Ka jingialang kaba 14 jong ka High-Powered Review Board (HPRB) jong ka Brahmaputra Board ka la long ha ka 19 tarik Jymmang 2026 ha Guwahati hapoh ka jingpyniaid jong u C. R. Patil, Myntri Sorkar Pdeng ba dei peit ia ka Tnad Jal Shakti. U Sarbananda Sonowal, Myntri ha ka Kynhun Myntri ka sorkar pdeng; u Raj Bhushan Choudhary, Myntri Khynnah, ka Tnad Jal Shakti, ryngkat bad kiwei pat ki Myntri, ki heh ophisar na ka Sorkar India bad ki jylla ka thain shatei lammihngi, ki riew shemphang ha kaba iadei bad ka teknoloji bad kito kiba don bynta ha kane ka kam ki la iashim bynta ha kane ka jingialang ban bishar bniah ia ka jingiaid shaphrang jong ki sienjam ban peit ia ki kam kiba iadei bad ki wah bad ban ai jingiarap ha ka jingpynkhreh ia ki kam ban wan jong ka Brahmaputra Board.

Ha kane ka sngi, u Myntri Sorkar Pdeng ba dei peit ia ka Tnad Jal Shakti u la pyllait paidbah ruh ia ka State Water Reforms Framework (SWRF), ka sienjam ba kongsan jong ka ri kaba thmu ban pynkhlain ia ki jingpynkylla ia ka rukom pyniaid ia ki kam kiba iadei bad ka um ha kylleng ki jylla bad ki Union Territory.

Haba ai jingkren ha ka jingïalang, u Myntri u la ban jur ba ka jingïada ïa ka um ka long kaba kongsan na ka bynta ka jingiaid lynti jong ka roi ka par jong ka India bad ka long u rishot ba kongsan ban pynurlong ïa ka jingthmu jong ka Viksit Bharat @2047. U la ong ba ka jingpyniaid ia ki kam kiba iadei bad ka um ha ka rukom kaba iaineh ka donkam ym tang ia ka jingwanrah ia ki jingdon jingem, hynrei ka donkam ruh ia ki rukom synshar kiba khlain, ki polisi kiba skhem, ki jaka treikam kiba khlain, ka jingpynwandur ia ka teknoloji bad ka jingiashim bynta lang jong ki paidbah.

Ka jingialang jong ka HPRB ka la bishar bniah ia ka jingiaid shaphrang jong ka Brahmaputra Board ha ki bynta jong ka jingpyniaid ia ki kam kiba iadei bad ki wah, ka jingpynkhreh bad pynthymmai ia ki masterplan, ka jingiada na ka jingshlei um bad ka jingtwa khyndew, ka jingpynthymmai ia ki tyllong um, ka jingpynkylla digital, ka jingkyntiew ia ka bor treikam bad ka jingpynkylla ia ki jaka treikam. Ka HPRB ka la ai jingiaroh ia ka jingkiew kaba khraw kaba la ioh da ka Board ha kine ki ar snem ba la dep ha kaba pynkhlain ia ka jingthmu ba iadei bad ki wah bad ban pyniar ia ki kam ba iadei bad ka teknoloji ha kylleng ka thain shatei lammihngi bad West Bengal.

Ha kane ka jingialang, la pynlong ia ki jingiakren kaba bniah halor ka jingpynkhreh bad pynthymmai ia ki river basin masterplan da kaba pyndonkam ia ki teknoloji katkum ka juk mynta kum ka GIS, ka remote sensing, ka LiDAR bad ka hydrological modelling. Ka Board ka la pyntip ba mynta la ithuh haduh 76 tylli ki wah bad ki sub-basin na ka bynta ban pynkhreh bad pynthymmai ia ki masterplan kiba kynthup ia ka Brahmaputra bad Barak basin.

Ka HPRB ka la bishar bniah ruh ia ki projek bapher bapher kiba dang iaid bad kiba la tyrwa kiba iadei bad ka jingiada na ka jingshlei um, ki kam ban iada na ka jingtwa khyndew, ka jingpynbha ia ki nala um, ka jingiada ia ki tyllong um bad ki sienjam ban pynneh pynsah ia ka um ha ki jylla bapher bapher jong ka thain shatei lammihngi. Ka Board ka la ban jur ia ki sienjam ba kongsan ba la sdang ha Assam, Meghalaya, Mizoram, Manipur, Nagaland bad Tripura ryngkat ka jingiatreilang bad ki Sorkar Jylla bapher bapher.

Ha kane ka jingialang la ia pyrkhat halor ka jingpynkylla ia ka Brahmaputra Board sha ka River Basin Organisation (RBO) kaba katkum ka juk mynta, kaba la pyndonkam da ka teknoloji bad kaba la pynshong nongrim ha ka jingnang jingstad. Ha kaba iadei bad kane, la pynbiang ia ka polisi bad ka jingialam lynti halor ka jingpynbeit thymmai ia ki jaka treikam, ka jingpynkhlain ia ki jaka treikam ba kyrpang ba iadei bad ka teknoloji, ki sienjam kiba iadei bad ki kam synshar lyngba ki lad digital bad ki jingpynkylla ia ki jaka treikam na ka bynta ban kyntiew ia ka jingtreikam, ka jingshai bad ka jingiatreilang.

