എല്ലാ നോർഡിക് രാജ്യങ്ങളിൽ നിന്നുമുള്ള നേതാക്കളേ, പ്രതിനിധികളേ,
മാധ്യമ സുഹൃത്തുക്കളേ,

എല്ലാവർക്കും എന്റെ ആശംസകൾ

ഇന്ന് മൂന്നാമത് ഇന്ത്യ-നോർഡിക് ഉച്ചകോടിയിൽ പങ്കെടുക്കാൻ കഴിഞ്ഞതിൽ എനിക്ക് അതിയായ സന്തോഷമുണ്ട്. ഒന്നാമതായി ഈ ഉച്ചകോടിക്ക് ആതിഥേയത്വം വഹിച്ചതിന് നോർവേ പ്രധാനമന്ത്രിക്ക് ഞാൻ ആത്മാർത്ഥമായി നന്ദി പറയുന്നു. ഇവിടെ സന്നിഹിതരായ എല്ലാ നോർഡിക് നേതാക്കളെയും ഞാൻ സ്നേഹപൂർവ്വം സ്വാഗതം ചെയ്യുകയും ചെയ്യുന്നു.

ജനാധിപത്യം, നിയമവാഴ്ച, ബഹുസ്വരത എന്നിവയോടുള്ള നമ്മുടെ പങ്കിട്ട പ്രതിബദ്ധത നമ്മെ സ്വാഭാവിക പങ്കാളികളാക്കുന്നു. അതേസമയം സാങ്കേതികവിദ്യയിലും സുസ്ഥിരതയിലുമുള്ള നമ്മുടെ പങ്കിട്ട മുൻഗണനകൾ നമ്മുടെ ബന്ധത്തെ വലിയ അവസരങ്ങളാൽ നിറയ്ക്കുന്നു. അതുകൊണ്ടാണ് എട്ട് വർഷം മുമ്പ് നോർഡിക് രാജ്യങ്ങളുമായുള്ള നമ്മുടെ ബന്ധത്തിന് കൂടുതൽ ഊർജ്ജവും ചലനാത്മകതയും നൽകുന്നതിനായി നമ്മൾ ഈ വേദി രൂപീകരിച്ചത്.

സുഹൃത്തുക്കളേ,

കഴിഞ്ഞ കുറച്ച് വർഷങ്ങളായി നമ്മുടെ ബന്ധത്തിൽ ഗണ്യമായ പുരോഗതി കൈവരിക്കാൻ കഴിഞ്ഞതിൽ എനിക്ക് വലിയ സന്തോഷമുണ്ട്. കഴിഞ്ഞ പത്ത് വർഷത്തിനുള്ളിൽ നമ്മുടെ ഉഭയകക്ഷി വ്യാപാരം ഏകദേശം നാലിരട്ടിയായി വർദ്ധിച്ചു.

നോർഡിക് രാജ്യങ്ങളിൽ നിന്നുള്ള നിക്ഷേപ നിധികളും ഇന്ത്യയുടെ ദ്രുതഗതിയിലുള്ള വളർച്ചാ യാത്രയിൽ പ്രധാന പങ്കാളികളായി മാറുകയാണ്. കഴിഞ്ഞ ദശകത്തിൽ നോർഡിക് രാജ്യങ്ങളിൽ നിന്ന് ഇന്ത്യയിലേക്കുള്ള നിക്ഷേപം ഏകദേശം 200 ശതമാനം വർദ്ധിച്ചു.

വേഗത്തിൽ വളരുന്ന വ്യാപാരവും നിക്ഷേപവും ഇന്ത്യയുടെ വളർച്ചാ കഥയ്ക്ക് സംഭാവന നൽകുക മാത്രമല്ല നോർഡിക് രാജ്യങ്ങളുടെ സമ്പദ്‌വ്യവസ്ഥയിൽ വളരെ നല്ല പങ്ക് വഹിക്കുകയും ആയിരക്കണക്കിന് പുതിയ തൊഴിലവസരങ്ങൾ സൃഷ്ടിക്കുകയും ചെയ്തിട്ടുണ്ട്. ഈ ശക്തമായ അടിത്തറയിൽ നിന്നുകൊണ്ട് നമ്മുടെ ബന്ധത്തെ അടുത്ത തലത്തിലേക്ക് കൊണ്ടുപോകുന്നതിനായി നമ്മൾ അടുത്തിടെ പ്രധാനപ്പെട്ട നിരവധി സംരംഭങ്ങൾ ഏറ്റെടുത്തിട്ടുണ്ട്.

