প্ৰধানমন্ত্ৰী শ্ৰী নৰেন্দ্ৰ মোদীয়ে কেন্দ্ৰীয় মন্ত্ৰী পৰিষদৰ বৈঠকত গুৰুত্বপূৰ্ণ প্ৰশাসনীয় নিৰ্দেশনা জাৰি কৰাৰ এদিন পিছতে শুকুৰবাৰে কৃষি তথা কৃষক কল্যাণ আৰু গ্ৰামোন্নয়ন মন্ত্ৰী শ্ৰী শিৱৰাজ সিং চৌহানে তেওঁৰ দুয়োটা মন্ত্ৰালয়ৰ জ্যেষ্ঠ বিষয়াসকলৰ সৈতে এক উচ্চ পৰ্যায়ৰ পৰ্যালোচনা বৈঠক আহ্বান কৰে। বৈঠকত তেওঁ স্পষ্ট বাৰ্তা দিয়ে যে প্ৰশাসন জনসাধাৰণৰ জীৱনত দৃশ্যমান হ’ব লাগে, কেৱল ফাইলতে সীমাবদ্ধ থাকিব নালাগে।

কেন্দ্ৰীয় মন্ত্ৰীগৰাকীয়ে বিষয়াসকলক তৎকালিনভাৱে এক পৰিকল্পিত, সময়াবদ্ধ আৰু ফলাফলমুখী ব্যৱস্থা গঢ়ি তুলিবলৈ নিৰ্দেশ দিয়ে, যাতে কৃষক, দৰিদ্ৰ, গ্ৰাম্য নাগৰিক আৰু সাধাৰণ জনতাই চৰকাৰী আঁচনিৰ লাভালাভ পাবলৈ বা ওজৰ-আপত্তি নিষ্পত্তিৰ বাবে হাবাথুৰি খাবলগীয়া নহয়।

বৈঠকত শ্ৰী চৌহানে কয় যে প্ৰধানমন্ত্ৰী শ্ৰী নৰেন্দ্ৰ মোদীয়ে স্পষ্টকৈ কয় যে সাধাৰণ নাগৰিকক অনাহক সংগ্ৰাম বা আমোলাতান্ত্ৰিক বিলম্বতাৰ মাজলৈ ঠেলি দিব নালাগে আৰু চৰকাৰী আঁচনিৰ লাভালাভ তেওঁলোকৰ ওচৰলৈ সৰল, নিৰৱচ্ছিন্ন আৰু সময়মতে প্ৰেৰণ কৰিব লাগে। ইয়াক চৰকাৰৰ সৰ্বোচ্চ অগ্ৰাধিকাৰ বুলি অভিহিত কৰি তেওঁ কৃষি, গ্ৰামোন্নয়ন, ভূমি সম্পদ আৰু আইচিএআৰসহ সকলো সংশ্লিষ্ট বিভাগ আৰু প্ৰতিষ্ঠানক ওজৰ-আপত্তি নিষ্পত্তি ব্যৱস্থাটোক অধিক শক্তিশালী, জবাবদিহি আৰু সঁহাৰিমূলক কৰিবলৈ নিৰ্দেশ দিয়ে।

তেওঁ উল্লেখ কৰে যে বৰ্তমান বিভিন্ন আঁচনি আৰু বিভাগসমূহৰ সুকীয়া সুকীয়া অভিযোগ পৰ্টেল আৰু ব্যৱস্থা আছে, কিন্তু এটা অধিক একীকৃত আৰু ফলাফলমুখী ব্যৱস্থাৰ প্ৰয়োজন আছে। এই লক্ষ্যত উপনীত হ’বলৈ তেওঁ কৃষি আৰু গ্ৰামোন্নয়ন মন্ত্ৰালয়ত অতি কমেও ১০জনকৈ বিষয়াৰ সমৰ্পিত দল গঠন কৰিবলৈ নিৰ্দেশ দিয়ে, যিয়ে দৈনিক ভিত্তিত অভিযোগ, ৰাজহুৱা আপত্তি, নিৰ্বাচিত প্ৰতিনিধিৰ পৰা অহা আবেদন, নাগৰিকৰ চিঠি আৰু বিভিন্ন পৰ্টেলত উত্থাপিত বিষয়সমূহ পৰ্যালোচনা কৰিব।

