مرکزی وزیر داخلہ اور وزیر تعاون، جناب امت شاہ نے آج گجرات کے احمد آباد میں نو تعمیر شدہ ’ملین مائنڈز ٹیک پارک‘ اور ’گریمی سٹی کیمپس‘ کا افتتاح کیا۔ اس موقع پر گجرات کے وزیر اعلیٰ جناب بھوپیندر پٹیل، نائب وزیر اعلیٰ جناب ہرش سنگھوی اور متعدد دیگر معزز شخصیات بھی موجود تھیں۔

اجتماع سے خطاب کرتے ہوئے جناب امت شاہ نے کہا کہ یہ تقریب وزیر اعظم جناب نریندر مودی کے بھارت کے مستقبل سے متعلق وژن کو عملی جامہ پہنانے کی جانب ایک اہم سنگ میل ہے۔ انہوں نے کہا کہ وزیر اعظم مودی کا وژن ہے کہ ٹیکنالوجی، اختراع، علم، صنعت کاری اور اعلیٰ مہارت پر مبنی صنعتیں بھی گجرات میں آئیں۔ جناب شاہ نے کہا کہ گجرات، جس نے آزادی کے بعد سے کئی شعبوں میں ملک کی قیادت کی ہے، اب ابھرتی ہوئی ٹیکنالوجیز کے میدان میں بھی قیادت کرے گا۔ انہوں نے کہا کہ جب بھی گجرات کسی شعبے میں عزم کے ساتھ قدم رکھتا ہے تو وہ تیزی سے اعلیٰ مقام حاصل کر لیتا ہے، اور انہوں نے یقین ظاہر کیا کہ ریاست اس شعبے میں بھی یہی کامیابی دہرائے گی۔

جناب امت شاہ نے کہا کہ آزادی کے بعد سے گجرات نے بھارت کی صنعتی ترقی میں بے پناہ کردار ادا کیا ہے۔ انہوں نے کہا کہ جب جناب نریندر مودی گجرات کے وزیر اعلیٰ بنے تو انہوں نے مسلسل صنعتی ترقی کو ایک منظم ڈھانچہ فراہم کرنے کے لیے کام کیا۔ انہوں نے کہا کہ 2002 کے بعد صنعتی ترقی، بنیادی ڈھانچے، کاروبار میں آسانی اور صنعت کاری پر مبنی ترقی جیسے شعبوں میں گجرات کے سفر نے ریاست کی عالمی شناخت قائم کرنے میں کامیابی حاصل کی ہے۔

مرکزی وزیر داخلہ نے کہا کہ کئی ریاستوں نے صنعتی ترقی حاصل کی ہے، لیکن گجرات اپنے منظم ترقیاتی ماڈل کی وجہ سے منفرد مقام رکھتا ہے۔ انہوں نے کہا کہ اس کی بنیادی وجہ یہ ہے کہ گجراتی عوام روایتی طور پر صنعت کاری اور جرات مندی جیسی خصوصیات کے ساتھ آگے بڑھے ہیں، اور وزیر اعظم مودی کی قیادت میں حکومت نے اس کے لیے سازگار بنیادی ڈھانچہ فراہم کرنے میں اہم کردار ادا کیا ہے۔ جناب شاہ نے کہا کہ بنیادی ڈھانچے سے مراد صرف جسمانی انفراسٹرکچر نہیں، بلکہ پالیسی معاونت، مالی انتظامات، فعال طرزِ حکمرانی اور ’وائبرنٹ گجرات‘ جیسے اقدامات بھی ہیں، جنہیں عالمی سطح پر پذیرائی حاصل ہوئی ہے۔

جناب امت شاہ نے کہا کہ گجرات نے مینوفیکچرنگ، انجینئرنگ، فارماسیوٹیکلز، بندرگاہوں، لاجسٹکس، گرین انرجی، صنعتی بنیادی ڈھانچے اور سرمایہ کاری جیسے شعبوں میں غیرمعمولی کارکردگی کا مظاہرہ کیا ہے۔ انہوں نے کہا کہ اب اگلا ہدف گجرات کو خدمات کے شعبے میں بھی ملک کی سرفہرست تین ریاستوں میں شامل کرنا ہے۔ اس مقصد کے لیے، انہوں نے کہا، نئے افتتاح شدہ ٹیک پارک جیسے منصوبے ضروری ہیں تاکہ احمد آباد کو بنگلورو، حیدرآباد، پونے اور گروگرام کے ہم پلہ بنایا جا سکے۔

