মোৰ মৰমৰ দেশবাসী, নমস্কাৰ।

'মন কি বাত'ৰ আন এটা খণ্ডত আপোনালোক সকলোৰে সৈতে যোগ দি আনন্দিত হৈছোঁ। নিৰ্বাচনৰ হুলস্থুল অব্যাহত থকাৰ সময়তে আপোনালোকৰ চিঠি আৰু বাৰ্তাৰ জৰিয়তে আমি ইজনে সিজনৰ লগত দেশ আৰু ইয়াৰ নাগৰিকৰ সাফল্যক লৈ আমাৰ আনন্দৰ ভাগ-বতৰা কৰিছো। এইবাৰ দেশৰ তেনে এক উল্লেখযোগ্য কৃতিত্বৰে আজিৰ ‘মন কি বাত’ৰ আৰম্ভণি কৰোঁ আহক।

বন্ধুসকল,

ভাৰতে সদায় বিজ্ঞানক দোশৰ প্ৰগতিৰ সৈতে সংযোগ কৰি আহিছে। এই দৃষ্টিভংগীৰে আমাৰ বিজ্ঞানীসকলে অসামৰিক পাৰমাণৱিক কাৰ্যসূচীক আগুৱাই লৈ গৈছে। তেওঁলোকৰ এই প্ৰচেষ্টাই ৰাষ্ট্ৰ-নিৰ্মাণৰ ক্ষেত্ৰত উল্লেখযোগ্য অৱদান আগবঢ়াইছে। ই আমাৰ ঔদ্যোগিক বিকাশ, শক্তি খণ্ড আৰু স্বাস্থ্যসেৱা খণ্ডক বহুখিনি উপকৃত কৰিছে। ভাৰতৰ অসামৰিক পাৰমাণৱিক কাৰ্যসূচীয়ে কৃষিৰ পৰা আৰম্ভ কৰি আধুনিক উদ্ভাৱকলৈকে সকলোকে যথেষ্ট সহায় কৰিছে।

বন্ধুসকল,

মাত্ৰ কেইদিনমানৰ আগতে আমাৰ পাৰমাণৱিক বিজ্ঞানীসকলে আন এক বৃহৎ সাফল্যৰে ভাৰতলৈ গৌৰৱ কঢ়িয়াই আনিছে। তামিলনাডুৰ কল্পকমত থকা ফাষ্ট ব্ৰিডাৰ ৰিয়েক্টৰে জটিল পৰ্যায় অতিক্ৰম কৰিছে। এই ৰিয়েক্টৰে প্ৰথমবাৰৰ বাবে স্ব-নিৰ্ভৰশীল পাৰমাণৱিক শৃংখলাবদ্ধ বিক্ৰিয়া সফলতাৰে লাভ কৰা পৰ্যায়টোৱেই হৈছে অত্যন্ত  জটিল। এই পৰ্যায়ৰ অৰ্থ হ’ল ৰিয়েক্টৰটোৱে কাৰ্য্যকৰী পৰ্যায়ত প্ৰৱেশ কৰিছে।

ভাৰতৰ পাৰমাণৱিক শক্তিখণ্ডৰ যাত্ৰাৰ এয়া এক ঐতিহাসিক মাইলৰ খুঁটি। তদুপৰি পাৰমাণৱিক ৰিয়েক্টৰটো সম্পূৰ্ণৰূপে থলুৱা প্ৰযুক্তি ব্যৱহাৰ কৰি নিৰ্মাণ কৰা হৈছে।

বন্ধুসকল,

ইয়াক কিয় ব্ৰিডাৰ ৰিয়েক্টৰে বুলি কোৱা হয়? ইয়াৰ আঁৰত এটা কাৰণ আছে। ই এনে এক ব্যৱস্থা যি শক্তি উৎপাদনৰ উপৰি ভৱিষ্যতৰ বাবে নতুন ইন্ধনো উৎপাদন কৰে।

বন্ধুসকল,

২০২৪ চনৰ মাৰ্চ মাহত কল্পকমত ৰিয়েক্টৰৰ কোৰ লোডিঙৰ সাক্ষী হোৱা সময়টোও মোৰ মনত আছে। ভাৰতৰ পাৰমাণৱিক কাৰ্যসূচীত অমূল্য অৱদান আগবঢ়োৱা সকলোকে অভিনন্দন জনাইছো। আমাৰ দেশবাসীৰ জীৱন উন্নত আৰু সহজ কৰি তোলাৰ বাবে তেওঁলোকৰ প্ৰচেষ্টা অতিশয় প্ৰশংসনীয়। ইয়াৰ দ্বাৰা আমাৰ উন্নত ভাৰতৰ সংকল্পকো নতুন শক্তি প্ৰদান কৰা হ’ব।

মোৰ মৰমৰ দেশবাসী,

আজি ‘মন কি বাত’ত এনে এক শক্তিৰ কথা ক’ব বিচাৰিছো যিটো অদৃশ্য, কিন্তু যাৰ অবিহনে আমাৰ জীৱনটো এক মুহূৰ্ততো স্থায়ী হ’ব নোৱাৰে। এই শক্তিয়ে ভাৰতক আগুৱাই লৈ গৈছে। এয়া হল আমাৰ বতাহৰ শক্তি। আমাৰ প্ৰাচীন গ্ৰন্থত কোৱা হৈছে –

"বায়ুৰ্ব ইতি ব্যাষ্টি:, বায়ুৰ্বৈ সমষ্টি:।"