സുഹൃത്തുക്കളേ,

2025 ഒക്ടോബർ മുതൽ നമ്മൾ നോർവേ, ഐസ്‌ലൻഡ് കൂടാതെ മറ്റ് യൂറോപ്യൻ ഫ്രീ ട്രേഡ് അസോസിയേഷൻ രാജ്യങ്ങളുമായി വ്യാപാര സാമ്പത്തിക പങ്കാളിത്ത കരാർ നടപ്പിലാക്കിയിട്ടുണ്ട്. ഏതാനും മാസങ്ങൾക്ക് മുമ്പ് നമ്മൾ ഇന്ത്യ-യൂറോപ്യൻ യൂണിയൻ സ്വതന്ത്ര വ്യാപാര കരാർ പൂർത്തിയാക്കി ഇതിൽ ഡെന്മാർക്ക്, ഫിൻലൻഡ്, സ്വീഡൻ എന്നിവരും പങ്കാളികളാണ്. ഈ അഭിലഷണീയമായ വ്യാപാര കരാറുകളിലൂടെ ഇന്ത്യയും നോർഡിക് രാജ്യങ്ങളും തമ്മിലുള്ള ബന്ധത്തിൽ നമ്മൾ ഒരു പുതിയ സുവർണ്ണ കാലഘട്ടത്തിന് തുടക്കം കുറിക്കുകയാണ്.

സുഹൃത്തുക്കളേ,

ഇന്ന് നമ്മൾ ഇന്ത്യ-നോർഡിക് ബന്ധത്തെ ഹരിത സാങ്കേതികവിദ്യയും നൂതന തന്ത്രപരമായ പങ്കാളിത്തവുമായി രൂപപ്പെടുത്താൻ തീരുമാനിച്ചിരിക്കുന്നു. ഈ ഹരിത സാങ്കേതികവിദ്യ പങ്കാളിത്തത്തിലൂടെ മുഴുവൻ ലോകത്തിനും മെച്ചപ്പെട്ട ഭാവി ഉറപ്പാക്കുന്നതിനായി ജിയോതെർമൽ ഊർജ്ജത്തിലും മത്സ്യബന്ധനത്തിലുമുള്ള ഐസ്‌ലൻഡിന്റെ വൈദഗ്ധ്യവും, ബ്ലൂ ഇക്കോണമിയിലും ആർട്ടിക് മേഖലയിലുമുള്ള നോർവേയുടെ ശക്തിയും, എല്ലാ നോർഡിക് രാജ്യങ്ങളുടെയും സമുദ്ര സുസ്ഥിരതയും വൈദഗ്ധ്യവും ഇന്ത്യയുടെ വലിയ വിപണിയുമായി നമ്മൾ സംയോജിപ്പിക്കും.

നമ്മൾ തമ്മിലുള്ള ഈ അതുല്യമായ തന്ത്രപരമായ പങ്കാളിത്തത്തിന്റെ രൂപീകരണത്തിലൂടെ ലോകത്തിനായി വിശ്വസനീയമായ പരിഹാരങ്ങൾ വികസിപ്പിക്കുന്നതിന് സ്വീഡന്റെ വിപുലമായ നിർമ്മാണ പ്രതിരോധ ശേഷിയും, ഫിൻലൻഡിന്റെ ടെലികമ്മ്യൂണിക്കേഷൻ ഡിജിറ്റൽ സാങ്കേതികവിദ്യയിലെ വൈദഗ്ധ്യവും, സൈബർ സുരക്ഷയിലും ഹെൽത്ത് ടെക്നോളജിയിലുമുള്ള ഡെന്മാർക്കിന്റെ ശക്തിയും ഇന്ത്യയുടെ പ്രതിഭകളുമായി നമ്മൾ സംയോജിപ്പിക്കും.

സുഹൃത്തുക്കളേ,

ഇന്ത്യ-നോർഡിക് പങ്കാളിത്തത്തിന്റെ ഒരു പ്രധാന സ്തംഭം നമ്മുടെ വിപുലമായ ഗവേഷണ നവീകരണ ബന്ധങ്ങളാണ്. ഇവ കൂടുതൽ ശക്തിപ്പെടുത്തുന്നതിന് സർവ്വകലാശാലകൾ, ലബോറട്ടറികൾ, സ്റ്റാർട്ടപ്പ് ആവാസവ്യവസ്ഥ എന്നിവ തമ്മിലുള്ള ബന്ധം വർദ്ധിപ്പിക്കുന്നതിന് നമ്മൾ ഒന്നിച്ച് പ്രവർത്തിക്കും. ആർട്ടിക് പോളാർ ഗവേഷണങ്ങളിൽ നമ്മൾ സഹകരണം ശക്തമാക്കും. ഇന്ത്യയും നോർഡിക് രാജ്യങ്ങളും തമ്മിലുള്ള നൈപുണ്യ വികസനത്തിനും പ്രതിഭകളുടെ സഞ്ചാരത്തിനും നമ്മൾ പുതിയ അവസരങ്ങൾ സൃഷ്ടിക്കുകയും ചെയ്യും.

