بھارت کے نائب صدر جناب سی۔ پی۔ رادھا کرشنن نے آج پنجی میں منعقدہ گوا کے 40ویں یومِ ریاستی حیثیت کی تقریبات میں شرکت کی۔

اجتماع سے خطاب کرتے ہوئے نائب صدر نے کہا کہ گوا کے عوام کے ساتھ اس تاریخی موقع پر شریک ہونا ان کے لیے اعزاز کی بات ہے، جب ریاستی حیثیت حاصل کرنے کے 40 برس مکمل ہو رہے ہیں۔ انہوں نے بتایا کہ بھارت کے نائب صدر کا عہدہ سنبھالنے کے بعد یہ ان کا گوا کا پہلا سرکاری دورہ ہے۔

30 مئی 1987 کی تاریخی اہمیت کو یاد کرتے ہوئے، جب گوا بھارت کی 25ویں ریاست بنا، نائب صدر نے کہا کہ یہ موقع گوا کے عوام کی منفرد شناخت، امنگوں اور جمہوری جذبے کی توثیق کرتا ہے۔ انہوں نے کہا کہ گوا ورثے اور ترقی، روایت اور جدت، نیز مقامی فخر اور عالمی نقطۂ نظر کے حسین امتزاج کی مثال ہے۔

نائب صدر نے گوا کے عوام کو تعلیم، شہری شعور اور سماجی شمولیت کے لیے ان کے عزم پر سراہا۔ انہوں نے کہا کہ یہاں کے لوگوں کی گرمجوشی اور مہمان نوازی گوا کو واقعی ایک منفرد مقام عطا کرتی ہے۔ انہوں نے مزید کہا کہ خواندگی، صحت، ماحولیاتی بیداری اور انسانی ترقی کے شعبوں میں ریاست کی کامیابیاں پورے ملک کے لیے ایک مثال ہیں۔

سابق وزیر اعلیٰ جناب منوہر پاریکر کو خراجِ عقیدت پیش کرتے ہوئے نائب صدر نے انہیں ایک دور اندیش رہنما قرار دیا جن کی سادگی، دیانت داری اور لگن نے گوا کی ترقی پر دیرپا نقوش چھوڑے ہیں۔

نائب صدر نے گوا کے وزیر اعلیٰ ڈاکٹر پرمود ساونت کی قیادت کو بھی سراہا اور کہا کہ وہ ریاست کو ترقی اور خوشحالی کی راہ پر گامزن کر رہے ہیں۔ انہوں نے کہا کہ ڈاکٹر ساونت کی قیادت میں گوا نے بنیادی ڈھانچے، صحت، تعلیم، سیاحت اور ڈیجیٹل طرزِ حکمرانی کے شعبوں میں نمایاں پیش رفت کی ہے، جبکہ اپنی بھرپور ثقافتی وراثت اور شناخت کو بھی محفوظ رکھا ہے۔

بھارت کی جمہوری روایات کا ذکر کرتے ہوئے نائب صدر نے کہا کہ رائے کا اختلاف اور سیاسی مقابلہ آرائی جمہوریت کا فطری حصہ ہیں، خصوصاً انتخابات کے دوران۔ تاہم انہوں نے زور دیا کہ انتخابات کے بعد تمام طبقات کو تعاون اور اجتماعی ذمہ داری کے جذبے کے ساتھ ملک کی ترقی کے لیے مل کر کام کرنا چاہیے۔ انہوں نے مزید کہا کہ گوا کی متحرک جمہوریت اور مضبوط سماجی ادارے ایسے معاشرے کی عکاسی کرتے ہیں جو عوامی شرکت، مکالمے اور وقار کو اہمیت دیتا ہے۔