অৰ্থাৎ, বায়ু কেৱল এটা মৌল নহয়; ই জীৱনৰ শক্তি, ই বিশ্বব্ৰহ্মাণ্ডৰ শক্তি।

বন্ধুসকল,

আজি এই বায়ু শক্তিয়েই লিখিছে ভাৰতৰ বিকাশৰ এক নতুন কাহিনী। শেহতীয়াকৈ ভাৰতে বায়ু শক্তিৰ ক্ষেত্ৰত এক বৃহৎ মাইলৰ খুঁটি অৰ্জন কৰিছে। ভাৰতৰ বায়ু শক্তি উৎপাদন ক্ষমতা এতিয়া ৫৬ গিগাৱাট অতিক্ৰম কৰিছে। কেৱল যোৱা এবছৰটোত প্ৰায় ৬ গিগাৱাট নতুন ক্ষমতা সংযোজন কৰা হৈছে। ভাৰতে বায়ু শক্তিৰ ক্ষেত্ৰত দ্ৰুতগতিত আগবাঢ়িছে, আৰু বিশ্বয়ো আমাৰ ফালে চাই আছে।

বন্ধুসকল,

আজি ভাৰতে বায়ু শক্তিৰ সক্ষমতাত বিশ্বৰ ভিতৰতে চতুৰ্থ স্থান লাভ কৰিছে। এয়া আমাৰ অভিযন্তাসকলৰ কঠোৰ পৰিশ্ৰম, আমাৰ যুৱ প্ৰজন্মৰ অধ্যৱসায় আৰু আমাৰ দেশৰ সামূহিক ইচ্ছাশক্তিৰ প্ৰতীক।

বন্ধুসকল,

গুজৰাট, তামিলনাডু, মহাৰাষ্ট্ৰ, ৰাজস্থান আৰু দেশৰ আন বহু ৰাজ্যই এই খণ্ডত শিখৰলৈ ধাৱমান হৈছে। গুজৰাটৰ কুচ্চ, পাটান, বানাস্কান্তৰ দৰে অঞ্চলত, য’ত পূৰ্বতে কেৱল মৰুভূমিহে দেখা গৈছিল, এতিয়া বৃহৎ নবীকৰণযোগ্য শক্তি উদ্যানৰ আলয় হৈ পৰিছে। যুৱক-যুৱতীসকলে ইয়াৰ দ্বাৰা উপকৃত হৈছে; নতুন সুযোগ সৃষ্টি হৈছে, নতুন দক্ষতা বিকাশ হৈছে আৰু নিয়োগৰ নতুন পথ মুকলি হৈছে।

বন্ধুসকল,

ভাৰতৰ উন্নয়নৰ বাবে সৌৰ আৰু বায়ু শক্তি অতি প্ৰয়োজনীয়। এইটো কেৱল পৰিৱেশৰ কথা নহয়— আমাৰ ভৱিষ্যত ৰক্ষাৰ কথা। ইয়াত আমাৰ সকলোৰে ভূমিকা আছে। আমি বিদ্যুৎ সংৰক্ষণ কৰিব লাগিব, আমি স্বচ্ছ শক্তিক আঁকোৱালি ল’ব লাগিব। দেশৰ প্ৰতিটো স্তৰতে এনে প্ৰচেষ্টা অপৰিহাৰ্য, কাৰণ ইয়েই ব্যাপক পৰিৱৰ্তন আনে।

বন্ধুসকল,

মে’ মাহৰ আৰম্ভণি হ’বলৈ ওলাইছে এক পবিত্ৰ অনুষ্ঠানেৰে। কিছুদিনৰ পাছত আমি বুদ্ধ পূৰ্ণিমা উদযাপন কৰিম। মোৰ সকলো দেশবাসীলৈ মোৰ শুভেচ্ছা জ্ঞাপন কৰিলোঁ। ভগৱান গৌতম বুদ্ধৰ জীৱনমুখী বাৰ্তা আজিও আগৰ দৰেই প্ৰাসংগিক হৈ আছে।

তেওঁ আমাক শিকাইছিল যে শান্তি আমাৰ ভিতৰতে আৰম্ভ হয়, আৰু তেওঁ বুজাইছিল যে নিজৰ ওপৰত জয়লাভ কৰাটোৱেই আটাইতকৈ ডাঙৰ জয়। আজি বিশ্বই যি উত্তেজনা আৰু সংঘাতৰ সন্মুখীন হৈছে, তাৰ প্ৰতি লক্ষ্য ৰাখি বুদ্ধৰ শিক্ষা আৰু অধিক গুৰুত্বপূৰ্ণ হৈ পৰিছে।

বন্ধুসকল,

দক্ষিণ আমেৰিকাৰ চিলিৰ ফ্ৰেণ্ডছ নামৰ সংস্থাটোৱে ভগৱান বুদ্ধৰ শিক্ষাৰ প্ৰচাৰ চলাই আছে। লাডাখত জন্মগ্ৰহণ কৰা ড্ৰুবপন অটজাৰ ৰিনপোচেৰ নেতৃত্বত এই কাম চলি আছে। এই সংস্থাই ধ্যান আৰু কৰুণাক মানুহৰ জীৱনৰ লগত সংযোগ কৰি আছে। কোচিগুয়াজ উপত্যকাৰ স্তুপটোৱে মানুহৰ মনত শান্তিৰ ভাব কঢ়িয়াই আনে। সঁচাকৈয়ে এয়া গৌৰৱৰ বিষয়। ভাৰতৰ প্ৰাচীন ধাৰাটোৱে সমগ্ৰ বিশ্বত প্ৰৱেশ কৰিছে। সুদূৰ দেশ-বিদেশৰ মানুহেও ইয়াত যোগদান কৰিছে।

