പശ്ചിമേഷ്യയിലെ മാറിക്കൊണ്ടിരിക്കുന്ന സാഹചര്യങ്ങളുടെ പശ്ചാത്തലത്തിൽ ഏകോപിത പ്രതികരണ നടപടികളിലൂടെ പ്രധാന മേഖലകളിലെ തയ്യാറെടുപ്പുകളും പ്രവര്‍ത്തനങ്ങളിലെ തുടർച്ചയും ഉറപ്പാക്കാൻ ഇന്ത്യാ ഗവണ്മെൻ്റ് സജീവമായി ഇടപെടുന്നു. ഊർജ്ജ ലഭ്യത, സമുദ്ര ഗതാഗതം, പ്രവാസികളുടെ സുരക്ഷ എന്നിവയുമായി ബന്ധപ്പെട്ട് സ്വീകരിച്ച നടപടികളുടെ വിവരങ്ങൾ താഴെ:
ഇന്ധന ലഭ്യതയും വിതരണവും
ഹോർമുസ് കടലിടുക്കുമായി ബന്ധപ്പെട്ട നിലവിലെ സാഹചര്യത്തിൽ രാജ്യത്തുടനീളം പെട്രോളിയം ഉൽപ്പന്നങ്ങളുടെയും എൽപിജിയുടെയും തടസ്സമില്ലാത്ത ലഭ്യത ഉറപ്പാക്കാൻ പെട്രോളിയം പ്രകൃതി വാതക മന്ത്രാലയം വിവിധ നടപടികൾ സ്വീകരിച്ചുവരികയാണ്. മന്ത്രാലയം നൽകുന്ന വിവരങ്ങൾ:

പൊതുജനങ്ങൾക്കുള്ള നിർദേശങ്ങളും ബോധവൽക്കരണവും

• രാജ്യത്തെ എല്ലാ പെട്രോൾ പമ്പുകളിലും പെട്രോൾ, ഡീസൽ എന്നിവയുടെ മതിയായ സ്റ്റോക്ക് ലഭ്യമാണ്. അതിനാൽ പൊതുജനങ്ങൾ പരിഭ്രാന്തരായി ഇന്ധനം വാങ്ങിക്കൂട്ടേണ്ട സാഹചര്യമില്ല.

• കിംവദന്തികൾ സൂക്ഷിക്കുക, ശരിയായ വിവരങ്ങൾക്ക് ഔദ്യോഗിക ഉറവിടങ്ങളെ ആശ്രയിക്കുക.

• എൽപിജി ഉപഭോക്താക്കൾ ഡിജിറ്റൽ ബുക്കിംഗ് പ്ലാറ്റ്‌ഫോമുകൾ ഉപയോഗിക്കാനും വിതരണക്കാരെ സന്ദർശിക്കുന്നത് ഒഴിവാക്കാനും അഭ്യർത്ഥിക്കുന്നു.

• പിഎൻജി, ഇലക്ട്രിക് അല്ലെങ്കിൽ ഇൻഡക്ഷൻ കുക്ക്‌ടോപ്പുകൾ പോലുള്ള ബദൽ പാചക ഇന്ധന മാര്‍ഗങ്ങള്‍ ഉപയോഗിക്കാൻ പൗരന്മാരെ പ്രോത്സാഹിപ്പിക്കുന്നു.

• നിലവിലെ സാഹചര്യത്തിൽ ദൈനംദിന ഉപയോഗത്തിൽ ഊർജ്ജ സംരക്ഷണ മാർഗ്ഗങ്ങൾ സ്വീകരിക്കാൻ എല്ലാ പൗരന്മാരോടും അഭ്യർത്ഥിക്കുന്നു.

സർക്കാർ തയ്യാറെടുപ്പുകളും വിതരണ നിർവഹണ നടപടികളും

• നിലവിലെ ഭൗമരാഷ്ട്രീയ സാഹചര്യങ്ങൾക്കിടയിലും, ഗാർഹിക എൽപിജി, ഗാർഹിക പിഎൻജി, സിഎൻജി എന്നിവയുടെ വിതരണം 100 ശതമാനവും സർക്കാർ ഉറപ്പാക്കിയിട്ടുണ്ട്.

