યોર એક્સેલન્સી પ્રેસિડેન્ટ ઓફ સાયપ્રસ, બંને દેશોના પ્રતિનિધિઓ, મીડિયાના સાથીઓ,

નમસ્કાર!

કાલીમેરા

સાયપ્રસના રાષ્ટ્રપતિજી અને તેમના પ્રતિનિધિમંડળનું ભારતમાં સ્વાગત કરતા મને ખૂબ જ આનંદ થઈ રહ્યો છે. રાષ્ટ્રપતિજી, ગયા વર્ષે, તમે સાયપ્રસમાં અમારું અત્યંત ઉષ્માભર્યું સ્વાગત કર્યું હતું. ભારત પ્રત્યે વિશેષ સન્માન દર્શાવતા, તમે મને સાયપ્રસના સર્વોચ્ચ સન્માનથી સન્માનિત કર્યો હતો.

સમગ્ર મુલાકાત દરમિયાન, તમારી આત્મીયતા, તમારો સ્નેહ અને ભારત પ્રત્યેનો તમારો વિશેષ લગાવ અમે ખૂબ જ ઊંડાણપૂર્વક અનુભવ્યો હતો. અને આજે તમારી ભારત મુલાકાત, આપણી સહિયારી યાત્રા (shared journey) નો આગામી મહત્વપૂર્ણ પડાવ છે.

મિત્રો,

ભારત અને સાયપ્રસની મિત્રતા મજબૂત પણ છે અને ભવિષ્યવાદી (ફ્યુચરિસ્ટિક) પણ છે. લોકશાહી અને કાયદાના શાસન જેવા મૂલ્યોમાં સહિયારો વિશ્વાસ, આપણી ભાગીદારીનો આધાર છે. આપણે તમામ દેશોની સાર્વભૌમત્વ અને પ્રાદેશિક અખંડિતતાનું સન્માન કરીએ છીએ. ભારત આ સિદ્ધાંતો પ્રત્યે સંપૂર્ણપણે પ્રતિબદ્ધ છે અને આગળ પણ રહેશે.

અને આજે જ્યારે ભારત અને યુરોપ પોતાના સંબંધોમાં એક નવા સુવર્ણ યુગમાં પ્રવેશ કરી રહ્યા છે; ત્યારે સાયપ્રસ આ સમયે ન માત્ર યુરોપિયન યુનિયન કાઉન્સિલની અધ્યક્ષતા કરી રહ્યું છે, પરંતુ ભારત અને સમગ્ર યુરોપ વચ્ચે એક મહત્વપૂર્ણ ઇન્વેસ્ટમેન્ટ ગેટવે (રોકાણના પ્રવેશદ્વાર) તરીકે ઉભરી રહ્યું છે.

મિત્રો,

સાયપ્રસ ભારતના ટોચના 10 રોકાણકારોમાંનું એક છે; છેલ્લા એક દાયકામાં, સાયપ્રસથી ભારતમાં રોકાણ લગભગ બમણું થયું છે. બંને દેશો વચ્ચે વિશ્વાસ વધ્યો છે. ભારત-યુરોપિયન યુનિયન ફ્રી ટ્રેડ એગ્રીમેન્ટથી તમામ નવી સંભાવનાઓ ઊભી થઈ છે. તેનો લાભ ઉઠાવીને આપણે આગામી પાંચ વર્ષમાં આ રોકાણને ફરીથી બમણું કરવાનું લક્ષ્ય રાખીએ છીએ. અને આ સંકલ્પને સાકાર કરવા માટે, આજે આપણે આપણા વિશ્વસનીય સંબંધોને એક વ્યૂહાત્મક ભાગીદારીના રૂપમાં ઉચ્ચ સ્તરે લઈ જઈ રહ્યા છીએ.

મિત્રો,

ભારત અને સાયપ્રસ વચ્ચેની આ વ્યૂહાત્મક ભાગીદારી, બંને દેશોના નાણાકીય અને સેવાઓના હબને જોડીને, વાણિજ્ય (કોમર્સ) માટે મૂડીને મુક્ત કરશે. તે સાયપ્રસના ઈન્ફ્રાસ્ટ્રક્ચર, ઊર્જા અને કૃષિ ક્ષેત્રમાં ભારતીય કંપનીઓ માટે નવી તકો પૂરી પાડશે. અને ભારતના ઝડપથી વધી રહેલા શિપિંગ અને મેરિટાઇમ (સમુદ્રી) ક્ષેત્રોમાં નવું રોકાણ લાવશે.

