ಮುತ್ತುಗಳ ನಗರವಾದ ಹೈದರಾಬಾದ್ ನಲ್ಲಿ, ಅಂತಾರಾಷ್ಟ್ರೀಯ ದಿನದ 50 ದಿನಗಳ ಹಿನ್ನೆಣಿಕೆಯ ಮಹತ್ತರವನ್ನು ಗುರುತಿಸುವ ಸಲುವಾಗಿ, ಸಾವಿರಾರು ಉತ್ಸಾಹಿಗಳು ಯೋಗ ಮಹೋತ್ಸವಕ್ಕಾಗಿ ಒಟ್ಟುಗೂಡಿದಾಗ ಯೋಗದ ಭವ್ಯ 2026ರ ಯೋಗೋತ್ಸವ ಆಚರಣೆಗೆ ಸಾಕ್ಷಿಯಾಯಿತು. ಕೇಂದ್ರ ಆಯುಷ್ ಸಚಿವಾಲಯದ ಅಧೀನದಲ್ಲಿರುವ ಮೊರಾರ್ಜಿ ದೇಸಾಯಿ ರಾಷ್ಟ್ರೀಯ ಯೋಗ ಸಂಸ್ಥೆ ಆಯೋಜಿಸಿದ್ದ ಈ ಕಾರ್ಯಕ್ರಮವನ್ನು ಪ್ರಶಾಂತವಾದ ಆಧ್ಯಾತ್ಮಿಕ ಕೇಂದ್ರವಾದ "ಕನ್ಹಾ ಶಾಂತಿ ವನಂ"ನಲ್ಲಿ ಯಶಸ್ವಿಯಾಗಿ ನಡೆಸಲಾಯಿತು.

"ಕನ್ಹಾ ಶಾಂತಿ ವನಂ"ನಲ್ಲಿ  𝟔❟𝟎𝟎𝟎 ಕ್ಕೂ ಹೆಚ್ಚು ಭಾಗವಹಿಸುವವರು ಭುಜಂಗಾಸನ ಯೋಗವನ್ನು ಪ್ರದರ್ಶಿಸಿದರು, ಹಾಗೂ ಐತಿಹಾಸಿಕ ದಾಖಲೆಯನ್ನು ಸ್ಥಾಪಿಸಿದರು ಮತ್ತು ಈ ಕಾರ್ಯಕ್ರಮವು ಏಕಕಾಲದಲ್ಲಿ ಆಸನವನ್ನು ಪ್ರದರ್ಶಿಸುವ ಅತಿದೊಡ್ಡ ಸಮಾವೇಶವಾಗಿ ಏಷ್ಯಾ ಬುಕ್ ಆಫ್ ರೆಕಾರ್ಡ್ಸ್‌ ಗೆ ಪ್ರವೇಶಿಸಿದಾಗ ಇನ್ನೂ ಮಹತ್ವದ ಮೈಲಿಗಲ್ಲನ್ನು ಗುರುತಿಸಿಕೊಂಡಿತು. ಇದು ಯೋಗದ ಮೂಲಕ ಉತ್ತೇಜಿಸಲಾದ ಸಾಮೂಹಿಕ ಭಾಗವಹಿಸುವಿಕೆ ಮತ್ತು ಹಂಚಿಕೆಯ ಯೋಗಕ್ಷೇಮದ ಮನೋಭಾವವನ್ನು ಪ್ರತಿಬಿಂಬಿಸುತ್ತದೆ.