বন্ধুসকল,

বৌদ্ধ পৰম্পৰাই আমাক প্ৰকৃতিৰ সৈতে সংযোগ স্থাপন কৰিবলৈও শিকাইছে। ভগৱান বুদ্ধই এজোপা গছৰ তলত জ্ঞান লাভ কৰিছিল। প্ৰকৃতি আমাৰ জীৱনৰ এক অবিচ্ছেদ্য অংগ। সমগ্ৰ দেশতে এনে প্ৰচেষ্টা চলি আছে। কৰ্ণাটকৰ কৰ্ম মঠ ইয়াৰ এটা ভাল উদাহৰণ। এই মঠটো ১০০ একৰ মাটিত বিস্তৃত এখন সজীৱ বনাঞ্চল। এই অৰণ্যত ৭০০ৰো অধিক থলুৱা গছ সংৰক্ষণ কৰা হৈছে।

বন্ধুসকল,

বুদ্ধৰ বাৰ্তা কেৱল অতীতৰ কথা নহয়। ই আজিও প্ৰাসংগিক আৰু ভৱিষ্যতৰ বাবেও অপৰিহাৰ্য। বুদ্ধ পূৰ্ণিমা উপলক্ষে ই আমাক অনুপ্ৰাণিত কৰে। আমি আমাৰ জীৱনত শান্তি বৃদ্ধি কৰোঁ, মমতাক আঁকোৱালি লওঁ আৰু ভাৰসাম্যতাৰে আগবাঢ়ি যাওঁ।

মোৰ প্ৰিয় দেশবাসী,

আপোনালোক সকলোৱে জানে যে আমাৰ দেশত নেতাজী সুভাষ চন্দ্ৰ বসুৰ জন্মদিন ২৩ জানুৱাৰীৰ পৰা গান্ধীজীৰ মৃত্যু বাৰ্ষিকী ৩০ জানুৱাৰীলৈকে গণৰাজ্য দিৱস পালন কৰা হয়। এই উদযাপনৰ এটা গুৰুত্বপূৰ্ণ অংশ হৈছে বিটিং ৰিট্ৰিট। আজি আপোনালোকৰ লগত বিটিং ৰিট্ৰিটৰ বিষয়ে আলোচনা কৰিছো, কাৰণ ইয়াৰ আঁৰত এটা বিশেষ কাৰণ আছে।

বন্ধুসকল,

আপোনালোকে হয়তো লক্ষ্য কৰিছে যে এই অনুষ্ঠানত বিভিন্ন বেণ্ডৰ বৈচিত্ৰ্যময় সংগীত পৰম্পৰা প্ৰদৰ্শন কৰা হয়। যোৱা কেইবছৰমানৰ পৰা ভাৰতীয় সংগীতৰ অন্তৰ্ভুক্তি বৃদ্ধি পাইছে, আৰু সমগ্ৰ দেশতে ই অতি জনপ্ৰিয় হৈ পৰিছে। এইবাৰৰ বিটিং ৰিট্ৰিট অনুষ্ঠানটোও আছিল অতি স্মৰণীয়। বায়ুসেনা, সেনা, নৌসেনা আৰু চিএপিএফৰ বেণ্ডসমূহে ইয়াত উৎকৃষ্ট প্ৰদৰ্শন আগবঢ়ায়।

বন্ধুসকল,

চমত্কাৰ গঠনৰ এই অনুষ্ঠানত উৎকৃষ্ট সংগীতেও সকলোৰে দৃষ্টি আকৰ্ষণ কৰিছিল। বায়ুসেনাৰ বেণ্ডে সিন্দুৰ ফৰ্মেচন পৰিবেশন কৰে। নেভেল বেণ্ডে মৎস্যযন্ত্ৰ গঠন পৰিবেশন কৰে। একে সময়তে আৰ্মী বেণ্ডৰ পৰিবেশনত ১৫০ বছৰীয়া বন্দে মাতৰমৰ লগতে ক্ৰিকেটত ভাৰতৰ সফলতাও চিত্ৰিত কৰা হৈছিল।

বন্ধুসকল,

বিটিং ৰিট্ৰিটৰ পিছত এই সকলো কঠোৰ পৰিশ্ৰম আৰু কৃতিত্ব ক্ৰমান্বয়ে ম্লান হৈ যাব, কিন্তু এতিয়া ইয়াক পুনৰুজ্জীৱিত কৰাৰ বাবে বহুত উন্নত প্ৰচেষ্টা চলোৱা হৈছে। প্ৰথমবাৰৰ বাবে বিটিং ৰিট্ৰিটৰ সংগীত ৱেভছ অটিটিত ত উপলব্ধ হৈছে। ভৱিষ্যতে ই আন প্লেটফৰ্মতো উপলব্ধ হ’ব– আপুনি এয়া শুনিব লাগিব। তেতিয়া আমাৰ সশস্ত্ৰ বাহিনী আৰু তেওঁলোকৰ পৰম্পৰাক লৈ আপুনি অতি গৌৰৱ অনুভৱ কৰিব।

