સિનેમેટિક ઉત્કૃષ્ટતા, સાંસ્કૃતિક વિવિધતા અને સર્જનાત્મક ઇનોવેશનની ભવ્ય ઉજવણી વચ્ચે સોમવારે સાંજે મુંબઈના દાદર સ્થિત રવીન્દ્ર નાટ્ય મંદિર ખાતે ડોક્યુમેન્ટરી, શોર્ટ ફિક્શન અને એનિમેશન ફિલ્મો માટેના ભારતના અગ્રણી મહોત્સવ 'મુંબઈ ઇન્ટરનેશનલ ફિલ્મ ફેસ્ટિવલ' (MIFF) ની 19મી આવૃત્તિનું ઉદ્ઘાટન કરવામાં આવ્યું હતું.

કેન્દ્રીય માહિતી અને પ્રસારણ તેમજ સંસદીય બાબતોના રાજ્ય મંત્રી ડૉ. એલ. મુરુગને આ મહોત્સવનું ઉદ્ઘાટન કર્યું હતું અને સપ્તાહભર ચાલનારા આ કાર્યક્રમ માટે મુખ્ય સંબોધન આપ્યું હતું, જેમાં તેમણે ભારતને વાર્તા કહેવા (સ્ટોરીટેલિંગ), કન્ટેન્ટ નિર્માણ અને સર્જનાત્મક ઉદ્યોગસાહસિકતા માટે એક ઉભરતા વૈશ્વિક હબ તરીકે રજૂ કર્યું હતું.

સભાને સંબોધતા ડૉ. મુરુગને માનનીય પ્રધાનમંત્રી શ્રી નરેન્દ્ર મોદીના નેતૃત્વ હેઠળ ભારતના મીડિયા અને મનોરંજન ઇકોસિસ્ટમના વિકાસ વિશે વાત કરી હતી. તેમણે જણાવ્યું હતું કે, "ભારત આજે સમગ્ર વિશ્વમાં એક સર્જનાત્મક પાવરહાઉસ અને કન્ટેન્ટ નિર્માણમાં એક વિશ્વસનીય ભાગીદાર તરીકે ઓળખાય છે. આપણી વાર્તાઓ વિવિધ ખંડોના પ્રેક્ષકોને પ્રેરણા આપવાની ક્ષમતા ધરાવે છે, જ્યારે આપણી સર્જનાત્મક પ્રતિભાઓનો સમૂહ તેના સ્કેલ અને ક્ષમતામાં અજોડ છે."

મંત્રીએ જણાવ્યું હતું કે, “ઝડપી ડિજિટલ પરિવર્તન અને કન્ટેન્ટના વપરાશમાં વધારાને કારણે ભારતનો મીડિયા અને મનોરંજન ઉદ્યોગ વર્ષ 2025માં 9 ટકા વધીને ₹2.78 લાખ કરોડ થયો છે. ડિજિટલ મીડિયા આ ઉદ્યોગનો સૌથી મોટો હિસ્સો બની ગયું છે, જેણે પ્રથમ વખત ₹1 લાખ કરોડની આવકનો સીમાચિહ્ન પાર કર્યો છે.” તેમણે ઉમેર્યું હતું કે આ ક્ષેત્ર સાત ટકાથી વધુ સીએજીઆર (CAGR) સાથે વધીને વર્ષ 2028 સુધીમાં ₹3.3 લાખ કરોડ સુધી પહોંચવાનો અંદાજ છે, જ્યારે એકલા વર્ષ 2025માં ભારતમાં 1,900 થી વધુ ફિલ્મો રિલીઝ થઈ હતી, જેણે થિયેટરની આવકમાં 16 ટકાનો વધારો કર્યો છે.

મુંબઈને ભારતની સર્જનાત્મક રાજધાની ગણાવતા તેમણે વર્ષ 2025માં આ શહેરમાં યોજાયેલી વર્લ્ડ ઓડિયો વિઝ્યુઅલ એન્ડ એન્ટરટેઈનમેન્ટ સમિટ (WAVES) ની સફળતાને યાદ કરી હતી અને કહ્યું હતું કે MIFF જેવા પ્લેટફોર્મ ભારતને વિશ્વના અગ્રણી ક્રિએટર્સ હબ બનાવવાની મહત્વાકાંક્ષાને આગળ વધારવામાં મહત્વની ભૂમિકા ભજવે છે.