ಈ ಕಾರ್ಯಕ್ರಮದಲ್ಲಿ ಕೇಂದ್ರ ಕಲ್ಲಿದ್ದಲು ಮತ್ತು ಗಣಿ ಸಚಿವರಾದ ಶ್ರೀ ಜಿ. ಕಿಶನ್ ರೆಡ್ಡಿ ಅವರು ಭಾಗವಹಿಸಿದರು. ಸಭೆಯನ್ನುದ್ದೇಶಿಸಿ ಮಾತನಾಡಿದ ಕೇಂದ್ರ ಸಚಿವರಾದ ಶ್ರೀ ರೆಡ್ಡಿ ಅವರು, "ಯೋಗವು ಕೇವಲ ಭಾರತದ ಪ್ರಾಚೀನ ಪರಂಪರೆಯಲ್ಲ, ಬದಲಾಗಿ ಮಾನವೀಯತೆಗೆ ಅಮೂಲ್ಯ ಕೊಡುಗೆಯಾಗಿದೆ. ಇಂದು, ನಾಯಕರು, ವೃತ್ತಿಪರರು ಮತ್ತು ಪ್ರಪಂಚದಾದ್ಯಂತ ಜನರು ಯೋಗವನ್ನು ಅಭ್ಯಾಸ ಮಾಡುತ್ತಾರೆ ಮತ್ತು ಅದರಿಂದ ಪ್ರಯೋಜನ ಪಡೆಯುತ್ತಾರೆ" ಎಂದು ಹೇಳಿದರು.

ರಾಷ್ಟ್ರ ನಿರ್ಮಾಣದಲ್ಲಿ ಯೋಗದ ಪಾತ್ರವನ್ನು ಉಲ್ಲೇಖಿಸುತ್ತಾ, "ಭಾರತವು 2047ರ ವೇಳೆಗೆ ವಿಕಸಿತ ಭಾರತವಾಗಬೇಕಾದರೆ, ನಾವು ಆರೋಗ್ಯಕರ, ಶಾಂತಿಯುತ ಮತ್ತು ಶಿಸ್ತಿನ ಸಮಾಜವನ್ನು ನಿರ್ಮಿಸಬೇಕು. ಒತ್ತಡ, ಅನಾರೋಗ್ಯಕರ ಜೀವನಶೈಲಿ ಮತ್ತು ಮಾಲಿನ್ಯದಂತಹ ಆಧುನಿಕ ಸವಾಲುಗಳಿಗೆ ಯೋಗವು ಪ್ರಾಯೋಗಿಕ ಮತ್ತು ವೆಚ್ಚ-ಪರಿಣಾಮಕಾರಿ ಪರಿಹಾರವನ್ನು ನೀಡುತ್ತದೆ" ಎಂದು ಹೇಳಿದರು. ನಾವೀನ್ಯತೆ ಮತ್ತು ತಂತ್ರಜ್ಞಾನಕ್ಕಾಗಿ ಈಗಾಗಲೇ ಜಾಗತಿಕವಾಗಿ ಗುರುತಿಸಲ್ಪಟ್ಟಿರುವ ಹೈದರಾಬಾದ್, ಯೋಗ ಮತ್ತು ಸಮಗ್ರ ಸ್ವಾಸ್ಥ್ಯದ ಜಾಗತಿಕ ಕೇಂದ್ರವಾಗಿ ಹೊರಹೊಮ್ಮಬೇಕು ಎಂದು ಅವರು ಹೇಳಿದರು.

ಸಭೆಯನ್ನುದ್ದೇಶಿಸಿ ಮಾತನಾಡಿದ ಕೇಂದ್ರ ಆಯುಷ್ ಸಚಿವಾಲಯದ (ಸ್ವತಂತ್ರ ಉಸ್ತುವಾರಿ) ರಾಜ್ಯ ಸಚಿವರಾದ ಮತ್ತು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ರಾಜ್ಯ ಖಾತೆ ಸಚಿವರಾದ ಶ್ರೀ ಪ್ರತಾಪ್‌ ರಾವ್ ಜಾಧವ್ ಅವರು, "ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ದೂರದೃಷ್ಟಿಯ ನಾಯಕತ್ವದಲ್ಲಿ, ಯೋಗವು ದೈಹಿಕ ಆರೋಗ್ಯ, ಮಾನಸಿಕ ಸ್ಪಷ್ಟತೆ ಮತ್ತು ಭಾವನಾತ್ಮಕ ಸಮತೋಲನವನ್ನು ಉತ್ತೇಜಿಸುವ ಸಮಗ್ರ ಯೋಗಕ್ಷೇಮಕ್ಕಾಗಿ ಜಾಗತಿಕ ಚಳುವಳಿಯಾಗಿ ವಿಕಸನಗೊಂಡಿದೆ" ಎಂದು ಹೇಳಿದರು. ಆರೋಗ್ಯ ಮತ್ತು ಸ್ವಾಸ್ಥ್ಯ ಪ್ರವಾಸೋದ್ಯಮದಲ್ಲಿ ಭಾರತದ ಹೆಚ್ಚುತ್ತಿರುವ ಪಾತ್ರವನ್ನು ಒತ್ತಿ ಹೇಳಿದ ಅವರು, ಯೋಗವು ಯೋಗಕ್ಷೇಮ ಮತ್ತು ಸಮಗ್ರ ಆರೋಗ್ಯ ರಕ್ಷಣೆಗಾಗಿ ಜಾಗತಿಕ ಕೇಂದ್ರವಾಗಿ ಭಾರತದ ಗುರುತನ್ನು ಬಲಪಡಿಸಿದೆ ಎಂದು ಹೇಳಿದರು.