സുഹൃത്തുക്കളേ,

ഇന്ന് നമ്മൾ എല്ലാവരും ആഗോള പ്രശ്നങ്ങളിലും കാഴ്ചപ്പാടുകൾ പങ്കുവെച്ചു. ആഗോള പിരിമുറുക്കങ്ങളുടെയും സംഘർഷങ്ങളുടെയും ഈ കാലഘട്ടത്തിൽ നിയമങ്ങൾ അടിസ്ഥാനമാക്കിയുള്ള ആഗോള ക്രമം ശക്തിപ്പെടുത്തുന്നതിന് ഇന്ത്യയും നോർഡിക് രാജ്യങ്ങളും ഒരുമിച്ച് പ്രവർത്തിക്കുന്നത് തുടരും. അത് യുക്രെയ്നായാലും പശ്ചിമേഷ്യയായാലും സംഘർഷങ്ങൾ എത്രയും വേഗം അവസാനിപ്പിക്കുന്നതിനും സമാധാനം പുനഃസ്ഥാപിക്കുന്നതിനും ലക്ഷ്യമിട്ടുള്ള ശ്രമങ്ങളെ നമ്മൾ തുടർന്നും പിന്തുണയ്ക്കും.

ബഹുസ്വര സ്ഥാപനങ്ങളുടെ പരിഷ്കരണം ആവശ്യവും അടിയന്തിരവുമാണെന്ന കാര്യത്തിൽ നമ്മൾ യോജിക്കുന്നു. ഭീകരവാദത്തിന്റെ കാര്യത്തിലും നമ്മുടെ നിലപാട് വ്യക്തവും ഏകീകൃതവുമാണ് - വിട്ടുവീഴ്ചയില്ല, ഇരട്ടത്താപ്പുമില്ല.

ബഹുമാനപ്പെട്ട നേതാക്കളേ,

നമ്മൾ എല്ലാവരും വ്യത്യസ്ത ഭാഷകളാണ് സംസാരിക്കുന്നതെങ്കിലും ചിലപ്പോൾ ഒരു വാക്ക് പോലും നമ്മുടെ സ്വാഭാവിക പങ്കാളിത്തത്തെ പ്രതിഫലിപ്പിക്കാൻ മതിയാകും. ഇന്ന് ഞാൻ 'സമ്പന്ത്' എന്ന വാക്ക് പലതവണ ഉപയോഗിച്ചു. പല നോർഡിക് ഭാഷകളിലും 'സമ്പന്ത്' എന്ന വാക്ക് ബന്ധം അല്ലെങ്കിൽ ഒരു കൂട്ടുകെട്ടിനെ സൂചിപ്പിക്കുന്നു. ഹിന്ദിയിലും 'സമ്പന്ത്' എന്ന വാക്ക് ഇതേ അർത്ഥം തന്നെയാണ് വഹിക്കുന്നത്.

ഇത് വാക്കുകളുടെ സാദൃശ്യം മാത്രമല്ല ഇത് നമ്മുടെ ചിന്തകളുടെ അടുപ്പത്തെയാണ് പ്രതിഫലിപ്പിക്കുന്നത്. നമുക്കിടയിലുള്ള ബന്ധം എല്ലാ മേഖലകളിലും കൂടുതൽ ആഴത്തിലാക്കാം കൂടാതെ ഇന്ത്യ-നോർഡിക് പങ്കാളിത്തത്തെ പങ്കിട്ട സമൃദ്ധി, നവീകരണം, സുസ്ഥിരമായ ഭാവി എന്നിവയുടെ ഒരു മാതൃകയാക്കി മാറ്റാം.

വളരെ നന്ദി

ഡിസ്ക്ലെയ്മർ: പ്രധാനമന്ത്രിയുടെ പ്രസംഗത്തിന്റെ ഏകദേശ വിവർത്തനമാണിത്. യഥാർത്ഥ പ്രസംഗം ഹിന്ദിയിലാണ് നടത്തിയത്

***

SK