وکست بھارت 2047 کے ویژن کا حوالہ دیتے ہوئے نائب صدر نے کہا کہ بھارت کی آئندہ ترقی کی داستان میں گوا کا اہم کردار ہوگا۔ انہوں نے کہا کہ بلیو اکانومی بھارت کی ترقی کے اہم ترین ستونوں میں سے ایک ہوگی اور انہیں خوشی ہے کہ گوا اس شعبے میں ایک قائدانہ کردار ادا کرتے ہوئے ابھر رہا ہے۔ انہوں نے مزید کہا کہ اپنی تعلیم یافتہ آبادی، کاروباری جذبے، تزویراتی ساحلی پٹی اور عالمی روابط کے باعث گوا ملک کی ترقی اور اختراع کے اگلے مرحلے میں نمایاں کردار ادا کرنے کی منفرد صلاحیت رکھتا ہے۔

نائب صدر نے کہا کہ گوا کا سفر اس بات کی روشن مثال ہے کہ اپنی ثقافتی جڑوں کو برقرار رکھتے ہوئے جدیدیت کو اپنایا جا سکتا ہے اور یہ کہ کوئی معاشرہ اپنی مقامی روایات کو محفوظ رکھتے ہوئے دنیا کا خیر مقدم بھی کر سکتا ہے۔ پائیدار ترقی پر زور دیتے ہوئے انہوں نے کہا کہ گوا پائیدار ساحلی ترقی کے ایک قومی نمونے کے طور پر ابھر سکتا ہے۔

گوا کے نوجوانوں سے خطاب کرتے ہوئے نائب صدر نے کہا کہ ریاست کی سب سے بڑی طاقت اس کے نوجوانوں کی تخلیقی صلاحیت، کشادہ ذہنی اور خود اعتمادی میں مضمر ہے۔ انہوں نے نوجوانوں کی حوصلہ افزائی کی کہ وہ صنعت و تجارت، سائنس، فنون، کھیل، اختراع اور نیلی معیشت جیسے شعبوں میں فعال کردار ادا کریں۔

اتحاد، خوشحالی، پائیداری اور سماجی ہم آہنگی کے لیے نئے عزم کی ضرورت پر زور دیتے ہوئے نائب صدر نے شہریوں سے اپیل کی کہ وہ مل کر ایسے گوا کی تعمیر کریں جو ثقافتی اعتبار سے زندہ و تابندہ، معاشی طور پر مضبوط اور مستقبل کے حوالے سے محفوظ ہو۔

تقریبات کے دوران نائب صدر نے کالا اکیڈمی، پنجی میں معروف کارٹون ساز جناب ماریو مرانڈا کی زندگی اور فن پاروں کے لیے وقف ایک نمائش کا افتتاح کیا۔ انہوں نے ان کے اعزاز میں ایک یادگاری ڈاک ٹکٹ اور خصوصی سرورق (اسپیشل کور) بھی جاری کیا، اور ’’گوا: انجینئرنگ دی نیکسٹ ایرا‘‘ کے عنوان سے ایک کافی ٹیبل بک کی رونمائی کی۔

نائب صدر نے ممتاز گوان برانڈز اور نمایاں شخصیات میں اعزازات بھی تقسیم کیے، تقرری نامے حوالے کیے، گوپال رتن ایوارڈ اسکیم، سویم پورن مترا اور سویم پورن دیہات کے ایوارڈ یافتگان کی ستائش کی اور دین دیال سواستھیا سیوا یوجنا کے تحت بہتر بیمہ تحفظ (انشورنس کور) کا آغاز کیا۔

اس موقع پر گوا کے گورنر جناب پوساپتی اشوک گجپتی راجو، گوا کے وزیر اعلیٰ ڈاکٹر پرمود ساونت، مرکزی وزیرِ مملکت برائے بجلی اور نئی و قابلِ تجدید توانائی جناب شری پد نائک، گوا قانون ساز اسمبلی کے اسپیکر ڈاکٹر گنیش گاؤںکر، رکنِ پارلیمنٹ (راجیہ سبھا) جناب سدانند تناواڑے، گوا حکومت کے وزراء اور دیگر معزز شخصیات موجود تھیں۔

***

ش ح۔ ش ا ر۔ ول

Uno-7745