নেদরলেন্দসগী প্রধান মন্ত্রী রোব জেত্তেন্না চেপাউ পীরকপদগী, প্রধান মন্ত্রী শ্রী নরেন্দ্র মোদী সরকারগী খোঙচৎ অমদা মে ১৬-মে ১৭,২০২৬ দা নেদরলেন্দসদা চৎখ্রে। হন্দক্কী খোঙচৎ অসি প্রধান মন্ত্রী মোদীনা নেদরলেন্দসদা চৎপা অনিশুবনি।

মে ১৬ গী অয়ুক্ত, লৈবাক অনিগী মীফম অমগীদমক হগতা লৈবা রোয়েল পেলেস হুইজ তেন বোসতা নেদরলেন্দসগী নিংথৌ ৱিলেম অলেকজেন্দর অমসুং মহারানী মেক্সিমানা প্রধান মন্ত্রী তরাম্না ওকখি। মখোয়না প্রধান মন্ত্রীগীদমক চাক্লেন অমা শীনখি।

প্রধান মন্ত্রী জেত্তেন অমসুং প্রধান মন্ত্রী মোদী অকক্নবা ওইনা অমসুং মীহুৎ কাংবুগী থাকশিংদা উনখি, তুংদা মে ১৬ দা চাক্লেন অমা চামিন্নখি। মতম শাংলবা অমসুং পুৱারি ওইরবা ললোন-ইতিক্কী মরীশিং, অচেৎপা মীগা-মীগা লৈনবা মরীশিং অমসুং লৈবাক অনিগী মরক্ত লৈনরিবা অফবা মরীশিং প্রধান মন্ত্রী অনিমক্না নিংশিংখি অমসুং মাইথোঙ য়াম্বা মরী অসি মখা তানা ফগৎহন্নিংবগী মখোয়গী অপাম্বা ফোঙদোকখি। রাজনিতিগী অৱাংবা থাক অমসুং ২০২৩ দা ভারতনা জি-২০গী প্রসিদেন্ত ওইরিঙৈ মনুংদা মতেং পাংনখিবা অমসুং ফেব্রুৱারি ২০২৬ দা ন্যু দিল্লিদা পাংথোকখিবা এ.আই ইম্পেক্ত সম্মিৎকী খুৎথাং য়াওনা চহি খর অসিদা হিরম কয়াদা মতেং পাংনবা খুমাঙ চাউশিনবদা লুচিংবা অনিনা অপেনবা ফোঙদোকখি।

ভারত অমসুং নেদরলেন্দসকী মরী ‘ষ্ট্রাতেজিক পার্তনরশিপ’ অমদা পুখৎনবা লুচিংবা অনিনা ৱারেপ লৌরে। হিরম অসিদা, ষ্ট্রাতেজিক পার্তনরশিপ রোদমেপ অমা চৎনবদা মখোয়না তরাম্না ওকখি, রাজনিতি, ললোন-ইতিক অমসুং শেন থাদবা, দিফেন্স অমসুং সেকুরিতি, সাইবর সেকুরিতি, মরুওইবা অমসুং সেমিকন্দক্তরশিং, স্পেস, এ.আই অমসুং ক্বান্তম সিষ্টেম য়াওনা মরুওইবা অমসুং নৌনা থোক্লকপা তেক্নোলোজিশিং, সাইন্স অমসুং ইন্নোবেসন, ষ্টেনেবিলিতি, হকশেল, তুংকোইনা চৎনবা য়াবা লৌউ-শিংউ অমসুং চীঞ্জাক পুথোকপগী থবকশিং, ঈশিংগী থবক, অইং-অশাগী খল হোংলকপা অমসুং ইনর্জিগী অওনবা, ষ্টেনেবল ত্রান্সপোর্ত, মেরিতাইম, লাইরিক-লাইশু, নাৎ অমসুং মীগা-মীগা লৈনবা মরীশিং য়াওনা হিরম কয়াদা মতেং পাংন্নবা থবক তৌমিন্নবদা নাকল অনিমক্না য়ানরে। থৌশিল শেম্বগী মতাংদা পীথোক-পীশিন তৌনবদসু নাকল অনিনা য়ানরে।

দিফেন্স, সেমিকন্দক্তরশিং অমসুং মরী লৈনবা অনৌবা তেক্নোলোজিশিং, দিজিতেল অমসুং সাইবরস্পেসদা মতেং পাংনবা হেনগৎহনবা, হিদাক-লাংথকশিং অমসুং মেদিকেলগী খুৎলায়শিংদা পুন্না থবক তৌমিন্নবা, অপুনবা ত্রেদ অমসুং ইনভেষ্টমেন্ত কম্মিতি অমা লিংখৎপা অমসুং লোথাল অমসুং অমষ্টরদামদা মেরিতিমা ম্যুজিয়মশিংগী মরক্ত মতেং পাংনবা য়াওনা তোঙান তোঙানবা মরুওইবা হিরমশিংদা ২০২৫ দা এগ্রিমেন্তশিং লৈনখিবদা লুচিংবা অনিমক্না তরাম্না ওকখ্রে।

গনতন্ত্র, মীওইবগী হকশিং, মালেমগী শান্তি অমসুং সেকুরিতি অমসুং য়ু.এন চার্তরগী পান্দমশিং অমসুং ফিদমশিংগা লোয়ননা নিয়মদা য়ুম্ফম ওইবা মালেমগী চৎন-কাংলোন য়াওনা মান্নবা গুনশিং অমসুং অচুম্বা ফিদমশিং ঙাক্না চৎনবা লুচিংবা অনিনা মখোয়গী থাজবা ফোঙদোক্নখি। হৌজিক ওইরিবা ফিবমশিং মমি তানবা য়ু.এন সেকুরিতি কাউন্সিলগী লেংদ্রবা অমসুং নন-পর্মনেন্ত মেম্বর ওইবা পাকথোক-চাউথোকপা য়াওনা মালেমগী লুপশিং অমুক হন্না শেমদোকপা অমসুং ফগৎহনবগী মরুওইবা লুচিংবা অনিনা খন্নখি অমসুং অকক্নবা মতমগী মনুংদা তেক্সতা য়ুম্ফম ওইদুনা ৱারি শান্নবা তকশিনখি। অওনবা পুরক্লবা অমসুং পাকথোক-চাউথোক্লবা য়ু.এন সেকুরিতি কাউন্সিল অমদা ভারতনা লেংদ্রবা মেম্বর অমা ওইবদা দচনা মখা তানা শৌগৎপদা প্রধান মন্ত্রী মোদীনা প্রধান মন্ত্রী জেত্তেন থাগৎপা ফোঙদোকখি।

