U Myntri Sorkar Pdeng ba dei peit ia ka Tnad Development of North Eastern Region (MDoNER), u Jyotiraditya M. Scindia ryngkat bad u Myntri Rangbah ka jylla Mizoram u Lalduhoma mynta ka sngi ki la plie paidbah ia ka Mizoram Ginger Mission, ka sienjam kaba T.189.79 klur kaba ialam da ka jingiasohlang na ka bynta ka jingrep ia u sying bad ka jingkyntiew ia ka jingbha na ka bynta ka jylla Mizoram. La pynskhem da ka MDoNER, ka Mission ka tei halor ka jingiatreilang bad ki Skhim jong ki Tnad ka rep ka riang, kam pynroi jaka nongkyndong, ki karkhana pynmih marbam, ryngkat bad ka NABARD, ka ICAR, ka APEDA bad ki nongbei tyngka shimet na ka bynta ban pyndonkam ia u sying.

U Sanjay Jaju, Secretary ka MDoNER, ha ka jingai jingkren lamkhmat jong u, u la batai bniah halor ka rukom pyntreikam ia ka Mission. U la ban jur ia ka jingmut kaba don ha lyndet jong ka Mission, khamtam eh ia ka jingdonkam ban weng ia ka jingbym iahap dor, ban pynthikna ia ka jingpyndonkam kaba paka ia ki jait jingthung ba la ioh jingithuh GI, bad ban weng ia ki jingduhnong hadien ba la ot. U la ban jur shuh shuh ia ka jingdonkam jong ka rukom treikam lang jong ki myntri, ba la pynskhem da ki mawmer ba kongsan ba la batai shai bad ba la buh por na ka bynta ban pyntreikam hok.

Ki nongrep sying ha Champhai district ki la pynpaw ka jingsngewnguh jong ki ïa ka Tnad Development of North Eastern Region kaba la plie paidbah ïa ka Mizoram Ginger Mission, kaba kular ban pynkylla ïa ka kamai kajih jong ki hajar tylli ki longïing jong ki nongrep kiba la rep slem bha ïa uwei na ki jait sying ba bha tam ha ka pyrthei kiba long dawai khlem da ioh ia ka dor kaba dei.

Ki nongiatreilang shimet, ki la pdiang sngewbha ia ka jingpynsdang ia ka Mission bad ki la iaroh ia ka MDoNER namar ba ka la wanrah ia ka jinglong jingman kaba plie lad kaba lah ban pynbeit ia ka jingduna kaba la slem bha hapdeng u sying jong ka Mizoram bad ki iew kiba u dei hok ban ioh. Ka karkhana ka la kular ban kyrshan pura ban pynlong ïa u sying jong ki Mizoram kum uba paw bha ha ka pyrthei bad ka nuksa jong ka jingïatreilang hapdeng ki nongrep bad ki karkhana na ka bynta ka thaiñ Shatei Lammihngi.

U Myntri Rangbah ka jylla Mizoram u la pynpaw ka jingsngewnguh kaba khraw ïa ka Tnad DoNER kaba la ai jingmut bad pynskhem ïa ka Mizoram Ginger Mission, kaba pyni ïa ka por ba kongsan ha ka jingïaid lynti jong ka Jylla ha ka rep ka riang bad ka ïoh ka kot. U la ong ba ka Mission ka ithuh ia ka bor ba kyrpang jong ka Mizoram ha kaba iadei bad u sying ba long dawai bad ka pynkylla ia u sha ka lynti kaba la buh ryntih na ka bynta ka jingseisoh jong ki nongrep, ka jingpynbha, bad ka jingpyniasoh ia ka iew ka hat ha ka pyrthei. Ka Sorkar Jylla ka shimkhia pura ban pynthikna ia ka jingpyntreikam katkum ka por.