વેવ્ઝ ડોક બજાર (WAVES Doc Bazaar) ના વધતા મહત્વ વિશે વાત કરતા, જે ડોક્યુમેન્ટરી ફિલ્મ નિર્માતાઓને નિર્માતાઓ, વિતરકો, ઉદ્યોગના નિષ્ણાતો અને વૈશ્વિક પ્રેક્ષકો સાથે જોડતા એક મુખ્ય પ્લેટફોર્મ તરીકે ઉભરી આવ્યું છે, ડૉ. મુરુગને જણાવ્યું હતું કે આ પહલ ઉભરતી પ્રતિભાઓ અને સ્થાપિત વ્યાવસાયિકો વચ્ચેનું અંતર ઘટાડવામાં મદદ કરી રહી છે અને પ્રભાવશાળી દસ્તાવેજી ફિલ્મોના નિર્માણ તેમજ આંતરરાષ્ટ્રીય વિતરણને સક્ષમ બનાવી રહી છે.

માહિતી અને પ્રસારણ મંત્રાલય, નેશનલ ફિલ્મ ડેવલપમેન્ટ કોર્પોરેશન (NFDC) અને આ મહોત્સવ સાથે જોડાયેલા તમામ હિતધારકોને અભિનંદન આપતાં ડૉ. મુરુગને વિશ્વાસ વ્યક્ત કર્યો હતો કે MIFF 2026 ઇનોવેશન, સર્જનાત્મકતા અને સહયોગ દ્વારા મીડિયા અને મનોરંજનના ભવિષ્યને આકાર આપવામાં નોંધપાત્ર યોગદાન આપશે.

ઉદ્ઘાટન સમારોહમાં મહારાષ્ટ્રના સાંસ્કૃતિક બાબતો અને માહિતી ટેકનોલોજી મંત્રી શ્રી આશિષ શેલારે પણ સંબોધન કર્યું હતું. તેમણે વિશ્વભરમાંથી આવેલા સહભાગીઓનું મુંબઈમાં સ્વાગત કર્યું હતું અને સર્જનાત્મક ઉદ્યોગોને ટેકો આપવા માટે રાજ્યની પ્રતિબદ્ધતાનો પુનરોચ્ચાર કર્યો હતો. મુંબઈમાં સૌપ્રથમ ઇન્ડિયન ઇન્સ્ટિટ્યુટ ઓફ ક્રિએટિવ ટેકનોલોજીની સ્થાપના કરવા બદલ ભારત સરકારની પ્રશંસા કરતા મંત્રીએ જણાવ્યું હતું કે રાજ્ય સરકાર કેન્દ્ર સરકારના સહયોગથી શહેરમાં એક મીડિયા હબ સ્થાપવાની યોજના ધરાવે છે. શ્રી શેલારે વર્ષ 2025માં મુંબઈમાં યોજાયેલી વર્લ્ડ ઓડિયો વિઝ્યુઅલ એન્ડ એન્ટરટેઈનમેન્ટ સમિટની પહલ માટે પ્રધાનમંત્રી શ્રી નરેન્દ્ર મોદીની પણ પ્રશંસા કરી હતી.

આ પૂર્વે, સભાનું સ્વાગત કરતાં માહિતી અને પ્રસારણ મંત્રાલયના સચિવ શ્રી ચંચલ કુમારે MIFF ને વિચારોના મુક્ત આદાનપ્રદાન અને સર્જનાત્મક અભિવ્યક્તિમાં ભારતના શાશ્વત સભ્યતાના વિશ્વાસની ઉજવણી તરીકે વર્ણવ્યું હતું. ઋગ્વેદના કાલાતીત આહવાન "આ નો ભદ્રાઃ ક્રતવો યન્તુ વિશ્વતઃ" (બધી દિશાઓમાંથી અમને કલ્યાણકારી વિચારો પ્રાપ્ત થાઓ) નો ઉદ્ધરણ આપીને તેમણે કહ્યું કે આ મહોત્સવ વિશ્વભરની ફિલ્મો, વિચારો અને સર્જકોને એકસાથે લાવે છે. સચિવે એમ પણ કહ્યું કે MIFF ફિલ્મ નિર્માતાઓને એક મહત્વપૂર્ણ પ્લેટફોર્મ પૂરું પાડીને માનનીય પ્રધાનમંત્રી શ્રી નરેન્દ્ર મોદીના 'ક્રિએટ ઇન ઇન્ડિયા' (Create in India) ના વિઝનને પ્રતિબિંબિત કરે છે, જેઓ ઊંડી વાસ્તવિકતાઓને શોધવાનું અને તેમને આકર્ષક સિનેમેટિક વાર્તાઓ દ્વારા રજૂ કરવાનું સાહસ કરે છે.

ભારતીય સિનેમામાં યોગદાન બદલ જયદીપ અહલાવતનું સન્માન

સાંજનું એક મુખ્ય આકર્ષણ જાણીતા અભિનેતા જયદીપ અહલાવતનું ભારતીય સિનેમામાં તેમના ઉત્કૃષ્ટ યોગદાન બદલ કરાયેલું સન્માન હતું. અન્ય મહાનુભાવોની ઉપસ્થિતિમાં ડૉ. એલ. મુરુગન દ્વારા આ સન્માન એનાયત કરવામાં આવ્યું હતું.