ইন্দিয়া-ই.য়ু ষ্ট্রাতেজিক পার্তনরশিপ মখা তানা ফগৎহন্নবা লুচিংবা অনিনা অমুক হন্না ফোঙদোকখ্রে অমসুং নাকল অনিমক কান্নবা ফংবা ইন্দিয়া-ই.য়ু ফ্রি ত্রেদ এগ্রিমেন্ত অমগী ৱারি শানবা চহি অসিগী জনুৱারিদা লোইশিনখিবদা তরাম্না ওকখি। মালেমগী মুক্নবশিং অমসুং মালেমগী শেন-থুমগী খুদোংচাদবশিংগী মতম অমদা, মালেমগী অনিশুবা অমসুং মরিশুবা খ্বাইদগী চাউবা ইকোনোমিশিংগী মরক্ত ফ্রি ত্রেদ এগ্রিমেন্ত অসিনা রাজনিতি অমসুং শেন-থুমগী মরীশিং ফগৎহনগনি হায়না মখোয়না য়ানরে অমসুং শেন-থুমগী থবকশিং হাংদোকপা অমসুং নিয়মশিংদা য়ুম্ফম ওইবা ললোন-ইতিক্কী থবকশিংদা অপুনবা থাজবা ফোঙদোক্নখি। ই.য়ু অমসুং ভারতকী ৱারি শানবা অমসুং সেকুরিতি অমসুং দিফেন্সকী মতেং পাংনবা মপাঙ্গল কনখৎহনগদবা সেকুরিতি অমসুং দিফেন্স পার্তনরশিপকী খুৎয়েক পীনবদা লুচিংবশিংনা তরাম্না ওকখ্রে অমসুং মেরিতাইম সেকুরিতি, সাইবর, তেরোরিজম থেংনবা অমসুং দিফেন্স ইন্দষ্ট্রিগী পুন্না থবক তৌমিন্নবগুম্বা হিরমশিংদা অফবা ফলশিং ফংলে।

মালেমগী আইন, মনিংতম্বা অমসুং ঙমখৈগী অপুনবগী ইকায়খুম্নবা, জহাজ হোনবগী মনিংতম্বা লৈবা অমসুং মুক্নবা লৈতবদা য়ুম্ফম ওইবা, মনিংতম্বা, অথিংবা লৈতবা, অশোই-অঙাম থোক্তবা অমসুং শান্তি লৈবা ইন্দো-পেসিফিক অমগী মরুওইবা লুচিংবশিংনা য়ানখি। ইন্দো-পেসিফিক্ত ই.য়ুগী লাল্লোংন নিংশিংলদুনা, ইন্দো-পেসিফিক ওসিন্স ইনিসিয়েতিপ (আই পি ও আই) দা শরুক অনবা অমসুং জর্মনি অমসুং য়ুরোপিয়ান য়ুনিয়নগা লোয়ননা কেপাসিতি বিল্দিং অমসুং রিছোর্স শরুক য়ামিন্নবদা লমজিংনবা ৱারেপশিং প্রধান মন্ত্রী জেত্তেন্না লাউথোক্লে।

হৌজিক য়ুক্রেন্দা মখা তানা লাল চৎথবদগী মীওই কয়া অৱাবা নংহল্লিবা অমসুং মালেমগী অৱাবা কয়া থোকহল্লিবা অসিদা লৈবাক অনিমক্না নুঙনাংবা ফোঙদোকখি। য়ু.এন চার্তর অমসুং মালেমগী আইনশিংদা য়ুম্ফম ওইদুনা, ৱারি শানদুনা অমসুং কুতনিতিগী খুৎথাংদা য়ুক্রেন্দা তুংকোইবা শান্তি পুরক্নবা থবকশিং মখা তানা শৌগৎপদা লুচিংবা অনিমক্না য়ানরে।

নোংচুপ এসিয়াগী ফিবমদা লুচিংবা অনিমক্না নুঙনাংবা ফোঙদোকখ্রে অমসুং মীওইবগী অৱাবা অমসুং মালেমগী ইনর্জি ফংহনবা অমসুং ললোন-ইতিক্কী থবকশিংদা অপনবা পীবা য়াওনা লদম অসিগী অমসুং মালেম শীনবা থুংবগী তমথিরবা খুদোংচাদবশিং খন্নখি। এপ্রিল ৮, ২০২৬ দা নোংমৈ কাপ্পা লেপ্নবা লাউথোকখিবদা লুচিংবশিংনা তরাম্না ওকখি। মুক্না হন্থহনবা অমসুং ৱারি শানবা অমসুং কুতিনিতিগী মরুওইবা মখোয়না খন্নখি অমসুং নোংচুপ এসিয়াদা তুংকোইনা শান্তি পুরকপদা থাজবা ফোঙদোকখি। ষ্ট্রেদ ওফ হোর্মুজ ফাওরগা নিংতম্না জহাজ হোন্নবা অমসুং মালেমগী ললোন-ইতিক পাংথোক্নবা মখোয়না তকশিনখি অমসুং হিরম অসিগী মতাংদা হৌজিক পায়খৎলিবা থবকশিং মখোয়না শৌগৎপা অমুক হন্না ফোঙদোকখি।

শেন-থুম, ললোন-ইতিক অমসুং শেন থাদবগী মতেং পাংনবা

তুংকোইবা, অনৌবা অমসুং মতম শাংনা চাউখৎপনা লমজিংদুনা নেদরলেন্দস-ইন্দিয়া ইকোনোমিক পার্তনরশিপ মতেং পাংনবগী নমুনা অমা ওইরে, মসিনা লৈবাক অনিমক কান্নবা পীরে হায়না লুচিংবা অনিমক্না ফোঙদোকখ্রে। ফবা সপ্লাই চেনশিং অমসুং ওপন মার্কেতশিংনা মতেং পাংদুনা, লৈবাক অনিগী মরক্ত ললোন-ইতিক চাউখৎলকপদা মখোয়না তরাম্না ওকখি। নেদরলেন্দসগী মালেম থাক্কী লোজিষ্টিক্স নেতৱার্ক লৈবগা লোয়ননা মসিগী রোত্তরদাম হিথাংফম শীজিন্নবা য়াওনা, ভারতনা য়ুরোপতা থাদোক্নবা মরুওইবা থোঙ্গাল অমা ওইনা থবক তৌরি অমসুং ভারতনা দচ কম্পেনিশিংনা পাক-চাউরবা অমসুং অফবা কৈথেল অমা ফংহল্লি অমসুং মসিনা অফবা ললোন-ইতিক্কী খুদোংচাবা পীরে। মসিগা লোয়ননা, ভারতকী ললোন-ইতিকশিংনা ঈশিংগী থবকশিং, লৌউ-শিংউ অমসুং স্মার্দ সিতিশিংদা অৱাংবা থাক্কী দচগী লৌশিং শীজিন্নবা ঙম্লে।

হৌজিক লৈবাক অনিগী মরক্ত শেন-থুমগী মতেং পাংনরিবা অসিদা অপেনবা ফোঙদোক্লদুনা, ইন্দিয়া-ই.য়ু ফ্রিদ ত্রেদ এগ্রিমেন্তদগী ফংলিবা কান্নবশিং লৌদুনা মখা তানা চাউখৎনবা খুদোংচাবা মরাংকাইনা লৈরিবা অসি লুচিংবশিংনা খন্নখি। নেদরলেন্দস মখা তানা ভারতকী মরুওইবা ললোন-ইতিক অমসুং শেন থাদবগী মরুপ অমা ওইগনি অমসুং মসিদা লৈবাক অনিগী শেন-থুমগী অচেৎপা মরীগী মমি তারে।

মখা তানা ললোন-ইতিক অমসুং শেন থাদবা পাংথোক্নবা, কষ্টমসকী থবকশিংদা নাকল অনিমক মতেং পাংন্নবা এগ্রিমেন্ত খুৎয়েক পীনবদা প্রধান মন্ত্রীশিংনা তরাম্না ওকখ্রে,মসিনা লৈবাকশিংগী কষ্টমস ওথোরিতিশিংগী মরক্ত ই-পাউ পীনবা ঙমহনগনি অমসুং কষ্টমসকী থবকশিং পায়খৎপা হেনগৎহনবদা মতেং পাংগনি অমসুং ভারত অমসুং নেদরলেন্দসকী মরক্ত আইন্না য়াবা ললোন-ইতিক পাংথোকহনগনি।