• വാണിജ്യ എൽപിജി വിതരണത്തിൽ, ആശുപത്രികൾ, വിദ്യാഭ്യാസ സ്ഥാപനങ്ങൾ എന്നിവയ്ക്ക് മുൻഗണന നൽകിയിട്ടുണ്ട്. ഇതിനുപുറമെ, ഔഷധനിർമാണം, സ്റ്റീൽ, വാഹനനിര്‍മാണം, വിത്ത്, കൃഷി മുതലായവയ്ക്കും മുൻഗണന നൽകിയിട്ടുണ്ട്. മാത്രമല്ല, കുടിയേറ്റ തൊഴിലാളികൾക്ക് നല്‍കുന്ന അഞ്ചുകിലോ എഫ്.ടി.എൽ സിലിണ്ടറുകളുടെ വിതരണം 2026 മാർച്ച് 2, 3 തീയതികളിലെ ശരാശരി പ്രതിദിന വിതരണത്തിൻ്റെ അടിസ്ഥാനത്തിൽ ഇരട്ടിയാക്കിയിട്ടുമുണ്ട്.

• എണ്ണ സംസ്കരണശാലകളിലെ ഉല്പാദന വർധന, സിലിണ്ടർ ബുക്കിങ് ഇടവേള നഗരപ്രദേശങ്ങളിൽ 21-ൽ നിന്ന് 25 ദിവസമായും ഗ്രാമപ്രദേശങ്ങളിൽ 45 ദിവസമായും ക്രമീകരണം, വിതരണത്തിന് മുൻഗണനാ മേഖലാ നിര്‍ണയം തുടങ്ങി വിതരണ-ആവശ്യകത മേഖലകളിൽ യുക്തിസഹമായ നിരവധി നടപടികൾ ഗവണ്മെൻ്റ് ഇതിനകം നടപ്പാക്കുകയും ചെയ്തു.

• എൽ.പി.ജി ആവശ്യകതയുടെ സമ്മർദം കുറയ്ക്കാന്‍ മണ്ണെണ്ണ, കൽക്കരി തുടങ്ങിയ ബദൽ ഇന്ധനങ്ങൾ ലഭ്യമാക്കിയിട്ടുണ്ട്.

• ചെറുകിട-ഇടത്തരം ഉപഭോക്താക്കൾക്ക് വിതരണം ചെയ്യുന്നതിന് സംസ്ഥാനങ്ങൾക്ക് അധിക കൽക്കരി അനുവദിക്കാൻ കൽക്കരി മന്ത്രാലയം കോൾ ഇന്ത്യ ലിമിറ്റഡിനോടും സിംഗരേണി കോളിയറീസിനോടും നിർദേശിച്ചു.

• ഗാർഹിക-വാണിജ്യ ഉപഭോക്താക്കൾക്ക് പുതിയ പി.എൻ.ജി കണക്ഷനുകൾ നല്‍കുന്ന നടപടി സുഗമമാക്കാൻ സംസ്ഥാനങ്ങൾക്ക് നിർദേശം നൽകി.

സംസ്ഥാന/കേന്ദ്രഭരണ പ്രദേശങ്ങളുമായുള്ള ഏകോപിത പ്രവർത്തനങ്ങളും ഔദ്യോഗിക സംവിധാനങ്ങളും

• 1955-ലെ അവശ്യസാധന നിയമം, 2000-ത്തിലെ എൽ.പി.ജി നിയന്ത്രണ ഉത്തരവ് എന്നിവ പ്രകാരം വിതരണം നിരീക്ഷിക്കാനും പൂഴ്ത്തിവെപ്പിനും കരിഞ്ചന്തയ്ക്കുമെതിരെ നടപടിയെടുക്കാനും സംസ്ഥാന സർക്കാരുകൾക്ക് അധികാരമുണ്ട്.

