U Myntri ka sorkar pdeng ba dei peit ia ka Tnad Development of North Eastern Region (MDoNER), u Jyotiraditya M. Scindia, ryngkat bad u Myntri Rangbah ka jylla Tripura, mynta ka sngi, ki la pyllait paidbah ia ka “Mission Queen Pineapple”, ka sienjam kaba la ialam da ka jingiatylli ha ka kam rep sohtrun bad ka jingkyntiew ha ka jylla Tripura kaba T.236 klur. Ia kane ka Mission la saindur kum ka jingpynkhreh ia ka jingpyntreikam kaba lai snem naduh ka Q2 jong u snem mang tyngka 2026 haduh ka Q4 jong u snem mang tyngka 2028 na ka bynta ban kyntiew ia ka Unique Selling Proposition (USP) jong ka Tripura  — u Queen Pineapple ba la ioh jingithuh GI.

 

La pynskhem da ka MDoNER, ka Mission ka tei halor ka jingïatylli bad ki Skhim bad ki jingïarap jong ki tnad ka rep ka riang & ka bha ka miat jong ki nongrep, Food Processing Industries, Commerce, MSME, APEDA, DPIIT, ICAR, CSIR, TRIFED, NERAMAC bad ka sorkar Tripura na ka bynta ban sdang ia ka rukom pyniasoh lang ia ki kam kiba iadei bad u sohtrun ha ka Jylla.

U Myntri sorkar pdeng ba dei khmih ia ka Tnad Development of North Eastern Region u la ban jur ia ka jingthmu jong u Myntri Rangbahduh ka ri u Narendra Modi ban buh ia ka thain shatei lammihngi kum ka jaka pdeng jong ki mar rep bad ki mar horticulture kiba heh dor.

Haba ai jingkren sha ki nongshim bynta kynthup ïa ki nongrep sohtrun, ki nongshna mar bad ki nongbei tyngka kiba iadonlang ha kane ka jingialang lyngba ka bor internet, u Scindia u la ong, “Hapoh ka jingthmu jong u Myntri Rangbahduh ka ri u Narendra Modi, ïa ki bor rep jong ka Tripura la pynkylla sha ki mar ba lah ban pyniaid iew ha kylleng ka pyrthei.”

U Myntri u la ban jur ba ka jingthmu kam dei tang ka jingrep ia ki jingthung, hynrei ban plie lad ïa ki nongrep ban long ki nongïashim bynta ba shitrhem ha baroh ki kam — naduh ka jingpynmih bad jinglum haduh ka jingpynkhreh, ka jingaipyniaid iew, ka jingsong bad ka jingshalan shabar ri.

Haba ban jur ïa ka rukom treikam kaba kham iar jong ka Mission, u Scindia u la ong, “Ka thong jong ngi kalong ban tei ïa ka lad kyntiew kam kaba pura—naduh na jaka rep haduh ki ïew kylleng ka pyrthei—khnang ba ki nongrep kin long ki nongïashim bynta ba radbah ha ka jingriewspah ba la wanrah da ki mar rep jong ki.”

 

U Myntri u la sakhi ba katba u Queen Pineapple jong ka jylla Tripura u don ïa ka jingiwbih kaba kyrpang, ka jinglong kaba duna ka fiber bad ka jinglong ba kyrpang ba la kyrshan da ka GI, ki nongrep ki dang ïai bteng ban ïoh ïa ki dor jong ki mar namar ka jingbym biang ka jingïasoh bad ki iew ki hat bad ka jingbym biang ki jingdon jingem. U la ong ba ka Mission ka thmu ban pyndap ia kane ka jingduna lyngba ki jingbei tyngka ba la ialam da ka jingiatylli bad ki jingiarap ba la pynshong nongrim ha ka iew ka hat ki ban kyntiew shibun ia ka jingkyntiew ia ka dor kaba ki nongrep ki ioh.

Haba ban jur ïa ki bynta ba kongsan jong ki jingdon jingem hapoh ka Mission, u Myntri u la ong ba kane ka prokram kan wanrah ïa ka “Hub & Spoke” ka jinglong jingman kaba don ka jingiasoh hadien ba la dep ot ïa u sohtrun kaba kynthup ïa kawei ka jaka pdeng hajan ka kad liengsuiñ Agartala bad phra tylli ki jaka lum ha kylleng ki ki jaka rep sohtrun ba kongsan jong ki distrik West Tripura, Khowai bad Sepahijala. Ki jingdon jingem kin kynthup ïa ki jaka ai kyrdan, ki jaka buh mar ba dait-thah, ka jingpynpoi ïa ki mar rep, ki jaka buh mar ba dait thah da ka solar, ka jingpeit bniah ïa ki jaka rep kaba pyndonkam da ka IoT bad ki rukom wad bniah lyngba ka lad digital.

U Myntri u la ban jur shuh shuh ïa ka jingpynthymmai biang ïa ka Nalkata Pineapple Processing Unit lyngba ka Viability Gap Funding (VGF) model ban pyntreikam da ka NERAMAC ha ka jingïatreilang bad ki kynhun shimet. Kane kan kyrshan ia ka jingpynkhreh na ka bynta ka kam khaii bad ka jingpynbha ia ki mar ba la shna na u sohtrun.

