ગ્રાહક બાબતો, ખાદ્ય અને જાહેર વિતરણ મંત્રાલય
azadi ka amrit mahotsav

સીસીપીએએ યુપીએસસી સિવિલ સર્વિસીસ પરીક્ષાના પરિણામો સંબંધિત ભ્રામક દાવાઓ માટે ₹7 લાખનો દંડ ફટકાર્યો


સંસ્થાએ સફળ ઉમેદવારો દ્વારા લેવામાં આવેલા કોર્સના સ્વરૂપ વિશેની મહત્વપૂર્ણ માહિતી છુપાવી હતી

સીસીપીએ (CCPA) એ પુનરોચ્ચાર કર્યો છે કે કોચિંગ સેવાઓ પસંદ કરતા પહેલા ગ્રાહકોને સચોટ માહિતી મેળવવાનો અધિકાર છે

પોસ્ટેડ ઓન: 30 MAY 2026 1:24PM by PIB Ahmedabad

સેન્ટ્રલ કન્ઝ્યુમર પ્રોટેક્શન ઓથોરિટી (CCPA) એ વાજીરામ એન્ડ રવિ આઈએએસ સ્ટડી સેન્ટર એલએલપી સામે અંતિમ આદેશ પસાર કરીને, કન્ઝ્યુમર પ્રોટેક્શન એક્ટ, 2019ના ઉલ્લંઘનમાં, મહત્વપૂર્ણ માહિતી જાણીજોઈને છુપાવીને ભ્રામક જાહેરાતમાં સામેલ થવા બદલ ₹7,00,000નો દંડ ફટકાર્યો છે. આ નિર્ણય ગ્રાહકોના હિતોનું એક વર્ગ તરીકે રક્ષણ કરવા અને તેને પ્રોત્સાહન આપવા માટે તથા કન્ઝ્યુમર પ્રોટેક્શન એક્ટ, 2019ની જોગવાઈઓ વિરુદ્ધ કોઈપણ માલસામાન અથવા સેવાઓના સંબંધમાં કોઈ ખોટી કે ભ્રામક જાહેરાત ન કરવામાં આવે તે સુનિશ્ચિત કરવા માટે લેવામાં આવ્યો હતો.

ચીફ કમિશનર, શ્રીમતી નિધિ ખરે અને કમિશનર, શ્રી અનુપમ મિશ્રાની અધ્યક્ષતાવાળી સેન્ટ્રલ કન્ઝ્યુમર પ્રોટેક્શન ઓથોરિટી (CCPA)એ વાજીરામ એન્ડ રવિ આઈએએસ સ્ટડી સેન્ટર એલએલપી સામે એ અવલોકન કર્યા પછી આદેશ પસાર કર્યો હતો કે કોચિંગ સંસ્થાએ મોટા દાવાઓ કર્યા હતા અને યુપીએસસી સિવિલ સર્વિસીસ પરીક્ષા (CSE) 2023ના સફળ ઉમેદવારો દ્વારા પસંદ કરવામાં આવેલા ચોક્કસ કોર્સ અંગેની મહત્વપૂર્ણ માહિતી છુપાવીને તેમના નામ, ફોટોગ્રાફ્સ અને સિદ્ધિઓનો અગ્રણીપણે ઉપયોગ કર્યો હતો.

યુપીએસસી સીએસઈ 2023ના પરિણામોની જાહેરાત બાદ સંસ્થાની સત્તાવાર વેબસાઇટ (www.vajiramandravi.com) પર નીચેના દાવાઓ પ્રકાશિત કરવામાં આવ્યા હતા:

  1. "ટોપ 10માં સ્થાન મેળવનારાઓમાંથી 8 રેન્ક ધારકો વાજીરામ એન્ડ રવિના છે"
  2. "ટોપ 50 માં સ્થાન મેળવનારાઓમાંથી 37 રેન્ક ધારકો વાજીરામ એન્ડ રવિના છે."
  3. "હકીકત: દર વર્ષે, યુપીએસસી સિવિલ સર્વિસીસ પરીક્ષા દ્વારા પસંદ કરાયેલા 30% થી વધુ અધિકારીઓ વાજીરામ એન્ડ રવિના વિદ્યાર્થીઓ હોય છે."

સીસીપીએ (CCPA) એ વિગતવાર તપાસ બાદ નીચે મુજબનું અવલોકન કર્યું હતું:

ક્રમ નં.

સંસ્થાનો દાવો

સીસીપીએ (CCPA)ના તારણો
  1.  

“ટોપ 10માં સ્થાન મેળવનારાઓમાંથી 8 રેન્ક ધારકો વાજીરામ એન્ડ રવિના છે”

8 માંથી 7 ઉમેદવારોએ માત્ર મફત ઇન્ટરવ્યુ ગાઇડન્સ પ્રોગ્રામ (ઇન્ટરવ્યુ માર્ગદર્શન કાર્યક્રમ) માં જ નોંધણી કરાવી હતી.

2.

“ટોપ 50માં 37 રેન્ક ધારકો”

37માંથી 29 ઉમેદવારોએ માત્ર મફત ઇન્ટરવ્યુ ગાઇડન્સ પ્રોગ્રામમાં જ નોંધણી કરાવી હતી.

3.

"હકીકત: દર વર્ષે, યુપીએસસી સિવિલ સર્વિસીસ પરીક્ષા દ્વારા પસંદ કરાયેલા 30% થી વધુ અધિકારીઓ વાજીરામ એન્ડ રવિના વિદ્યાર્થીઓ હોય છે."

