કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયા યુવા બાબતો, રમતગમતની આંતરમાળખાકીય સુવિધાઓના વિકાસને લગતા શ્રેણીબદ્ધ કાર્યક્રમોમાં ભાગ લેવા અને રાજ્યમાં કેન્દ્ર પ્રાયોજિત યોજનાઓની સમીક્ષા કરવા માટે 29મી થી 31મી મે, 2026 દરમિયાન શિલોંગ, મેઘાલયની ત્રણ દિવસીય મુલાકાત લેશે.

મુલાકાત દરમિયાન, કેન્દ્રીય મંત્રી યુવા બાબતોના વિભાગ દ્વારા આયોજિત ચિંતન શિબિરમાં પણ હાજરી આપશે.

મેઘાલયના રમતગમત અને યુવા બાબતોના મંત્રી શ્રી વૈલાડમિકી શિલા અને અન્ય વરિષ્ઠ અધિકારીઓ પણ ઉપસ્થિત રહેશે.

ડૉ. માંડવિયા 30મી મેના રોજ મેઘાલયના મુખ્યમંત્રી શ્રી કોનરાડ કે. સંગમાની સાથે શિલોંગમાં ઇન્ટિગ્રેટેડ મલ્ટિપર્પઝ ઇન્ડોર સ્પોર્ટ્સ કોમ્પ્લેક્સનું ઉદ્ઘાટન પણ કરશે.

ઇન્ટિગ્રેટેડ મલ્ટિપર્પઝ ઇન્ડોર સ્પોર્ટ્સ કોમ્પ્લેક્સ, જે ₹132.9 કરોડના પ્રોજેક્ટ ખર્ચે વિકસાવવામાં આવી રહ્યું છે, તેને અન્ય ઇન્ડોર રમતગમતની ઇવેન્ટ્સ ઉપરાંત બાસ્કેટબોલ, બેડમિન્ટન અને વોલીબોલ જેવી રમતોનું આયોજન કરવા સક્ષમ આધુનિક મલ્ટિ-ફંક્શનલ સ્પોર્ટ્સ સુવિધા તરીકે ડિઝાઇન કરવામાં આવ્યું છે.

આ કોમ્પ્લેક્સ નેશનલ ગેમ્સ માટેના મુખ્ય સ્થળ તરીકે પણ પરિકલ્પિત છે અને તેમાં મલ્ટિપર્પઝ હોલ, ઓડિટોરિયમ, બેન્ક્વેટ સુવિધાઓ વગેરે જેવી સંકલિત આંતરમાળખાકીય સુવિધાઓનો સમાવેશ થશે.

39મી નેશનલ ગેમ્સ 2026 માટેના હોસ્ટ સ્ટેટ કોન્ટ્રાક્ટ (યજમાન રાજ્ય કરાર) પર પણ વરિષ્ઠ મહાનુભાવો અને ઇન્ડિયન ઓલિમ્પિક એસોસિએશનના પ્રતિનિધિઓની ઉપસ્થિતિમાં મેઘાલય સાથે હસ્તાક્ષર કરવામાં આવશે.

કેન્દ્રીય મંત્રી 39મી નેશનલ ગેમ્સ 2026 સંબંધિત તૈયારીઓ માટેની સમીક્ષા બેઠકની આગળ અધ્યક્ષતા કરશે.

આ બેઠકમાં મેઘાલયના અધિકારીઓ અને અન્ય ઉત્તર-પૂર્વીય રાજ્યોના પ્રતિનિધિઓ સામેલ હોય તેવા પ્રેઝન્ટેશન અને ચર્ચાઓનો સમાવેશ થશે.

મુલાકાતના ભાગરૂપે, ડૉ. માંડવિયા રાજ્યમાં ચાલી રહેલા રમતગમતના આંતરમાળખાકીય વિકાસની સમીક્ષા કરવા માટે શિલોંગમાં ઉમસાવલી સ્પોર્ટ્સ કોમ્પ્લેક્સનું પણ નિરીક્ષણ કરશે, જેમાં એક્વાટિક્સ (જળચર રમતો) અને ટેનિસ સુવિધાઓનો સમાવેશ થાય છે.

કેન્દ્રીય મંત્રી 31મી મેના રોજ પૂર્વોત્તર સંપર્ક સેતુ પહેલ હેઠળ મેઘાલયના રી-ભોઈ જિલ્લામાં કેન્દ્ર પ્રાયોજિત યોજનાઓના અમલીકરણ અને પ્રગતિની પણ સમીક્ષા કરશે.

કેન્દ્રીય યુવા બાબતો અને રમતગમત મંત્રીની ઉત્તર પૂર્વની 3-દિવસીય મુલાકાત યુવા જોડાણને મજબૂત કરવા, રમતગમતના આંતરમાળખાને પ્રોત્સાહન આપવા અને ઉત્તર-પૂર્વીય ક્ષેત્રમાં સર્વગ્રાહી વિકાસને ટેકો આપવા તરફ ભારત સરકારની સતત પ્રતિબદ્ધતા દર્શાવે છે.

SM/NP/JT