বন্ধুসকল,

যোৱা কেইবছৰমানৰ পৰা দেশৰ বিভিন্ন প্ৰান্তৰ পৰা প্ৰকৃতি সংৰক্ষণৰ প্ৰেৰণাদায়ক কাহিনীৰ উন্মেষ ঘটিছে। এই কাহিনীবোৰে আমাক আশাৰ সঞ্চাৰ কৰে আৰু গৌৰৱেৰে ভৰাই তোলে। 'মন কি বাত'ৰ শ্ৰোতাসকলৰ আগত ইয়াৰ কেইটামান উদাহৰণ দিব বিচাৰিছোঁ। তেওঁলোকৰ কথা শুনিলে আপোনালোকৰ আনন্দ লাগিব। প্ৰথমে কুচ্চৰ ৰাণৰ কথাকে কওঁ। বৰষুণ শেষ হোৱাৰ লগে লগে ইয়াৰ মাটি সজীৱ হৈ উঠে। প্ৰতি বছৰে ইয়ালৈ লাখ লাখ ফ্লেমিংগো আহে। সমগ্ৰ অঞ্চলটো গোলাপী ৰঙেৰে ৰঙীন হৈ পৰে, সেয়েহে ইয়াৰ নাম ‘ফ্লেমিংগো চিটি’। এই চৰাইবোৰে বাহ সাজি ইয়াত পোৱালি ডাঙৰ কৰে। কুচ্চৰ মানুহে ইহঁতক ‘লাখা জী কে বাৰাতি’ বুলি কয়। এতিয়া লাখা জীকে বাৰাতি কুচ্চৰ পৰিৱেশ সুৰক্ষাৰ এক সুন্দৰ প্ৰতীক হৈ পৰিছে।

বন্ধুসকল,

আন এটা কাহিনী হৈছে মানুহ আৰু বন্যপ্ৰাণীৰ সহযোগিতাৰ বিষয়ে। এইটো উত্তৰ প্ৰদেশৰ পৰা আহিছে। তেৰাই অঞ্চলত শস্য চপোৱাৰ বতৰত হাতীৰ জাক গাঁৱৰ কাষ চাপিছে, যাৰ ফলত সংঘাতৰ আশংকা বৃদ্ধি পায়। অৱশ্যে উত্তৰ প্ৰদেশতো এতিয়া "গজ মিত্ৰ"ৰ দৰে প্ৰচেষ্টা আৰম্ভ হৈছে। গাঁওবাসীয়ে হাতী নিৰীক্ষণৰ বাবে দল গঠন কৰে। সময়মতে মানুহক সতৰ্ক কৰি দিয়ে। ইয়াৰ ফলত সংঘাত হ্ৰাস পোৱাৰ লগতে জনসাধাৰণৰ আস্থা বাঢ়িছে।

বন্ধুসকল,

মধ্য ভাৰতৰ পৰাও ভাল খবৰ আহিছে। ছত্তীশগড়ত পুনৰ আবিৰ্ভাৱ হৈছে ব্লেকবাক। ইহঁতৰ সংখ্যা বহু পৰিমাণে হ্ৰাস পাইছিল যদিও অবিৰত প্ৰচেষ্টাৰ ফলত সংৰক্ষণ বৃদ্ধি পাইছে। এতিয়া পুনৰ এবাৰ মুকলি পথাৰত ইহঁত ঘূৰি ফুৰা দেখা গৈছে। এয়া আমাৰ হেৰুৱা ঐতিহ্য উভতি অহাৰ চিন স্বৰূপ। আমাৰ মৰুভূমি অঞ্চলত এসময়ত চিনাকি চৰাই গ্ৰেট ইণ্ডিয়ান বাষ্টাৰ্ডৰ সংৰক্ষণৰ ক্ষেত্ৰতো একেধৰণৰ আশা দেখা গৈছে। কিন্তু এটা সময়ত ইয়াৰ সংখ্যা এটা এটাকৈ কমি আহিছিল। পৰিস্থিতি এনেকুৱা আছিল যে এই চৰাইটো বিলুপ্তিৰ পথত। কিন্তু এতিয়া ইয়াক সংৰক্ষণৰ বাবে এক বৃহৎ অভিযান চলি আছে। বৈজ্ঞানিক পদ্ধতি গ্ৰহণ কৰা হৈছে। প্ৰজনন কেন্দ্ৰ স্থাপন কৰা হৈছে, ফলত এতিয়া নতুন জীৱনৰ আৰম্ভণি দেখা গৈছে।

বন্ধুসকল,

প্ৰকৃতি আৰু মানুহ পৃথক নহয়। আমি ইজনে সিজনৰ অংশীদাৰ। যেতিয়া আমি প্ৰকৃতিক বুজি পাওঁ, ইয়াক সন্মান কৰো আৰু তাৰ লগত মিলাপ্ৰীতিৰে জীয়াই থাকোঁ, তেতিয়া পৰিৱৰ্তন স্পষ্টকৈ দেখা যায়। আজি এই পৰিৱৰ্তন দেশৰ চুক-কোণৰ ​​পৰা নতুন আশা হিচাপে আত্মপ্ৰকাশ কৰিছে।

মোৰ প্ৰিয় দেশবাসী,

উত্তৰ-পূৰ্বাঞ্চল আমাৰ সকলোৰে বাবে অষ্টলক্ষ্মী। ইয়াত প্ৰচুৰ প্ৰতিভা আছে, উত্তৰ-পূৰ্বাঞ্চলৰ প্ৰাকৃতিক সৌন্দৰ্য্যয়ো সকলোৰে দৃষ্টি আকৰ্ষণ কৰে। ‘মন কি বাত’ত আমি প্ৰায়ে উত্তৰ-পূৰ্বাঞ্চলৰ জনসাধাৰণৰ সাফল্যৰ বিষয়ে আলোচনা কৰি আহিছোঁ। আজি আপোনালোকৰ সৈতে এনে আন এক কৃতিত্বৰ বিষয়ে আলোচনা কৰিম, সেয়া হল বাঁহ খণ্ডত উত্তৰ-পূবৰ সফলতা।

