ভারতকি সেমিকন্দক্তর এম্বিসনশিং অমসুং ওরিশানা তুংলমচৎকী ওইনা শেম শাবা তেক্নোলোজিগী মফম অমা ওইনা থোরকপগী মশক থোকপা মীকুপ অমদা লৈবাক অসিগী অহানবা এদভান্স 3 দি. চিপ পেকেজিং য়ুনিৎকি য়ুম্ফম ঙসি ইনফো ভেলি, ভুবনেশ্বরদা থম্লে। প্রোজেক্ত অসিনা ভারতকি দোমেস্তিক সেমিকন্দক্তর ইকোসিস্তেম মপাঙ্গল কনখৎহন্নবা অমসুং অৱাংবা থাক্কী ইলেক্ত্রোনিক্স মেন্যুফেকচরিংদা ইরোমদোম লেপচবা ঙম্বা ভারতকি মীৎয়েং অদু মাংলোমদা পুখৎনবা মরুওইবা খোঙথাং অমা ওইরি।

3 দি গ্লাস সোলুসন্না প্রমোত তৌবা হেতেরোজিনস ইনতিগ্রেসন পেকেজিং সোলুসন প্রোজেক্তকি য়ুম্বী সিল অসি মুখ্য মন্ত্রী শ্রী মোহন চরন মাঝি অমসুং রেলৱেজ, ইলেক্ত্রোনিক্স অমসুং ইনফোরমেসন তেক্নোলোজি, অমসুং ইনফোরমেসন অমসুং ব্রোদকাস্তিংগী কেন্দ্রগী মন্ত্রী শ্রী অশ্বিনি বৈষ্ণৌগী মফমদা থমখি। প্রোজেক্ত অসি হৌদোকপগা লোয়ননা ওরিশা অসি মালেমগী খ্বাইদগী অনৌবা চিপ পেকেজিং তেক্নোলোজিশিংগী মনুংদা অমগী ময়ুম ওইনবা শেম শারে।

মীয়াম তিনখিবা অদুদা ৱা ঙাংলদুনা মুখ্য মন্ত্রী শ্রী মোহন চরন মাঝিনা প্রোজেক্ত অসিবু ওরিশা অমসুং জাতিগীদমক পুৱারি ওইরবা মায় পাকপগী নিংশিং য়ুম্বী অমা ওইনা ফোঙদোকখি। মহাক্না হায়খি মদুদি ভারত্তা অহানবা ওইনা এদভান্স 3 দি গ্লাস সোলুসন সেমিকন্দক্তর প্রোজেক্ত অমা লিংখৎলি, মসিনা রাজ্য অসিদা অচৌবা চাওথোকচবা অমা পুরক্লি। মহাক্না নোৎ তৌখি মদুদি ইন্তেল, লোকহিদ মার্তিন অমসুং এপ্লাইদ মেতরিএলগুম্বা মালেমগী তেক্নোলোজিগী লুচিংবশিং অসি অনৌবা মতমগী পেকেজিং তেক্নোলোজিশিংগা মরি লৈনৈ, অমসুং ওরিশাদা মখোয়গী ইন্তরেস্ত অসিনা রাজ্য অসিগী হেনগৎলক্লিবা ইন্দস্ত্রীগী পাঙ্গল অদু উৎলি।

রাজ্য অসিদাা শাবা পোত্থোকশিং অসিনা মথংগী মীরোলগী সেক্তরশিং হায়বদি আর্তিফিসিএল ইনতিলিজেন্স, হায়-পারফোরমেন্স কম্প্যুতিং, দিফেন্স ইলেক্ত্রোনিক্স, তেলিকম্যুনিকেসন, অমসুং এদভান্স দিজিতেল সিস্তেমশিংদা মতেং পাংগনি হায়না মুখ্য মন্ত্রীনা ফ্লেগা তৌখি। মহাক্না মখা তানা হায়খি, “ওরিশানা সেমিকন্দক্তর অমসুং ইলেক্ত্রোনিক্স মেন্যুফেকচরিংদা ভারতনা মশা মরোমদোম লেপচবা ঙম্নবা প্রধান মন্ত্রী শ্রী নরেন্দ্র মোদীগী মীৎয়েং অদু মংফাওনহনবদা মরু ওইবা থৌদাং লৌনবা থৌরাং শেম শারে।”

