કેન્દ્રીય પર્યાવરણ, વન અને આબોહવા પરિવર્તન રાજ્ય મંત્રી શ્રી કીર્તિ વર્ધન સિંહે આજે રાષ્ટ્રીય પ્રાણીઉદ્યાન (NZP), નવી દિલ્હી ખાતે સ્માર્ટ નેવિગેશન અને ઓનલાઇન ટિકેટ બુકિંગને સરળ બનાવી મુલાકાતીઓના અનુભવને વધારવાના ઉદ્દેશ્ય સાથે સ્માર્ટ ડિજિટલ ઝૂ ગાઇડ "NZP સાથી એપ" (NZP Saathi App) લોન્ચ કરી અને સેલ્ફ-ટિકટિંગ કિઓસ્ક (Self-ticketing Kiosks) નું ઉદ્ઘાટન કર્યું હતું.

મંત્રીશ્રીએ તાજેતરમાં જ સંપન્ન થયેલા સમર વેકેશન પ્રોગ્રામ 2026માં ભાગ લેનારા વિદ્યાર્થીઓ દ્વારા તૈયાર કરાયેલી સર્જનાત્મક કૃતિઓ પ્રદર્શિત કરતા એક પ્રદર્શનની મુલાકાત લીધી હતી. તેમણે યુવા સહભાગીઓની સર્જનાત્મકતાની પ્રશંસા કરી હતી અને વિદ્યાર્થીઓમાં વન્યજીવ સંરક્ષણ વિશે ઊંડી સમજ કેળવતા શૈક્ષણિક અને જાગૃતિ કાર્યક્રમોનું આયોજન કરવા બદલ પ્રાણીઉદ્યાનના સત્તાવાળાઓને અભિનંદન આપ્યા હતા.

મંત્રીશ્રીએ ઔપચારિક રીતે "NZP સાથી એપ" લોન્ચ કરી અને સેલ્ફ-ટિકટિંગ કિઓસ્કનું ઉદ્ઘાટન કર્યું, જે રાષ્ટ્રીય પ્રાણીઉદ્યાન ખાતે મુલાકાતીઓની સુવિધા અને ડિજિટલ પરિવર્તન તરફ એક મહત્વપૂર્ણ પગલું દર્શાવે છે.

"NZP સાથી એપ" એન્ડ્રોઇડ (Android) અને આઇઓએસ (iOS) બંને પ્લેટફોર્મ પર ઉપલબ્ધ છે, જેમાં ઇન્ટરેક્ટિવ ડિજિટલ મેપ અને સ્માર્ટ નેવિગેશન સિસ્ટમ છે જે મુલાકાતીઓને પ્રાણીઓના પાંજરા (એન્ક્લોઝર), શૌચાલય, બગી પોઇન્ટ, એક્ઝિટ (બહાર નીકળવાનો માર્ગ) અને અન્ય સુવિધાઓ શોધવામાં સક્ષમ બનાવે છે. આ એપ એક્સપ્રેસ ટૂર, ફેમિલી ટૂર, ગ્રાન્ડ ઝૂ ટૂર અને પર્સનલાઇઝ્ડ "માય ટૂર" વિકલ્પો સહિતની થીમ આધારિત ટૂરની સુવિધા પણ પ્રદાન કરે છે.

સેલ્ફ-ટિકટિંગ કિઓસ્ક મુલાકાતીઓને ઘટનાસ્થળે જ ટિકટ બુકિંગ કરવા માટે મફત વાઇ-ફાઇ (Wi-Fi) કનેક્ટિવિટી સાથે યુપીઆઇ (UPI) આધારિત ડિજિટલ પેમેન્ટ્સ દ્વારા ઓનલાઇન ટિકટ બુકિંગની સુવિધા આપશે.

ઉદ્ઘાટન બાદ, મંત્રીશ્રીએ રાષ્ટ્રીય પ્રાણીઉદ્યાનના સર્વગ્રાહી વિકાસ, આધુનિકીકરણ અને કાર્યક્ષમ સંચાલન માટે ચાલુ પહેલોની સમીક્ષા કરવા અને વ્યૂહરચનાઓ પર ચર્ચા કરવા માટે અધિકારીઓ અને સેક્શન ઇન-ચાર્જ સાથે બેઠક યોજી હતી.

મંત્રીશ્રીએ પક્ષીઘરોનું પણ નિરીક્ષણ કર્યું હતું અને પક્ષીઓના સંગ્રહ માટે ઉનાળાના વ્યવસ્થાપનની વ્યવસ્થાઓની સમીક્ષા કરી હતી. તેમણે પાંજરાઓની સ્થિતિનું મૂલ્યાંકન કર્યું હતું અને પ્રાણી કલ્યાણ તથા વસવાટ વ્યવસ્થાપનમાં વધુ સુધારો કરવા માટે સૂચનો આપ્યા હતા.

વેટરનરી હોસ્પિટલની મુલાકાત દરમિયાન, મંત્રીશ્રીએ ત્યાં સારવાર લઈ રહેલા બીમાર પ્રાણીઓની રાખવામાં આવતી સંભાળનું નિરીક્ષણ કર્યું હતું અને સ્વાસ્થ્ય સંભાળ તથા વ્યવસ્થાપનની પદ્ધતિઓ અંગે પ્રાણીઉદ્યાનના પશુચિકિત્સકો અને પશુ આરોગ્ય સ્ટાફ સાથે વિગતવાર ચર્ચા કરી હતી.

ત્યારબાદ, મંત્રીશ્રીએ સિંહના પાંજરાની મુલાકાત લીધી હતી અને એશિયાટિક સિંહો, કાર્તિક અને કરણીનું નિરીક્ષણ કર્યું હતું. તેમણે તેમની જાળવણી અને પાંજરાના એકંદર વ્યવસ્થાપન અંગે સંતોષ વ્યક્ત કર્યો હતો.

મંત્રીશ્રીએ રાષ્ટ્રીય પ્રાણીઉદ્યાનના સ્ટાફ અને અધિકારીઓને વન્યજીવ સંરક્ષણ, પ્રાણી કલ્યાણ અને જાહેર શિક્ષણ પ્રત્યેની તેમની પ્રતિબદ્ધતા, સમર્પણ અને સતત પ્રયાસો બદલ બિરદાવ્યા હતા.

રાષ્ટ્રીય પ્રાણીઉદ્યાન સંરક્ષણ શિક્ષણને મજબૂત કરવા, ટેક્નોલોજી દ્વારા મુલાકાતીઓની સેવાઓમાં સુધારો કરવા અને પ્રાણીઓની સંભાળ તથા વ્યવસ્થાપનના સર્વોચ્ચ ધોરણો સુનિશ્ચિત કરવા માટે પ્રતિબદ્ધ છે.

SM/IJ/JD