الیکٹرانکس اور اطلاعاتی ٹیکنالوجی کی وزارت (ایم ای آئی ٹی وائی) کے تحت ڈیجیٹل انڈیا کارپوریشن کے ڈیجیٹل انڈیا بھاشنی ڈویژن نے کرنٹ اے آئی اور کلپا امپیکٹ کے اشتراک سے ویوما اختراع چیلنج کا آغاز کیا ہے۔ یہ ایک اختراعی اقدام ہے جس کا مقصد اوپن سورس، کثیر لسانی اور آواز پر مبنی مصنوعی ذہانت کے ایسے حلوں کی ترقی کو فروغ دینا ہے جو آف لائن اور کم رابطہ والے ماحول میں بھی مؤثر طریقے سے کام کر سکیں۔

یہ چیلنج سنو سترا پر مبنی ہے، جو ایک کثیر لسانی، آواز پر مبنی اور اوپن سورس ہینڈ ہیلڈ مصنوعی ذہانت ریفرنس ڈیوائس ہے، جسے بھاشنی اور کرنٹ اے آئی نے مشترکہ طور پر تیار کیا اور انڈیا اے آئی امپیکٹ سمٹ 2026 میں متعارف کرایا تھا۔ ایک ریفرنس پلیٹ فارم کے طور پر تیار کردہ سنو سوترا، کثیر لسانی زبان ٹیکنالوجیوں کو ڈیوائس پر موجود مصنوعی ذہانت کی صلاحیتوں کے ساتھ یکجا کرتا ہے، جس کے ذریعے کلاؤڈ بنیادی ڈھانچہ پر انحصار کے بغیر ہندوستانی زبانوں میں مکالماتی مصنوعی ذہانت کے تجربات ممکن ہوتے ہیں۔

ڈیجیٹل انڈیا بھاشنی ڈویژن کے چیف ایگزیکٹو آفیسر جناب امیتابھ ناگ نے کہا:

"کثیر لسانی مصنوعی ذہانت صرف ایک تکنیکی تبدیلی نہیں بلکہ ہندوستان کے لیے عوامی اثرات رکھنے والا ایک بنیادی ڈھانچہ ہے، جو بڑے پیمانے پر مختلف زبانوں میں خدمات تک مساوی رسائی کو ممکن بناتا ہے۔ بھاشنی ہندوستانی زبانوں پر مبنی مصنوعی ذہانت کے ماحولیاتی نظام کو مضبوط بنا کر اس تبدیلی کو آگے بڑھا رہا ہے اور سنو سوترا جیسے حلوں کو ممکن بنا رہا ہے، جو کم وسائل، آف لائن اور ہینڈ ہیلڈ ماحول میں کام کرتے ہوئے ملک کے آخری فرد تک آواز پر مبنی ذہین خدمات پہنچاتے ہیں۔"

ویوما اختراع چیلنج بھاشنی کے کثیر لسانی مصنوعی ذہانت کے بنیادی ڈھانچے اور کرنٹ اے آئی کی اوپن سورس ٹیکنالوجی میں مہارت کو یکجا کرتا ہے تاکہ زبان تک رسائی، ڈیجیٹل خواندگی اور رابطہ کاری سے متعلق چیلنجوں کے عملی حل تیار کیے جا سکیں۔

اس چیلنج کے تحت اسٹارٹ اپس، محققین، طلبہ، تعلیمی ادارے، ایم ایس ایم ایز، صنعتی شراکت دار اور آزاد اختراع کاروں کو سنو سوترا پلیٹ فارم پر نئے استعمالات، ہارڈویئر میں بہتری، ماڈل کی بہتر کارکردگی اور عملی نفاذ کے قابل ایپلی کیشنز تیار کرنے کی دعوت دی گئی ہے۔ شرکا کو ایسے طریقوں کی تلاش کی بھی ترغیب دی گئی ہے جن کے ذریعے اس ڈیوائس کو مزید چھوٹا، مؤثر اور مختلف زمینی حالات کے لیے موزوں بنایا جا سکے۔