• പെട്രോൾ, ഡീസൽ, എൽ.പി.ജി എന്നിവയടക്കം അവശ്യസാധനങ്ങളുടെ വിതരണ സാഹചര്യം നിരീക്ഷിക്കുന്നതിലും നിയന്ത്രിക്കുന്നതിലും സംസ്ഥാന/കേന്ദ്രഭരണ പ്രദേശങ്ങളിലെ ഗവണ്മെൻ്റുകൾക്ക് പ്രധാന പങ്കുണ്ട്. വിവിധ കത്തുകളിലൂടെയും വീഡിയോ കോൺഫറൻസുകളിലൂടെയും ഇന്ത്യാ ഗവണ്മെൻ്റ് ഇക്കാര്യം എല്ലാ സംസ്ഥാനങ്ങളോടും കേന്ദ്രഭരണ പ്രദേശങ്ങളോടും ആവർത്തിച്ച് വ്യക്തമാക്കിയിട്ടുണ്ട്.

• ഇന്ധന ലഭ്യതയെക്കുറിച്ച് പൗരന്മാർക്ക് ഉറപ്പുനൽകുന്നതിന് സജീവ പൊതുജന ആശയവിനിമയം അനിവാര്യമാണെന്ന് 2026 മാർച്ച് 27, 2026 ഏപ്രിൽ 2 തീയതികളിലെ കത്തുകളിലൂടെ ഇന്ത്യാ ഗവണ്മെൻ്റ് വ്യക്തമാക്കിയിട്ടുണ്ട്. സംസ്ഥാനങ്ങളുമായും കേന്ദ്രഭരണ പ്രദേശങ്ങളുമായും പതിവ് അവലോകന യോഗങ്ങൾ ചേർന്നു വരുന്നു. ഈ സാഹചര്യത്തിൽ 2026 ഏപ്രിൽ 2-ന് പെട്രോളിയം പ്രകൃതിവാതക മന്ത്രാലയ സെക്രട്ടറിയുടെ അധ്യക്ഷതയിലും 2026 ഏപ്രിൽ 6-ന് പെട്രോളിയം പ്രകൃതിവാതക മന്ത്രാലയ സെക്രട്ടറി, വാര്‍ത്താവിതരണ പ്രക്ഷേപണ മന്ത്രാലയ സെക്രട്ടറി, ഉപഭോക്തൃ കാര്യ മന്ത്രാലയ സെക്രട്ടറി എന്നിവരുടെ സംയുക്ത അധ്യക്ഷതയിലും യോഗങ്ങൾ ചേർന്നു. ഈ യോഗങ്ങളിൽ താഴെ പറയുന്ന കാര്യങ്ങളിലാണ് ഊന്നൽ നൽകിയത്:

* പ്രതിദിന പത്രക്കുറിപ്പുകളും പതിവ് പൊതുനിർദേശങ്ങളും പുറപ്പെടുവിക്കുക.

* സമൂഹമാധ്യമങ്ങളിലെ വ്യാജവാർത്തകളും തെറ്റായ വിവരങ്ങളും സജീവമായി നിരീക്ഷിക്കുകയും പ്രതിരോധിക്കുകയും ചെയ്യുക.

* ജില്ലാ ഭരണകൂടങ്ങളുടെ നേതൃത്വത്തിൽ പ്രതിദിന പരിശോധനകൾ ശക്തമാക്കുകയും എണ്ണക്കമ്പനികളുമായി ചേർന്ന് പരിശോധന നടപടികള്‍ തുടരുകയും ചെയ്യുക.

* അതത് സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും  വാണിജ്യ എൽ.പി.ജി വിഹിതവുമായി ബന്ധപ്പെട്ട ഉത്തരവുകൾ പുറപ്പെടുവിക്കുക.

* സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും അധികമായി അനുവദിച്ച മണ്ണെണ്ണയുടെ വിതരണ ഉത്തരവുകൾ പുറപ്പെടുവിക്കുക.

 * പി.എൻ.ജി ഉപയോഗവും ബദൽ ഇന്ധനങ്ങളും പ്രോത്സാഹിപ്പിക്കുക.