مرکزی وزیر داخلہ نے کہا کہ بھارت کی معاشی سرگرمیوں میں تیزی سے تبدیلی آ رہی ہے، اسی لیے وزیر اعظم مودی گزشتہ چند برسوں سے ٹیک پارکس اور گلوبل کیپیبلٹی سینٹر پر خصوصی توجہ دے رہے ہیں۔ انہوں نے کہا کہ تقریباً 1,100 کروڑ روپے کی لاگت سے 13.5 لاکھ مربع فٹ رقبے پر تعمیر کیے گئے ’ملین مائنڈز ٹیک پارک‘ کے پہلے مرحلے میں 9,000 اعلیٰ مہارت رکھنے والے پیشہ ور افراد کے لیے جدید ترین کام کا ماحول فراہم کیا جائے گا۔ جناب شاہ نے کہا کہ سات مراحل پر مشتمل اس منصوبے میں تقریباً 15,000 کروڑ روپے کی سرمایہ کاری متوقع ہے، اور اگلے پانچ برسوں میں اس سے 63,000 سے زائد اعلیٰ قدر والی ملازمتیں پیدا ہوں گی۔ 65 ایکڑ پر مشتمل یہ اراضی گجرات میں اعلیٰ مہارت والی ملازمتوں کے فروغ میں اہم کردار ادا کرے گی۔ انہوں نے کہا کہ اس منصوبے میں 50 فیصد جگہ تجارتی استعمال کے لیے مختص کی گئی ہے، جبکہ اس میں مال، ہوٹل اور رہائشی سہولیات بھی شامل ہیں، جو ایک مکمل مربوط ٹیک پارک ماحولیاتی نظام کے وژن کی عکاسی کرتی ہیں۔

جناب امت شاہ نے گنیش رئیل اسٹیٹ مینجمنٹ انسٹی ٹیوٹ کیمپس کا بھی افتتاح کیا۔ انہوں نے کہا کہ یہ ادارہ ملک کے لیے ایک اہم اقدام ہے کیونکہ رئیل اسٹیٹ کے شعبے کو شاذ و نادر ہی جامع انداز میں دیکھا گیا ہے۔ انہوں نے کہا کہ ماحولیات، منصوبہ بندی اور ٹاؤن پلاننگ کا رئیل اسٹیٹ کی ترقی سے گہرا تعلق ہے، اور اس بات پر زور دیا کہ مناسب منصوبہ بندی کے بغیر اچھے شہر تعمیر نہیں کیے جا سکتے۔ مودی حکومت کی شہری منصوبہ بندی سے متعلق اصلاحات نے ٹاؤن پلاننگ کے ایک نئے دور کا آغاز کیا ہے۔ انہوں نے کہا کہ 30,000 مربع فٹ پر مشتمل یہ کیمپس اپنے پہلے بیچ میں 300 طلبہ کو جگہ فراہم کرے گا، جبکہ تھول جھیل کے قریب مرکزی کیمپس 100 ایکڑ رقبے پر تقریباً 500 کروڑ روپے کی لاگت سے تعمیر کیا جائے گا۔ انہوں نے کہا کہ یہ ادارہ ملک بھر کے رئیل اسٹیٹ شعبے کو جدید سوچ اور مؤثر قیادت فراہم کرے گا۔

مرکزی وزیر داخلہ اور وزیر تعاون جناب امت شاہ نے کہا کہ اے آئی اور ڈیپ ٹیک مستقبل کی معیشت کی نمائندگی کرتے ہیں۔ انہوں نے کہا کہ وزیر اعظم جناب نریندر مودی کی دور اندیش قیادت میں بھارت عالمی سطح پر کئی ابھرتے ہوئے شعبوں میں ایک بانی کردار ادا کرتے ہوئے ابھر رہا ہے۔ جناب شاہ نے مزید کہا کہ روبوٹکس، کوانٹم کمپیوٹنگ، سیمی کنڈکٹر، اے آئی، آٹومیشن سسٹم، سائبر سکیورٹی، دفاع اور خلائی ٹیکنالوجی جیسے شعبوں میں کام کرنے والے نوجوانوں کو مناسب ماحولیاتی نظام، بنیادی ڈھانچہ اور مواقع فراہم کیے جانے چاہئیں۔ انہوں نے کہا کہ یہ دونوں اقدامات گجرات کو جدید ٹیکنالوجیز کے میدان میں کئی قدم آگے لے جانے میں اہم کردار ادا کریں گے۔

 **************

ش ح۔ ف ش ع

U: 7171