 
  1. વર્ષ 2021માં- સફળ ઉમેદવારોમાંથી 86.36% ઉમેદવારો ઇન્ટરવ્યુ ગાઇડન્સ પ્રોગ્રામમાં નોંધાયેલા હતા.
  2. વર્ષ 2022માં- સફળ ઉમેદવારોમાંથી 78.31% ઉમેદવારો ઇન્ટરવ્યુ ગાઇડન્સ પ્રોગ્રામમાં નોંધાયેલા હતા.
  3. વર્ષ 2023માં- સફળ ઉમેદવારોમાંથી 97.56% ઉમેદવારો ઇન્ટરવ્યુ ગાઇડન્સ પ્રોગ્રામમાં નોંધાયેલા હતા.
  4. વર્ષ 2024માં- સફળ ઉમેદવારોમાંથી 71.69% ઉમેદવારો ઇન્ટરવ્યુ ગાઇડન્સ પ્રોગ્રામમાં નોંધાયેલા હતા.

 

ઉપરોક્ત મહત્વપૂર્ણ માહિતી આ વર્ષોમાંની કોઈપણ વર્ષમાં સંસ્થાની સત્તાવાર વેબસાઇટ પર જાહેર કરવામાં આવી ન હતી.

સીસીપીએ (CCPA)એ એ પણ નોંધ્યું હતું કે આઈજીપી (IGP) એક એવો કાર્યક્રમ છે જે ઉમેદવાર યુપીએસસી સીએસઈ (UPSC CSE) ના બંને પ્રિલિમિનરી અને મેન્સ તબક્કાઓ—કે જે બે અત્યંત કઠિન સ્પર્ધાત્મક તબક્કા છે અને જેમાં સંસ્થાનું કોઈ શૈક્ષણિક યોગદાન નહોતું—તેને સ્વતંત્ર રીતે પાસ કરી લે તે પછી જ શરૂ થાય છે. પસંદ કરાયેલા ચોક્કસ કોર્સની કોઈ પણ જાહેરાત વિના, વ્યાપક પેઇડ કોચિંગ પ્રોગ્રામ્સની જાહેરાતો સાથે આવા ઉમેદવારોને અગ્રણીપણે દર્શાવીને, સંસ્થાએ એક ભ્રામક છાપ ઊભી કરી હતી કે આ ઉમેદવારો તેના ફુલ-લેન્થ કોચિંગ પ્રોગ્રામ્સની પ્રોડક્ટ હતા.

સીસીપીએ (CCPA) એ અવલોકન કર્યું કે સફળ ઉમેદવારો દ્વારા પસંદ કરાયેલા ચોક્કસ અભ્યાસક્રમોને જાહેર ન કરવા, જેમાં એ બાબત પણ સામેલ છે કે શું આવા ઉમેદવારો ફુલ-લેન્થ ક્લાસરૂમ પ્રોગ્રામ્સ, વૈકલ્પિક વિષયના કોચિંગ, ટેસ્ટ સિરીઝ અથવા ટૂંકા ગાળાના મફત ઇન્ટરવ્યુ માર્ગદર્શન કાર્યક્રમમાં હાજર રહ્યા હતા, તે આ એક્ટ હેઠળ ભ્રામક જાહેરાત સમાન છે, કારણ કે તે સંભવિત ગ્રાહકોને માહિતગાર પસંદગી કરવાની ક્ષમતાથી વંચિત રાખે છે. સીસીપીએ (CCPA) એ ઠેરવ્યું કે વિવાદાસ્પદ જાહેરાતો કન્ઝ્યુમર પ્રોટેક્શન એક્ટ, 2019ની કલમ 2(28) (iv) હેઠળ "ભ્રામક જાહેરાત"ની વ્યાખ્યામાં સંપૂર્ણપણે આવે છે, જે મહત્વપૂર્ણ માહિતીને જાણીજોઈને છુપાવવા પર પ્રતિબંધ મૂકે છે. આ વર્તન વધુમાં એક્ટની કલમ 2(9) નું ઉલ્લંઘન કરતું હોવાનું જાણવા મળ્યું હતું, જે ગ્રાહકોને માહિતગાર થવાનો અધિકાર આપે છે.

અત્યાર સુધીમાં, સીસીપીએ (CCPA) એ વિદ્યાર્થીઓના હિતોનું રક્ષણ કરવા અને કોચિંગ ક્ષેત્રમાં પારદર્શિતા સુનિશ્ચિત કરવા માટે ભ્રામક જાહેરાતો અને અયોગ્ય વેપાર પદ્ધતિઓ (અનફેર ટ્રેડ પ્રેક્ટિસિસ) બદલ કોચિંગ સંસ્થાઓને 60 થી વધુ નોટિસો જારી કરી છે. સીસીપીએ (CCPA) એ યુપીએસસી સિવિલ સર્વિસીસ પરીક્ષા (CSE), IIT-JEE, NEET, RBI અને અન્ય સ્પર્ધાત્મક પરીક્ષાઓ માટે કોચિંગ આપતી કોચિંગ સંસ્થાઓ પર ₹1.46 કરોડથી વધુની રકમનો દંડ ફટકાર્યો છે. (અંતિમ આદેશો નીચેની લિંક દ્વારા એક્સેસ કરી શકાય છે: https://jagograhakjago.gov.in/CCPA_Orders/index.html). 

 

SM/IJ/GP/JT

સોશિયલ મીડિયા પર અમને ફોલો કરો :  @PIBAhmedabad   Image result for facebook icon /pibahmedabad1964    /pibahmedabad  pibahmedabad1964[at]gmail[dot]com


(રીલીઝ આઈડી: 2266955) મુલાકાતી સંખ્યા : 25
આ રીલીઝ વાંચો: English , Urdu , Marathi , हिन्दी , Tamil , Kannada , Malayalam