આ માન્યતા સ્વીકારતા, અહલાવતે પોતાનો આભાર વ્યક્ત કર્યો હતો અને અર્થપૂર્ણ વાર્તા કહેવા માટે જગ્યા ઊભી કરવામાં અને મુખ્ય પ્રવાહની વાર્તાઓથી પર સિનેમેટિક અવાજોને પ્રોત્સાહિત કરવામાં MIFF જેવા મહોત્સવોના મહત્વને સ્વીકાર્યું હતું.

ઓપનિંગ ફિલ્મોના કલાકારો અને ક્રૂ સભ્યોનું બહુમાન

આ સમારોહમાં ફેસ્ટિવલની ઓપનિંગ (શરૂઆતની) ફિલ્મો પાછળની સર્જનાત્મક ટીમોની પણ પ્રશંસા કરવામાં આવી હતી. આંતરરાષ્ટ્રીય સ્તરે પ્રશંસા પામેલી ટૂંકી ફિલ્મ ‘અગાપિતો’ (Agapito) અને દસ્તાવેજી ફિલ્મ ‘ટાઇમ એન્ડ વોટર’ (Time & Water) ના પ્રતિનિધિઓનું મંચ પર સન્માન કરવામાં આવ્યું હતું.

‘અગાપિતો’ માંથી અભિનેતા એન્ટોન નોલાસ્કો અને કાસ્ટિંગ ડાયરેક્ટર મા. ક્રિસ્ટિના સિમોનનું બહુમાન કરવામાં આવ્યું હતું, જ્યારે પ્રેક્ષકો સમક્ષ આકર્ષક વૈશ્વિક વાર્તાઓ લાવવા બદલ ‘ટાઇમ એન્ડ વોટર’ સાથે જોડાયેલી નેશનલ જિયોગ્રાફિક અને જિયોસ્ટાર (JioStar) ની ટીમના સભ્યોની પણ પ્રશંસા કરવામાં આવી હતી.

જ્યુરી સભ્યોનું સન્માન

ઉદ્ઘાટનના અન્ય એક ભાગમાં, મહોત્સવમાં આંતરરાષ્ટ્રીય સ્પર્ધા જ્યુરી, રાષ્ટ્રીય સ્પર્ધા જ્યુરી અને ફિપ્રેસ્કી (FIPRESCI) જ્યુરીના સભ્યોનું ઔપચારિક સ્વાગત અને સન્માન કરવામાં આવ્યું હતું.

જ્યુરી પેનલમાં ભારત અને વિશ્વભરના ફિલ્મ નિર્માતાઓ, વિવેચકો, વિદ્વાનો, પ્રોગ્રામર્સ અને મીડિયા વ્યાવસાયિકોનો સમાવેશ થાય છે, જેમને મહોત્સવની ડોક્યુમેન્ટરી, શોર્ટ ફિક્શન અને એનિમેશન ફિલ્મોની વિવિધ પસંદગીઓનું મૂલ્યાંકન કરવાની જવાબદારી સોંપવામાં આવી છે.

ઉદ્ઘાટન સમારોહમાં ભારતની કલાત્મક વિરાસતને પ્રદર્શિત કરતી જીવંત સાંસ્કૃતિક પ્રસ્તુતિ પણ રજૂ કરવામાં આવી હતી. આ સમારોહમાં જાણીતા ફિલ્મ નિર્માતા અને ઇફ્ફી (IFFI) 2026 ના ફેસ્ટિવલ ડાયરેક્ટર શ્રી આશુતોષ ગોવારીકર, પ્રસાર ભારતીના અધ્યક્ષ શ્રી પ્રસુન જોશી, NFDC ના ચેરમેન શ્રી કૃષ્ણકુમાર જી, MIFF ના ફેસ્ટિવલ ડાયરેક્ટર અને NFDC ના મેનેજિંગ ડિરેક્ટર શ્રી પ્રકાશ મગદુમ, ઇન્ડિયન ડોક્યુમેન્ટરી પ્રોડ્યુસર્સ એસોસિએશન (IDPA) ના પ્રમુખ શ્રી સંસ્કાર દેસાઈ, ઉદ્યોગના અગ્રણીઓ, ફિલ્મ નિર્માતાઓ, જ્યુરી સભ્યો અને ભારત તેમજ વિદેશના પ્રતિષ્ઠિત મહેમાનો ઉપસ્થિત રહ્યા હતા.

