ભારતના ઉપરાષ્ટ્રપતિ શ્રી સી. પી. રાધાકૃષ્ણને આજે ભારત મંડપમ, નવી દિલ્હી ખાતે અખિલ ભારતીય આયુર્વિજ્ઞાન સંસ્થાન (AIIMS), નવી દિલ્હીના 51મા દીક્ષાંત સમારોહને સંબોધિત કર્યો હતો.

આરોગ્યસંભાળ વિતરણમાં AIIMS ના યોગદાન પર પ્રકાશ પાડતા ઉપરાષ્ટ્રપતિએ નોંધ્યું હતું કે, આ સંસ્થા તબીબી નવીનતા અને આરોગ્યસંભાળ શ્રેષ્ઠતા માટે રાષ્ટ્રના મુખ્ય એન્જિન તરીકે ઉભરી આવી છે. તે સામાન્ય લોકો માટે નોંધપાત્ર રીતે પરવડે તેવી રહેવાની સાથે દર્દીઓની સંભાળ અને આધુનિક ચિકિત્સાના સર્વોચ્ચ ધોરણો સ્થાપિત કરી રહી છે. તેમણે અવલોકન કર્યું કે રોગચાળા સામેની સ્થિતિસ્થાપકતાથી લઈને ગ્રામીણ આરોગ્યસંભાળ સુધી, "AIIMS બ્રાન્ડ" સમગ્ર ભારત અને દક્ષિણ-પૂર્વ એશિયા ક્ષેત્રમાં વિશ્વાસ અને પ્રામાણિકતાનો પર્યાય બની ગઈ છે.

ઉપરાષ્ટ્રપતિએ કેન્દ્રીય આરોગ્ય અને પરિવાર કલ્યાણ મંત્રી અને AIIMS ના અધ્યક્ષ શ્રી જગત પ્રકાશ નડ્ડાની સાથે AIIMS ના ડાયરેક્ટર અને ફેકલ્ટી સભ્યોની પ્રશંસા કરી હતી, જેમણે શૈક્ષણિક ધોરણો સાથે સમાધાન કર્યા વિના વિશાળ સંખ્યામાં દર્દીઓનું કાર્યક્ષમ સંચાલન કર્યું છે. તેમણે કહ્યું કે AIIMS એ દાયકાઓથી એવા વિદ્વાનો તૈયાર કર્યા છે જેઓ તબીબી શ્રેષ્ઠતા સાથે નૈતિકતા અને સહાનુભૂતિનો સમન્વય કરે છે, અને તેના ભૂતપૂર્વ વિદ્યાર્થીઓ વિશ્વભરની પ્રતિષ્ઠિત સંસ્થાઓમાં અગ્રણી હોદ્દા પર બિરાજમાન છે.

આ વર્ષની શરૂઆતમાં એન્ટાર્કટિકામાં રિમોટ રોબોટિક અલ્ટ્રાસાઉન્ડ કરવાના AIIMS ના પરાક્રમનો ઉલ્લેખ કરતા ઉપરાષ્ટ્રપતિએ ટિપ્પણી કરી હતી કે, આ સિદ્ધિ દર્શાવે છે કે ભૌગોલિક સીમાઓ હવે ભારતીય ક્લિનિકલ શ્રેષ્ઠતા માટે અવરોધ નથી. તેમણે સંસ્થાના વિસ્તરી રહેલા આંતરરાષ્ટ્રીય સહયોગ પર પણ પ્રકાશ પાડ્યો હતો, જેમાં આરોગ્ય ક્ષેત્રે AI (આર્ટિફિશિયલ ઇન્ટેલિજન્સ) માટેના ઇન્ડો-ફ્રેન્ચ સેન્ટરનો સમાવેશ થાય છે.

ઉપરાષ્ટ્રપતિએ જણાવ્યું હતું કે AIIMS હવે આરોગ્યસંભાળ અને તબીબી શિક્ષણમાં વૈશ્વિક માપદંડો સ્થાપિત કરી રહી છે. QS વર્લ્ડ રેન્કિંગનો ઉલ્લેખ કરતા તેમણે નોંધ્યું કે AIIMS માત્ર બે વર્ષમાં 40 સ્થાનની છલાંગ લગાવીને વૈશ્વિક સ્તરે 105માં ક્રમે પહોંચી છે. તેમણે વિશ્વાસ વ્યક્ત કર્યો હતો કે સંસ્થા ટૂંક સમયમાં ટોચની 100માં પ્રવેશ કરશે અને એક દિવસ વિશ્વની નંબર વન સંસ્થા તરીકે ઉભરી આવશે. તેમણે વધુમાં નોંધ્યું કે AIIMS એ 2018 થી 2025 સુધી સતત NIRF મેડિકલ કેટેગરીમાં ટોચનું સ્થાન જાળવી રાખ્યું છે.