বন্ধুসকল,

এসময়ত যাক বোজা হিচাপে গণ্য কৰা হৈছিল, এতিয়া সিয়েই নিয়োগ, ব্যৱসায়, উদ্ভাৱনক নতুন গতি প্ৰদান কৰিছে। আমাৰ মাতৃ আৰু ভগ্নীসকল এই খণ্ডৰ আটাইতকৈ ডাঙৰ হিতাধিকাৰী। বাঁহৰ সংজ্ঞা সলনি কৰি কিমান আমূল পৰিৱৰ্তন ঘটিছে সেই কথা জানি আপুনি আচৰিত হ’ব।

বন্ধুসকল,

ইংৰাজে প্ৰণয়ন কৰা আইন অনুসৰি বাঁহক গছ বুলি সংজ্ঞায়িত কৰা হৈছিল, আৰু ইয়াৰ লগত সংলগ্ন নিয়মবোৰ অতি কঠোৰ আছিল। যিকোনো ঠাইলৈ বাঁহ পৰিবহণ কৰাটো অত্যন্ত কঠিন আছিল। ফলত ইয়াৰ মানুহে বাঁহ সম্পৰ্কীয় ব্যৱসায়ৰ পৰা আঁতৰি থাকিবলৈ ধৰিলে।

বন্ধুসকল,

২০১৭ চনত আমি আইন সংশোধন কৰি গছৰ শ্ৰেণীৰ পৰা বাঁহক আঁতৰাই আনিলোঁ। ফলাফল সকলোৰে বাবে স্পষ্ট। আজি সমগ্ৰ উত্তৰ-পূৰ্বাঞ্চলত বাঁহৰ খণ্ডটোৱে বিকাশ লাভ কৰিছে। মানুহে অহৰহ ইয়াৰ উদ্ভাৱন কৰি আছে আৰু ইয়াৰ মূল্য সংযোজন হৈ আছে।

বন্ধুসকল,

ত্ৰিপুৰাৰ গোমাটি জিলাৰ বিজয় সূত্ৰধৰ আৰু দক্ষিণ ত্ৰিপুৰাৰ প্ৰদীপ চক্ৰৱৰ্তীলৈ চাওঁ আহক। তেওঁলোকে নতুন আইনক নিজৰ বাবে এক ডাঙৰ সুযোগ হিচাপে প্ৰত্যক্ষ কৰিছিল। তাৰ পিছত, তেওঁলোকে নিজৰ কামক প্ৰযুক্তিৰ সৈতে একত্ৰিত কৰিলে। আজি তেওঁলোকে পূৰ্বতকৈ উন্নত আৰু অধিক বাঁহৰ সামগ্ৰী উৎপাদন কৰিছে।

ডিমাপুৰ আৰু নাগালেণ্ডৰ আশে-পাশে থকা অঞ্চলত কেইবাটাও আত্মসহায়ক গোট আছে, যিয়ে বাঁহভিত্তিক খাদ্য সামগ্ৰীৰ মূল্য সংযোজন কৰিছে। খোৰোলো ক্ৰিয়েটিভ ক্ৰাফ্টৰ দৰে দলেও বাঁহৰ আচবাব আৰু হস্তশিল্পৰ কাম কৰি আছে।

বন্ধুসকল,

মিজোৰামৰ মামিট জিলাত বাঁহৰ টিছু কালচাৰ আৰু পলি-হাউচ মেনেজমেণ্টৰ কামত একাধিক দল জড়িত হৈ আছে। ছিকিমৰ গেংটকৰ ওচৰৰ লাগাষ্টল বাঁহ এণ্টাৰপ্ৰাইজ দলৰ কথাও জানিব পাৰিলোঁ। ইয়াত বাঁহৰ পৰা হস্তশিল্প, ধূপৰ লাঠি, আচবাব আৰু অভ্যন্তৰীণ সজ্জাৰ সামগ্ৰী তৈয়াৰ কৰা হয়।

বন্ধুসকল,

ইয়াত মাত্ৰ কেইটামান উদাহৰণ দিছো। দেশৰ বাঁহ খণ্ডৰ সফলতাৰ কাহিনীৰ তালিকা যথেষ্ট দীঘলীয়া। আপোনালোক সকলোকে উত্তৰ-পূৰ্বাঞ্চলৰ পৰা বাঁহৰ সামগ্ৰী ক্ৰয় কৰিবলৈ আহ্বান জনাইছোঁ। আনকি ইয়াক উপহাৰ হিচাপেও দিব পাৰে। আপোনালোকৰ এই প্ৰচেষ্টাই বাঁহৰ সামগ্ৰী তৈয়াৰ কৰিবলৈ অক্লান্তভাৱে কাম কৰা লোকসকলক উৎসাহিত কৰিব।