শ্ৰী চৌহানে দৃঢ়তাৰে দি কয় যে অভিযোগ নিষ্পত্তি কেৱল কাগজত 'নিষ্পত্তি' কৰাতে সীমাবদ্ধ থাকিব নালাগে। হিতাধিকাৰীসকলে প্ৰকৃততে সকাহ পাইছে নে নাই আৰু আঁচনিৰ লাভালাভ প্ৰকৃত প্ৰাপকৰ ওচৰলৈ গৈ পাইছে নে নাই, তাৰ সত্যতা নিৰূপণ কৰিবলৈ বিষয়াসকলক নিৰ্দেশ দিয়া হয়। তেওঁ এনে পৰিস্থিতিৰ বিৰুদ্ধে সতৰ্ক কৰি কয় যে কেতিয়াবা নথিপত্ৰই বিতৰণ দেখুৱায় কিন্তু হিতাধিকাৰীয়ে মাটিত একো নাপায়।

মন্ত্ৰীগৰাকীয়ে সত্যতা নিৰূপণৰ বাবে হিতাধিকাৰীসকলক নিজেই পোনপটীয়াকৈ ফোন কৰাৰ অভিজ্ঞতাৰ কথা উল্লেখ কৰে, য’ত কিছুমান ক্ষেত্ৰত চৰকাৰী নথিপত্ৰ আৰু প্ৰকৃত স্থিতিৰ মাজত ব্যৱধান ধৰা পৰে। তেওঁ কয় যে এই সমস্যাটো জটিল আৰু ইয়াৰ বাবে অভিযোগৰ ধৰণ, অঞ্চলভিত্তিক প্ৰৱণতা আৰু আঁচনি-নিৰ্দিষ্ট প্ৰতিবন্ধকতাসমূহ চিনাক্ত কৰা আৰু তাৰ পিছত প্ৰয়োজনীয় পদ্ধতিগত সংস্কাৰ কৰাৰ প্ৰয়োজন আছে।

তেওঁ ঘোষণা কৰে যে প্ৰতি মাহে ওজৰ-আপত্তি নিষ্পত্তি ব্যৱস্থাৰ পৰ্যালোচনা কৰা হ’ব। এই পৰ্যালোচনা সাধাৰণতে প্ৰতি মাহৰ প্ৰথম সোমবাৰে কৰা হ’ব; অৱশ্যে ব্যস্ত খাৰিফ বতৰৰ বাবে জুন মাহৰ পৰ্যালোচনা দ্বিতীয় সোমবাৰে অনুষ্ঠিত হ’ব। তেতিয়ালৈকে এই ব্যৱস্থাটো উল্লেখযোগ্যভাৱে অধিক সুশৃংখল, সঁহাৰিমূলক আৰু কাৰ্যকৰী হৈ উঠিব লাগে বুলি তেওঁ কয়।

সংস্কাৰৰ ওপৰত প্ৰধানমন্ত্ৰী নৰেন্দ্ৰ মোদীৰ ধাৰাবাহিক গুৰুত্বৰ কথা উল্লেখ কৰি শ্ৰী চৌহানে কয় যে প্ৰতিটো বিভাগ, আঁচনি আৰু শাখাই ক’ত অসুবিধাৰ সৃষ্টি হৈছে, সেই সঠিক স্থানসমূহ চিনাক্ত কৰিব লাগিব। প্ৰধানমন্ত্ৰী আৱাস যোজনা, পথ আঁচনি, কৃষি কাৰ্যসূচী, উদ্যান শস্য, বীমা, বিপণন বা আন যিকোনো পদক্ষেপেই নহওক কিয়, হিতাধিকাৰীৰ অনাহক অসুবিধাৰ সৃষ্টি কৰা যিকোনো প্ৰক্ৰিয়া নিয়ম, কাৰ্যপদ্ধতি আৰু ব্যৱস্থাৰ সংস্কাৰৰ জৰিয়তে সৰল কৰিব লাগিব।

তেওঁ লক্ষ্য কৰে যে বহুতো আঁচনি আৰু সংস্কাৰ সম্পূৰ্ণ ফলপ্ৰসূ হ’ব নোৱাৰে কাৰণ মানুহ এইবোৰৰ বিষয়ে অৱগত নহয়। গতিকে, তেওঁ ব্যাপক জনসচেতনতা সুনিশ্চিত কৰিবলৈ কৃষক সংগঠন, শ্ৰমিক গোট, সৰপঞ্চ, নিৰ্বাচিত প্ৰতিনিধি, ছচিয়েল মিডিয়া, গ্ৰাফিক্স, ভিডিঅ’, ৰিল আৰু অন্যান্য সৃজনশীল যোগাযোগ মাধ্যমৰ জৰিয়তে অংশীদাৰসকলৰ সৈতে যোগাযোগ স্থাপনৰ ওপৰত গুৰুত্ব আৰোপ কৰে।