માહિતી અને પ્રસારણ મંત્રાલય દ્વારા દર બે વર્ષે આયોજિત અને NFDC દ્વારા સંચાલિત આ સાત દિવસીય મહોત્સવ ફિલ્મ નિર્માતાઓ, ઉદ્યોગના વ્યાવસાયિકો અને સિનેમા પ્રેમીઓ માટે એક સમૃદ્ધ અનુભવનું વચન આપે છે. પ્રાદેશિક સિનેમેટિક અવાજો પ્રદર્શિત કરવા અને ભારતની સાંસ્કૃતિક વિવિધતાની ઉજવણી કરવાના ઉદ્દેશ્ય સાથે આ વર્ષની આવૃત્તિમાં બે નવા ક્યુરેટેડ સેક્શન -- "મરાઠી ફિલ્મો" અને "ઇકોઝ ફ્રોમ નોર્થ ઇસ્ટ" (Echoes from North East) પણ રજૂ કરવામાં આવ્યા છે.

ભારત અને વિશ્વભરમાંથી MIFF જે અસાધારણ ફિલ્મો, અવાજો અને પરિપ્રેક્ષ્યોને એકસાથે લાવી રહ્યું છે તેના પેકેજની વધુ વિગતો માટે અહીં ક્લિક કરો.

19મા MIFF 2026 વિશે

બિન-ફીચર સિનેમાને સમર્પિત દક્ષિણ એશિયાના સૌથી જૂના અને સૌથી મોટા ફિલ્મ ફેસ્ટિવલ તરીકે ઓળખાતો 'મુંબઈ ઇન્ટરનેશનલ ફિલ્મ ફેસ્ટિવલ' (MIFF) લાંબા સમયથી ડોક્યુમેન્ટરી, શોર્ટ ફિક્શન અને એનિમેશન ફિલ્મ નિર્માણની એક જીવંત ઉજવણી તરીકે ઓળખાય છે. વર્ષ 1990 માં સ્થાપિત અને ભારત સરકારના માહિતી અને પ્રસારણ મંત્રાલયના નેજા હેઠળ આયોજિત, MIFF એક પ્રતિષ્ઠિત આંતરરાષ્ટ્રીય પ્લેટફોર્મ તરીકે વિકસિત થયું છે જે વિશ્વભરના ફિલ્મ નિર્માતાઓ, કલાકારો અને સિનેમા પ્રેમીઓને આકર્ષિત કરે છે.

MIFF ની 19મી આવૃત્તિ એક ગહન અને સમૃદ્ધ સિનેમેટિક અનુભવનું વચન આપે છે, જેમાં ઉદ્યોગ-કેન્દ્રિત પહલોની રોમાંચક શ્રેણી સાથે આંતરરાષ્ટ્રીય સ્તરે પ્રશંસા પામેલી ફિલ્મોની વિચારપૂર્વકની લાઇનઅપ રજૂ કરવામાં આવી છે.

• આ વર્ષે, મહોત્સવના સ્પર્ધાત્મક વિભાગમાં ભારત સહિત 46 દેશોમાંથી 1,459 ફિલ્મોની એન્ટ્રીઓ પ્રાપ્ત થઈ છે.
• આ મહોત્સવ 42 થી વધુ ભારતીય ભાષાઓ અને ભારત બહારની 30 થી વધુ ભાષાઓમાં ફિલ્મો પ્રદર્શિત કરે છે, જે તેની વૈશ્વિક પહોંચ અને સાંસ્કૃતિક વિવિધતા દર્શાવે છે.
• વિશ્વભરના પ્રખ્યાત ફિલ્મ નિર્માતાઓની કૃતિઓને પ્રદર્શિત કરતા, આ મહોત્સવમાં કેટલીક શ્રેષ્ઠ દસ્તાવેજી, ટૂંકી કાલ્પનિક ફિલ્મો, એનિમેશન, ડેબ્યૂ ડિરેક્ટર ફિલ્મો અને વિદ્યાર્થીઓની ફિલ્મો રજૂ કરવામાં આવશે.
• સ્ક્રીનીંગની સાથે, ડોક બજાર (Doc Bazaar) ની બીજી આવૃત્તિ, સમૃદ્ધ માસ્ટરક્લાસ અને IDPA દ્વારા ઓપન ફોરમ મહોત્સવમાં સિનેમેટિક અને સર્જનાત્મક આદાનપ્રદાનને વધુ વધારશે.

MIFF 2026 માં વાર્તા કહેવાની જીવંત દુનિયામાં પ્રવેશ કરો, જ્યાં શક્તિશાળી સિનેમા, સર્જનાત્મક મગજ અને પ્રેરણાદાયી અવાજો એકસાથે આવીને ડોક્યુમેન્ટરી, એનિમેશન અને શોર્ટ ફિક્શન ફિલ્મ નિર્માણની એક અવિસ્મરણીય ઉજવણીનું નિર્માણ કરે છે.

SM/JD