ಹೊಸದಾಗಿ ಪ್ರಾರಂಭಿಸಲಾದ ಯೋಗ 365 ಉಪಕ್ರಮವನ್ನು ಉಲ್ಲೇಖಿಸುತ್ತಾ, "ಯೋಗ 365 ಅಭಿಯಾನದ ಮೂಲಕ, ಕೇಂದ್ರ ಆಯುಷ್ ಸಚಿವಾಲಯವು ಹ್ಯಾಬಿಲ್ಡ್ ಮತ್ತು ಎಂ.ಡಿ.ಎನ್.ಐ.ವೈ. ಸಹಯೋಗದೊಂದಿಗೆ, ನಾಗರಿಕರು ಯೋಗವನ್ನು ತಮ್ಮ ದೈನಂದಿನ ಜೀವನದ ಅವಿಭಾಜ್ಯ ಅಂಗವನ್ನಾಗಿ ಮಾಡಿಕೊಳ್ಳಲು ಪ್ರೋತ್ಸಾಹಿಸುತ್ತಿದೆ" ಎಂದು ಹೇಳಿದರು. ಜೂನ್ 21 ರವರೆಗೆ 100 ದಿನಗಳ ಉಚಿತ ಯೋಗ ತರಬೇತಿ ಕಾರ್ಯಕ್ರಮವನ್ನು ನಡೆಸಲಾಗುತ್ತಿದೆ, ಇದು ಒಂದು ಲಕ್ಷಕ್ಕೂ ಹೆಚ್ಚು ವ್ಯಕ್ತಿಗಳ ಭಾಗವಹಿಸುವಿಕೆಯನ್ನು ಗುರಿಯಾಗಿಟ್ಟುಕೊಂಡು ಯೋಗ ಮಿತ್ರ ಪ್ರಮಾಣೀಕರಣವನ್ನು ಕೂಡ ನೀಡಲಾಗುತ್ತದೆ.

ಐಡಿವೈ 2026 ಕ್ಕೆ 25 ದಿನಗಳ ಹಿನ್ನೆಣಿಕೆಯನ್ನು ಗುರುತಿಸುವ ಮುಂದಿನ ಯೋಗ ಮಹೋತ್ಸವವನ್ನು ಮಧ್ಯಪ್ರದೇಶದ ಖಜುರಾಹೊದಲ್ಲಿ ಆಯೋಜಿಸಲಾಗುವುದು ಎಂದು ಸಚಿವರು ಈ ಸಂದರ್ಭದಲ್ಲಿ ಘೋಷಿಸಿದರು, ಇದು ಭಾರತದ ಸಾಂಸ್ಕೃತಿಕ ಪರಂಪರೆ, ವಾಸ್ತುಶಿಲ್ಪ ಮತ್ತು ಸ್ವಾಸ್ಥ್ಯ ಸಂಪ್ರದಾಯಗಳ ಸಂಗಮವನ್ನು ಸಂಕೇತಿಸುತ್ತದೆ. ಜಪಾನ್‌ ನ ಒಸಾಕಾದಲ್ಲಿ 2025 ರ ವರ್ಲ್ಡ್ ಎಕ್ಸ್‌ಪೋ ಸಮಯದಲ್ಲಿ ಆರು ತಿಂಗಳ ಕಾಲ ಯೋಗ ಅಧಿವೇಶನಗಳನ್ನು ನಡೆಸಲು ಹಾರ್ಟ್‌ ಫುಲ್‌ ನೆಸ್ ಸಂಸ್ಥೆ ಮತ್ತು ಯೋಗ ಪ್ರಮಾಣೀಕರಣ ಮಂಡಳಿಯ ಪ್ರಯತ್ನಗಳನ್ನು ಸಚಿವರು ಶ್ಲಾಘಿಸಿದರು.

