উত্তৰ-পূৰ্বাঞ্চল উন্নয়ন মন্ত্ৰালয়
কেন্দ্ৰীয় মন্ত্ৰী জ্যোতিৰাদিত্য এম সিন্ধিয়াই অসমৰ মুগা ৰেচমৰ বাবে “মিছন চেনেহজৰী”ৰ শুভাৰম্ভণি কৰে
প্ৰধানমন্ত্ৰী নৰেন্দ্ৰ মোদীৰ আত্মনিৰ্ভৰ উত্তৰ-পূৰ্বাঞ্চলৰ দৃষ্টিভংগীৰ বাস্তৱ ৰূপ “মিছন চেনেহজৰী” — অসমৰ সোণালী ৰেচমক বিশ্বমানৰ বিলাসী ব্ৰেণ্ড হিচাপে গঢ়ি তোলাৰ লক্ষ্য
কেন্দ্ৰীয় মন্ত্ৰীগৰাকীয়ে বিশ্বমানৰ প্ৰিমিয়াম মুগা ৰেচম আৰু বিলাসী বস্ত্ৰ মূল্য শৃংখলাৰ কেন্দ্ৰস্থল হিচাপে আত্মপ্ৰকাশ কৰাৰ ক্ষেত্ৰত অসমৰ সম্ভাৱনাৰ ওপৰত আলোকপাত কৰে
পোষ্ট কৰা হৈছে:
02 JUN 2026 7:05PM by PIB Guwahati
উত্তৰ-পূৰ্বাঞ্চল উন্নয়ন মন্ত্ৰালয়ৰ (এমড’নাৰ) কেন্দ্ৰীয় মন্ত্ৰী শ্ৰী জ্যোতিৰাদিত্য এম সিন্ধিয়াই আজি অসমৰ মুখ্যমন্ত্ৰীৰ সৈতে একেলগে “মিছন চেনেহজৰী – অসম মুগা ৰেচম ইউএছপি”ৰ শুভাৰম্ভ কৰে। এই বিস্তৃত ক্লাষ্টাৰভিত্তিক পদক্ষেপৰ লক্ষ্য হৈছে অসমৰ অনন্য মুগা ৰেচম খণ্ডটোক বিশ্ববজাৰত প্ৰতিযোগিতামূলক আৰু উচ্চ-মূল্যসম্পন্ন বিলাসী বস্ত্ৰ পৰিৱেশতন্ত্ৰলৈ ৰূপান্তৰিত কৰা।
উত্তৰ-পূৰ্বাঞ্চল উন্নয়ন মন্ত্ৰালয়ৰ নেতৃত্বত অসম চৰকাৰ, কেন্দ্ৰীয় ৰেচম ব’ৰ্ড, বস্ত্ৰ মন্ত্ৰালয় আৰু অন্যান্য কেন্দ্ৰীয় মন্ত্ৰালয় তথা সংস্থাসমূহৰ সমন্বয়ত ৰূপায়িত এই অভিযানৰ লক্ষ্য হৈছে আতিথ্য উদ্ভিদৰ খেতি আৰু ৰেচম পলুৰ বীজ উৎপাদনৰ পৰা আৰম্ভ কৰি সূতা উলিওৱা, বয়ন, ব্ৰেণ্ডিং, ৰপ্তানি প্ৰসাৰ, ডিজিটেল অনুসৰণ ব্যৱস্থা আৰু পৰ্যটনলৈকে সমগ্ৰ মুগা ৰেচম মূল্য শৃংখলাক শক্তিশালী কৰা।
বিশ্বৰ একমাত্ৰ প্ৰাকৃতিকভাৱে সোণালী ৰঙৰ ৰেচম আৰু ভাৰতৰ প্ৰথম ভৌগোলিক সূচক (জিআই) স্বীকৃতিপ্ৰাপ্ত ৰেচম হিচাপে পৰিচিত মুগা ৰেচমে অসমৰ প্ৰায় ২.৬ লাখ পালনকাৰী আৰু শিপিনী পৰিয়ালৰ জীৱিকাৰ আধাৰ হিচাপে কাম কৰি আহিছে। ইয়াৰ দুৰ্লভতা আৰু বিশ্বজোৰা স্বীকৃতি সত্ত্বেও এই খণ্ডটো এতিয়াও অৰ্থনৈতিকভাৱে সম্পূৰ্ণ সম্ভাৱনা লাভ কৰিব পৰা নাই। “মিছন চেনেহজৰী”ৰ লক্ষ্য হৈছে এক উৎকৃষ্টমানৰ, অনুসৰণযোগ্য আৰু ৰপ্তানিমুখী মুগা ৰেচম অৰ্থনীতি গঢ়ি তুলি এই মূল্য ব্যৱধান দূৰ কৰা।