ইন্দিয়া-নেদরলেন্দস জোইন্ত ত্রেদ এন্দ ইনভেষ্টমেন্ত কম্মিতি অমসুং ফাষ্ট ত্রেক মেকানিজম অমসুং অতোপ্পা থবকশিংগী খুৎথাংদা লৈবাক অনিগী ললোন-ইতিক অমসুং শেন থাদবা মখা তানা ফগৎহন্নবা লুচিংবশিংনা ফোঙদোকখ্রে। তুংকোইনা চাউখৎনবা, থবক পীনবা অমসুং অফবা ভেলু চেনশিং লৈহন্নবা শেন থাদবা হেনগৎহন্নবা অমসুং অনৌবা থবকশিং ফগৎহন্নবা মখোয়না য়ানরে।

ষ্টার্দঅপশিং অমসুং ইন্নোবেসন্দা মতেং পাংনবগী মতাংদা লৈরিবা খুদোংচাবশিং প্রধান মন্ত্রী অনিনা খন্নখি অমসুং ভারত অমসুং নেদরলেন্দসদা পুথোকপা পাম্বৈশিংনা ভারত অমসুং ই.য়ুগী কৈথেলশিং য়াওনা মালেম শীনবা থুংনা য়ৌবা য়াগনি হায়না ফোঙদোকখি। মখা তানা লৈবাক অনিগী ষ্টার্দঅপকী থবকশিং শম্নহনবা, পীথোক-পীশিন তৌনবা অমসুং দিজিতেল সোফ-লেন্দিংগী থৌরমশিং খঙদোকপা অমসুং ত্রেদ মিসনশিং, ইন্নোবেসন মিসনশিং অমসুং তেক্নোলোজি সম্মিৎশিংদা শরুক য়াবা হেনগৎহনবা হায়না মখোয়না য়ানরে।

দিফেন্স অমসুং সেকুরিতিগী মতেং পাংনবা

দিফেন্স কোওপরেসন্দা লেত্তর ওফ ইন্তেন্ত খুৎয়েক পীনবদা লুচিংবা অনিমক্না তরাম্না ওকখ্রে অমসুং ই-পাউ পীথোক-পীশিন, খোঙচৎশিং, থিজিনবা, ইন্নোবেসন অমসুং ত্রেনিংগী থবকশিং পাংথোক্নবা, লৈবাকশিংগী দিফেন্স মিনিষ্ট্রিশিং অমসুং ষ্টাফ লেভেলগী মরক্ত চাংনাইনা ৱারি শানবগী খুৎথাংদা লৈবাক অনিগী মরক্ত দিফেন্সকী মতেং পাংনবা হেনগৎহনবগী মরুওইবা খন্নখ্রে। লৈবাক অনিগী মরক্ত ইন্দষ্ট্রিয়েল কোওপরেসন মখা তানা পাকথোক-চাউথোকহনবা হায়নসু মখোয়না য়ানরে। ন

ই.য়ুগী থবকশিংগী মখাদা অমসুং অতোপ্পা লৈবাকশিংগা লোয়ননা, দিফেন্সকী লমদা মতেং পাংনবা হেনগৎহনবা হায়না মখোয় য়ানরে অমসুং দিফেন্স ইন্দষ্ট্রিয়েল রোদমেপ অমা লিংখৎনবা খুদোংচাবশিং খঙদোক্কনি, মসিনা দিফেন্সকী খুৎলায়শিং অমসুং মচাকশিং শানবা অমসুং তেক্নোলোজি পীথোক-পীশিন তৌন্নবা অমসুং লৈবাক অনিমক্কী আর্মদ ফোর্সশিংগী দরকার ওইবশিং ফংনবা পুন্না পুথোকমিন্ননবা জোইন্ত ভেঞ্চরশিং লিংখৎনবা মতেং পাংনগনি।

দিফেন্স, মেরিতাইম সেকুরিতি, ইকোনোমিক সেকুরিতি, মরুওইবা তেক্নোলোজিশিং, সাইবর সেকুরিতি, তেরোরিজম থেংনবা অমসুং মালেমগী সেকুরিতিগী লৈবাক অনিমক্না য়ানরবা ৱাফমশিং য়াওনা, মমাংঙৈগী অমসুং অনৌবা দিফেন্সকী ৱাফমশিংদা লৈবাক অনিমক্কী নেসনেল সেকুরিতি এপ্পারেতসকী মরক্ত চাংনাইনা চৎথোক-চৎশিন তৌনবা য়াওনা, সেকুরিতিগী মতেং পাংনবা মখা তানা হেনগৎহনবা হায়না লুচিংবশিং য়ানরে।

মনিংতম্বা, অথিংবা লৈতবা অমসুং অশোই-অঙাম য়াওদবা সাইবরস্পেস অমা লৈনবা লৈবাক অনিগী মরক্ত মখা তানা মতেং পাংনবা হেনগৎহন্নবা পাম্বৈ ওইনা, লৈবাক অনিগী চহিগী সাইবরগী খন্ন-নৈনবশিং অমসুং ৮শুবা ওনলাইন সাইবর স্কুল পাংথোকপদা লুচিংবা অনিমক্না অপেনবা ফোঙদোকখ্রে। মালেমগী লুপশিংদা পুন্না থবক তৌমিন্নবা অমসুং কেপাসিতি বিল্দিং অমসুং লৌশিং পীথোক-পীশিন তৌনবগী খুৎথাংদা সাইবরগী কিহনবশিং অমসুং সাইবরক্রাইম থেংন্নবা অপুনবা থবকশিং য়াওনা, সাইবরস্পেসতা পুন্না থবক তৌমিন্নবা হেনগৎহন্নবা লেত্তর ওফ ইন্তেন্ত খুৎয়েক পীনবদা লুচিংবশিংনা তরাম্না ওকখ্রে।

মনিংতম্বা, অথিংবা লৈতবা, অশোই-অঙাম য়াওদবা, তুংদু-লৈতাবা, লাইনা ফংবা য়াবা অমসুং শান্তি লৈবা আই.সি.তিগী ফিবম অমগী মরুওইবা লুচিংবা অনিমক্না খন্নখি, মসি ইন্নোবেসন অমসুং শেন-থুম চাউখৎহনবা ঙমগনি। হিরম অসিগী মতাংদা, ন্যু দিল্লিদা ফেব্রুৱারি ১৯ দা পাংথোকখিবা এ.আই ইম্পেক্ত সম্মিত্ত শরুক য়াবগীদমক প্রধান মন্ত্রী মোদীনা নেদরলেন্দস থাগৎপা ফোঙদোকখি।

এপ্রিল ২০২৫ দা জম্মু অমসুং কাস্মিরগী পাহালগামদা মীচম মীয়ামদা তেরোরিষ্টশিংনা লান্দারকখিবা থৌদোক অদু প্রধান মন্ত্রী জেত্তেন্না য়াম্না কন্না য়ানিংদবা ফোঙদোকখি অমসুং ঙমখৈ ৱাংমদগী চৎথরকপা তেরোরিজম য়াওনা, তেরোরিজমগী মায়োক্ত ভারতনা থেংনরিবা অসিদা নেদরলেন্দসনা শৌগৎপা ফোঙদোকখি অমসুং মরাল লৈবশিং চৈরাক পীনবা লুচিংবা অনিনা তকশিনখি। প্রধান মন্ত্রী অনিনা মখল খুদিংমক্কী তেরোরিজক অমতা ওইনা য়ানিংদবা ফোঙদোকখি। তেরোরিজম তুমিন্না খাংদুনা লৈথোক্তনবা মখোয়না তকশিনখি অমসুং তেরোরিজম থেংনবদা মমাই অনি লোংবা মখোয়না য়াখিদে।