  * എൽ.പി.ജി വിതരണത്തിൽ ഗാർഹിക ആവശ്യങ്ങൾക്ക് പ്രത്യേകം മുൻഗണന നൽകുകയും വിതരണ സ്ഥിരത ഉറപ്പാക്കുന്നതിന് അഞ്ചുകിലോ എഫ്.ടി.എൽ സിലിണ്ടറുകളുടെ ലക്ഷ്യാധിഷ്ഠിത വിതരണം നടപ്പാക്കുകയും ചെയ്യുക.
 

• പൂഴ്ത്തിവെപ്പും കരിഞ്ചന്തയും തടയുന്നതിന്  എല്ലാ സംസ്ഥാനങ്ങളും കേന്ദ്രഭരണ പ്രദേശങ്ങളും കൺട്രോൾ റൂമുകളും ജില്ലാ നിരീക്ഷണ സമിതികളും സ്ഥാപിച്ചിട്ടുണ്ട്.

• പല സംസ്ഥാനങ്ങളും കേന്ദ്രഭരണ പ്രദേശങ്ങളും വിതരണ സാഹചര്യം വിശദീകരിക്കുന്നതിൻ്റെ ഭാഗമായി കൃത്യമായ ഇടവേളകളിൽ പത്രക്കുറിപ്പുകൾ പുറത്തിറക്കുകയും പതിവ് വാർത്താ സമ്മേളനങ്ങൾ നടത്തിവരികയും ചെയ്യുന്നു.

നിയമനിർവഹണവും നിരീക്ഷണ നടപടികളും

• എൽ.പി.ജി പൂഴ്ത്തിവെപ്പിനും കരിഞ്ചന്തയ്ക്കുമെതിരെ രാജ്യത്ത് നിയമനിർവഹണ നടപടികൾ തുടരുകയാണ്. ഇന്നലെ മാത്രം രാജ്യവ്യാപകമായി 2100-ലധികം പരിശോധനകള്‍ നടത്തി.

• പൊതുമേഖലാ എണ്ണക്കമ്പനികൾ മിന്നൽ പരിശോധനകൾ ശക്തമാക്കുകയും ഇന്നലെ വരെ 310 എൽ.പി.ജി വിതരണക്കാർക്കെതിരെ പിഴ ചുമത്തുകയും 70 എൽ.പി.ജി വിതരണ ഏജൻസികളെ സസ്പെൻഡ് ചെയ്യുകയും ചെയ്തിട്ടുണ്ട്. 

എൽ.പി.ജി  വിതരണം

ഗാർഹിക എൽ.പി.ജി വിതരണ നില:

• നിലവിലെ ഭൗമരാഷ്ട്രീയ സാഹചര്യം എൽ.പി.ജി വിതരണത്തെ ബാധിക്കുന്നത് തുടരുന്നുണ്ട്.

• ഗാർഹിക എൽ.പി.ജി വിതരണത്തിന് സർക്കാർ മുൻഗണന നൽകിയിട്ടുണ്ട്.

• എൽ.പി.ജി വിതരണ ഏജൻസികളിൽ ഒരിടത്തും സ്റ്റോക്ക് തീരുന്ന സാഹചര്യം റിപ്പോർട്ട് ചെയ്തിട്ടില്ല.

• എൽ.പി.ജി സിലിണ്ടറുകളുടെ ഓണ്‍ലൈന്‍ ബുക്കിങ് ഇന്നലെ വ്യാവസായികാടിസ്ഥാനത്തിൽ ഏകദേശം 98 ശതമാനമായി വർധിച്ചു.

• ദുരുപയോഗം തടയുന്നതിനായി ഏര്‍പ്പെടുത്തിയ 'ഡെലിവറി ഓതൻ്റിക്കേഷൻ കോഡ്' (ഡി.എ.സി) അധിഷ്ഠിത വിതരണം 94 ശതമാനത്തിലധികമായി ഉയർന്നു. ഉപഭോക്താവിൻ്റെ രജിസ്റ്റർ ചെയ്ത മൊബൈൽ നമ്പറിലേക്കാണ് ഡി.എ.സി ലഭിക്കുന്നത്.