Haba kren shaphang ka rukom treikam bio-economy jong ka Mission, u Myntri u la ong ba jan 60 percent jong u sohtrun ba la thung, uba la bret mynta kum kiba lehnohei, yn pynkylla sha ki mar kiba la pynbha lyngba ka jingpynmih Bromelain, ka jingpynkhreh ïa ki Pineapple Leaf Fiber (PALF) bad ki jaka shna jingbam ba ioh jingithuh GI. U la ban jur ba kine ki jingiarap kin plie ki lad ba thymmai na ka bynta ki SHG ba pyniaid da ki kynthei, ki jaitbynriew riewlum bad ki nongseng kam seng jam ha ki jaka nongkyndong katba kin pynkhlain ia ka ioh ka kot kaba wan na ka jingrep sohtrun.

Kum shi bynta ka jingplie paidbah ia ka prokram, la pyni ia ka phlim lyngkot halor ka Pineapple Mission, bud sa ki jingiakren bad ki nongrep sohtrun na Tripura bad ki jingkren na ki nongbei tyngka bad ki nongmihkhmat na ki karkhana.

U Myntri Rangbah ka jylla Tripura u Prof.(Dr) Manik Saha u la ong ba ia u sohtrun la pynbna kum u soh jong ka jylla Tripura. U la ban jur ba ki jait sohtrun ba pawnam jong ka Tripura Queen bad Kew kidei kiba la thung hi ha ki jaka lum jong ka jylla khlem da pyndonkam ïa ki dawai, kaba pynlong ïa ki ban long kiba thiang, kiba sngiam bad ba sma iwbih.

U la ong shuh shuh ba ka Sorkar Jylla ka kyntiew ïa ka jingpynbha, ka jingpynkhreh ïa ki marbam, ka jingsong, ka jingpyniaid iew bad ka jingpyniasoh bad ki iew ki hat ban kyntiew ïa ka kamai kajih jong ki nongrep bad ban plie ki lad ioh kam ha ki jaka nongkyndong. Haba pynpaw ïa ka jingshaniah ha ka jingkyrshan jong ka Tnad Development of North Eastern Region (MDoNER), u la ong ba kane ka sienjam kan ïarap ban pyndap ïa ki jingduna ha ka jingpynmih bad ban pynskhem ïa u sohtrun jong ka jylla Tripura kum u mar uba iaid iew ha kylleng ka pyrthei.

U Myntri ka tnad ka rep ka riang jong ka jylla Tripura u Ratan Lal Nath u la kren shaphang ki jingthmu jong ka mission bad ai khublei ïa ka Tnad DoNER na ka bynta kane ka sienjam.

U Sanjay Jaju, Secretary, MDoNER ha ka jingkren jong u u la batai bniah ia ka rukom pyntreikam jong ka Mission bad u la ban jur ia ka jingdonkam ban don ka rukom treikam Mission-mode ban plie lad ia ka ioh ka kot kaba pura na ka bynta u Queen Pineapple jong ka jylla Tripura. U la ong ba watla kidei napdeng ki jait sohtrun kiba sma iwbih bha bad kiba duna ka fiber ha India, ki nongrep kiba rit ba ria mynta ki ïoh tang T.6-10 shi kilo ha ka kyrdan farmgate, katba ki mar ba la pynkhreh bad shalan shabar ri ki lah ban ïoh ïa ka dor kaba heh ha ki iew hapoh ka ri bad shabar ri.

U Secretary u la ban jur shuh shuh ba ka Mission ka ialeh ban pynbeit ryntih ia ki jingduna kiba kongsan ha kane ka kam, kynthup ia ki jingduhnong hadien ka jingot, ka jingbym don ki jaka buh pyndait-thah ba la pyniasoh lang, ka jingbym don ki jaka pynmih mar kiba heh, ka jingpyniaid iew kaba tlot bad ka jingpynmih pisa na ki mar GI bad ki rukom pyniasoh bad ki nongthied.

Ki kam jong ka Mission kin kynthup ruh ïa ki jingïalang ban ioh jingithuh GI, ki rukom wad bniah ba pynshong nongrim ha ka QR, ki rukom pynmih pisa na ki mar GI, ki jingïakynduh jong ki nongthied bad ki nongdie, ka jingkyrshan ïa ka jingpynshisha ba kidei ki mar organic, ki sienjam pynkhreh ban shalan mar shabar ri bad ki jingïalang ba kongsan ba man la u snem kum ka “Tripura Queen Pineapple Festival”, kaba ïahap bad ka International Pineapple Day ha ka 27 tarik Jylliew.

Ka Mission ka thmu ban pynkylla ïa u Queen Pineapple jong ka jylla Tripura sha ka mar kaba bha bad kaba iiaid iew ha kylleng ka pyrthei katba ka pynkhlaiñ ïa ki lad kamai kajih kiba iaineh, ka jingkyntiew ia ki kam ba la ïalam da ki nongrep bad ka jingkiew shaphang kaba pynshong nongrim ha ka jingshalan shabar ri ha kylleng ka Jylla.

 

Ha kane ka jingialang pyllait paidbah la wan ïashim bynta da ki ophisar ka MDoNER bad ka Sorkar Tripura ha ryngkat ki nongrep, ki nongseng kam seng jam bad kito kiba iadon bynta ha kane ka kam.

*******

(Release ID: 2266085) visitor counter : 5