಗಳ ವ್ಯಾಪ್ತಿಯಿಂದ ಹೊರಗಿವೆ. ಈ ಉಕ್ಕಿನ ಕ್ರಮಗಳಿಗೆ ಒಳಪಡುವ ಉತ್ಪನ್ನಗಳ ವಿಚಾರದಲ್ಲಿ, CSQ, ಉಳಿಕೆ ಕೋಟಾ (residual quota) ಮತ್ತು ಅಧಿಕೃತ ಬಳಕೆಯ ಯೋಜನೆ (Authorised Use Scheme - AUS) ಅಡಿಯಲ್ಲಿ ಪ್ರವೇಶಾವಕಾಶಗಳ ಸಂಯೋಜನೆಯ ಮೂಲಕ ಭಾರತದ ಹಿತಾಸಕ್ತಿಯನ್ನು ರಕ್ಷಿಸಲಾಗಿದೆ.

ಜನ-ಕೇಂದ್ರಿತ ವ್ಯಾಪಾರ ಒಪ್ಪಂದ

ಭಾರತ-ಯುಕೆ CETA ಒಪ್ಪಂದವನ್ನು ಸಮಾಜದಾದ್ಯಂತ ಪ್ರಯೋಜನಗಳನ್ನು ತಲುಪಿಸುವ ಒಂದು 'ಜನ-ಕೇಂದ್ರಿತ' ಒಪ್ಪಂದವಾಗಿ ವಿನ್ಯಾಸಗೊಳಿಸಲಾಗಿದೆ.

ರೈತರು ಉನ್ನತ ಮಟ್ಟದ (ಪ್ರೀಮಿಯಂ) ರಫ್ತು ಮಾರುಕಟ್ಟೆಗಳಿಗೆ ಪ್ರವೇಶವನ್ನು ಪಡೆಯಲಿದ್ದಾರೆ. ಮೀನುಗಾರರು ಸಾಗರೋತ್ಪನ್ನಗಳ ಹೆಚ್ಚಿದ ರಫ್ತಿನಿಂದ ಲಾಭ ಪಡೆಯಲಿದ್ದಾರೆ. ಕಾರ್ಮಿಕರು ಹೆಚ್ಚು ಶ್ರಮ ಬೇಡುವ (labour-intensive) ವಲಯಗಳಲ್ಲಿ ಹೊಸ ಉದ್ಯೋಗಾವಕಾಶಗಳನ್ನು ಪಡೆಯಲಿದ್ದಾರೆ. ಮಹಿಳಾ ಉದ್ಯಮಿಗಳು, ಯುವಕರು, ಸ್ಟಾರ್ಟಪ್‌ಗಳು ಮತ್ತು MSME ಗಳು ಜಾಗತಿಕ ಮೌಲ್ಯ ಸರಪಳಿಗಳಿಗೆ ಉತ್ತಮ ಪ್ರವೇಶವನ್ನು ಪಡೆಯಲಿವೆ. ವೃತ್ತಿಪರರು ಸುಧಾರಿತ ಚಲನಶೀಲತೆ (ಮೊಬಿಲಿಟಿ) ಮತ್ತು ಮಾನ್ಯತೆಯ ಅವಕಾಶಗಳಿಂದ ಪ್ರಯೋಜನ ಪಡೆಯಲಿದ್ದಾರೆ.

15 ಜುಲೈ 2026 ರಿಂದ ಭಾರತ-ಯುಕೆ CETA ಮತ್ತು DCC ಒಪ್ಪಂದಗಳ ಜಾರಿಯು ಜಾಗತಿಕವಾಗಿ ಬೆರೆತಿರುವ, ಸದೃಢ ಮತ್ತು ಸ್ಪರ್ಧಾತ್ಮಕ ಆರ್ಥಿಕತೆಯಾಗುವತ್ತ ಭಾರತದ ಪಯಣದಲ್ಲಿ ಒಂದು ಪ್ರಮುಖ ಹೆಜ್ಜೆಯಾಗಿದೆ. ಜೊತೆಗೆ, ತಮ್ಮ ಕಾರ್ಯತಂತ್ರದ ಪಾಲುದಾರಿಕೆಯನ್ನು ಇನ್ನಷ್ಟು ಗಾಢವಾಗಿಸುವ ಹಾಗೂ ತಮ್ಮ ಜನರಿಗೆ ಸಮೃದ್ಧಿಯನ್ನು ತರುವ ನಿಟ್ಟಿನಲ್ಲಿ ಭಾರತ ಮತ್ತು ಯುನೈಟೆಡ್ ಕಿಂಗ್‌ ಡಮ್‌ ನ ಹಂಚಿಕೆಯ ಬದ್ಧತೆಯನ್ನು ಇದು ಪ್ರತಿಬಿಂಬಿಸುತ್ತದೆ.

ಈ ಐತಿಹಾಸಿಕ ಆರ್ಥಿಕ ಚೌಕಟ್ಟು, ಆಧುನಿಕ ಅಂತಾರಾಷ್ಟ್ರೀಯ ವಾಣಿಜ್ಯದ ಸಂಕೀರ್ಣತೆಗಳನ್ನು ಸಮರ್ಥವಾಗಿ ನಿಭಾಯಿಸಲು ಎರಡೂ ರಾಷ್ಟ್ರಗಳನ್ನು ಸಿದ್ಧಗೊಳಿಸುತ್ತದೆ; ಅದೇ ವೇಳೆ, ಎಲ್ಲರನ್ನೂ ಒಳಗೊಂಡ, ಸಮೃದ್ಧ ಮತ್ತು ಸ್ವಾವಲಂಬಿ "ವಿಕಸಿತ ಭಾರತ 2047" ರ ಕಡೆಗಿನ ಭಾರತದ ಪಥವನ್ನು ಶಾಶ್ವತವಾಗಿ ವೇಗಗೊಳಿಸುತ್ತದೆ.

ಭಾರತ-ಯುಕೆ ಸಮಗ್ರ ಆರ್ಥಿಕ ಮತ್ತು ವ್ಯಾಪಾರ ಒಪ್ಪಂದದ ಸಂಪೂರ್ಣ ವಿವರಗಳನ್ನು ಇಲ್ಲಿ ನೋಡಬಹುದು: https://www.commerce.gov.in/#/international-trade/trade-agreements/india-united-kingdom-comprehensive-economic-and-trade-agreement.

 

*****

(रिलीज़ आईडी: 2274360) आगंतुक पटल : 7