• 25.04.2026 ന്, 51.8 ലക്ഷത്തിലധികം ഗാർഹിക എൽപിജി സിലിണ്ടറുകൾ വിതരണം ചെയ്തു.

വാണിജ്യ എൽ.പി.ജി വിഹിതവും വിതരണ നടപടികളും

• ആകെ വാണിജ്യ എൽ.പി.ജി വിഹിതം പ്രതിസന്ധിക്ക് മുൻപത്തെ വിതരണത്തിൻ്റെ 70 ശതമാനത്തോളമായി വർധിപ്പിച്ചു. ഇതിൽ 10 ശതമാനം പരിഷ്കരണങ്ങളുമായി ബന്ധപ്പെട്ട വിഹിതമാണ്.

• ഓരോ സംസ്ഥാനത്തും ലഭ്യമായ അഞ്ചുകിലോ എഫ്.ടി.എൽ സിലിണ്ടറുകളുടെ പ്രതിദിന അളവ് 2026 മാർച്ച് 21-ലെ കത്തിൽ പരാമർശിച്ച 20 ശതമാനം എന്ന പരിധിക്ക് പുറമെ 2026 മാർച്ച് 2, 3 തീയതികളിൽ കുടിയേറ്റ തൊഴിലാളികൾക്ക് നൽകിയ ശരാശരി പ്രതിദിന സിലിണ്ടറുകളുടെ എണ്ണത്തിൻ്റെ അടിസ്ഥാനത്തിൽ ഇരട്ടിയാക്കിയതായി 2026 ഏപ്രിൽ 6-ലെ കത്തിലൂടെ ഇന്ത്യാ ഗവണ്മെൻ്റ് അറിയിച്ചു. ഈ അഞ്ചുകിലോ എഫ്.ടി.എൽ സിലിണ്ടറുകൾ എണ്ണക്കമ്പനികളുടെ സഹായത്തോടെ അതത് സംസ്ഥാനത്തെ കുടിയേറ്റ തൊഴിലാളികൾക്ക് മാത്രം വിതരണം ചെയ്യുന്നതിന് സംസ്ഥാന ഗവണ്മെൻ്റുകൾക്ക് വിട്ടുനൽകിയിട്ടുണ്ട്.

• 2026 ഏപ്രിൽ 1 മുതൽ ഇതുവരെ 19.44 ലക്ഷത്തിലധികം അഞ്ചുകിലോ എഫ്.ടി.എൽ സിലിണ്ടറുകൾ വിറ്റഴിച്ചു. 

• ഇന്നലെ മാത്രം രാജ്യത്ത് ഏകദേശം 82,000 അഞ്ചുകിലോ എഫ്.ടി.എൽ സിലിണ്ടറുകളാണ് വിറ്റത്.  

• 2026 ഏപ്രിൽ 3 മുതൽ പൊതുമേഖലാ എണ്ണക്കമ്പനികൾ അഞ്ചുകിലോ എഫ്.ടി.എൽ സിലിണ്ടറുകളുമായി ബന്ധപ്പെട്ട് 8950-ലധികം ബോധവല്‍ക്കരണ ക്യാമ്പുകൾ സംഘടിപ്പിച്ചു. ഇതിലൂടെ 1,42,000-ലേറെ എഫ്.ടി.എൽ സിലിണ്ടറുകൾ വിൽക്കാനായി.  

• ഇന്നലെ നടത്തിയ 190-ലേറെ ക്യാമ്പുകളിലൂടെ 3846 എഫ്.ടി.എൽ സിലിണ്ടറുകൾ വിറ്റു.