শ্রী মাঝিনা হায়খি মদুদি কম্পেনি অসিনা প্রোজেক্ত অসিদা চাওরাক্না লুপা করোর ২,০০০ থাদরি অমসুং ফেসিলিতি অসিনা চহি খুদিংগী গ্লাস পেনেল ৭০,০০০ পুথোক্কনি হায়না পানরি, মসিগা লোয়ননা এসেম্বল তৌরবা য়ুনিৎ মিলিয়ন ৫০ অমসুং চাওরাক্না এদভান্স 3 দিঐচআই মোদ্যুল ১৩,০০০ পুথোক্কনি। মহাক্না মখা তানা হায়খি মদুদি ওরিশা অসি লৈবাক অসিগী অমত্তা ঙাইরবা রাজ্য অমা ওইনা থোরক্লে, মফম অদুদা ভারতকি অহানবা কম্পাওন্দা সেমিকন্দক্তর ফেব্রিকেসন য়ুনিৎ অমসুং অহানবা 3 দি গ্লাস সবস্ত্রেৎ পেকেজিং ফেসিলিতি অনিমক লিংখৎলি।

মহাক্না মখা তানা হায়খি ওরিশাদা হেনগৎলক্লিবা সেমিকন্দক্তর ইকোসিস্তেম অসিনা রাজ্য অসিগী রিসোর্সতা য়ুম্ফম ওইবা শেন্মীৎলোন অসি তেক্নোলোজীনা লমজিংবা চাউখৎনবগী সেন্তর অমা ওইহনবদা মতেং পাংলদুনা ইঞ্জিনিয়রিং গ্রেজুএৎশিং, দিপ্লোমা হোলদরশিং, অমসুং আই.তি.আই. গী মহৈরোয়শিংগীদমক্তা অচৌবা স্কেল অমা হাংদোক্লগনি।

মীফম অদুদা শরুক য়াদুনা কেন্দ্রগী মন্ত্রী শ্রী অশ্বিনি বৈষ্ণবনা ওরিশাগী মিয়ামদা মশক থোকপা খোঙথাং অসিগীদমক নুংঙাইবা ফোঙদোকখি অমসুং রাজ্য সরকারনা পিরিবা মতেং অসিবু থাগৎপা ফোঙদোকখি। মহাক্না হায়খি, প্রধান মন্ত্রী শ্রী নরেন্দ্র মোদীগী মীৎয়েং শানবা লুচিংবগী মখাদা ভারতকি সেমিকন্দক্তর সেক্তার অসি য়াম্না থুনা চাওখৎলক্লি, মসিগী ত্রান্সফোরমেশন অসিদা ওরিশানা মরুওইবা কন্ত্রীব্যুতর অমা ওইনা থোরক্লি।

শ্রী বৈষ্ণবনা হায়খি, চৎনবিগী মতুং ইননা মিনরেল, ধাতু অমসুং ইনর্জিগী পাঙ্গলগীদমক খঙনরবা ওরিশা অসি হৌজিক ইলেক্ত্রোনিক্স, আই.তি., সেমিকন্দক্তরগুম্বা অহোঙবা সেক্তরশিংদা লেপ্পা লৈতনা লিংখৎলক্লি। প্রোজেক্ত অসি মখল অসিগী খ্বাইদগী চাওখৎপা মেন্যুফেকচরিং ইনিসিয়েতিবশিংগী মনুংদা অমনি হায়না ফোঙদোক্লদুনা মহাক্না হায়খি মদুদি মসিনা ভারতকি সেমিকন্দক্তর ভেল্যু চেন অসি মশক থোক্না মপাঙ্গল কনখৎহনগনি।