য়ু.এন অমসুং এফ.এ.তি.এফ য়াওনা, লৈবাক অনিগী অমসুং মালেমগী লুপশিংগী থবকশিংগী খুৎথাংদা অপুনবা অমসুং তুংকোইবা মওং অমদা তেরোরিজম লাকশিনবগী দরকার ওইবা অদু লুচিংবা অনিনা অমুক হন্না ফোঙদোকখ্রে। য়ু.এন.এস.সি ১২৬৭ সেঙ্কসন কম্মিতিনা অথিংবা থমদ্রবা লুপশিং অমসুং মখোয়গী প্রোক্সিশিং, শৌগৎপশিং অমসুং শেন থাদবশিং য়াওনা, তেরোরিষ্টশিং অমসুং তেরোরিষ্ট কাংবুশিংগী মথক্ত অকনবা থবক পায়খৎনবা মখোয়না তকশিনখ্রে। মালেমগী আইন মতুংইন্না, তেরোরিষ্ট নেতৱার্কশিং অমসুং মখোয়দা শেন থাদবা অপনবা পীনবা অমসুং তেরোরিজম পাংথোক্লিবা অথুবা মতমদা অচুম্বা ৱায়েল ফংহন্নবা অমসুং তেরোরিষ্টকী চঙজফমশিং অমসুং ইনফ্রাষ্ট্রকচর মুৎথৎনবা মখা তানা লৈবাকশিং পুন্না থবক তৌমিন্ননবা নাকল অনিমক্না তকশিনখ্রে। য়ু.এন কমপ্রেহেন্সিপ কনভেন্সন ওন ইন্তরনেসনেল তেরোরিজম (সি সি আই তি) অমা লিংখৎনবা ভারতনা পায়খৎলিবা থবকশিং প্রধান মন্ত্রী জেত্তেন্না শৌগৎখ্রে।

য়ু.ভি.এসশিং, তেরোরিষ্টশিং অমসুং মখোয়গী লুপশিংনা ভর্চুএল এসেতশিং শীজিন্নবা অমসুং রেদিকেলাইজেসনগীদমক ই-পাউ অমসুং কম্মুনিকেসনগী তেক্নোলোজিশিং লান্না শীজিন্নবগুম্বা অনৌবা তেক্নোলোজিশিং শীজিন্নবগী অকিবশিং হেনগৎলক্লিবা অসি লুচিংবা অনিনা খন্নখ্রে।

তেরোরিজম থেংন্নবা অমসুং হিরম অসিগী মতাংদা মালেমগী মতেং পাংনবগী থবক ফগৎনবা, এন্তি-মনি লাউন্দরিং অমসুং তেরোরিজমদা শেন থাদবা লৈবাকশিংনা থিংনবা মালেমগী চৎন-কাংলোনশিং ঙাক্না চৎপগী মরুওইবা লুচিংবা অনিনা ফোঙদোকখ্রে।

নৌনা থোক্লকপা তেক্নোলোজিশিং, ইন্নোবেসন, সাইন্স অমসুং লাইরিক-লাইশু

সেমিকন্দক্তরশিং অমসুং মরী লৈনবা অনৌবা তেক্নোলোজিদা পুন্না থবক তৌমিন্ননবা এম,ও.য়ু অমা খুৎয়েক পীনবদা লুচিংবা অনিনা তরাম্না ওকখ্রে, মসিনা শেন থাদবা, থিজিনবা অমসুং লৌশিং পীথোক-পীশিন তৌনবা য়াওনা সেমিকন্দক্তরশিংদা মতেং পাংনবা হেনগৎহন্নবা ঙাক্লৌ পীরে।

সাইন্স, তেক্নোলোজি অমসুং ইন্নোবেসনদা হান্না থবক তৌরিবা অপুনবা ৱার্কিং গ্রুপকী খুৎথাংদা, পব্লিক-প্রাইভেৎ পার্তনরশিপশিং লিংখৎনবা অমসুং সরকারশিং, ললোন-ইতিকশিং অমসুং মহৈলোয়শঙশিং শম্ননবা, সাইন্স, তেক্নোলোজি অমসুং ইন্নোবেসনদা হৌজিক মতেং পাংনরিবা অসিদা লুচিংবশিংনা তরাম্না ওকখ্রে, মসিনা লৈবাক অনি চাংনাইনা ৱারি শানবগী খুৎথাংদা, অপুনবা আর অমসুং দিগী প্রোজেকশিং, হৈশিংবা মীওইশিং চৎথোক-চৎশিন তৌবা অমসুং তেক্নোলোজি পীনবা ঙমহনগনি। হৌখিবা চহিশিংদা পুন্না হৌদোকখিবা অচৌবা থিজিনবা অমসুং ইন্নোবেসনগী থৌরম ৫০ লুচিংবশিংনা খঙখি অমসুং খুন্নাইগী খুদোংচাদবশিং কোকহন্নবা পান্দম থম্লিবা তেক্নোলোজিশিংগী লমদা মখা তানা মতেং পাংনবগী মরুওইবা হেনগৎলক্লিবা অদু ফোঙদোকখি।

পুন্না থবক তৌমিন্নবা, তেক্নোলোজি অমসুং হৈশিংবা মীওই শেমগৎপগী খুৎথাংদা, উদ্যোগশিং, ষ্টার্দঅপশিং, স্কেল-অপশিং, এস.এম.ইশিং অমসুং মখোয়গী সপ্লাইয়ারশিং য়াওনা, সেমিকন্দক্তর সেক্তর ফগৎনবা পান্দম থম্লিবা, দচ সেমিকোন কম্পিতেন্স সেন্তর অমসুং ইন্দিয়ান সেমিকন্দক্তর মিসন(আই এস এম) শম্ননবা থবক লুচিংবশিংনা তরাম্না ওকখ্রে। ইন্দো-দচ সেমিকোন ওনলাইন স্কুল অমসুং মথংগী তাঙ্কক মখা চৎথরকপদা প্রধান মন্ত্রী অনিনা অপেনবা ফোঙদোকখ্রে।

এন.এক্স.পি, এ.এস.এম.এল, তাতা অমসুং সি.জি সেমিগা পুন্না থবক তৌমিন্নদুনা, সেমিকন্দক্তরশিং অমসুং মরী লৈনবা তেক্নোলোজিশিংদা ব্রেন ব্রিজ অমা শেম্নবা, আইনধোবেন য়ুনিভর্সিতি ওফ তেক্নোলোজি অমসুং য়ুনিভর্সিতি ওফ ত্বেন্তে অমসুং ভারতকী মরুওইবা তেক্নিকেল ইন্সতিতুৎশিং (আই.আই.এস.সি বেঙ্গালুরু, আই.আই.তি বোম্বে, আই.আই.তি দিল্লি, আই.আই.তি গান্ধীনগর, আই.আই.তি গুৱাহাতি অমসুং আই.আই.তি মাদ্রাস) গী মরক্ত মেমোরেন্দম ওফ কোওপরেসন অমা খুৎয়েক পীনবদা লুচিংবশিংনা তরাম্না ওকখ্রে।