• ഐ.ഒ.സി.എൽ, എച്ച്.പി.സി.എൽ, ബി.പി.സി.എൽ എന്നിവിടങ്ങളിലെ എക്സിക്യൂട്ടീവ് ഡയറക്ടർമാരടങ്ങുന്ന മൂന്നംഗ സമിതി സംസ്ഥാന അധികാരികളുമായും വ്യാവസായിക സ്ഥാപനങ്ങളുമായും ഏകോപനത്തോടെ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും വാണിജ്യ എൽ.പി.ജി വിതരണം ആസൂത്രണം ചെയ്യുന്നുണ്ട്.

• 2026 ഏപ്രിലില്‍ (ഏപ്രിൽ 25 വരെ) ആകെ 1,64,655 മെട്രിക് ടൺ (19 കിലോയുടെ 86.66 ലക്ഷത്തിലധികം എൽ.പി.ജി സിലിണ്ടറുകൾക്ക് തുല്യം) വാണിജ്യ എൽ.പി.ജി വില്പന നടത്തി.  

• 25.04.2026 ന് 9131 മെട്രിക് ടൺ വാണിജ്യ എൽപിജി (ഏകദേശം 4.80 ലക്ഷം - 19 കിലോഗ്രാം സിലിണ്ടറുകൾക്ക് തുല്യം) വില്പന നടത്തി.

പ്രകൃതിവാതക വിതരണവും പി.എൻ.ജി വിപുലീകരണ നടപടികളും

• ഉപഭോക്താക്കൾക്ക് മുൻഗണന നൽകിക്കൊണ്ട് ഗാർഹിക പി.എൻ.ജി, ഗതാഗത മേഖലയിലെ സി.എൻ.ജി എന്നിവയുടെ 100 ശതമാനം വിതരണം ഉറപ്പാക്കി.

• വളം നിര്‍മാണ പ്ലാൻ്റുകളുടെ ആകെ ഗ്യാസ് വിഹിതം അവരുടെ ആറുമാസത്തെ ശരാശരി ഉപഭോഗത്തിൻ്റെ ഏകദേശം 95 ശതമാനമായി വർധിപ്പിച്ചു.

• കൂടാതെ  സിറ്റി ഗ്യാസ് വിതരണ ശൃംഖലകൾ വഴി നടത്തുന്ന വിതരണം ഉൾപ്പെടെ മറ്റ് വ്യാവസായിക, വാണിജ്യ മേഖലകളിലെ ഗ്യാസ് വിതരണം 80 ശതമാനം വരെ ഉയര്‍ത്തി.  

• വാണിജ്യ എൽ.പി.ജി ലഭ്യതയിലെ ആശങ്കകൾ പരിഹരിക്കുന്നതിന് വിവിധ ഭൂമിശാസ്ത്ര മേഖലകളിലെ ഹോട്ടലുകൾ, റെസ്റ്റോറൻ്റുകൾ, കാൻ്റീനുകൾ തുടങ്ങിയ വാണിജ്യ സ്ഥാപനങ്ങൾക്ക് പി.എൻ.ജി കണക്ഷനുകൾക്ക് മുൻഗണന നല്‍കാന്‍ സിറ്റി ഗ്യാസ് വിതരണ സ്ഥാപനങ്ങൾക്ക് നിർദേശം നൽകി.

• ഐ.ജി.എൽ, എം.ജി.എൽ‌, ഗെയിൽ ഗ്യാസ്, ബി.പി.സി.എൽ തുടങ്ങിയ സിറ്റി ഗ്യാസ് വിതരണ കമ്പനികൾ ഗാർഹിക-വാണിജ്യ പി.എൻ.ജി കണക്ഷനുകൾക്ക് ആനുകൂല്യങ്ങൾ വാഗ്ദാനം ചെയ്യുന്നു.

• സിറ്റി ഗ്യാസ് വിതരണ ശൃംഖലകളുടെ വിപുലീകരണത്തിനാവശ്യമായ അംഗീകാരങ്ങൾ വേഗത്തിലാക്കാന്‍ സംസ്ഥാനങ്ങളോടും കേന്ദ്ര മന്ത്രാലയങ്ങളോടും അഭ്യർത്ഥിച്ചു.