ইলেক্ত্রোনিক্স মেন্যুফেকচরিংদা লৈবাক অসিগী প্রোগ্রেশ অদু ফোঙদোক্লদুনা শ্রী বৈষ্ণবনা হায়খি হৌখিবা চহি ১২দা সেক্তর অসিদা পুথোকপা অসি শরুক ৬ ​​হেনগৎলে। মহাক্না মখা তারদুনা হায়খি, “ভারত অসি হৌজিক মালেমগী অনিশুবা খ্বাইদগী চাওবা মোবাইল ফোন মেন্যুফেকচরর ওইরে অমসুং ২০২৫দা মোবাইল ফোনগী মকোক থোঙবা এক্সপোর্তর অমা ওইনা থোরক্লে।”

মহাক্না মখা তানা খঙহনখি মদুদি ইন্দিয়া সেমিকন্দক্তর মিশনগী মখাদা ওরিশাগীদমক সেমিকন্দক্তর প্রোজেক্ত অনি হান্ননা অয়াবা পিখ্রে, অদুগা ইলেক্ত্রোনিক্স অমসুং সেমিকন্দক্তরগা মরি লৈনবা প্রপোজেল অহুম অমুক পায়পলাইন্দা লৈরি। মহাক্না পনখি, “রাজ্য অসিদা তুংদা শেল থাদবগীদমক ইনতেল য়াওনা মালেমগী অচৌবা কম্পেনিশিংগা লোয়ননা খন্ন-নৈনবসু চত্থরি।”

রেলৱেগী ইনফ্রাস্ত্রকচরগী মতাংদা ৱা ঙাংলদুনা শ্রী বৈষ্ণবনা হায়খি মদুদি হৌজিক ওরিশাদা লুপা করোর ৯০,০০০ হেনবগী প্রোজেক্তশিং পায়খৎলি, মসিনা রেল কনেক্তিবিতিদা মমাঙদা অমুক্তা ওইখিদ্রিবা মওংদা পাকথোক চাওথোকপা অদু উৎলি। মহাক্না মখা তানা হায়খি মদুদি রাজ্য অসিনা রেকোর্দ ওইবা রেলৱে বজেৎ এলোকেসন লুপা করোর ১০,৯২৮ ফংলে, অদুগা অমৃত ভারত স্তেসন স্কীমগী মখাদা স্তেশন ৫৯ অমুক হন্না সেমগৎলি। মহাক্না মখা তানা হায়খি মদুদি ওরিশাগী জিলা ৩০ পুম্নমক থৌরাং তৌরবা ইন্তর্ভেন্সনশিংগী খুত্থাংদা রেল কনেক্তিবিতিগী মখাদা পুরক্লি, মসিগা লোয়ননা বালাশোরদগী বেরহাম্পুর ফাওবগী প্রপোজ তৌরিবা লাইন মরিগী কোস্তেল রেল কোরিদোরগুম্বা মরুওইবা প্রোজেক্তশিংসু য়াওরি। শ্রী বৈষ্ণবনা অকনবা ৱাফম থমখি মদুদি ত্রান্সফোরমেতিব ইনিসিয়েতিবশিং অসিনা রিজনেল কনেক্তিবিতি মপাঙ্গল কনখৎহনগনি, ইকোনোমিক গ্রোথতা মতেং পাংগনি, অমসুং ওরিশাবু নেস্নেল ফ্রেৎ অমসুং পেসেঞ্জর নেতৱর্কশিংগা হেন্না নক্না ইন্তিগ্রেৎ তৌগনি।

সরকারগী ৱাখল্লোন অদু অমুক হন্না ফোঙদোক্লদুনা মহাক্না অকনবা ৱাফম থমখি মদুদি ওরিশা শিনবা থুংনা রেলৱেগী ইনফ্রাস্ত্রকচর অসি খোঙজেল, সেফতি, অমসুং পেসেঞ্জরশিংগী নুংঙাইবদা মীৎয়েং থমদুনা মখা তানা অপগ্রেদ তৌগনি, মসিনা রাজ্য অসিগী লমদম খুদিংমকতা চাং মান্নবা অমসুং ইনক্লুসিব দিবেলপমেন্ত শোয়দনা ফংহনগনি।