মখা তানা অনৌবা থবক পাংথোকপদা ক্রিতিকেল মিনরেলশিংগী মরুওইবা অফবা সপ্লাই চেনশিং শেমগৎনবা মালেমগী পুন্না থবক তৌমিন্নবগী দরকার ওইবা খঙলদুনা, থিবা, থিজিনবা অমসুং ইন্নোবেসন, ভেলুন চেনশিং পুনশিনবা, সপ্লাই চেন, সর্কুলারিতি অমসুং ই.এস.জি ষ্টেন্দার্দশিং অমসুং মরী লৈনবা এসেসমেন্তশিং য়াওনা, ক্রিতিকেল মিনরেল ভেলু চেন শীনবা থুংনা মতেং পাংনবা হেনগৎহন্নবগী লৈবাক অনিগী অপাম্বা লুচিংবা অনিনা ফোঙদোকখ্রে। হিরম অসিদা, ক্রিতিকেল মিনরেলশিংদা এম.ও.য়ু অমা খুৎয়েক পীনবদা লুচিংবশিংনা তরাম্না ওকখ্রে।

লৈবাক অনিগী লাইরিক-লাইশুগী মরুওইবশিং অমসুং দরকার ওইবশিংগী মতুংইন্না, লৈবাক অনিগী অৱাংবা থাক্কী মহৈলোয়শঙশিংগী মরক্ত মতেং পাংনবা য়োকখৎনবা ভারতকী ইজুকেসন মিনিষ্ট্রি অমসুং নেদরলেন্দসকী ইজুকেসন, কলচর অমসুং সাইন্স মিনিষ্ট্রিগী মরক্ত অৱাংবা থাক্কী ইজুকেসনগী এম.ও.য়ু অমা খুৎয়েক পীনবদা লুচিংবা অনিনা তরাম্না ওকখ্রে।

হন্দক ভারত অমসুং দচ য়ুনিভর্সিতিশিংগী মরক্ত, খুদম ওইনা: গ্রোনিনজেন য়ুনিভর্সিতি অমসুং নালান্দা য়ুনিভর্সিতি; দেল্ফ য়ুনিভর্সিতি ওফ তেক্নোলোজি অমসুং মুম্বাই মেত্রোপোলিতান রিজনেল দিবলপমেন্ত ওথোরিতি; সর্ভে ওফ ইন্দিয়া অমসুং আই.তি.সি, য়ুনিভর্সিতি ওফ ত্বেন্তে; রিজে য়ুনিভর্সিতি অমষ্টরদাম অমসুং আই.আই.তি রুরকিগী মতেং পাংনবদা লুচিংবশিংনা অপেনবা ফোঙদোকখ্রে। লাইরিক-লাইশু অমসুং সাইন্সকী লমদা পুন্না থবক তৌমিন্নবা মখা তানা ফগৎহনবদা ইন্দো-দচ ইজুকেসন এন্দ একাদেমিক নেতৱার্কগুম্বা মফমশিংনা মরুওইবা থৌদাং অমা লৌবা ঙমগনি হায়না প্রধান মন্ত্রী অনিমক্না ফোঙদোকখ্রে। 

অইং-অশাগী খল হোংলকপা, ফুদ সেকুরিতি অমসুং নুংশিৎ শেংহনবা য়াওনা খুন্নাইগী খুদোংচাদবশিং কোকহন্নবা স্পেসতা য়ুম্ফম ওইবা এপ্লিকেসনশিং শীজিন্নদুনা হৌজিক ভারত অমসুং নেদরলেন্দসকী মরক্ত স্পেসকী পুন্না থবক তৌমিন্নরিবা অসিদা লুচিংবশিংনা থাগৎপা ফোঙদোকখ্রে।

ইনর্জি সেকুরিতি অমসুং অওনবা / সর্কুলার ইকোনোমি

ভারতনা জি-২০গী প্রসিদেন্ত ওইরিঙৈ মনুংদা হৌদোকখিবা গ্লোবেল বাইওফ্যুএল এল্লাইন্স শরুক য়াবগীদমক প্রধান মন্ত্রী মোদীনা নেদরলেন্দস থাগৎপা ফোঙদোকখ্রে। বাইও-ইকোনোমিদা থবক তৌনবা প্রধান মন্ত্রী অনিনা অমুক হন্না থাজবা পীনখ্রে অমসুং ভারত অমসুং নেদরলেন্সনা পুন্না চিয়ার লৌমিন্নবা বাইওরিফাইনরিশিংগী মিসন ইন্নোবেসন প্রোগ্রাম মাইপাক্লে।

‘ৱেষ্ট তু ভেলু’ দা হৌজিক মতেং পাংনরিবা অসি থাগৎলদুনা, দচ নেসনেল সর্কুলার ইকোনোমি প্রোগ্রাম ২০২৩-৩০ গী ২০২৫ গী অনৌবা থবক লুচিংবশিংনা খঙলে অমসুং ৱার্ল্দ সর্কুলার ইকোনোমি ফোরম ২০২৬ দা ভারতনা প্রসিদেন্ত ওইবা অসিনা অনৌবা হিরমশিংদা পুন্না থবক তৌমিন্নবা হেনগৎহন্নবা খুদোংচাবা পীরগনি।

মসিগী মনুংদা ইন্দষ্ট্রিয়েল সর্কুলারিতি, পাইলোত অমসুং স্কেলেবল প্রোজেকশিংদা তেক্নোলোজি শীজিন্নদুনা সহরশিংদা মপং অমসুং মহিগী অমোৎপা লোইশিনবা, ললোন-ইতিক অমসুং শেন থাদবা ফগৎনবা খুদোংচাবশিং, অনৌবা থবক পায়খৎপা য়াওরি, অসিগুম্বা থবকশিং অসি রিছোর্স ইফিসিয়েন্সি এন্দ সর্কুলার ইকোনোমি ইন্দষ্ট্রি কোলিএসন (আর ই সি ই সি) শরুক য়ানবা দচ কম্পেনিশিং চেপাউ পীদুনা বি২বিগী মখাদা পাংথোক্কনি। মোবিলিতিগী লমদা, স্মার্দ অমসুং ইন্তর ওপরেবল চার্জিং ইনফ্রাষ্ট্রকচর, বেত্তরি তেক্নোলোজি অমসুং সিষ্টেম ইন্তিগ্রেসন, ষ্টেন্দার্দগী থবক অমসুং ওপন প্রোতোগোলসিং, হেভি অমসুং মেদিয়ম-হেভি জিরো-ইমিসন গারিশিং, স্মার্দ মোবিলিতি সিষ্টেমশিং অমসুং মল্তিমোদাল পুনশিনবা অমসুং অতোপ্পা মখলগী থাউশিং শীজিন্নবগুম্বা হিরমশিংদা মতেং পাংনবা হেনগৎহনবা য়াই।

ভারত অমসুং নেদরলেন্দসগী মরক্ত রিন্যুএবল ইনর্জিগী লমদা পুন্না থবক তৌমিন্নবা মখা তানা ফগৎনবা রিন্যুএল ইনর্জিগী এম.ও.য়ুগী মখাদা জোইন্ত ৱার্কিং গ্রুপ অমা লিংখৎপদা লুচিংবা অনিনা তরাম্না ওকখ্রে,মসিনা সোলার ইনর্জিগী অনৌবা থবক, গ্রিন হায়দ্রোজেন, ষ্টোরেজ অমসুং রিন্যুএবল ইনর্জি সেক্তরদা শেন থাদবা য়াওনা, রিন্যুএবল ইনর্জিদা মতেং পাংন্নবা খুদোংচাবা পীরে।

