ഉപഭോക്തൃ സംരക്ഷണ നിയമം 2019 ലംഘിച്ചുകൊണ്ട്, പ്രധാനപ്പെട്ട വിവരങ്ങൾ മനഃപൂർവം മറച്ചുവെച്ച്, തെറ്റിദ്ധരിപ്പിക്കുന്ന പരസ്യം നൽകിയതിന് വാജിറാം ആൻഡ് രവി ഐ.എ.എസ് സ്റ്റഡി സെൻ്റർ എൽ.എൽ.പിക്ക് എതിരെ കേന്ദ്ര ഉപഭോക്തൃ സംരക്ഷണ അതോറിറ്റി (സി.സി.പി.എ) അന്തിമ ഉത്തരവ് പുറപ്പെടുവിക്കുകയും 7,00,000 രൂപ പിഴ ചുമത്തുകയും ചെയ്തു. ഉപഭോക്താക്കളുടെ അവകാശങ്ങൾ സംരക്ഷിക്കുന്നതിനും പ്രോത്സാഹിപ്പിക്കുന്നതിനും, കൂടാതെ ഉപഭോക്തൃ സംരക്ഷണ നിയമത്തിലെ വ്യവസ്ഥകൾക്ക് വിരുദ്ധമായി ഏതെങ്കിലും ഉൽപ്പന്നങ്ങളെയോ സേവനങ്ങളെയോ കുറിച്ച് തെറ്റായതോ തെറ്റിദ്ധരിപ്പിക്കുന്നതോ ആയ പരസ്യങ്ങൾ നൽകുന്നില്ലെന്ന് ഉറപ്പാക്കാനുമാണ് ഈ ഉത്തരവ് പുറപ്പെടുവിച്ചത്.

ചീഫ് കമ്മീഷണർ ശ്രീമതി നിധി ഖാരെ, കമ്മീഷണർ ശ്രീ അനുപം മിശ്ര എന്നിവർ നേതൃത്വം നൽകുന്ന കേന്ദ്ര ഉപഭോക്തൃ സംരക്ഷണ അതോറിറ്റിയാണ് ഉത്തരവ് നൽകിയത്. പ്രസ്തുത കോച്ചിംഗ് ഇൻസ്റ്റിറ്റ്യൂട്ട് വൻ അവകാശവാദങ്ങൾ ഉന്നയിക്കുകയും, 2023-ലെ യു.പി.എസ്.സി സിവിൽ സർവീസ് പരീക്ഷയിൽ വിജയിച്ച ഉദ്യോഗാർത്ഥികൾ തിരഞ്ഞെടുത്ത കോഴ്സുകളെക്കുറിച്ചുള്ള സുപ്രധാന വിവരങ്ങൾ മറച്ചുവെച്ചുകൊണ്ട് അവരുടെ പേരുകളും ചിത്രങ്ങളും നേട്ടങ്ങളും വ്യാപകമായി ഉപയോഗിക്കുകയും ചെയ്തതായി കണ്ടെത്തിയതിനെ തുടർന്നാണ് ഈ ഉത്തരവ് പുറപ്പെടുവിച്ചത്.

2023-ലെ യു.പി.എസ്.സി സിവിൽ സർവീസ് പരീക്ഷാ ഫലം പ്രഖ്യാപിച്ചതിന് പിന്നാലെ ഇൻസ്റ്റിറ്റ്യൂട്ടിൻ്റെ ഔദ്യോഗിക വെബ്‌സൈറ്റിൽ (www.vajiramandravi.com) താഴെ പറയുന്ന അവകാശവാദങ്ങൾ പ്രസിദ്ധീകരിച്ചിരുന്നു:

* "ആദ്യ 10 റാങ്ക് ജേതാക്കളിൽ 8 പേരും വാജിറാം ആൻഡ് രവിയിൽ നിന്നുള്ളവരാണ്."

* "ആദ്യ 50 റാങ്ക് ജേതാക്കളിൽ 37 പേരും വാജിറാം ആൻഡ് രവിയിൽ നിന്നുള്ളവരാണ്."

* "വസ്തുത : ഓരോ വർഷവും യു.പി.എസ്.സി സിവിൽ സർവീസ് പരീക്ഷയിലൂടെ തിരഞ്ഞെടുക്കപ്പെടുന്ന ഉദ്യോഗസ്ഥരിൽ 30%-ത്തിലധികം പേർ വാജിറാം ആൻഡ് രവിയിലെ വിദ്യാർത്ഥികളാണ്."

വിശദമായ അന്വേഷണത്തിന് ശേഷം സി.സി.പി.എ കണ്ടെത്തിയ കാര്യങ്ങൾ താഴെ പറയുന്നവയാണ്:

മുകളിൽ സൂചിപ്പിച്ച പ്രധാനപ്പെട്ട വിവരങ്ങൾ ഈ വർഷങ്ങളിലൊന്നും തന്നെ ഇൻസ്റ്റിറ്റ്യൂട്ടിൻ്റെ ഔദ്യോഗിക വെബ്‌സൈറ്റിൽ പ്രസിദ്ധീകരിച്ചിരുന്നില്ല.