• എൽ.പി.ജിയിൽ നിന്ന് പി.എൻ.ജിയിലേക്ക് ദീർഘകാല മാറ്റത്തിന് സഹായിക്കുന്ന സാഹചര്യങ്ങളില്‍ സംസ്ഥാനങ്ങൾക്ക് വാണിജ്യ എൽ.പി.ജി വിഹിതത്തിൽ 10 ശതമാനം അധികം നൽകാമെന്ന് 2026 മാര്‍ച്ച് 18-ലെ കത്തിലൂടെ ഇന്ത്യാ ഗവണ്മെൻ്റ് എല്ലാ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും വാഗ്ദാനം നല്‍കിയിട്ടുണ്ട്.

• 22 സംസ്ഥാനങ്ങൾ/കേന്ദ്രഭരണ പ്രദേശങ്ങൾ പി.എൻ.ജി വിപുലീകരണ പരിഷ്കരണങ്ങളുമായി ബന്ധപ്പെട്ട ഈ അധിക വാണിജ്യ എൽ.പി.ജി വിഹിതം നിലവിൽ കൈപ്പറ്റുന്നുണ്ട്.

• സിറ്റി ഗ്യാസ് വിതരണ അടിസ്ഥാന സൗകര്യങ്ങളുമായി ബന്ധപ്പെട്ട അപേക്ഷകൾ മുൻഗണനാടിസ്ഥാനത്തിൽ പരിഗണിക്കുന്നതിന് ഉപരിതല ഗതാഗത-ഹൈവേ മന്ത്രാലയം 2026 മാര്‍ച്ച് 24-ലെ കത്തിലൂടെ മൂന്ന് മാസക്കാലയളവിലേക്ക് പ്രത്യേക 'അതിവേഗ അംഗീകാര ചട്ടക്കൂട്' നടപ്പാക്കി.

• 2026 മാർച്ച് 24-ലെ ഗസറ്റ് വിജ്ഞാപനത്തിലൂടെ ഇന്ത്യാ ഗവണ്മെൻ്റ് 1955-ലെ അവശ്യസാധന നിയമത്തിന് കീഴിൽ 'പ്രകൃതിവാതക പെട്രോളിയം ഉല്പന്ന വിതരണ ഉത്തരവ് 2026' വിജ്ഞാപനം ചെയ്തു. രാജ്യത്തുടനീളം പൈപ്പ് ലൈനുകൾ സ്ഥാപിക്കാനും വിപുലീകരിക്കാനും ലളിതവും സമയബന്ധിതവുമായ ചട്ടക്കൂട് നല്‍കുന്ന ഈ ഉത്തരവ് അനുമതികളിലെ കാലതാമസവും ഭൂമി ലഭ്യമാക്കുന്നതിലെ തടസ്സങ്ങളും പരിഹരിച്ച് പാർപ്പിട മേഖലകളിലടക്കം പ്രകൃതിവാതക അടിസ്ഥാനസൗകര്യങ്ങളുടെ അതിവേഗ വികസനം സാധ്യമാക്കാന്‍ സഹായിക്കും. പി.എൻ.ജി ശൃംഖലയുടെ വളർച്ച ത്വരിതപ്പെടുത്തുന്ന ഈ നടപടി സേവനലഭ്യത കുറഞ്ഞ മേഖലകളിലെ സേവനവിതരണം മെച്ചപ്പെടുത്തുമെന്നും സംശുദ്ധ ഇന്ധനങ്ങളിലേക്ക് മാറാന്‍ പിന്തുണയ്ക്കുമെന്നും പ്രതീക്ഷിക്കുന്നു. ഊർജ്ജ സുരക്ഷ ശക്തിപ്പെടുത്താനും ഇന്ത്യയുടെ ഗ്യാസ് അധിഷ്ഠിത സമ്പദ്‌ വ്യവസ്ഥയെ മുന്നോട്ട് നയിക്കാനും ഇതിലൂടെ സാധിക്കും.