রিন্যুএবল ইনর্জিদা লম্বী অনিদা শেন থাদবা অমসুং মতেং পাংনবা মখা তানা ফগৎনবা, গ্রিন হায়দ্রোজেন চাউখৎনবা ইন্দিয়া-নেদরলেন্দস রোদমেপ লুচিংবশিংনা হৌদোক্লে। গ্রিন হায়দ্রোজেন শীজিন্নবা অমসুং মপান্দা থাদোকপগী অমসুং পূথোকপদা রোদমেপ অসিনা ভারতকী মতেং পাংগনি অমসুং লৈবাক অনিমক্ত গ্রিন হায়দ্রোজেন য়াংনা শীজিন্নবদা মতেং পাংগনি।

মসিগী মথক্ত, নিতি অয়োগ অমসুং নেদরলেন্দসকী মরক্ত ইনর্জি ত্রান্সিসনগী কেপাসিতি বিল্দিংদা ইন্তেন্তগী জোইন্ত ষ্টেৎমেন্ত অসিনা ইনর্জি সেকুরিতি অমসুং ত্রান্সিসনগী হিরমশিংদা মখা তানা পুন্না থবক তৌমিন্নবা ঙমহনগনি।

লাইরিক লাইশুগী মতেং পাংনবা হেনগৎহন্নবা য়ুনিভর্সিতি ওফ গ্রোনিনজেন অমসুং ভারতকী আই.আই.তি ১৯ গী মরক্ত এম.ও.য়ু খুৎয়েক পীনবদা লুচিংবশিংনা তরাম্না ওকখ্রে। ভারতকী সাইন্স অমসুং তেক্নোলোজি দিপার্তমেন্ত অমসুং য়ুনিভর্সিতি ওফ গ্রোনিনজেনগী মরক্ত হায়দ্রোজেনগী পি.ঐচ.দি ফেল্লোসিপ প্রোগ্রাম অমা হৌদোকপদা মখোয়না তরাম্না ওকখ্রে।

ঈশিংগী ফংহনবগী থবক

ঈশিংগা মরী লৈনবা ভারতকী দরকার ওইবশিং অমসুং লৌশিং অমসুং নেদরলেন্দসগী খঙবা-হৈবগী মরক্ত পুন্না থবক তৌমিন্নদুনা ঈশিংগী ষ্ট্রাতেজিক পার্তনরশিপকী মখাদা খুমাঙচাউশিনবদা লুচিংবশিংনা থাগৎখ্রে। নামামি গঙ্গা মিসন, অর্বান রিভর মেনেজমেন্ত প্লানশিংগী মখাদা শহরগী ঈশিং ফংহনবগী থবক, দেলতা মেনেজমেন্ত, অফবা ঈশিং ফংহন্নবা থবক, ফত্তবা ঈশিং অমুক হন্না শীজিন্নবা অমসুং ঈশিংগী অনৌবা তেক্নোলোজিশিং শীজিন্নবা য়াওনা, ঈশিং অমসুং তুরেলগী লমদা পুন্না থবকশিং পায়খৎপদা প্রধান মন্ত্রী অনিনা থাগৎপা ফোঙদোকখ্রে। সেনিতেসন ফজনা য়েংশিন্নবা অমসুং মীওই খুদিংমক অফবা ঈশিং ফংহনবগী মরুওইবা লুচিংবশিংনা ফোঙদোকখি অমসুং ভারতকী শ্বাচ্ছ ভারত মিসনগী পান্দমশিংগা লোয়ননা, মালেমগী ওইনা ৱাসকা মরী লৈনবা চাউখৎ-থৌরাংগী প্রোজেকশিংদা নেদরলেন্দসনা মতেং পাংবদা থাগৎপা ফোঙদোকখি।

নেদরলেন্দস সরকারগী ইনফ্রাষ্ট্রকচর অমসুং ৱাতর মেনেজমেন্ত মিনিষ্ট্রি অমসুং ভারত সরকারগী জল শক্তি মিনিষ্ট্রিগী মখাদা আই.আই.তি দিল্লিদা ঈশিংগী সেন্তর ওফ এক্সলেন্স অমা লিংখৎপদা লুচিংবা অনিনা তরাম্না ওকখ্রে। উত্তর প্রদেস, মহারাষ্ট্রা, নোংচুপ বেঙ্গাল, তামিল নাদু অমসুং কেরলামদা হৌজিক অপুনবা থৌরমশিং খুমাঙচাউশিনবদা লুচিংবশিংনা থাগৎপা ফোঙদোকখ্রে।

গুজরাত্ত কালপাসার প্রোজেক্ত মখা তানা মতেং পাংনবা হেনগৎহনবা হায়না লুচিংবশিংনা য়ানরে, মফম অসিদা দচগী হৈথোই-শিংথোইবা অমসুং তেক্নিকেলগী মতেংনা প্রোজেক অসিনা মখা তানা ঈশিংগী ষ্ট্রাতেজিক পার্তনরশিপ ফগৎহনগনি।

ভারত লমজিংবা কোলিএসন ফোর দিজাষ্টার রিসিলিয়েন্ত ইনফ্রাষ্ট্রকচর (সি দি আর আই) গী সহরগী ঈশিং ফংহন্নবা থৌরম খুমাংচাউশিনবদা লুচিংবশিংনা নুংঙাইবা ফোঙদোকখ্রে অমসুং মসিদা মসিগী মেম্বর ওইনা নেদরলেন্দসনা মতেং পাংলি। নেসনেল দিজাষ্টার মেনেজমেন্ত ওথোরিতি অমসুং মালেমগী অতোপ্পা সি.দি.আর.আই মেম্বর ৫০ হেনবগা লোয়ননা ভারতকী সহরশিংদা ত্রেনিং পাংথোকপদা লুচিংবা অনিমক্না থাগৎপা ফোঙদোকখ্রে।

সমুদ্রগা মরী লৈনবা থবকশিং চাউখৎহনবা

সমুদ্রগী লমদা মতেং পাংন্নবা হন্দক এম.ও.য়ু অমুক নৌথোকহনখিবা অদু প্রধান মন্ত্রী অনিনা খন্নখি অমসুং অশোই-অঙাম থোক্তবা অমসুং তুংকোইনা চৎনবা য়াবা মেরিতাইম সেক্তর অমা লৈনবা মখা তানা পুন্না থবক তৌমিন্নবগী মরুওইবা খন্নখি, ভারত অমসুং নেদরলেন্দসকী মরক্ত ‘গ্রিন এন্দ দিজিতেল সি কোরিদোর’ অমা শেমগৎপা শৌগৎখি। হিথাংফমশিং অমসুং কংফালগী ঈশিং লম্বীশিং শেমগৎপা, সপ্লাই চেন ফগৎহনবা অমসুং গ্রিন পোর্তশিং অমসুং সিপ্পিংগী হিরমশিংদা মতেং পাংনবা মখা তানা ফগৎহনবদা মখোয়না য়ানখ্রে। মথংগী খোঙথাং অমা ওইনা, ভারত অমসুং নেদরলেন্দসকী মরক্ত মহৌশাগী অকোয়বগী ফিবম কাইহন্দবা, দিজিতেল ওইরবা অমসুং শেন-থুমগী মতিক চারবা তুংগী শেম-শারবা মেরিতাইম কোরিদোর অমগী পান্দমদা থবক তৌরিবা ‘গ্রিন এন্দ দিজিতেল সি কোরিদোরগী রোদমেপ অমা’ শেম্নবা লম্বীশিং মশক খঙদোকপদা প্রধান মন্ত্রী অনিনা য়ানরে।