യു.പി.എസ്.സി സി.എസ്.ഇ പരീക്ഷയുടെ രണ്ട് കഠിനമായ ഘട്ടങ്ങളായ പ്രിലിമിനറിയും മെയിൻസും ഒരു ഉദ്യോഗാർത്ഥി സ്വന്തം നിലയിൽ വിജയിച്ചതിന് ശേഷം മാത്രം ആരംഭിക്കുന്ന ഒന്നാണ് IGP (ഇൻ്റർവ്യൂ ഗൈഡൻസ് പ്രോഗ്രാം) എന്ന് സി.സി.പി.എ ചൂണ്ടിക്കാണിച്ചു. ഈ രണ്ട് ഘട്ടങ്ങളിലും ഇൻസ്റ്റിറ്റ്യൂട്ടിന് യാതൊരുവിധ അക്കാദമിക സംഭാവനയും ഉണ്ടായിരുന്നില്ല. ഉദ്യോഗാർത്ഥികൾ ഏത് കോഴ്സാണ് തിരഞ്ഞെടുത്തത് എന്ന കാര്യം വെളിപ്പെടുത്താതെ, തങ്ങളുടെ മുഴുവൻ സമയ പെയ്ഡ് കോച്ചിംഗ് പരിപാടികളുടെ പരസ്യങ്ങൾക്കൊപ്പം ഇത്തരം ഉദ്യോഗാർത്ഥികളുടെ നേട്ടവും പ്രമുഖമായി പ്രദർശിപ്പിച്ചതിലൂടെ, ഇവർ തങ്ങളുടെ മുഴുവൻ സമയ കോച്ചിംഗ് പ്രോഗ്രാമുകളുടെ വിജയമാണെന്ന തെറ്റിദ്ധാരണാജനകമായ ഒരു പ്രതീതി സൃഷ്ടിക്കാൻ ഇൻസ്റ്റിറ്റ്യൂട്ടിന് സാധിച്ചു.

വിജയികളായ ഉദ്യോഗാർത്ഥികൾ തിരഞ്ഞെടുത്ത നിർദ്ദിഷ്ട കോഴ്സുകൾ ഏതാണെന്ന വിവരം വെളിപ്പെടുത്താതിരിക്കുന്നത്—അവർ പങ്കെടുത്തത് മുഴുവൻ സമയ ക്ലാസ്റൂം പ്രോഗ്രാമുകളിലാണോ, ഐച്ഛിക വിഷയ പരിശീലനത്തിലാണോ, ടെസ്റ്റ് സീരീസിലാണോ അതോ ചെറിയ കാലയളവിലുള്ള സൗജന്യ ഇൻ്റർവ്യൂ ഗൈഡൻസ് പ്രോഗ്രാമിലാണോ എന്നതുൾപ്പെടെയുള്ള കാര്യങ്ങൾ മറച്ചുവെക്കുന്നത്—ഉപഭോക്തൃ സംരക്ഷണ നിയമപ്രകാരം തെറ്റിദ്ധരിപ്പിക്കുന്ന പരസ്യത്തിൻ്റെ പരിധിയിൽ വരുമെന്ന് സി.സി.പി.എ നിരീക്ഷിച്ചു. കാരണം ഇത് ഭാവിയിലെ വിദ്യാർത്ഥികൾക്ക് അറിഞ്ഞുകൊണ്ട് വ്യക്തമായ ഒരു തീരുമാനമെടുക്കാനുള്ള അവകാശത്തെ ഇല്ലാതാക്കുന്നു. പ്രധാനപ്പെട്ട വിവരങ്ങൾ മനഃപൂർവ്വം മറച്ചുവെക്കുന്നത് നിരോധിക്കുന്ന, 2019-ലെ ഉപഭോക്തൃ സംരക്ഷണ നിയമത്തിലെ വകുപ്പ് 2(28)(iv) പ്രകാരമുള്ള "തെറ്റിദ്ധരിപ്പിക്കുന്ന പരസ്യം" എന്ന നിർവചനത്തിന് കീഴിലാണ് ഈ പരസ്യങ്ങൾ വരുന്നതെന്ന് സി.സി.പി.എ വിധിച്ചു. ഈ നടപടി ഉപഭോക്താക്കൾക്ക് വിവരങ്ങൾ അറിയാനുള്ള അവകാശം നൽകുന്ന നിയമത്തിലെ വകുപ്പ് 2(9)-ൻ്റെ ലംഘനമാണെന്നും കണ്ടെത്തിയിട്ടുണ്ട്.

വിദ്യാർത്ഥികളുടെ താൽപ്പര്യങ്ങൾ സംരക്ഷിക്കുന്നതിനും കോച്ചിംഗ് മേഖലയിൽ സുതാര്യത ഉറപ്പാക്കുന്നതിനുമായി തെറ്റിദ്ധരിപ്പിക്കുന്ന പരസ്യങ്ങൾ നൽകിയതിനും അന്യായമായ വ്യാപാര രീതികൾ പിന്തുടർന്നതിനും കോച്ചിംഗ് ഇൻസ്റ്റിറ്റ്യൂട്ടുകൾക്കെതിരെ സി.സി.പി.എ ഇതുവരെ അറുപതിലധികം നോട്ടീസുകൾ അയച്ചിട്ടുണ്ട്. യു.പി.എസ്.സി  സിവിൽ സർവീസസ് പരീക്ഷ (CSE), IIT-JEE, NEET, RBI തുടങ്ങിയ മത്സര പരീക്ഷകൾക്ക് കോച്ചിംഗ് നൽകുന്ന ഇൻസ്റ്റിറ്റ്യൂട്ടുകൾക്ക് ഇത്തരത്തിലുള്ള നിയമലംഘനത്തിന് 1.46 കോടിയിലധികം രൂപയാണ് സി.സി.പി.എ പിഴയായി ചുമത്തിയിട്ടുള്ളത്.

(അന്തിമ ഉത്തരവുകൾ താഴെ പറയുന്ന ലിങ്ക് വഴി പരിശോധിക്കാവുന്നതാണ്: https://jagograhakjago.gov.in/CCPA_Orders/index.html)

***