মোৰ প্ৰিয় দেশবাসী,

এই দ্ৰুতগতিত পৰিৱৰ্তিত সময়ত প্ৰযুক্তি আমাৰ জীৱনৰ এক বিশাল অংগ হৈ পৰিছে। আজি আমি আমাৰ অতীতক বৰ্তমানৰ সৈতে সংযোগ স্থাপনৰ ক্ষেত্ৰত প্ৰযুক্তিৰ আশ্চৰ্য্যৰ সাক্ষী হৈ আছোঁ। এই দিশৰ শেহতীয়া এক উন্নয়নে শিক্ষা আৰু ইতিহাসৰ লগত জড়িতসকলক আনন্দিত কৰিছে। বন্ধুসকল, মাত্ৰ কেইদিনমানৰ আগতে ভাৰতৰ ৰাষ্ট্ৰীয় আৰ্কাইভে এটা বিশেষ পৰ্টেলত এক অনন্য ডাটাবেছ শ্বেয়াৰ কৰিছিল। এই সংস্থাটোৱে ২০ কোটিৰো অধিক অমূল্য নথি-পত্ৰ ডিজিটেলাইজ কৰি ৰাজহুৱা কৰিছে। ইয়াৰে কিছুমান অতি আকৰ্ষণীয়— ভোজপত্ৰত লিখা সপ্তম শতিকাৰ গিলগিটৰ পাণ্ডুলিপি। ইয়াত অষ্টম শতিকাৰ এক আকৰ্ষণীয় গ্ৰন্থ শ্ৰী ভূৱালয়াও পাব। সংখ্যাৰ ওপৰত ভিত্তি কৰি লিখা এই লেখাটো গ্ৰীডৰ আকাৰত উপলব্ধ। ৰাণী লক্ষ্মীবাইৰ লগত জড়িত কিছুমান গুৰুত্বপূৰ্ণ চিঠিও ইয়াত চাব পাৰে। এইবোৰে ১৮৫৭ চনত লোৱা কিছুমান সিদ্ধান্তৰ কথা উন্মোচন কৰে, যিয়ে তেওঁৰ সাহসিকতাক প্ৰতিফলিত কৰে।

নেতাজী সুভাষ চন্দ্ৰ বসুৰ মহান প্ৰশংসকসকলৰ বাবে ইয়াত নেতাজীৰ জীৱন, আজাদ হিন্দ ফৌজ আৰু তেওঁৰ ভাষণৰ সৈতে জড়িত বহুতো নথি আছে। পণ্ডিত মদন মোহন মালব্যৰ লগত জড়িত বহুতো নথিও পাব। ইয়াৰ ভিতৰত বি এইচ ইউ আৰু হিন্দী সাহিত্য সন্মিলনৰ প্ৰতিষ্ঠা সম্পৰ্কীয় গুৰুত্বপূৰ্ণ তথ্যও উপলব্ধ। আমাৰ সংবিধান সভাৰ লগত জড়িত বহুতো অনন্য নথিও ইয়াত আছে। আপোনালোক সকলোকে www.abhilekh-patal.inত এইবোৰ চাবলৈ আহ্বান জনাইছোঁ। ই আপোনাক আমাৰ ইতিহাসৰ এক আচৰিত অভিজ্ঞতা প্ৰদান কৰিব।

বন্ধুসকল,

কল্পনা কৰকচোন- আপুনি পৃথিৱীৰ আটাইতকৈ প্ৰতিভাৱান লোকসকলৰ ভিতৰত আছে, অত্যন্ত কঠিন গাণিতিক সমস্যাৰ সন্মুখীন হৈছে। সেইবোৰ সমাধান কৰিবলৈ আপোনাৰ হাতত মাত্ৰ চাৰে চাৰি ঘণ্টা সময় আছে। অৰ্থাৎ সময় অতি কম আৰু প্ৰতিযোগিতা আন্তঃৰাষ্ট্ৰীয় তথা তীব্ৰ। এনে পৰিস্থিতিত নাৰ্ভাছ অনুভৱ কৰাটো স্বাভাৱিক। কিন্তু এই পৰিস্থিতিত আমাৰ ছোৱালীকেইজনীয়ে উজ্জ্বল প্ৰদৰ্শন আগবঢ়াইছিল। চলিত মাহৰ আৰম্ভণিতে ফ্ৰান্সৰ বৰ্ডোত অনুষ্ঠিত হৈছিল ইউৰোপীয় গাৰ্লছ মেথেমেটিকেল অলিম্পিয়াড। গণিতৰ প্ৰতি তীব্ৰ আগ্ৰহ থকা স্কুলীয়া ছাত্ৰীসকলৰ বাবে এইখন আছিল এক ডাঙৰ প্ৰতিযোগিতা। বিশ্বৰ অন্যতম সন্মানীয় প্ৰতিযোগিতা। আমাৰ ছোৱালীকেইজনীয়ে এই অলিম্পিয়াডত এতিয়ালৈকে সৰ্বোত্তম প্ৰদৰ্শন আগবঢ়াইছিল। এই প্ৰতিভাৱান দলটোক লৈ মই অতি গৌৰৱান্বিত। ইয়াৰ ভিতৰত আছিল মুম্বাইৰ পৰা শ্ৰেয়া মুন্ধৰা, তিৰুৱনন্তপুৰমৰ সঞ্জনা চাকো, চেন্নাইৰ পৰা শিৱানী ভাৰত কুমাৰ আৰু কলকাতাৰ শ্ৰীময়ী বেৰা।

আমাৰ দলটোৱে বিশ্বৰ ষষ্ঠ স্থান দখল কৰে। শ্ৰেয়াই স্বৰ্ণ পদক, সঞ্জনাই ৰূপৰ পদক আৰু শিৱানীয়ে ব্ৰঞ্জৰ পদক লাভ কৰি ইতিহাস ৰচনা কৰে।