આપણે સાયપ્રસની સાથે મળીને, ગિફ્ટ સિટીને વૈશ્વિક નાણાકીય અને સેવાઓનું હબ બનાવવાના વિઝનને ગતિ આપીશું. અને બંને દેશોની ઇનોવેશન અને સ્ટાર્ટ-અપ ઇકોસિસ્ટમ વચ્ચે જોડાણ વધારીશું.

મિત્રો,

સંરક્ષણ અને સુરક્ષા સહયોગ પણ આપણા સંબંધોનો એક મહત્વપૂર્ણ સ્તંભ છે. આપણને ખૂબ જ આનંદ છે કે છેલ્લા કેટલાક વર્ષોમાં બંને દેશો વચ્ચે મિલિટરી એક્સચેન્જ (લશ્કરી આદાનપ્રદાન) અને તાલીમ સહયોગ વધ્યા છે. આજે આપણે સાયબર સિક્યોરિટી, મેરિટાઇમ સિક્યોરિટી અને કાઉન્ટર-ટેરરિઝમ (આતંકવાદ વિરોધી) સહયોગને પણ વધુ મજબૂત કરવાનો નિર્ણય લીધો છે.

એટલું જ નહીં, આપણે ઇન્ડો-પેસિફિક ઓશન્સ ઇનિશિયેટિવ, અને ઇન્ડિયા-મિડલ ઇસ્ટ યુરોપ ઇકોનોમિક કોરિડોર જેવી મહત્વપૂર્ણ પહેલો દ્વારા; કનેક્ટિવિટી સુનિશ્ચિત કરવા માટે પણ સાથે મળીને કામ કરીશું.

મિત્રો,

સાયપ્રસમાં વસેલા ભારતીય વ્યાવસાયિકો (professionals) અને વિદ્યાર્થીઓ (students), આપણા લોકો વચ્ચેના સંબંધોને વધુ સશક્ત બનાવી રહ્યા છે. આ સંબંધો (ties)ને વધુ સુદ્રઢ કરવા માટે આપણે ટૂંક સમયમાં જ એક વ્યાપક માઇગ્રેશન એન્ડ મોબિલિટી પાર્ટનરશિપ; અને સાથે-સાથે સોશિયલ સિક્યોરિટી એગ્રીમેન્ટ કરવા પર સહમતિ સાધી છે.

આજે આપણે સંસ્કૃતિ અને ઉચ્ચ શિક્ષણ પર પણ કરારો કરી રહ્યા છીએ; જેનાથી બંને દેશો વચ્ચે સાંસ્કૃતિક આદાનપ્રદાન અને સંશોધન સહયોગ પ્રગાઢ બનશે.

મિત્રો,

આજે આપણે સાથે મળીને વૈશ્વિક મુદ્દાઓ પર પણ વાત કરી. યુક્રેન હોય કે પશ્ચિમ એશિયા, આપણે સંઘર્ષના વહેલા અંત અને શાંતિના પ્રયાસોનું સમર્થન કરતા રહીશું. આપણે આ વાત પર પણ સહમત છીએ, કે વધતા જતા વૈશ્વિક પડકારોના ઉકેલ માટે વૈશ્વિક સંસ્થાઓનું સુધારણા (રિફોર્મ) અત્યંત તાકીદનું અને મહત્વપૂર્ણ છે.

યોર એક્સેલન્સી,

ભારત અને સાયપ્રસનો નાતો, સમયની કસોટી પર વારંવાર ખરો ઉતર્યો છે. આજે, ભારત-સાયપ્રસ વ્યૂહાત્મક ભાગીદારીની રચનાથી, આપણે આપણા સંબંધોને નવી મહત્વાકાંક્ષા અને નવી ગતિ આપવા જઈ રહ્યા છીએ.

આવો, આપણે સાથે મળીને આપણા સંબંધોને સહયોગથી સહ-નિર્માણ સુધી, અને ભાગીદારીથી સહિયારી સમૃદ્ધિ સુધી લઈ જઈએ.

ભારત અને સાયપ્રસ — સાથે મળીને, એક સુરક્ષિત, સમૃદ્ધ અને બહેતર ભવિષ્યનું નિર્માણ કરશે.

ખૂબ-ખૂબ ધન્યવાદ.

IJ/DK/JD