Ka HPRB ka la bishar bniah ruh ia ka jingthmu ban pynthymmai biang ia ka North Eastern Hydraulic and Allied Research Institute (NEHARI) ban pynkhlain ia ka jingwad bniah, ki jingpule ba iadei bad ka um, ka jingai jingmut ha kaba iadei bad ka teknoloji bad ki kam kyntiew ia ka bor treikam ha ka thain. La pynlong ruh ïa ki jingïakren ha kaba ïadei bad ka jingpynbha pat ïa ka Brahmaputra Board Office Complex kaba don ha Basistha, Guwahati sha ka jaka treikam kaba katkum ka juk mynta kaba iahap bad ki jingdonkam ha ki por ban wan.

Kum shi bynta jong kane ka prokram, la pyllait paidbah ia kine ki kot bad ki jingthoh ba iadei bad ki rukom treikam tynrai jong ka thain shatei lammihngi jong ka Ri India ha ka jingpeit ia ki kam kiba iadei bad ka um:

• Traditional Water Management Practices of Northeast India – Resource Book

· Traditional Water Management Practices of Northeast India – Picture Book

· Paddy-cum-Fishery (Arunachal Pradesh) – Documentary

· Dong System (Assam) – Documentary

· Bamboo Drip Irrigation (Meghalaya) – Documentary

• Rainwater Harvesting (Mizoram) – Documentary

Ka HPRB ka la iaroh ia ki sienjam jong ka Brahmaputra Board ha kaba buh jingtip shaphang ki rukom pyniaid um tynrai bad kiba iaineh jong ka thain bad ka la ban jur ia ka jingdonkam ban pyniasoh ia ka jingtip tynrai bad ki rukom pyniaid ia ki kam kiba iadei bad ki wah kiba katkum ka juk mynta.

Shaphang ka State Water Reforms Framework (SWRF)

Ka State Water Reforms Framework (SWRF), kaba la pyllait paidbah ha kane ka prokram, ka dei ka rukom synshar kaba pynshong nongrim ha ka jingpynkylla kaba la pynwandur da ka Tnad Jal Shakti ban pynshlur bad buh nuksa ia ki jingpynkylla ha ka Tnad ba iadei bad ki kam um kiba iaid shaphrang ha kylleng ki Jylla bad ki Union Territory. Da kaba pynpaw ia ka jingsynshar paidbah kaba iatreilang, la saindur ia ka Framework ha ka jingiamir jingmut bad ki Jylla bad ki UT, da kaba ithuh ia ka um kum ka jingdon jingem jong ka ri kaba donkam ia ka jingbahkhlieh lang, ka jingsynshar kaba don ka jingiatreilang bad ka jingkitkhlieh lang hapdeng ka Sorkar Pdeng bad ki Jylla bad ki UT.

Ka rukom treikam ka kynthup ia 75 tylli ki dak ha kylleng ki san tylli ki bynta kynthup ia ka Polisi & Jingpynbeit, Ka jingpeit bniah ia ki projek, ka jingpynkylla digital & R&D, ki jingdon jingem, bad ka jingiatreilang bad ki paidbah. Da kaba wanrah ia ka rukom peit kaba shai, kaba pynshong nongrim ha ki sakhi ha kylleng kine ki bynta, ka SWRF ka pyndonkam ha kajuh ka por ia ka bor jong ka synshar paidbah da kaba plie lad ia ki Jylla bad ki UT ban ioh jinghikai na ki rukom treikam ba bha tam jong uwei pa uwei, ban thew ia ka jingtreikam jong ki haba ianujor bad ki paralok bad ban ialeh ban long kiba tbit ha ka jingsynshar ia ki kam kiba iadei bad ka um. La khmih lynti ba kane ka jingiakhun kaba bha hapdeng ki Jylla kan pynsted ia ki jingpynkylla, kan kyntiew ia ka jingsaindur thymmai bad kan kyntiew ia ka rukom pyniaid ia ki kam ha kylleng ka ri kiba iadei bad ka um.

Ka Framework ka ialeh ban pynshlur ia ki Jylla bad ki UT ban shim ia ki jingpynkylla kiba lah ban shim jingkhein bad pynshisha ha ki bynta kiba kongsan kum ka jingpynbeit ia ka um hapoh khyndew, ka jingpynbeit ia ki jaka ba shlei um, ka jingpyndonkam biang ia ka um jakhlia, ka jingshngain jong ki dam, ka jingpyniaid ia ka um ha ka rukom kaba iashim bynta lang, ka jingpynkhreh ia ki kam ha ki jaka rud wah, ka jingpyniasoh ia ki jingtip bad ka jingpynkhlain ia ki jaka treikam. Ka ialeh ban kyrshan ia ki Jylla/UT ha kaba ithuh ia ki jingduna ha ki polisi, ban shim ia ki jingpynkylla kiba lah ban shim jingkhein bad ban shim ia ki rukom treikam kiba bha tam na ka bynta ban tei ia ki rukom synshar kiba skhem, kiba don ka jingkitkhlieh bad kiba lah ban iada ia ka um kiba iahap bad ka jingthmu jong ka Viksit Bharat @2047.

Ka jingpyllait paidbah ia ka Framework ka ai ia ki Jylla/UT ia ka por ba la buh lypa kaba hynniew bnai, haduh ka 31 tarik u Nohprah 2026, ban sdang ia ki jingpynkylla ba kongsan bad ban ai ia ki jubab halor ki dak haduh ka 31 tarik u Kyllalyngkot 2027.

La pynkut ia ka jingialang da ka jingkular lang ban pynkhlain ia ka jingiatreilang hapdeng ki jylla, ka jingpyniaid ia ki kam kiba iadei bad ki wah ha ka rukom kaba iaineh bad ka jingpynkhreh ia ki kam ba jrong samoi kiba iadei bad ki jingdon jingem ba iadei bad ka um na ka bynta ka thain shatei lammihngi bad ka West Bengal.

****