ممکنہ استعمالات میں تعلیم، زراعت، صحت، حکمرانی اور عوامی خدمات کی فراہمی جیسے شعبے شامل ہیں، جن کا مقصد ہندوستان کی لسانی اور جغرافیائی تنوع کے درمیان مصنوعی ذہانت تک رسائی کو وسعت دینا ہے۔

یہ چیلنج کئی مراحل میں منعقد ہوگا، جس کا آغاز کھلی درخواستوں کے عمل سے ہوگا۔ منتخب کیے جانے والے 20 مختصر فہرست شدہ ٹیموں کو ڈویلپر کٹس اور سنو سوترا پلیٹ فارم تک رسائی فراہم کی جائے گی تاکہ وہ اپنے حل تیار اور آزمائش کر سکیں۔ شرکا کو بھاشنی اور کرنٹ اے آئی سے وابستہ ماہرین کی جانب سے تکنیکی رہنمائی بھی حاصل ہوگی۔

فائنل مرحلے میں منتخب ٹیمیں اپنے نمونے ماہرین کی جیوری کے سامنے پیش کریں گی۔ کامیاب ٹیمیں 80 لاکھ روپے تک کے انعامات اور مرکزی و ریاستی سرکاری محکموں کے ساتھ اپنے حلوں کے نفاذ کے مواقع حاصل کر سکیں گی۔

یہ اقدام اختراعی ماحولیاتی نظام میں باہمی تعاون کو بھی فروغ دیتا ہے، خاص طور پر ایسی ٹیموں کی حوصلہ افزائی کرتا ہے جن میں اسٹارٹ اپس، ایم ایس ایم ایز، انجینئرز، محققین اور تعلیمی ادارے شامل ہوں۔

ویوما اختراع چیلنج کے لیے درخواستیں اب کھلی ہیں۔

ڈیجیٹل انڈیا بھاشنی ڈویژن (ڈی آئی بی ڈی) کے بارے میں

ڈیجیٹل انڈیا کارپوریشن کے تحت اور الیکٹرانکس و اطلاعاتی ٹیکنالوجی کی وزارت (ایم ای آئی ٹی وائی) کے ماتحت ڈیجیٹل انڈیا بھاشنی ڈویژن (ڈی آئی بی ڈی) ہندوستان کا قومی اقدام ہے جو مصنوعی ذہانت پر مبنی کثیر لسانی ڈیجیٹل شمولیت اور زبان ٹیکنالوجی کے فروغ کے لیے کام کر رہا ہے۔

 لسانی ٹیکنالوجی کے نیشنل ہب کے ذریعے بھاشنی ہندوستانی زبانوں میں حکمرانی، عوامی پلیٹ فارمز اور اداروں کے لیے قابلِ توسیع تقریر اور متن پر مبنی مصنوعی ذہانت خدمات فراہم کرتا ہے۔ یہ پلیٹ فارم 800 سے زائد سرکاری ویب سائٹس کو خدمات فراہم کرتا ہے، روزانہ 1.5 کروڑ سے زیادہ پراسیسنگ انجام دیتا ہے، اور 36 ہندوستانی متنی زبانوں، 23 ہندوستانی صوتی زبانوں اور 35 بین الاقوامی زبانوں کی معاونت کرتا ہے۔

ڈی آئی بی ڈی اوپن سورس اختراعات، کثیر لسانی مصنوعی ذہانت کی تحقیق، ڈیٹا سیٹس کی تیاری، اسٹارٹ اپس کی معاونت اور تعلیمی اشتراک کو بھی فروغ دیتا ہے، جس کے ذریعے ہندوستان کے ڈیجیٹل عوامی بنیادی ڈھانچے کے نظام کو مزید مضبوط بنایا جا رہا ہے۔

************

ش ح ۔   م  د ۔  م  ص

(U : 7889 )