এই অভিযানত যোৰহাট, শিৱসাগৰ, লখিমপুৰ, ধেমাজি, ডিব্ৰুগড়, তিনিচুকীয়া, মাজুলী আৰু শুৱালকুছিকে ধৰি মুগা ৰেচম উৎপাদনকাৰী মুখ্য জিলাসমূহ সামৰি ক্লাষ্টাৰভিত্তিক পদ্ধতি গ্ৰহণ কৰা হৈছে। এই পদক্ষেপৰ অধীনত আতিথ্য উদ্ভিদৰ পৰিৱেশতন্ত্ৰ শক্তিশালী কৰা, আধুনিক সূতা উলিওৱা আন্তঃগাঁথনি স্থাপন, কৃষক উৎপাদক সংগঠন (এফপিঅ’) গঠন, উমৈহতীয়া সুবিধা কেন্দ্ৰ (চিএফচি) স্থাপন, জিআই প্ৰমাণীকৰণ কঠোৰভাৱে বলৱৎ কৰা আৰু “চেনেহজৰী” নামৰ একক ব্ৰেণ্ড পৰিচয়ৰ অধীনত বিশ্ববজাৰত প্ৰৱেশাধিকাৰ সৃষ্টি কৰাৰ পৰিকল্পনা গ্ৰহণ কৰা হৈছে।
কেন্দ্ৰীয় মন্ত্ৰী শ্ৰী জ্যোতিৰাদিত্য এম সিন্ধিয়াই কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত চৰকাৰে উত্তৰ-পূৰ্বাঞ্চলৰ অনন্য শক্তি আৰু উৎপাদিত সামগ্ৰীসমূহক বিশ্বজোৰা স্বীকৃতি প্ৰদান কৰাৰ লগতে স্থানীয় জনগোষ্ঠীৰ বাবে বহনক্ষম জীৱিকাৰ সুযোগ সৃষ্টিৰ বাবে প্ৰতিশ্ৰুতিবদ্ধ। তেওঁ উল্লেখ কৰে যে অসমৰ মুগা ৰেচম কেৱল এটা বস্ত্ৰজাত সামগ্ৰী নহয়, ই ভাৰতৰ সাংস্কৃতিক আৰু সভ্যতাগত ঐতিহ্যৰ এক মূল্যৱান সম্পদ।
মন্ত্ৰীগৰাকীয়ে কয় যে “মিছন চেনেহজৰী” কেৱল “সমগ্ৰ চৰকাৰ” দৃষ্টিভংগীৰ ওপৰত নহয়, বৰং কেন্দ্ৰীয় মন্ত্ৰালয়সমূহ, অসম চৰকাৰ, কাৰিকৰী প্ৰতিষ্ঠান আৰু ব্যক্তিগত খণ্ডৰ অংশীদাৰসকলৰ সমন্বিত অংশগ্ৰহণৰ ভিত্তিত গঢ়ি তোলা হৈছে। তিনিবছৰীয়া এই অভিযানত প্ৰায় ৩৯৬ কোটিৰ পৰা ৪১১ কোটি টকা বিনিয়োগৰ পৰিকল্পনা কৰা হৈছে, যাৰ ভিতৰত উত্তৰ-পূৰ্বাঞ্চল উন্নয়ন মন্ত্ৰালয়ৰ অংশ হ’ব ১৩৬-১৫১ কোটি টকা। এই পদক্ষেপৰ লক্ষ্য হৈছে বিশ্বস্বীকৃত বিলাসী মুগা ৰেচম পৰিৱেশতন্ত্ৰ গঢ়ি তোলা, উৎপাদকসকলৰ আয় বৃদ্ধি কৰা আৰু ৰেচমভিত্তিক সাংস্কৃতিক তথা অভিজ্ঞতামূলক পৰ্যটনৰ ক্ষেত্ৰত অসমক আগশাৰীৰ গন্তব্যস্থল হিচাপে প্ৰতিষ্ঠা কৰা।
তেওঁ আৰু কয় যে এই অভিযানৰ সফলতা তেতিয়াহে প্ৰতিফলিত হ’ব যেতিয়া খাঁটি অসমৰ মুগা ৰেচমে দেশীয় আৰু আন্তঃৰাষ্ট্ৰীয় বিলাসী বজাৰত সন্মানজনক স্থান লাভ কৰিব আৰু একে সময়তে ৰাজ্যখনৰ পালনকাৰী আৰু শিপিনী পৰিয়ালসমূহৰ আয় উল্লেখযোগ্যভাৱে বৃদ্ধি পাব। আন্তঃগাঁথনি উন্নয়ন, ব্ৰেণ্ডিং, গুণগত মান নিশ্চিতকৰণ আৰু ৰপ্তানি সুবিধা প্ৰদানৰ জৰিয়তে সমগ্ৰ মুগা ৰেচম মূল্য শৃংখলাক শক্তিশালী কৰাৰ ক্ষেত্ৰত চৰকাৰৰ অংগীকাৰ তেওঁ পুনৰ দোহাৰে।