বন্ধুসকল,

ভাৰতৰ এই অলিম্পিয়াডৰ বাছনি প্ৰক্ৰিয়াটো অতি প্ৰত্যাহ্বানজনক। ইয়াৰ লগত বহু পৰ্যায়ৰ নিৰ্বাচন প্ৰক্ৰিয়া জড়িত হৈ থাকে। ইয়াত আঞ্চলিক, ৰাজ্যিক আৰু ৰাষ্ট্ৰীয় পৰ্যায়ৰ কঠিন প্ৰত্যাহ্বানসমূহ অতিক্ৰম কৰাটো প্ৰয়োজনীয়। তাৰ পিছত সৰ্বোত্তম প্ৰদৰ্শন কৰা ছাত্ৰ-ছাত্ৰীসকলে এমাহজোৰা গণিত প্ৰশিক্ষণ শিবিৰত অংশগ্ৰহণ কৰে। এই শিবিৰটো টাটা ইনষ্টিটিউট অব ফাণ্ডামেণ্টেল ৰিচাৰ্চৰ হোমি ভাভা চেণ্টাৰ ফৰ ছায়েন্স এডুকেচনত অনুষ্ঠিত হয়। এই শিবিৰৰ শেষত দল বাছনি পৰীক্ষা অনুষ্ঠিত কৰা হয়। উক্ত প্ৰদৰ্শনৰ ওপৰত ভিত্তি কৰি ভাৰতীয় দল নিৰ্বাচন কৰা হয়।

বন্ধুসকল,

প্ৰতি বছৰে সমগ্ৰ দেশৰ পৰা প্ৰায় ৬ লাখ ছাত্ৰ-ছাত্ৰীয়ে এই গাণিতিক অলিম্পিয়াড কাৰ্যসূচীত অংশগ্ৰহণ কৰে। এই সংখ্যা সময়ৰ লগে লগে ক্ৰমাগতভাৱে বৃদ্ধি পাইছে, অৰ্থাৎ অলিম্পিয়াড সংস্কৃতি দেশখনৰ কন্যাসকলৰ মাজত ক্ৰমান্বয়ে জনপ্ৰিয় হৈ পৰিছে। এই আগ্ৰহী কন্যাসকলক সহায় কৰাৰ বাবে তেওঁলোকৰ পিতৃ-মাতৃকো মই প্ৰশংসা কৰিছোঁ।

মোৰ মৰমৰ দেশবাসী,

বৰ্তমান আমাৰ দেশত এক অতি গুৰুত্বপূৰ্ণ অভিযান চলি আছে, যাৰ প্ৰতি প্ৰতিজন ভাৰতীয় সচেতন হ’ব লাগিব। এইটো হৈছে বিশ্বৰ সৰ্ববৃহৎ লোকপিয়ল অভিযান।

বন্ধুসকল,

যিসকলে ইতিমধ্যে এনে প্রক্রিয়া পাৰ কৰিছে তেওঁলোকৰ এইবাৰ বেলেগ অভিজ্ঞতা হ’ব৷ ২০২৭ চনৰ লোকপিয়ল ডিজিটেল কৰা হৈছে। সকলো তথ্য পোনপটীয়াকৈ ডিজিটেল ৰূপত ৰেকৰ্ডিং কৰা হৈছে। ঘৰে ঘৰে গৈ কাম কৰাসকলৰ হাতত আছে এটা মোবাইল এপ। তেওঁলোকে আপোনাৰ সৈতে যোগাযোগ কৰিব আৰু তাত আপোনাৰ তথ্য অন্তৰ্ভুক্ত কৰিব।

বন্ধুসকল,

এইবাৰ আপোনালোকৰ লোকপিয়লত অংশগ্ৰহণো সহজ কৰি তোলা হৈছে; আপুনি নিজেই আপোনাৰ তথ্য অন্তৰ্ভুক্ত কৰিব পাৰে। এই সুবিধা লোক গাণনিকজন অহাৰ ১৫ দিন আগতে আপোনাৰ বাবে মুকলি হ’ব। আপোনাৰ সুবিধা অনুসৰি তথ্য অন্তৰ্ভুক্ত কৰিব পাৰিব। যেতিয়া আপুনি প্ৰক্ৰিয়াটো সম্পূৰ্ণ কৰে তেতিয়া আপুনি এটা বিশেষ আইডি লাভ কৰিব। এই আইডি আপোনাৰ মোবাইল বা ই-মেইললৈ প্ৰেৰণ কৰা হ'ব। ইয়াৰ পিছত যেতিয়া গাণনিকজনে আপোনাৰ ঘৰলৈ আহে তেতিয়া এই আই ডিটো দেখুৱাই তথ্য পৰীক্ষা কৰিব পাৰিব। ইয়াৰ ফলত পুনৰ তথ্য দিয়াৰ প্ৰয়োজনীয়তা নোহোৱা হয়। তদুপৰি ই সময় ৰাহি কৰে আৰু প্ৰক্ৰিয়াটো সৰল কৰি তোলে।

বন্ধুসকল,

যিবোৰ ৰাজ্যত স্ব-গণনা সম্পূৰ্ণ হৈছে, সেইবোৰ ৰাজ্যত গণনা কৰ্মীসকলে পৰিয়াল তালিকাভুক্ত কৰাৰ কাম আৰম্ভ কৰিছে। এতিয়ালৈকে প্ৰায় ১ কোটি ২০ লাখ পৰিয়ালৰ ঘৰ তালিকাভুক্ত কৰাৰ কাম সম্পূৰ্ণ হৈছে।

