قومی کمیشن برائے ہومیوپیتھی (این سی ایچ) نے ایک ایڈوائزری جاری کی ہے،  جس میں تمام اسٹیک ہولڈرز ، میڈیا تنظیموں اور عوام کے اراکین سے اپیل کی گئی ہے کہ وہ ہومیوپیتھی اور باضابطہ طور پر رجسٹرڈ ہومیوپیتھک پریکٹیشنرز سے متعلق بیانات دیتے وقت ذمہ داری کا ثبوت دیں ۔

قومی کمیشن برائے ہومیوپیتھی کے چیئرپرسن ڈاکٹر تارکیشور جین نے بتایا کہ کمیشن نے ہومیوپیتھی میں تعلیم ، عمل ، پیشہ ورانہ طرز عمل اور اخلاقیات کے معیارات کو منظم اور برقرار رکھنے کے اپنے مینڈیٹ کا استعمال کرتے ہوئے، ہومیوپیتھی اور اس کے پریکٹیشنرز کو نشانہ بنانے والے غیر ذمہ دارانہ اور غیر مصدقہ بیانات کے خلاف ایک سرکلر : 27/2026- این سی ایچ، مورخہ : 8/06/2026  جاری کیا ہے ۔

پرنٹ ، الیکٹرانک ، ڈیجیٹل اور سوشل میڈیا پلیٹ فارمز کے ذریعے نشر کیے جانے والے توہین آمیز ، ہتک آمیز ، گمراہ کن اور غیر تصدیق شدہ بیانات کی مثالوں کا سنجیدگی سے نوٹس لیتے ہوئے، کمیشن نے عوامی گفتگو میں حقائق کی درستگی اور ذمہ دارانہ مواصلات کی ضرورت پر روشنی ڈالی ۔

ڈاکٹر جین نے بتایا کہ ہومیوپیتھی قومی کمیشن برائے ہومیوپیتھی ایکٹ  2020 کے تحت قانونی طور پر تسلیم شدہ طب کا نظام ہے ، اور ہومیوپیتھی ادویات کو ڈرگس اینڈ کاسمیٹکس ایکٹ  1940 کے تحت ریگولیٹ کیا جاتا ہے ۔  انہوں نے مزید کہا کہ ہومیوپیتھی میں انڈرگریجویٹ اور پوسٹ گریجویٹ پروگرام کمیشن کی طرف سے مقرر کردہ ایک منظم تعلیمی فریم ورک کے تحت منعقد کیے جاتے ہیں ، جس میں این ای ای ٹی کے اہل امیدواروں کے ذریعے داخلے ہوتے ہیں ۔

انہوں نے مزید کہا کہ رجسٹرڈ ہومیوپیتھک پریکٹیشنرز مقررہ تعلیم اور تربیتی معیارات سے گزرتے ہیں اور قابل اطلاق قانونی اور ریگولیٹری دفعات کے مطابق ہومیوپیتھی پر عمل کرنے کے مجاز ہیں ۔

کمیشن نے اداروں ، پیشہ ورانہ اداروں ، صحت کی دیکھ بھال کے اداروں ، میڈیا تنظیموں اور سوشل میڈیا پلیٹ فارم استعمال کرنے والے افراد  سے اپیل کی ہے کہ وہ ہومیوپیتھی یا اس کے پریکٹیشنرز کے بارے میں عوامی بیانات دینے سے پہلے سمجھ داری سے کام لیں اور حقائق کی درستگی کو یقینی بنائیں ۔

ایڈوائزری میں مزید کہا گیا ہے کہ انفرادی پریکٹیشنر کے طرز عمل سے متعلق کسی بھی الزام ، شکایات یا خدشات کو پیشے کے خلاف عمومی دعووں کے بجائے قائم شدہ قانونی ، ریگو لیٹری ، تادیبی یا عدالتی طریقہ کار کے ذریعے حل کیا جانا چاہیے ۔

ہومیوپیتھی اور رجسٹرڈ پریکٹیشنرز کے وقار ، دیانت داری اور قانونی حیثیت کے تحفظ کے لیے کمیشن کے عزم کا اعادہ کرتے ہوئے،  ڈاکٹر جین نے کہا کہ بے بنیاد ، گمراہ کن یا ہتک آمیز بیانات پھیلانے کی جان بوجھ کر کی جانے والی کارروائیوں کے خلاف جہاں بھی ضروری ہو، قانونی چارہ جوئی سمیت مناسب کارروائی کی جا سکتی ہے ۔

Circular issued by the National Commission for Homoeopathy

****************************

( ش ح ۔  ا  ک  ۔ ق ر)

U.No. 8220