সমবেত লোকসকলক সম্বোধন কৰি শ্ৰী সিন্ধিয়াই আজিৰ দিনটোক অসম আৰু উত্তৰ-পূৰ্বাঞ্চলৰ বাবে এক ঐতিহাসিক দিন বুলি অভিহিত কৰে। তেওঁ স্মৰণ কৰে যে অসম মুগা ৰেচমৰ কেৱল কাপোৰেই নহয়, প্ৰস্তুত পোছাক; অষ্টলক্ষ্মী মহোৎসৱৰ এখন ষ্টলতেই “মিছন চেনেহজৰী”ৰ ধাৰণাটোৱে প্ৰকৃত ৰূপ লাভ কৰিছিল। তেওঁ উল্লেখ কৰে যে বিশ্বৰ মুঠ মুগা ৰেচম উৎপাদনৰ ৯০ শতাংশই অসমত উৎপাদিত হয় আৰু ইয়াৰ স্বাভাৱিক সোণালী আভা, অসাধাৰণ স্থায়িত্ব আৰু জিআই-সমৰ্থিত অনুসৰণযোগ্যতাই ইয়াক বিশ্বৰ বিলাসী বস্ত্ৰসমূহৰ মাজত এক অনন্য স্থান প্ৰদান কৰিছে। তেওঁ কয় যে কৃষক আৰু উদ্যোগীসকলৰ অসাধাৰণ প্ৰচেষ্টাৰ পিছতো বৰ্তমান মুগা ৰেচমৰ পৰা উৎপাদকসকলে বছৰি মাত্ৰ ১৮ হাজাৰৰ পৰা ২১ হাজাৰ টকা উপাৰ্জন কৰে আৰু “মিছন চেনেহজৰী” এই বাস্তৱতাক আমূল সলনি কৰাৰ লক্ষ্যৰে প্ৰস্তুত কৰা হৈছে। মন্ত্ৰীগৰাকীয়ে কয় যে “সমগ্ৰ চৰকাৰ, সমগ্ৰ ভাৰত” দৃষ্টিভংগীয়েই এই অভিযানৰ মূল নীতি, যাৰ চূড়ান্ত লক্ষ্য হৈছে মুগা ৰেচমৰ সম্পূৰ্ণ প্ৰিমিয়াম মূল্য কৃষিক্ষেত্ৰৰ পৰা বৈদেশিক বজাৰলৈ লৈ যোৱা আৰু সেই মূল্যৰ সুফল অসমৰ শিপিনী আৰু পালনকাৰীসকলৰ হাতলৈ নিশ্চিতভাৱে গৈ পোৱাটো।
শ্ৰী সিন্ধিয়াই কয়, “মোৰ প্ৰতিশ্ৰুতি হৈছে আমি মূল্য শৃংখলাৰ প্ৰতিটো অংশক একত্ৰিত কৰিম আৰু অসমৰ মুগা ৰেচমক লেটাৰ পৰা বিশ্বমঞ্চলৈ লৈ যাম।”
অসমৰ মুখ্যমন্ত্ৰীয়ে “মিছন চেনেহজৰী”ৰ ধাৰণা প্ৰস্তুত আৰু সমৰ্থন কৰাৰ বাবে উত্তৰ-পূৰ্বাঞ্চল উন্নয়ন মন্ত্ৰালয়ক ধন্যবাদ জনাই ইয়াক অসমৰ পৰম্পৰাগত ৰেচম খণ্ডৰ বাবে এক যুগান্তকাৰী পদক্ষেপ বুলি অভিহিত কৰে। তেওঁ কয় যে মুগা ৰেচম অসমৰ সাংস্কৃতিক পৰিচয়ৰ সৈতে ওতঃপ্ৰোতভাৱে জড়িত আৰু এই অভিযানৰ জৰিয়তে কৃষক, পালনকাৰী, শিপিনী, শিল্পী আৰু উদ্যোগীসকলৰ বাবে নতুন সুযোগ সৃষ্টি হোৱাৰ লগতে ৰাজ্যখনৰ সমৃদ্ধ ঐতিহ্য সংৰক্ষণো নিশ্চিত হ’ব।
