وزیر اعظم جناب نریندر مودی نے آج سورت، گجرات میں کئی ترقیاتی منصوبوں کا افتتاح کیا اور سنگ بنیاد رکھا۔ ایک بڑے اجتماع سے خطاب کرتے ہوئے وزیر اعظم نے گجرات کے لوگوں کی غیر متزلزل حمایت کے لیے ان کا شکریہ ادا کیا۔ جناب مودی نے تبصرہ کیا، "بلدیاتی انتخابات کے بعد، میں پہلی مرتبہ سورت کا دورہ کر رہا ہوں۔ سورت سے، میں پورے گجرات کے لوگوں کو سلام اور مبارکباد پیش کرتا ہوں" ۔

تقریب میں موجود سورت اور نوساری کے بہت سے منتخب نمائندوں کو مبارکباد پیش کرتے ہوئے وزیر اعظم نے تمام تر متعلقہ فریقوں  کو یاد دلایا کہ گجرات کے لوگوں نے خدمت کے جذبے کی تائید کی ہے۔ اس بات پر زور دیتے ہوئے کہ یہ عظیم فتح خدمت کے مشن کو مزید وسعت دینے کا فرمان ہے، انہوں نے تمام منتخب نمائندوں پر زور دیا کہ وہ مزید محنت کریں۔ انہوں نے اس اہم کردار پر زور دیا جو تمام منتخب عوامی نمائندوں کو اس وژن کو عملی جامہ پہنانے میں ادا کرنا چاہیے۔ جناب مودی نے زور دے کر کہا، ’’ہمارا عزم وکست گجرات اور وکست بھارت بنانا ہے۔ یہ عزم ملک کے ہر گاؤں، ہر ضلع، ہر شہر کو ترقی دینے سے ہی پورا ہوگا۔‘‘

یوم ماحولیات کے موقع پر منعقد ہونے والی تقریب کے خوش آئند اتفاق کی جانب توجہ مبذول کراتے ہوئے، وزیر اعظم نے 5 جون کو، ملک کے سب سے صاف ستھرے شہروں میں سے ایک سورت میں ہونے پر فخر کا اظہار کیا۔ سورت شہر ،جو کبھی طاعون کے وبائی مرض سے متاثر ہوا تھا، کا تغیر سے ہمکنار ہوکر اپنی صفائی ستھرائی کے لیے شہرت حاصل کرنے کا ذکر کرتے ، انہوں نے تمام تر متعلقہ فریقوں بشمول شہری، افسران، ملازمین اور عوامی نمائندوں کی گزشتہ دو دہائیوں کی مسلسل کوششوں کی ستائش کی۔ جناب مودی نے کہا، ’’یہ کتنے بڑے فخر کی بات ہے، یہی سورت، جو کبھی طاعون کی وبا سے متاثر تھا، آج صفائی کے لیے پہچانا جا رہا ہے‘‘۔

سبز مستقبل کی جانب عالمی منتقلی میں گجرات کے اہم کردار کا ذکر کرتے ہوئے، وزیر اعظم نے تاریخی چرنکا سولر پارک کے ساتھ 2009 میں بھارت کے پہلے موسمیاتی تبدیلی کے محکمے کے قیام میں ریاست کی دور اندیشی کو یاد کیا۔ انہوں نے تفصیل سے بتایا کہ کس طرح سورت اپنی اختراعی 'مدور آبی معیشت'، صنعتی استعمال کے لیے گندے پانی کو سودھنے، اور گزشتہ بارہ برسوں کی ملک گیر 'فضلے سے دولت' تحریک کے ذریعے فطرت کے ساتھ ترقی کو متوازن کرنے کے قومی اصول کی مثال دیتا ہے۔ مستقبل میں پینے کے پانی اور آبی نکاسی کی حفاظت کو یقینی بناتے ہوئے، انہوں نے تاپی بیراج پروجیکٹ کی منظوری پر روشنی ڈالی، جبکہ سورت کی برقی نقل و حرکت، بڑھتے ہوئے میٹرو نیٹ ورک، اور ہزیرہ انڈسٹریل ایریا کی آنے والی گرین اسٹیل کی پیداوار مکمل طور پر قابل تجدید توانائی سے چلنے کی توقع ظاہر کی۔ جناب مودی نے کہا،''یہ تمام تر اقدامات، اس امر کو یقینی بنانے سے کہ ہماری بسیں برقی ہوں، سبز توانائی کا استعمال کرتے ہوئے اسٹیل تیار کرنے تک، سورت کی ایک حقیقی سبز شہر کے طور پر الگ شناخت کو مزید تقویت بخشیں گے'' ۔

