என் நண்பர், மலேசிய பிரதமர் அவர்களே, உங்களுக்கு எனது மனமார்ந்த நன்றியைத் தெரிவித்துக் கொள்கிறேன். என்னையும் எனது பிரதிநிதிகளையும் வரவேற்ற விதம் என் நினைவில் என்றென்றும் பதிந்திருக்கும். இதற்காக, எனது ஆழ்ந்த நன்றியைத் தெரிவித்துக் கொள்கிறேன். நட்பு என்றால் என்ன, அதன் உயரம், ஆழம் ஆகியவற்றை நான் உண்மையிலேயே அனுபவிக்கிறேன். அதற்காக நான் உங்களுக்கு மிகவும் நன்றியுள்ள நபராக இருக்கிறேன்.

மதிப்பிற்குரிய மலேசிய பிரதமர் அவர்களே,

பிரதமராக, மூன்றாவது முறையாக மலேசியாவுக்கு வரும் வாய்ப்பு எனக்குக் கிடைத்தது எனது பாக்கியம். உங்கள் பதவிக் காலத்தில், நான்காவது முறையாக உங்களைச் சந்திக்கிறேன். இதுவே நமது உறவின் வேகத்தை பிரதிபலிக்கிறது. கடந்த ஆண்டுகளில், நமது இருதரப்பு உறவுகள் அடைந்துள்ள ஆழம் உண்மையிலேயே ஊக்கமளிக்கின்றது. இதற்கு உங்கள் விலைமதிப்பற்ற பங்களிப்பிற்கு, நான் உங்களுக்கு மனமார்ந்த நன்றி கூறுகிறேன். இன்று, விவசாயம் முதல் எரிசக்தி, குறைக்கடத்திகள் வரை நமது ஒத்துழைப்பு விரிந்துள்ளது. பாதுகாப்பு ஒத்துழைப்பு தொடர்ந்து வலுவடைந்து வருகிறது.

மதிப்பிற்குரிய மலேசிய பிரதமர் அவர்களே,

ஆசியானின் வெற்றிகரமான தலைமைப் பொறுப்பிற்கு மீண்டும் ஒருமுறை உங்களை மனமார வாழ்த்துகிறேன். மலேசியாவின் ஆதரவுடன், ஆசியானுடனான நமது உறவுகள் மேலும் ஆழமடைந்து விரிவடையும் என்று நாங்கள் நம்புகிறோம்.

மதிப்பிற்குரிய மலேசிய பிரதமர் அவர்களே,

நமது உறவின் உண்மையான வலிமை மக்களுக்கு இடையிலான உறவுகளில் உள்ளது. இந்திய வேர்களைக் கொண்ட மலேசிய வம்சாவளியைச் சேர்ந்த கிட்டத்தட்ட முப்பது லட்சம் மக்கள் நமது நாடுகளுக்கு இடையே ஒரு பாலமாகச் செயல்படுகிறார்கள். நேற்று, உங்களுடன் சேர்ந்து இந்திய சமுதாயத்தினரைச் சந்திக்கும் வாய்ப்பு எனக்குக் கிடைத்தது. அது மிகவும் சிறப்பான அனுபவம். அவர்கள் உங்கள் மீது வைத்திருக்கும் ஆழ்ந்த மரியாதையை நான் கண்டேன். இது என்னை பெருமையில் ஆழ்த்தியது. பயங்கரவாதத்திற்கு எதிரான நமது போராட்டத்தில், நட்பு நாடுகளின் ஆதரவு மிகவும் முக்கியமானது.

மதிப்பிற்குரிய மலேசிய பிரதமர் அவர்களே,

இந்தியா - மலேசியா, இரு நாடுகளின் செழிப்பு ஒன்றோடொன்று தொடர்புடையது என்று நாங்கள் உறுதியாக நம்புகிறோம். இன்றைய உலகளாவிய நிலையற்ற சூழலில், கடல்சார் அண்டை நாடுகளாக, இந்தியாவும் மலேசியாவும் தங்கள் உறவின் முழு திறனையும் பயன்படுத்திக் கொள்வது அவசியம். இன்றைய எனது பயணத்தின் முக்கிய செய்தி தெளிவாக உள்ளது. அதாவது, மலேசியாவுடனான தனது ஒத்துழைப்பை இந்தியா புதிய உயரத்திற்கு உயர்த்த விரும்புகிறது, ஒவ்வொரு துறையிலும் ஒத்துழைப்பை விரிவுபடுத்தி ஆழப்படுத்துகிறது. மீண்டும் ஒருமுறை, எனக்கும் எனது பிரதிநிதிகள் குழுவிற்கும் அளிக்கப்பட்ட அன்பான, அற்புதமான வரவேற்புக்காக உங்களுக்கும் உங்கள் குழுவினருக்கும் எனது மனமார்ந்த நன்றியைத் தெரிவித்துக் கொள்கிறேன்.

---­

(Release ID: 2225064)

TV/PLM/KR