ইন্দো-পেসিফিক লমদমদা মালেমগী অমসুং লমদম অদুগী মেরিতাইম সেকুরিতি লৈনবা, হিথাংফমশিং অমসুং কংফালগী ঈশিং লম্বীশিংগী সাইবর রিসিলিয়েন্স অমসুং রিসিলিয়েন্ত সপ্লাই চেনশিং (ক্রিতিকেল রো মিনরেলশিং, হিদাক-লাংথকঅমসুং চীঞ্জাক য়াওনা) গী লমদা মরী লৈনবা সরকারগী লুপশিং, ললোন-ইতিকশিং অমসুং মহৈলোয়শঙশিংগী মরক্ত খ্বাইদগী ফবা থবকশিং পীথোক-পীশিন তৌনবদা প্রধান মন্ত্রী অনিনা য়ারে।

হকশেলগী থবক

লৌনগনবা লাইনাশিং অমসুং এন্তিমাইক্রোবিয়েল রিসিষ্টেন্সগুম্বা অমসুং লৌনগন্দবা লাইনাশিংগী অৱাবা হেনগৎলকপা য়াওনা, মালেমগী মীয়ামগী হকশেলগী অৱাববশিং কোকহন্নবা হকশেলগী লমদা নাকল অনি মতেং পাংনবা হেনগৎহনবগী মরুওইবা লুচিংবা অনিমক্না ফোঙদোকখ্রে। দিজিতেল হেল্থ (এ আই অমসুং সাইবরসেকুরিতি) অমসুং কেপাসিতি বিল্দিংদা মখা তানা মতেং পাংনবা পুক্নিং থৌগৎপা হায়না লুচিংবা অনিনা য়ানরে।

অনা-লাইয়েং অমসুং মীয়ামগী হকশেলদা এম.ও.য়ু অমুক নৌথোকহনবদা মখোয়না তরাম্না ওকখি অমসুং নুপীশিংগী হকশেল, ক্লাইমেত অমসুং হকশেলগী শেম-শানবা কেপাসিতি হেনগৎহনবা অমসুং লৈবাক অনিমক্ত তুংকোইনা চৎনবা য়াবা অনা-লাইয়েংগী থবকশিংগী লৌশিং পীথোক-পীশিন তৌনবগুম্বা হিরমশিংদা নৌনা মতেং পাংন্নবা থবকশিং খন্নখি। মসিগীদমক এম.ও.য়ু নৌথোকহল্লে। লৌনগনবা লাইনাশিং, কাংনা থোকহনবা লাইনাশিং, ৱান হেল্থ অমসুং লাইনা থিজিনবগুম্বা হিরমশিংদা মীৎয়েং চঙদুনা, দচ নেসনেল ইন্সতিতুৎ ফোর পব্লিক হেল্থ এন্দ ইনভাইরোনমেন্ত অমসুং ইন্দিয়ান কাউন্সিল ওফ মেদিকেল রিছার্সকী মরক্ত লেত্তর ওফ ইন্তেন্ত খুৎয়েক পীনবদা লুচিংবা অনিনা তরাম্না ওকখ্রে।

ইন্দিয়া-নেদরলেন্দস ষ্ট্রাতেজিক পার্তনরশিপকী ঙাক্লৌ মনুংদা, মগুন লৈহন্নবা, মীওই খুদিংমক কান্নবা ফংনবা, অশোই-অঙাম থোক্তনবা অমসুং তুংকোইনা চৎনবা য়াবা লাইয়েংগীদমক, হিদাক-লাংথকশিং অমসুং মেদিকেলগী খুৎলায়শিংদা মতেং পাংনবা হেনগৎহন্নবা মীৎয়েং চঙগনি। থবক পায়খৎনবা খন্ননবা অমসুং মখা তানা এম.ও.য়ু অমসুং মসিগী ৱার্কপ্লান  ফগৎনবা অমসুং একাদেমিক কোওপরেসন, রিগুলেতোরি কোওপরেসন, ললোন-ইতিক্কী থবক অমসুং কৈথেলগী লৌশিং পীথোক-পীশিন তৌনবা য়াওনা, পুন্না থবক তৌমিন্ননবা খুদোংচাবশিং খঙদোক্নবা, নৌনা খুৎয়েক পীনখ্রবা এম.ও.য়ুগী মখাদা, ২০২৬ দা, অহানবা ওইনা জোইন্ত ৱার্কিং গ্রুপ মীফম পাংথোক্কনি।

লৌউ-শিংউ অমসুং চীঞ্জাক পুথোকপগী থবকশিং

লৌউ-শিংউগী জোইন্ত ৱার্কিং গ্রুপকী খুৎথাংদা লৌশিং অমসুং থবক পীথোক-পীশিন তৌনবা য়াওনা, লৌউ-শিংউ, চীঞ্জাক পুথোকপগী থবকশিং অমসুং সপ্লাই চেনশিংগী লমদা হৌজিক ভারত-নেদরলেন্দস মতেং পাংনবদা লুচিংবা অনিনা অপেনবা ফোঙদোকখ্রে। চেকশিন্না ঙাক-শেন্দুনা মহৈ-মরোং থাবা, চীঞ্জাক শেম-শাবা, দাইরি অমসুং পোলতরিগী লমদা ভারত্ত দচ কম্পনিশিং মশিং হেনগৎলকপদা লুচিংবা অনিনা তরাম্না ওকখ্রে। এগ্রি-তেক য়াওনা লৌউ-শিংউগা মরী লৈনবা ভারত অমসুং দচ কম্পেনিশিংগীমরক্ত মতেং পাংনবগী মরুওইবা লুচিংবা অনিনা ফোঙদোকখ্র।

দচকী লৌশিংগা লোয়ননা, ভারত্ত লৌউ-শিংউগা মরী লৈনবা সেন্তরস ওফ এক্সলেন্স লিংখৎপগী থবক লুচিংবশিংনা হন্না য়েংশিনখ্রে। লম য়াম্না লৈতবা লৌমীশিংগী য়াইফনবা অৱাংবা তেক্নোলোজিগী গ্রিনহাওসদা লৌউ-শিংউগী পোৎথোক পুথোকপা হেনগৎহন্নবা সেন্তরশিং অসিনা পুক্নিং থৌগৎলি, মসিনা পোৎথোক হেন্না পুথোকহল্লে অমসুং ঈশিং শীজিন্নবা অমসুং কেমিকেল শীজিন্নবা হন্থহল্লে।

মখা তানা পুন্না থবক তৌমিন্নদুনা অমসুং লৌশিং পীথোক-পীশিন তৌনদুনা সেন্তরশিং অসিগী কান্নবা মখা তানা হেনগৎহন্নবা লুচিংবা অনিনা মখোয়গী থাজবা পীনখি। চীঞ্জাক পুথোকপগী হিরমশিংদা ভোকেসনেল ইজুকেসন্দা পুন্না থবক তৌমিন্নবা হেনগৎহনবদসু মখোয় য়ানরে।

ফিসরিজ, এনিমেল হসবেন্দরি অমসুং দাইরিয়িং মিনিষ্ট্রি অমসুং নেদরলেন্দসকী এগ্রিকলচর, ফিসরিজ, ফুদ সেকুরিতি অমসুং নেচর মিনিষ্ট্রিগী মরক্ত জোইন্ত দিক্লারেসন অমা খুৎয়েক পীনবদা লোয়ননা সেন্তর ওফ এক্সলেন্স ফোর এনিমেল হসবেন্দরি, বেঙ্গালুরুদা ইন্দো-দচ সেন্তর ওফ এক্সলেন্স ওন ত্রেনিং ইন দাইরি লিংখৎপদা লুচিংবা অনিনা তরাম্না ওকখ্রে। চীঞ্জাক শেম-শাবা য়াওনা দাইরি অমসুং লৌউ-শিংউগা মরী লৈনবা হিরমশিংদা মতেং পাংনবা মখা চৎথবদা নাকল অনি য়ানরে।