U Myntri Sorkar Pdeng ba dei khmih ia ka Tnad  Development of North Eastern Region u la ban jur ia ka jingkular jong u Myntri Rangbahduh ba donburom u Narendra Modi ban pynthikna ba ki nongrep kin long ki nongshim bynta ba shisha ha ka rep ka riang baroh kawei — "na kper sha ka miej bam." U Myntri u la ban jur ba ka jingthmu kam dei tang ka jingrep jingthung, hynrei ka plie lad ia ki nongrep ban iashim bynta da kaba don jingmut ha ka jingpynkhreh, ka jingpyniaid iew, ka jingsong, ka jingpynbha ba la ialam da ka jingshalan shabar ri, bad ka jingpyniasoh ia ka iew ka hat ha ka pyrthei. U la ong ba katba u sying jong ka Mizoram u don 6–8 percent ka oleoresin pyrshah ïa ka jingkheiñ kyllum ha ka pyrthei kaba long kumba 3 percent, ki nongrep mynta ki ïoh tang T.8–15 shi kilo, wat haba ka kam ka poi palat T.500 shi kilo ha ki ïew ka pyrthei.

Da kaba kyntu ïa ka jingpyrshang kaba kut jingmut ban "weng ia ki nong mushlia" bad ban pynkhlain ïa ki rukom treikam jong ka jingïatreilang bad ka FPO, u la buh ïa ka sienjam kaba T.190 klur kum ka "Mizo Ginger Movement" — kaba la pynshong nongrim ha ki saw tylli ki rishot ba kongsan jong ka jingïatylli, ka jingpynbha, ka jingpyniaid, bad ka jingpyniasoh bad ka ïew ka hat – bad ka jingpynwandur lyngba ka jingpynïasoh hapdeng ki Tnad jong ka DoNER, ka rep ka riang & ka bha ka miat jong ki nongrep, ki karkhana pynmih marbam, bad ka kam pynroi jaka nongkyndong, ryngkat bad ka APEDA, ka NABARD, ka Sorkar Mizoram, bad kito kiba don bynta ha ka kam karkhana.

U Myntri u la ban jur ba ka Mission kan pynbiang ia kawei ka Jaka pynmih mar ba la pyniasoh lang bad lai tylli ki Spoke Centre, palat 30 tylli ki jingiarap ba kongsan, bad ka jingpyniasoh lang ia jan 20,000 tylli ki longing jong ki nongrep sha ka jinglong jingman kaba iatylli kaba la tei halor ka jinglah ban wad bniah, ka jinglong kyrpang, ka jingpynthikna ia ka jingbha, bad ka jingpynbha ba la ialam da ki nongrep. U la buh ia ka jingthmu kaba shai ha ka pyrthei na ka bynta u sying jong ka Mizoram, da kaba thmu ban rung sha ki iew jong ka South East Asia, Middle East, bad Europe, bad u la ong ba ka jingjop kan sa urlong ha ka sngi ba u sying jong ka Mizoram un poi sha kylleng ka pyrthei, uba lah ban ba lah ban buddien shaduh u nongrep ba pynmih ia u, bad ban pynpoi beit beit sha ki ia ki jingmyntoi ha ka ioh ka kot. Da kaba buh ia ka Mission hapoh ka jingthmu ba kham heh jong ka "Brand North East" ryngkat kawei ka USP na ka bynta kawei pa kawei ka Jylla kum ka Sikkim kum ka Jylla Organic, ki soh Kiwi jong ka Arunachal Pradesh, Queen Pineapple jong ka Tripura, Coffee jong ka Nagaland bad shynrai Lakadong na Meghalaya — u Myntri u la pynthikna ia ki nongrep ba ka Sorkar ka don ryngkat bad ki, da kaba khot ia ka sienjam kum ka jingiakhih kaba jrong samoi kaba la khmih lynti ban wanrah ia ka jingkiew kaba hynriew shah ha ka dor ia ki nongrep, ka jingduna kaba jur ha ki jingduhnong hadien ka jingot, ka jingpynpaw ha ka pyrthei ia u sying jong ka Mizoram, ki lad kamai jakpoh kiba lah ban iaineh, bad ka jingshalan kaba khlain bad ka jinglong jingman jong ka jingpynmih mar na ka bynta ka thain.

***