ಕೇಂದ್ರ ಆಯುಷ್ ಸಚಿವಾಲಯದ ಜಂಟಿ ಕಾರ್ಯದರ್ಶಿ ಶ್ರೀಮತಿ ಮೊನಾಲಿಸಾ ದಾಶ್ ಅವರು ಹಾರ್ಟ್‌ ಫುಲ್‌ ನೆಸ್ ಸಂಸ್ಥೆಯ ಕೊಡುಗೆಯನ್ನು ಶ್ಲಾಘಿಸಿದರು ಹಾಗೂ, "ಯೋಗವು ಬೆಳೆಸಲು ಬಯಸುವ ಶಾಂತಿ ಮತ್ತು ಸಮತೋಲನವನ್ನು "ಕನ್ಹ ಶಾಂತಿ ವನಮ್" ಪ್ರತಿಬಿಂಬಿಸುತ್ತದೆ. ಈ ಸಭೆಯು ಆರೋಗ್ಯ ಮತ್ತು ಏಕತೆಯ ಕಡೆಗೆ ರಾಷ್ಟ್ರವ್ಯಾಪಿ ಆಂದೋಲನವನ್ನು ಹುಟ್ಟುಹಾಕುವ ಉದ್ದೇಶವನ್ನು ಹೊಂದಿದೆ" ಎಂದು ಹೇಳಿದರು.

ಈ ಕಾರ್ಯಕ್ರಮದಲ್ಲಿ ಹಾರ್ಟ್‌ ಫುಲ್‌ ನೆಸ್ ಅಧ್ಯಕ್ಷರಾದ ಶ್ರೀ ಕಮಲೇಶ್ ಡಿ. ಪಟೇಲ್ (ದಾಜಿ); ಲೋಕಸಭಾ ಸದಸ್ಯರಾದ ಶ್ರೀಮತಿ ಡಿ. ಕೆ. ಅರುಣಾ; ಆಯುಷ್ ಸಚಿವಾಲಯದ ಕಾರ್ಯದರ್ಶಿ ಪದ್ಮಶ್ರೀ ವೈದ್ಯ ರಾಜೇಶ್ ಕೋಟೆಚಾ; ಆಯುಷ್ ಸಚಿವಾಲಯ, ರಾಜ್ಯ ಆಡಳಿತ ಮತ್ತು ಪ್ರಮುಖ ಯೋಗ ಸಂಸ್ಥೆಗಳ ಪ್ರತಿನಿಧಿಗಳು ಹಾಗೂ ಇತರ ಗಣ್ಯರು ಉಪಸ್ಥಿತರಿದ್ದರು.