ভারতকী হোর্তিকলচরগী সেক্তরদা মালেমগী ওইনা চাংদম্নবা ঙম্নবা, মগুন লৈবা উহৈ-ৱাহৈশিংগী লাইনা য়াওদবা অফবা চারাশিং ফংহন্নবা ভারতকী হৌজিক পায়খৎলিবা ক্লিন প্লান্ত প্রোগ্রামগী মখাদা ক্লিন প্লান্ত সেন্তরশিং লিংখৎনবা হোর্তিকলচরগী লমদা ভারত-দচ মতেং পাংনবা হেনগৎহন্নবা পায়খৎলিবা থবকশিং লুচিংশিংনা খঙলে। হিরম অসিগী মতাংদা, নাকতুইনবাউ এন্দ নেসনেল হোর্তিকলচর বোর্দ, ভারত সরকার অনিগী মরক্ত কেপাসিতি বিল্দিং অমসুং মতেং পাংন্নবা এম.ও.য়ু খুৎয়েক পীনখিবদা লুচিংবা অনিনা তরাম্না ওকখ্রে।

ফুদ সেফতি অমসুং সেকুরিতিগী মরুওইবা পল্লদুনা, নেদরলেন্দস ফুদ এন্দ কঞ্জুমর প্রদক সেফতি ওথোরিতি অমসুং ফুদ সেফতি এন্দ ষ্টেন্দার্দস ওথোরিতি ওফ ইন্দিয়া (ফাসাই) গী মরক্ত এম.ও.য়ু লৈনবদা লুচিংবা অনিনা তরাম্না ওকখ্রে।

মীগা-মীগা চৎথোক-চৎশিন তৌনবা অমসুং নাৎ

ভারত-নেদরলেন্দসকী মরীদা মীগা-মীগা লৈনবা মরীনা মরুওইবা য়ুম্বী অমা ওইরিবা অসি প্রধান মন্ত্রী অনিনা খঙখি। নেদরলেন্দসতা লৈরিবা ভারতমচাশিংনা দচ খুন্নাইদা মতেং পাংবগীদমক প্রধান মন্ত্রী জেত্তেন্না তৌবীমল খঙবা উৎখি। নহারোল, লাইরিক-লাইশু, শীনফম কয়াগী মীওইশিং, শান্নবা অমসুং কলচরেল একচেঞ্জশিংগী খুৎথাংদা, লৈবাক অনিগী মরক্ত মীগা-মীগা শম্নবা মখা তানা ফগৎহন্নবা মখোয়না অমুক হন্না ৱারেপ লৌখ্রে।

লৈবাক অনিগী মরক্ত চৎথোক-চৎশিন অমসুং য়ুম হোংবা খুদোংচানবা, য়ুম হোংবা অমসুং চৎথোক-চৎশিনগী এম.ও.য়ু খুৎয়েক পীনবদা লুচিংবা অনিনা তরাম্না ওকখ্রে।

আইন্না য়াদনা য়ুম হোংলকপা অমসুং হুমেন ত্রাফিক্কিং থিংনবা মতেং পাংনবা মখা তানা ফগৎহনবা লৈবাক অনিনা য়ানরে অমসুং য়াম্না হৈথোই-শিংথোইরবা মীওইশিং চৎথোক-চৎশিন তৌবা পুক্নিং থৌগৎলে। নিয়ম চুম্না চৎথোক-চৎশিন তৌবা, অরোনবা লৈতনা ভিসা শেম-শাবা অমসুং শিন্মীশিংগী হকশিং ঙাক-শেনবা য়াওনা শিন্মীশিংগী ইকায়খুম্নবা অমসুং চিংলেম্বগা লোয়ন্নবা ঙম্নবা থবক অসিদা মালেমগী চৎন-কাংলোনশিংনা লমজিংলে। 

দিজাইন, পর্ফোমিং আর্তশিং, ভিজুয়ল আর্তশিং, ম্যুজিয়মগুম্বা হিরমশিংদা একজিবিসনশিং অমসুং নাৎকী থবকশিং য়োকখত্তুনা লৈবাক অনিগী মরক্ত নাৎকী মতেং পাংনবা হেনগৎহনবা হায়না প্রধান মন্ত্রী অনিনা য়ানরে অমসুং নাৎকী মতেং পাংন্নবা জোইন্ত ৱার্কিং গ্রুপ অমা লিংখৎপগী মতাংদা খন্নখ্রে।

লৈবাক অমনা অমগী নাৎ থাগৎপগী মরুওইবা পল্লদুনা, দ্রেন্তস ম্যুজিয়ম অমসুং নেসনেল গেল্লারি ওফ মোদর্ন আর্ত অনিগী মরক্ত লৈনবা এম.ও.য়ুগী শরুক অমা ওইনা, দ্রেন্তস ম্যুজিয়মদা অমরিতা সের-গিলগী একজিবিসন পাংথোক্নবা হোৎনবদা লুচিংবশিংনা থাগৎপা ফোঙদোকখ্রে। নেসনেল গেল্লারি ওফ মোদর্ন আর্ততা ভেন গোগ অমসুং অতোপ্পা দচ আর্তৱার্কশিং উৎনবা রিতর্ন একজিবিসন্দা মখোয়না থাজবা থমখি।

নাৎকা মরী লৈনবা কলাগী পোৎলমশিং অমুক পুরকপগী মতাংদা মতেং পাংনবগী মরুওইবা প্রধান মন্ত্রী অনিমক্না ফোঙদোকখ্রে অমসুং হিরম অসিগী মতাংদা য়ুনিভর্সিতি ওফ লৈদেন্দগী ভারতকী ওথোরিতিশিংদা চোলা মতমগী শেঞ্জেংগী কোনপাকশিং অমুক পুরকপদা তরাম্না ওকখ্রে।

ভারত অমসুং নেদরলেন্দসকী মরক্ত লৈনরিবা চহি চা কয়া শুরবা সমুদ্রগী পুৱারি নিংশিংলদুনা, গুজরাতকী লোথালদা নেসনেল মেরিতাইম হেরিতেচ কমপ্লেক্স শেমগৎনবা অমষ্টারদামগী নেসনেল মেরিতাইম ম্যুজিয়ম অমসুং ভারতকী পোর্তস, সিপ্পিং অমসুং ৱাতরৱেজ মিনিষ্ট্রিগী মরক্ত মতেং পাংন্নবা এম.ও.য়ু খুৎয়েক পীনবদা লুচিংবা অনিনা তরাম্না ওকখ্রে।

মরুপ-মপাং ওইবা ফিবম অমদা ৱারি শানবা অদু পাংথোকখি অমসুং লৈবাক অনিগী মরীশিং মখা তানা চাউখৎনবা খুদোংচাবা মরাংকাইনা লৈবদা অমসুং ইন্দিয়া-নেদরলেন্দস ষ্ট্রাতেজিক পার্তনরশিপ রোদমেপকী হিরমশিং শীনবা থুংনা মতেং পাংনবদা লুচিংবা অনিমক্না মখোয়গী থাজবা ফোঙদোকখি। তরাম্না ওকপগীদমক প্রধান মন্ত্রী মোদীনা প্রধান মন্ত্রী জেত্তেন থাগৎপা ফোঙদোকখি অমসুং মহাক্কী খুদোংচাগদবা মতমদা ভারত্ত লাক্নবা প্রধান মন্ত্রী জেত্তেন্দা চেপাউ পীখ্রে।

***