ભારતની પરંપરાગત જ્ઞાન વિરાસતના સંરક્ષણ માટે ચાલી રહેલા પ્રયાસોના ભાગરૂપે, તિગલારી અને જૂની કન્નડ લિપિમાં લખાયેલ આયુર્વેદ હસ્તપ્રતોના ટ્રાંસલિટરેશન પર એક ક્ષમતા-નિર્માણ કાર્યશાળાનું આજે શ્રી પુથિગે નરસિંહ સભાભવન, ગીતા મંદિર, ઉડુપી ખાતે ઉદ્ઘાટન કરવામાં આવ્યું હતું.

આ કાર્યશાળાનું સંયુક્ત આયોજન સેન્ટ્રલ કાઉન્સિલ ફોર રિસર્ચ ઇન આયુર્વેદિક સાયન્સીસ (CCRAS), આયુષ મંત્રાલય, ભારત સરકાર અને સેન્ટ્રલ સંસ્કૃત યુનિવર્સિટી (CSU), શિક્ષણ મંત્રાલય, ભારત સરકાર દ્વારા શ્રી વાદિરાજ રિસર્ચ ફાઉન્ડેશનના સહયોગથી કરવામાં આવી રહ્યું છે.

આ કાર્યક્રમ શ્રી પુથિગે મઠના મઠાધિપતિ પરમ પૂજ્ય શ્રી શ્રી સુગુણેન્દ્ર તીર્થ શ્રીપાદ અને મઠના જુનિયર મઠાધિપતિ પરમ પૂજ્ય શ્રી શ્રી સુશ્રીન્દ્ર તીર્થ શ્રીપાદના આશીર્વાદથી આયોજિત કરવામાં આવી રહ્યો છે. આ પહેલનો ઉદ્દેશ્ય તિગલારી અને જૂની કન્નડ લિપિમાં સચવાયેલી આયુર્વેદ હસ્તપ્રતોને વાંચવા, ઉકેલવા અને નકલ કરવા માટે વિદ્વાનોમાં કુશળતા કેળવવાનો છે, જે મુખ્યત્વે કર્ણાટકના દરિયાકાંઠાના વિસ્તારોમાં જોવા મળે છે.

આ કાર્યશાળાનું ઉદ્ઘાટન CCRASના મહાનિર્દેશક પ્રો. વૈદ્ય રબિનારાયણ આચાર્ય દ્વારા કરવામાં આવ્યું હતું. ઉદ્ઘાટન સમારોહમાં શ્રી પુથિગે મઠના વહીવટકર્તા અને દિવાન શ્રી નાગરાજ આચાર્ય; નેશનલ ઇન્સ્ટિટ્યુટ ઓફ ઇન્ડિયન મેડિકલ હેરિટેજ (NIIMH), હૈદરાબાદના આસિસ્ટન્ટ ડાયરેક્ટર ડો. જી. પી. પ્રસાદ; સેન્ટ્રલ આયુર્વેદ રિસર્ચ ઇન્સ્ટિટ્યુટ (CARI), બેંગલુરુના આસિસ્ટન્ટ ડાયરેક્ટર ડો. ટી. મહેશ્વર; અને નિટ્ટે યુનિવર્સિટીના ઇન્ડિયન નોલેજ સિસ્ટમ્સ (IKS) સેન્ટરના ડાયરેક્ટર ડો. સુધીર રાજ કે. હાજર રહ્યા હતા. આ કાર્યક્રમનું સંકલન શ્રી વાદિરાજ રિસર્ચ ફાઉન્ડેશનના ડાયરેક્ટર વિદ્વાન ગોપાલાચાર્ય દ્વારા કરવામાં આવ્યું હતું.

સભાને સંબોધતા, પ્રો. વૈદ્ય રબિનારાયણ આચાર્યએ આયુર્વેદ જ્ઞાનના સંરક્ષણ, દસ્તાવેજીકરણ અને પ્રસાર માટે CCRAS દ્વારા હાથ ધરવામાં આવેલી વિવિધ પહેલો પર પ્રકાશ પાડ્યો હતો. તેમણે દેશની સમૃદ્ધ જ્ઞાન પરંપરાઓના સંરક્ષણ અને પ્રમોશન માટે જ્ઞાન ભારતમ્ મિશન હેઠળ ભારત સરકારના પ્રયાસો પર ભાર મૂક્યો હતો.

આ પ્રસંગે  ડો. સુધીર રાજ કે. એ ભારતની હસ્તપ્રત વિરાસતના સંરક્ષણના મહત્વ પર ભાર મૂક્યો હતો અને સંશોધન તથા જ્ઞાનના પ્રસારને મજબૂત બનાવવામાં ઇન્ડિયન નોલેજ સિસ્ટમ્સની ભૂમિકા પર પ્રકાશ પાડ્યો હતો.

આ 15-દિવસીય તાલીમ કાર્યક્રમ આયુર્વેદ અને સંસ્કૃત પૃષ્ઠભૂમિ ધરાવતા યુવા વિદ્વાનોને અપ્રકાશિત આયુર્વેદ હસ્તપ્રતોને ઉકેલવા, ટ્રાંસલિટરેશન કરવા, સંપાદિત કરવા અને પ્રકાશન માટે તૈયાર કરવા માટે નિષ્ણાતો સાથે કામ કરવા સક્ષમ બનાવશે.

CCRAS અને સેન્ટ્રલ સંસ્કૃત યુનિવર્સિટી દ્વારા સંયુક્ત રીતે આયોજિત આ પ્રકારની આ ત્રીજી કાર્યશાળા છે. અગાઉની કાર્યશાળાઓ પુરી, ઓડિશા ખાતે કરણી/દેવનાગરી લિપિ પર ધ્યાન કેન્દ્રિત કરીને અને ગુરુવાયુર, કેરળ ખાતે વટ્ટેઝુથુ/મલયાલમ લિપિ પર ધ્યાન કેન્દ્રિત કરીને આયોજિત કરવામાં આવી હતી.

શ્રી ધર્મસ્થળ મંજુનાથેશ્વર કોલેજ ઓફ આયુર્વેદ, ઉડુપી, શ્રી ધર્મસ્થળ મંજુનાથેશ્વર કોલેજ ઓફ આયુર્વેદ, હાસનના ફેકલ્ટી સભ્યો અને વિદ્યાર્થીઓ તેમજ શ્રી પુથિગે મઠના ગુરુકુળના સંસ્કૃત વિદ્યાર્થીઓ આ કાર્યશાળામાં ભાગ લઈ રહ્યા છે.

આ કાર્યક્રમ દરમિયાન તૈયાર કરાયેલ લિપ્યંતરણ હસ્તપ્રતોને ત્યારબાદ CCRAS અને સેન્ટ્રલ સંસ્કૃત યુનિવર્સિટી દ્વારા પ્રકાશન માટે લેવામાં આવશે, જે ભારતના પરંપરાગત જ્ઞાન સ્ત્રોતોના સંરક્ષણ અને વ્યાપક પ્રસારમાં યોગદાન આપશે.

SM/DK/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com