ಯೋಗ ಮಹೋತ್ಸವದ ಪ್ರಮುಖ ಅಂಶವೆಂದರೆ ಸಾಮಾನ್ಯ ಯೋಗ ಶಿಷ್ಟಾಚಾರದ (ಸಿವೈಪಿ) ಸಾಮೂಹಿಕ ಪ್ರದರ್ಶನ. ಈ ಅಧಿವೇಶನವನ್ನು ಎಂ.ಡಿ.ಎನ್.ಐ.ವೈ ನಿರ್ದೇಶಕ ಪ್ರೊ. (ಡಾ.) ಕಾಶಿನಾಥ್ ಸಮಗಂಡಿ ಮತ್ತು ಎಂ.ಡಿ.ಎನ್.ಐ.ವೈ ಯೋಗ ಬೋಧಕರು ನೇತೃತ್ವ ವಹಿಸಿದ್ದರು. ಸಿವೈಪಿ ಅಭ್ಯಾಸದ ನಂತರ, ದಾಜಿ ಅವರ ನೇತೃತ್ವದಲ್ಲಿ ಹಾರ್ಟ್‌ ಫುಲ್‌ ನೆಸ್ ಧ್ಯಾನ ಅಧಿವೇಶನ ನಡೆಯಿತು. ಜೂನ್ 21 ರಂದು ಆಚರಿಸಲಾಗುವ ಐಡಿವೈ 2026ರ ರಾಷ್ಟ್ರವ್ಯಾಪಿ ಯೋಗಾಸನ ವ್ಯವಸ್ಥೆ ನಿರ್ಮಾಣದಲ್ಲಿ ಈ ಕಾರ್ಯಕ್ರಮವು ಮಹತ್ವದ ಮೈಲಿಗಲ್ಲನ್ನು ಗುರುತಿಸುತ್ತದೆ. ಕಾರ್ಯಕ್ರಮದ ಇತರ ಮುಖ್ಯಾಂಶಗಳಲ್ಲಿ ನಾಟ್ಯಯೋಗ ಪ್ರದರ್ಶನ, ಕೊರಿಯನ್ ತಂಡದಿಂದ ಯೋಗ ಸಮ್ಮಿಳನ ಪ್ರಸ್ತುತಿ ನಡೆಯಿತು.

ಕಜಕಿಸ್ತಾನ್, ಲೆಸೊಥೊ, ಬಲ್ಗೇರಿಯಾ, ಕ್ಯೂಬಾ, ನಮೀಬಿಯಾ, ಯುನೈಟೆಡ್ ಕಿಂಗ್‌ ಡಮ್, ಕೆನಡಾ ಮತ್ತು ಆಸ್ಟ್ರೇಲಿಯಾ ಸೇರಿದಂತೆ 20 ಕ್ಕೂಹೆಚ್ಚು ದೇಶಗಳ ರಾಯಭಾರ ಕಚೇರಿಗಳು, ದೂತಾವಾಸಗಳು ಮತ್ತು ಅಂತಾರಾಷ್ಟ್ರೀಯ ಸಂಸ್ಥೆಗಳ ಗಣ್ಯರು ಮತ್ತು ಪ್ರತಿನಿಧಿಗಳು 50 ದಿನಗಳಹಿನ್ನೆಣಿಕೆಯ ಕಾರ್ಯಕ್ರಮದಲ್ಲಿ ಭಾಗವಹಿಸಿದರು, ಇದು ಯೋಗದ ಬೆಳೆಯುತ್ತಿರುವ ಜಾಗತಿಕ ಹೆಜ್ಜೆಗುರುತನ್ನು ಪ್ರತಿಬಿಂಬಿಸುತ್ತದೆ.

"ಕನ್ಹಾ ಶಾಂತಿ ವನಂ"ನಲ್ಲಿ ನಡೆಯುವ ಯೋಗ ಮಹೋತ್ಸವವು ಐಡಿವೈ 2026 ಕ್ಕಿಂತ ಒಂದು ಮಹತ್ವದ ಹೆಜ್ಜೆಯನ್ನು ಸೂಚಿಸುತ್ತದೆ, ಇದು ಯೋಗದ ಮೂಲಕ ಸಮಗ್ರ ಆರೋಗ್ಯ, ಸ್ವಾಸ್ಥ್ಯ ಮತ್ತು ಸುಸ್ಥಿರ ಜೀವನವನ್ನು ಉತ್ತೇಜಿಸುವ ಭಾರತ ಸರ್ಕಾರದ ಬದ್ಧತೆಯನ್ನು ಪುನರುಚ್ಚರಿಸುತ್ತದೆ.

*****