ইতিমধ্যে ৰূপায়িত সংস্কাৰসমূহক "সংস্কাৰ উৎসৱ"ৰ মনোভাৱেৰে প্ৰচাৰ কৰাৰ ওপৰতো বৈঠকত গুৰুত্ব আৰোপ কৰা হয়। শ্ৰী চৌহানে কয় যে কেৱল সংস্কাৰেই পৰ্যাপ্ত নহয়; হিতাধিকাৰী আৰু অংশীদাৰসকলক আলোচনাৰ বাবে আমন্ত্ৰণ জনাব লাগে আৰু কি সলনি হৈছে, তেওঁলোকে কেনেকৈ উপকৃত হৈছে আৰু কি কি অতিৰিক্ত উন্নতি সম্ভৱ সেই বিষয়ে অৱগত কৰিব লাগে।

আইচিএআৰৰ নতুন পদোন্নতি ব্যৱস্থাৰ কথা উল্লেখ কৰি তেওঁ কয় যে এতিয়া কেৱল গৱেষণা পত্ৰৰ পৰিৱৰ্তে ক্ষেত্ৰভিত্তিক প্ৰভাৱ আৰু ব্যৱহাৰিক কামক অধিক গুৰুত্ব দিয়া হৈছে। তেওঁ ইয়াক প্ৰতিষ্ঠানিক কৰ্ম-সংস্কৃতি সলনি কৰিব পৰা এক বৃহৎ সংস্কাৰ বুলি অভিহিত কৰি লগতে কয় যে এনে সংস্কাৰ কেৱল বিভাগসমূহৰ ভিতৰতে আৱদ্ধ নাৰাখি কৃষক আৰু জনসাধাৰণৰ মাজত বহুলভাৱে প্ৰচাৰ কৰিব লাগে।

শ্ৰী চৌহানে ৰাজ্যসমূহৰ সৈতে অংশীদাৰিত্বক কৃষি আৰু গ্ৰামোন্নয়নৰ সফলতাৰ চাবিকাঠি বুলি বৰ্ণনা কৰে। তেওঁ কয় যে প্ৰকৃত ৰূপায়ণ ৰাজ্যিক পৰ্যায়ত হয় আৰু সেয়েহে ৰাজ্যসমূহৰ সৈতে ৰোডমেপ-ভিত্তিক অংশীদাৰিত্ব, আঞ্চলিক সন্মিলন, আঁচনি ভিত্তিক সমন্বয় আৰু বিষয় ভিত্তিক আলোচনা অধিক শক্তিশালী কৰিব লাগে। তেওঁ লগতে ইংগিত দিয়ে যে যিবোৰ ৰাজ্যই কিছু দ্বিধাবোধ দেখুৱাইছে, সেইবোৰৰ সৈতেও যোগাযোগ বৃদ্ধি কৰা হ’ব, কিয়নো সমগ্ৰ দেশৰ কল্যাণৰ বাবে কেন্দ্ৰ দায়বদ্ধ।

তেওঁ 'পিএম সূৰ্য ঘৰ'ৰ দৰে আঁচনিৰ সৈতে সংগতি ৰাখি চৰকাৰী ভৱন আৰু প্ৰতিষ্ঠানসমূহত সৌৰশক্তিৰ ব্যৱহাৰ বৃদ্ধি কৰাৰ বাবেও আহ্বান জনায়। বিভাগসমূহক সম্পূৰ্ণ হোৱা আৰু বাকী থকা কামৰ মূল্যায়ন কৰিবলৈ আৰু সময়মতে ৰূপায়ণ সুনিশ্চিত কৰিবলৈ নিৰ্দেশ দিয়া হয়।

বৈঠকত প্ৰধানমন্ত্ৰী নৰেন্দ্ৰ মোদীৰ বৰ্তমানৰ কাৰ্যকালৰ সাফল্যৰ লগতে বিগত ১২ বছৰৰ সামগ্ৰিক সাফল্যৰ ফলপ্ৰসূ উপস্থাপনৰ বিষয়ে আলোচনা কৰা হয়। শ্ৰী চৌহানে বিভাগসমূহক পদ্ধতিগতভাৱে সাফল্যসমূহ সংকলন কৰিবলৈ আৰু সংবাদ মেল, গাঁও পৰ্যায়ৰ আউটৰিচ কাৰ্যসূচী, উপস্থাপন, সৃজনশীল সমল, ভিডিঅ’ আৰু ছচিয়েল মিডিয়া কেম্পেইনৰ জৰিয়তে প্ৰচাৰ কৰিবলৈ নিৰ্দেশ দিয়ে।