وزیر اعظم نے 'آفات کی دہائی' قرار دیے جانے والے دور کی بے مثال چنوتیوں کا ذکر کرتے ہوئے—جو کہ وبا، عالمی تنازعات اور توانائی کی غیر مستحکم سپلائی چینوں پر محیط ہے—140 کروڑ ہندوستانیوں کی ان شدید عالمی جھٹکوں کا مضبوطی سے مقابلہ کرنے پر تعریف کی۔" انہوں نے خاص طور پر بھارت کی توانائی کی خود انحصاری میں اس کی مضبوط شراکت کا سہرا گجرات کو دیا، اور کہا کہ ریاست ملک کی 250 جی ڈبلیو کے بقدر قابل تجدید توانائی کی صلاحیت کا پانچواں حصہ (50 جی ڈبلیو) پیدا کرتی ہے اور گرین ہائیڈروجن اور گرین امونیا جیسے ابھرتے ہوئے شعبوں میں قیادت کرنے کے لیے تیار ہے۔ گزشتہ بارہ برسوں کے دوران تعمیر کی گئی توانائی کی صلاحیتوں کی اہم اہمیت پر روشنی ڈالتے ہوئے، انہوں نے شمسی توانائی، ایتھنول بلینڈنگ، ریلوے الیکٹریفیکیشن، نیوکلیئر انرجی، جدید بجلی کی ترسیل کے نیٹ ورکس، اور گیس پائپ لائنوں اور بندرگاہوں کی ذخیرہ کرنے کی صلاحیتوں کی وسیع پیمانے پر توسیع میں تاریخی سرمایہ کاری کا خاکہ پیش کیا۔ جناب مودی نے کہا،’’یہ جاری عالمی بحران ظاہر کرتا ہے کہ توانائی کے معاملے میں خود انحصاری کس قدر ضروری ہے، اور ملک نے گزشتہ بارہ برسوں میں جو وسیع صلاحیت پیدا کی ہے وہ آج بہت اہمیت رکھتی ہے‘‘۔

تقریب سے قبل ہزیرہ کے اپنے دورے کے بارے میں بات کرتے ہوئے، وزیر اعظم نے خطے کو نہ صرف ایک صنعتی زون بتایا، بلکہ توانائی، فولاد، دفاعی پیداوار اور عالمی سمندری تجارت پر محیط ایک جامع، فروغ پزیر ماحولیاتی نظام بھی قرار دیا۔ انہوں نے اس سمندری-صنعتی مرکز کو 'آتم نربھر بھارت' (خود کفیل بھارت) پہل قدمی کے زندہ ثبوت کے طور پر پیش کیا، ملک کے اندر ان مایوسی پرست دھڑوں کی سخت مذمت کی جو خود انحصاری کی مہم کا مذاق اڑاتے ہیں اور جنہوں نے تاریخی طور پر ملک کو غیر ملکی اداروں پر منحصر رکھا ہے۔ جناب مودی نے زور دیا، ’’وہ لوگ جو قوم کے عزم کو مسلسل کم کرتے ہیں وہ بھول جاتے ہیں کہ دوسروں پر انحصار کرنے والا ملک کبھی بھی ترقی کی وہ بلندیاں حاصل نہیں کر سکتا جس کا وہ حقدار ہے ‘‘۔

خود کفالت کو آگے بڑھانے کے لیے جدید کنیکٹیویٹی پر حکومت کی خصوصی توجہ کا خاکہ پیش کرتے ہوئے، وزیر اعظم نے صنعتی اور تجارتی ترقی کے لیے اہم محرک کے طور پر وقف مال بھاڑا گلیارہ، بلٹ ٹرین، اور وڈودرا-ممبئی ایکسپریس وے کے نئے افتتاحی حصے جیسے میگا پروجیکٹس کا حوالہ دیا۔ انہوں نے اس بات پر زور دیا کہ یہ بنیادی ڈھانچہ مہم فطری طور پر شامل ہے، جو کہ داہود-بوڈیلی-واپی گلیارہ جیسے اقدامات کے ذریعے پہلے سے محروم قبائلی اور دور دراز علاقوں تک پہنچتی ہے۔ چھوٹا ادے پور، نرمدا، بھروچ اور تاپی کے قبائلی علاقوں میں چار لین شاہراہیں لا کر، حکومت سفر کے وقت اور مال برداری کے اخراجات کو کم کر رہی ہے جبکہ اس کے ساتھ ہی اسٹیچو آف یونٹی اور ساپوتارا جیسے مقامات پر تعلیم، حفظانِ صحت اور سیاحت تک بے مثال رسائی کے راستے کھول رہی ہے۔ جناب مودی نے تصدیق کی، ’’ہمارے قبائلی اور دیہی علاقوں میں جدید کنیکٹیویٹی لا کر، ہم اس بات کو یقینی بنا رہے ہیں کہ انہیں تعلیم، ادویات اور کمائی کے بہتر مواقع ملیں‘‘۔

سورت میں ایک جدید ای ایس آئی سی ہسپتال کا افتتاح کرتے ہوئے دوسری ریاستوں سے آنے والے مزدوروں اور مہاجر خاندانوں کے لیے بہتر حفظانِ صحت فراہم کرنے کے لیے، وزیر اعظم نے ان ترقیاتی سنگ میلوں کو زبردست انتخابی اعتماد سے مربوط کیا جس پر قوم کا حکومت پر اعتماد برقرار ہے۔ ایک زبردست ترغیب عمل کے ساتھ اپنی بات مکمل کرتے ہوئے، انہوں نے ایک مکمل ترقی یافتہ ملک کی تعمیر کے لیے لوگوں کی اجتماعی طاقت پر مکمل اعتماد کا اظہار کرتے ہوئے، بھارتی شہریوں کی لامحدود امید پر خوش ظاہر کی۔ جناب مودی نے کہا، ’’بھارت ناقابل یقین امنگوں اور لامحدود امیدوں سے آراستہ ایک ملک ہے، اور جب ملک کی افرادی قوت مکمل طور پر حل ہو جائے تو کوئی ایسا مقصد نہیں ہے جسے ہم حاصل نہیں کر سکتے ‘‘۔

**********

 (ش ح –ا ب ن)

U.No:7951