સંસ્થાના ફેકલ્ટી અને સંશોધકોની પ્રશંસા કરતા ઉપરાષ્ટ્રપતિએ કહ્યું કે AIIMS ની શ્રેષ્ઠતા તેના ફેકલ્ટી સભ્યોને વર્ષોથી એનાયત કરાયેલા અસંખ્ય પદ્મ પુરસ્કારોમાં પ્રતિબિંબિત થાય છે. તેમણે માહિતી આપી હતી કે આ પ્રતિષ્ઠિત યાદીમાં 2 પદ્મ વિભૂષણ, 15 પદ્મ ભૂષણ અને 51 પદ્મ શ્રી પુરસ્કાર વિજેતાઓનો સમાવેશ થાય છે, જ્યારે 57 ફેકલ્ટી સભ્યો સ્ટેનફોર્ડ યુનિવર્સિટીના વૈશ્વિક ટોચના 2% વૈજ્ઞાનિકોમાં સ્થાન ધરાવે છે.

પ્રધાનમંત્રી શ્રી નરેન્દ્ર મોદીના નેતૃત્વમાં દેશભરમાં AIIMS સંસ્થાઓના વિસ્તરણ પર પ્રકાશ પાડતા ઉપરાષ્ટ્રપતિએ કહ્યું કે આ વિસ્તરણથી વંચિત પ્રદેશોમાં આરોગ્યસંભાળ વિતરણ નોંધપાત્ર રીતે મજબૂત બન્યું છે. તેમણે તબીબી શિક્ષણની પહોંચ સુધારવા માટે દેશભરમાં વધુ મેડિકલ અને નર્સિંગ કોલેજો સ્થાપવા તરફના આરોગ્ય મંત્રાલયના પ્રયાસોની પણ પ્રશંસા કરી હતી.

સ્નાતક થયેલા વિદ્યાર્થીઓને સંબોધતા ઉપરાષ્ટ્રપતિએ કહ્યું કે તેઓ ભારતીય આરોગ્યસંભાળ માટેના એક નિર્ણાયક સમયે આ વ્યવસાયમાં પ્રવેશી રહ્યા છે, જ્યારે “વન નેશન, વન હેલ્થ” (એક રાષ્ટ્ર, એક આરોગ્ય) વિઝન વધુ સંકલિત, સમાન અને ભવિષ્ય માટે તૈયાર આરોગ્યસંભાળ પ્રણાલીને આકાર આપી રહ્યું છે. તેમણે યુવા ડોક્ટરો, વૈજ્ઞાનિકો અને આરોગ્યસંભાળ વ્યાવસાયિકોને આરોગ્યસંભાળમાં કરુણા, નવીનતા અને જાહેર વિશ્વાસને આગળ વધારવા વિનંતી કરી હતી.

ઉપરાષ્ટ્રપતિએ અવલોકન કર્યું કે જ્યારે AI-આધારિત ટેકનોલોજી ચિકિત્સા અને અન્ય અનેક ક્ષેત્રોમાં પરિવર્તન લાવી રહી છે, ત્યારે કોઈ પણ આર્ટિફિશિયલ ઇન્ટેલિજન્સ દર્દીના પથારી પાસે ડૉક્ટરની હાજરીના નૈતિક મહત્વનું સ્થાન લઈ શકતું નથી. તેમણે સ્નાતકોને તેમના વ્યવસાયમાં હંમેશા સહાનુભૂતિ, પ્રામાણિકતા અને માનવતા જાળવી રાખવા વિનંતી કરી હતી.

સ્નાતક થયેલા વિદ્યાર્થીઓને અભિનંદન આપતા ઉપરાષ્ટ્રપતિએ કહ્યું કે તેઓ જે સફેદ કોટ પહેરે છે તે વ્યક્તિગત સફળતાથી ઘણી આગળની અપેક્ષાઓ વહન કરે છે. તેમણે તેઓને નમ્રતા, શ્રેષ્ઠતા અને સહાનુભૂતિ સાથે સમાજની સેવા કરવા અને તેમનું કાર્ય વ્યાવસાયિક કૌશલ્ય અને જનકલ્યાણ પ્રત્યેની પ્રતિબદ્ધતા બંનેને પ્રતિબિંબિત કરે તેની ખાતરી કરવા વિનંતી કરી હતી.

આ પ્રસંગે કેન્દ્રીય આરોગ્ય અને પરિવાર કલ્યાણ મંત્રી અને અધ્યક્ષ, AIIMS નવી દિલ્હી, શ્રી જગત પ્રકાશ નડ્ડા; ડાયરેક્ટર, AIIMS નવી દિલ્હી, પ્રો. નિખિલ ટંડન; સંસ્થાના ડીન, પ્રો. રાધિકા ટંડન; સંસ્થાના રજિસ્ટ્રાર, પ્રો. ગિરિજા પ્રસાદ રથ; ફેકલ્ટી સભ્યો, આરોગ્યસંભાળ વ્યાવસાયિકો, વિદ્યાર્થીઓ અને મહાનુભાવો ઉપસ્થિત રહ્યા હતા.

IJ/NP/JD