ইলেক্ত্রোনিক্স অমসুং আই.তি.গী রাজ্য মন্ত্রী দা. মহাক্না হায়খি রাজ্য সরকারগী আই.তি., এ.আই., জি.সি.সি. অমসুং সেমিকন্দক্তর পোলিসি ২০২৫না ইনোবেসন থৌগৎলগনি অমসুং ইনভেস্তমেন্তশিং পুক্নিং চিংশিনগনি। স্কীল দিবেলপমেন্ততা অকনবা ৱাফম থম্লদুনা মহাক্না হায়খি ইনদস্ত্রী-রেদি ৱার্কফোর্স অমা শেমগৎনবা ইঞ্জিনিয়রিংগী মহৈরোয়শিংদা স্তাইপেন্দ সপোর্ত পিরি। মহাক্না মখা তানা হায়খি মদুদি ব্লেকস্বন সমীৎ ২০২৬ অমসুং হেনগৎলক্লিবা এ.আই. ইনভেস্তমেন্তশিং অসিনা তুংলমচৎকী তেক্নোলোজীদা থবক লৈহল্লগনি অমসুং ওরিশাগী লিদরশিপ অসি হেন্না পাঙ্গল কনখৎহল্লগনি।

প্রোজেক্ত অসি য়ু.এস.এ.গী ৩দি গ্লাস সোলুসন ইনকোর্পোরেসন (3 দি.জি.এস.)না মপুঙ ওইনা মপু ওইবা ভারতকি সবসিদিয়রি হেতেরোজেনিক ইন্তিগ্রেসন পেকেজিং সোলুসন প্রাইবেৎ লিমিতেদকি খুত্থাংদা পায়খৎলি। লিমিতেদ (ঐচ.আই.পি.এস.পি.এল.) অসি খোরধা জিলাগী ইনফো ভেলিদা লৈ। মসি ভর্তিকেল ওইনা ইন্তিগ্রেতেদা এদভান্স পেকেজিং অমসুং এম্বেদেদ গ্লাস সবস্ত্রেৎ এ.তি.এম.পি. গী ফেসিলিতীগী গ্রীনফিল্দ অমনি।

প্রোজেক্ত অসিগী অপুনবা শেল থাদবগী চাং অসি লুপা করোর ১,৯৪৩.৫৩নি, মসিদা এপ্রুবা তৌরবা সেন্ত্রেল ফিসকেল সপোর্তকী লুপা করোর ৭৯৯ অমসুং অহেনবা রাজ্যগী মতেং চাওরাক্না লুপা করোর ৩৯৯.৫ য়াওরি।

ফেসিলিতি অসিনা দেতা সেন্তরশিং, আর্তিফিসিএল ইন্তিলিজেন্স, মেছিন লর্নিং, 5 জি/6 জি কম্ম্যুনিকেসন, ওতোমোতিব রাদার, দিফেন্স ইলেক্ত্রোনিক্স, এরোস্পেস এপ্লিকেসনশিং, অমসুং ফোতোনিক্সকুম্বা অৱাংবা থাক্কী সেক্তরশিংদা মতেং পাংগনি। কম্মর্সিএল প্রদক্সন অসি অগস্ত ২০২৮ ফাওবদা হৌরগনি হায়না পানরি, অদুগা মপুঙ ওইবা ভোল্যুম প্রদক্সন অসি অগস্ত ২০৩০ ফাওবগী মনুংদা পান্দম থম্লি।

থৌরম অদুদা ভারত সরকারগী ইলেক্ত্রোনিক্স অমসুং আই.তি. মন্ত্রালয়গী সেক্রেতরী শ্রী এস কৃষ্ণন,  ওরিশাগী চীফ সেক্রতরী শ্রীমতি এস. অনু গর্গ, ইন্দস্ত্রীজ দিপার্তমেন্ত এদিস্নেল চীফ সেক্রতরী শ্রী হেমন্ত শর্মা, ইলেক্ত্রোনিক্স অমসুং আই.তি. দিপার্তমেন্ত এদিস্নেল চীফ সেক্রতরী শ্রী বিশাল কুমার দেব অমসুং 3 দি. গ্লাস সোলুসনগী চেয়রমেন অমদি সি.ই.ও. শ্রী বাবু মান্দবানচিংবা অখন্নবা মীওই কয়ানা শরুক য়াখি।

***