• ഗാര്‍ഹിക പിഎൻജി കണക്ഷനുകൾ വേഗത്തിലാക്കാൻ സിറ്റി ഗ്യാസ് വിതരണ സ്ഥാപനങ്ങൾക്ക് പി.എൻ.ജി.ആർ.ബി നിർദേശം നൽകി. കൂടാതെ, പി.എൻ.ജി വിപുലീകരണത്തിൻ്റെ വേഗം നിലനിർത്തുന്നതിന് 'ദേശീയ പി.എൻ.ജി യ‍ജ്ഞം 2.0' 2026 ജൂണ്‍ 30 വരെ നീട്ടിയിട്ടുണ്ട്.

• സംശുദ്ധവും സുരക്ഷിതവും സ്വയംപര്യാപ്തവുമായ ഊർജ്ജ ഭാവി പ്രോത്സാഹിപ്പിക്കുന്നതിന് ഇന്ത്യാ ഗവണ്മെൻ്റ് സംസ്ഥാന കംപ്രസ്ഡ് ബയോഗ്യാസ് മാതൃകാ നയം തയ്യാറാക്കിയിട്ടുണ്ട്. കംപ്രസ്ഡ് ബയോഗ്യാസ് വികസനത്തിന് നിക്ഷേപക സൗഹൃദവും എളുപ്പത്തില്‍ നടപ്പാക്കാവുന്നതുമായ സാഹചര്യം സൃഷ്ടിക്കാൻ സംസ്ഥാനങ്ങളെ പ്രാപ്തമാക്കുന്ന സമഗ്രവും ലളിതവുമായ വഴികാട്ടിയായി ഈ മാതൃകാ നയം നിലകൊള്ളും. നയം തിരഞ്ഞെടുക്കുന്ന സംസ്ഥാനങ്ങൾക്ക് അധിക വാണിജ്യ എൽ.പി.ജി വിഹിതത്തിൻ്റെ അടുത്ത ഗഡുവിൽ മുൻഗണന നൽകും.

• സിറ്റി ഗ്യാസ് വിതരണ ശൃംഖലകൾക്കും അടിസ്ഥാന സൗകര്യങ്ങൾക്കും 15 ദിവസത്തിനകം പ്രവർത്തനാനുമതി നൽകുന്നതിനാവശ്യമായ നിർദേശങ്ങൾ സംസ്ഥാന മലിനീകരണ നിയന്ത്രണ ബോർഡുകൾക്കും മലിനീകരണ നിയന്ത്രണ സമിതികൾക്കും നൽകാൻ കേന്ദ്ര പരിസ്ഥിതി-വന-കാലാവസ്ഥാ വ്യതിയാന മന്ത്രാലയം 2026 ഏപ്രില്‍ 7-ലെ ഉത്തരവിലൂടെ കേന്ദ്ര മലിനീകരണ നിയന്ത്രണ ബോർഡിനോട് നിർദേശിച്ചു.

• 2026 മാർച്ച് മുതല്‍ 5.45 ലക്ഷത്തിലധികം പി.എൻ.ജി കണക്ഷനുകൾ ലഭ്യമാക്കി. കൂടാതെ 2.62 ലക്ഷം അധിക കണക്ഷനുകൾക്ക് അടിസ്ഥാന സൗകര്യങ്ങളൊരുക്കുകയും ചെയ്തു. ഇതോടെ ആകെ കണക്ഷനുകൾ 8.07 ലക്ഷമായി ഉയര്‍ന്നു. 6.14 ലക്ഷം ഉപഭോക്താക്കൾ പുതിയ കണക്ഷനുകൾക്ക് രജിസ്റ്റർ ചെയ്തിട്ടുണ്ട്.

• 2026 ഏപ്രിൽ 25 വരെയുള്ള കണക്കനുസരിച്ച്, 42,500-ലധികം പിഎൻജി ഉപഭോക്താക്കൾ തങ്ങളുടെ എൽപിജി കണക്ഷനുകൾ MYPNGD.in എന്ന വെബ്സൈറ്റ് വഴി സറണ്ടർ ചെയ്തിട്ടുണ്ട്.