উত্তৰ-পূৰ্বাঞ্চল উন্নয়ন মন্ত্ৰালয়ৰ ৰাজ্য়িক মন্ত্ৰী ড০ সুকান্ত মজুমদাৰে কয় যে ভাৰত চৰকাৰে উত্তৰ-পূৰ্বাঞ্চলৰ উন্নয়নক অভূতপূৰ্ব অগ্ৰাধিকাৰ প্ৰদান কৰিছে। তেওঁ “মিছন চেনেহজৰী”ক এক ৰূপান্তৰকাৰী পদক্ষেপ বুলি উল্লেখ কৰি কয় যে ইয়াৰ জৰিয়তে অসম বিশ্বস্বীকৃত প্ৰিমিয়াম ৰেচম উৎপাদন কেন্দ্ৰ হিচাপে গঢ় লৈ উঠিব, কৰ্মসংস্থান সৃষ্টি হ’ব, উদ্যোগীকৰণ উৎসাহিত হ’ব আৰু গ্ৰাম্য জীৱিকা অধিক বহনক্ষম হ’ব।
উত্তৰ-পূৰ্বাঞ্চল উন্নয়ন মন্ত্ৰালয়ৰ সচিব শ্ৰী সঞ্জয় জাজুৱে অভিযানটোৰ ৰূপায়ণ কাঠামোৰ বিষয়ে ব্যাখ্যা কৰি কয় যে খাঁটি মুগা ৰেচমৰ বিশ্বৰ একমাত্ৰ উৎপাদক হিচাপে অসমৰ এক অনন্য সুবিধা আছে। তেওঁ উল্লেখ কৰে যে এই অভিযানৰ অধীনত আতিথ্য উদ্ভিদৰ পুনৰুজ্জীৱন, বীজৰ সুৰক্ষা, সূতা উলিওৱা আন্তঃগাঁথনি আধুনিকীকৰণ, জিআই প্ৰমাণীকৰণ, ডিজিটেল অনুসৰণ ব্যৱস্থা আৰু ব্ৰেণ্ডিং তথা ৰপ্তানিৰ জৰিয়তে বজাৰ সম্প্ৰসাৰণৰ ওপৰত গুৰুত্ব আৰোপ কৰা হ’ব।
২০২৮ চনৰ ভিতৰত এই অভিযানৰ অধীনত পাঁচটা আধুনিকীকৃত মুগা সূতা উলিওৱা গোট আৰু এটা মুগা স্পান মিল স্থাপন, ৩০টা কৃষক উৎপাদক সংগঠন আৰু ১,১৮০টাতকৈ অধিক কৃষক আগ্ৰহ গোট গঠন, ৫,০০০ হেক্টৰ সোম আৰু সোৱালু আতিথ্য উদ্ভিদৰ পুনৰুজ্জীৱন, জিআই-সংলগ্ন ব্যৱস্থাৰ জৰিয়তে ৮০ শতাংশতকৈ অধিক ব্যৱসায়িক মুগা ৰেচমৰ প্ৰমাণীকৰণ, ৮,০০০টাতকৈ অধিক পৰিয়ালৰ বাবে ডিজিটেল অনুসৰণ ব্যৱস্থা সৃষ্টি আৰু বছৰি ২,০০০ কিলোগ্ৰামতকৈ অধিক মুগা ৰেচম ৰপ্তানিৰ লক্ষ্য নিৰ্ধাৰণ কৰা হৈছে।
“মিছন চেনেহজৰী”ৰ জৰিয়তে সাংস্কৃতিক অৰ্থনীতিৰো বিকাশ সাধনৰ লক্ষ্য গ্ৰহণ কৰা হৈছে। ইয়াৰ অন্তৰ্গত মুগা ৰেচম পৰ্যটন পথৰ বিকাশ, ৰেচম পৰ্যটন উদ্যান স্থাপন আৰু বাৰ্ষিক “মুগা উৎসৱ” আয়োজনৰ ব্যৱস্থা, যাৰ জৰিয়তে অসমক ৰেচম ঐতিহ্যভিত্তিক পৰ্যটনৰ এক শ্ৰেষ্ঠ গন্তব্যস্থল হিচাপে গঢ়ি তোলা হ’ব।
এই শুভাৰম্ভ অনুষ্ঠানত বস্ত্ৰ মন্ত্ৰালয়ৰ ৰাজ্য়িক মন্ত্ৰী শ্ৰী পবিত্ৰ মাৰ্ঘেৰিটাৰ লগতে ভাৰত চৰকাৰ, অসম চৰকাৰ, কেন্দ্ৰীয় ৰেচম ব’ৰ্ড, বস্ত্ৰ আৰু ৰেচম পালন প্ৰতিষ্ঠানসমূহৰ জ্যেষ্ঠ বিষয়াবৰ্গ, উৎপাদক সংগঠনৰ প্ৰতিনিধি, শিপিনী, উদ্যোগী আৰু মুগা ৰেচম মূল্য শৃংখলাৰ সৈতে জড়িত অন্যান্য অংশীদাৰসকল উপস্থিত থাকে।
*****
PS/AA
(ৰিলিজ আই ডি : 2268178)
অতিথি কক্ষ : 20