ডিজিটেল মিডিয়াৰ বৰ্ধিত প্ৰভাৱৰ ওপৰত আলোকপাত কৰি তেওঁ চুটি ভিডিঅ’, গ্ৰাফিক্স, হিতাধিকাৰীৰ কাহিনী আৰু চৰকাৰী আঁচনিয়ে কঢ়িয়াই অনা বাস্তৱ জীৱনৰ ৰূপান্তৰৰ ওপৰত গুৰুত্ব দিবলৈ পৰামৰ্শ দিয়ে। তেওঁ লক্ষ্য কৰে যে বাতৰি কাকত আৰু টেলিভিছনৰ সমান্তৰালভাৱে প্ৰভাৱশালী ডিজিটেল যোগাযোগ ক্ৰমান্বয়ে ফলপ্ৰসূ হৈ পৰিছে।

বিদেশ ভ্ৰমণৰ সন্দৰ্ভত প্ৰধানমন্ত্ৰী মোদীৰ নিৰ্দেশনাৰ কথা উল্লেখ কৰি শ্ৰী চৌহানে বিষয়াসকলক অনাহক বিদেশ ভ্ৰমণ পৰিহাৰ কৰিবলৈ নিৰ্দেশ দিয়ে আৰু কেৱল প্ৰকৃততে প্ৰয়োজনীয় ক্ষেত্ৰতহে এনে প্ৰস্তাৱ বিবেচনা কৰাটো সুনিশ্চিত কৰিবলৈ কয়। তেওঁ কয় যে বৰ্তমানৰ তাৎক্ষণিক অগ্ৰাধিকাৰ হৈছে দেশৰ ভিতৰত কামৰ গতি, গুণগত মান আৰু ফলাফলৰ উন্নতি সাধন কৰা।

ফাইল নিষ্পত্তিৰ ক্ষেত্ৰত শ্ৰী চৌহানে স্পষ্ট কৰি দিয়ে যে তেওঁৰ অগ্ৰাধিকাৰ কেৱল ক্ষিপ্ৰতা নহয়, বৰঞ্চ গুণগত মান আৰু ফলাফলমুখী সিদ্ধান্ত গ্ৰহণহে অধিক গুৰুত্বপূৰ্ণ। তেওঁ কয় যে প্ৰতিটো নিয়ম আৰু প্ৰতিটো ফাইলে বহু মানুহৰ জীৱনত প্ৰভাৱ পেলাব পাৰে, গতিকে সিদ্ধান্তসমূহ সাৱধানে, ইতিবাচকভাৱে আৰু সম্পূৰ্ণ বুজাবুজিৰে ল’ব লাগিব। একে সময়তে তেওঁ এনে এক ব্যৱস্থাৰ ওপৰত গুৰুত্ব আৰোপ কৰে যিয়ে অনাহক পলম হোৱাত বাধা দিয়ে আৰু গুৰুত্বপূৰ্ণ বিষয়সমূহৰ সময়মতে আলোচনা সুনিশ্চিত কৰে।

বৈঠকৰ সামৰণিত কেন্দ্ৰীয় মন্ত্ৰীগৰাকীয়ে ওজৰ-আপত্তি নিষ্পত্তি আৰু সংস্কাৰৰ পৰা আৰম্ভ কৰি প্ৰযুক্তি গ্ৰহণ, আদালতৰ গোচৰ, ৰাজ্যসমূহৰ সৈতে সমন্বয়, জনসম্পৰ্ক, ভিজন ২০৪৭ৰ পৰিকল্পনা আৰু সাফল্যৰ উপস্থাপনলৈকে প্ৰতিটো বিভাগে এক সক্ৰিয়, জবাবদিহি আৰু সময়াবদ্ধ কৰ্ম-সংস্কৃতি গ্ৰহণ কৰি প্ৰধানমন্ত্ৰী শ্ৰী নৰেন্দ্ৰ মোদীৰ সুশাসনৰ দৃষ্টিভংগী অনুসৰি শাসনৰ সুফল প্ৰান্তীয় ব্যক্তিৰ ওচৰলৈ ফলপ্ৰসূভাৱে নিয়াৰ বাবে পিছপৰি নাথাকিবলৈ কয়।

*****

RC/MS/DB