বন্ধুসকল,

ৰাষ্ট্ৰীয় লোকপিয়ল কেৱল চৰকাৰী কাম নহয়। এয়া আমাৰ সকলোৰে দায়িত্ব। এইক্ষেত্ৰত আপোনাৰ অংশগ্ৰহণ অতিকৈ গুৰুত্বপূৰ্ণ। আপুনি প্ৰদান কৰা তথ্যসমূহ সম্পূৰ্ণৰূপে সুৰক্ষিত, গোপনীয় আৰু ডিজিটেলভাৱে সংৰক্ষিত। আহক আমি সকলোৱে এই প্ৰক্ৰিয়াত অংশগ্ৰহণ কৰোঁ। লোকপিয়ল ২০২৭ সফল কৰোঁ।

বন্ধুসকল,

আমাৰ দেশত ৰান্ধন প্ৰকৰণৰ পৰম্পৰা কেৱল সোৱাদতে সীমাবদ্ধ নহয়। এই পৰম্পৰাৰ এটা আমোদজনক অংশ হৈছে ভাৰতীয় পনিৰ। কিছুদিন আগতে টুইটৰ জৰিয়তে এই তথ্য শ্বেয়াৰ কৰিছিলোঁ।

ব্ৰাজিলত অনুষ্ঠিত আন্তঃৰাষ্ট্ৰীয় পনিৰ প্ৰতিযোগিতাত ভাৰতীয় পনিৰৰ দুটা ব্ৰেণ্ডে সন্মানীয় বঁটা লাভ কৰিছিল। এই কৃতিত্বৰ বিষয়ে ছ’চিয়েল মিডিয়াত ব্যাপক চৰ্চা হৈছিল। বহুতে মোক কৈছিল যে ভাৰতীয় পনিৰৰ বৈচিত্ৰ্যৰ বিষয়েও আলোচনা কৰা উচিত।

বন্ধুসকল,

ভাৰতৰ দুগ্ধ খণ্ডত যথেষ্ট পৰিৱৰ্তন হৈছে। এই খণ্ডত মূল্য সংযোজনে আমাৰ পৰম্পৰাগত সোৱাদক এক নতুন পৰিচয় দিছে। আজি ভাৰতীয় পনিৰে বিশ্বজুৰি নিজৰ নাম উজলাইছে। ব্ৰেকফাষ্ট হওক, দুপৰীয়াৰ আহাৰ হওক, ৰাতিৰ আহাৰ হওক, ভাৰতৰ সোৱাদ সমগ্ৰ বিশ্বৰ খোৱা থালত উপনীত হৈছে। "কাশ্মীৰৰ মজাৰেলা" বুলি জনাজাত জম্মু-কাশ্মীৰৰ কালাৰী পনিৰ কথাকে লওক- ইয়াক গুজ্জাৰ-বাকৰোৱাল সমাজে প্ৰজন্মৰ পিছত প্ৰজন্ম ধৰি খাই আহিছে। ইফালে ছিকিম, অৰুণাচল প্ৰদেশ আৰু লাডাখত "চুৰপি" অতি জনপ্ৰিয়। পাহাৰৰ সৰলতা আৰু নমনীয়তা ইয়াৰ ৰুচিত স্পষ্ট হৈ পৰে। এই পনিৰৰ বিশেষ বৈশিষ্ট্য হ’ল ইয়াক য়াকৰ গাখীৰৰ পৰা তৈয়াৰ কৰা হয়।

বন্ধুসকল,

মহাৰাষ্ট্ৰ আৰু গুজৰাটত ‘সুৰতি পনিৰ’ নামেৰেও জনাজাত ‘টপলি নু পনিৰ’ৰো নিজস্ব সুকীয়া পৰিচয় আছে। ইয়াত কেইটামান নামহে উল্লেখ কৰিছোঁ, কিন্তু আমাৰ দেশত এই সোৱাদৰ জগতখন বিশাল। আজি এই পৰম্পৰাই নতুন শক্তি লাভ কৰিছে। বহু ভাৰতীয় কোম্পানীয়ে এই খণ্ডত বিনিয়োগ কৰিছে। আধুনিক প্ৰযুক্তিৰ উত্থান ঘটিছে, পেকেজিং উন্নীত হৈছে আৰু আমাৰ সামগ্ৰীয়ে বিশ্বৰ মানদণ্ড পূৰণ কৰিছে। ফলত ভাৰতীয় পনিৰ এতিয়া দেশৰ সীমা অতিক্ৰম কৰি বিশ্বৰ বজাৰ আৰু ৰেষ্টুৰেণ্টত প্ৰৱেশ কৰিবলৈ সক্ষম হৈছে।

আজি আমি স্থানীয়ৰ পৰা বিশ্বজোৰা যাত্ৰাৰ কথা কওঁতে ভাৰতীয় পনিৰৰ উদাহৰণে আমাক অগ্ৰসৰ হোৱাৰ পথ দেখুৱাইছে। মই বিশ্বাস কৰোঁ যে ভাৰতৰ ৰুচি, ভাৰতীয় পৰম্পৰা, ভাৰতীয় গুণাগুণে সমগ্ৰ বিশ্বৰ মানুহক এক নতুন অভিজ্ঞতা প্ৰদান কৰিব আৰু ভাৰতৰ সৈতে এক নতুন সংযোগ সৃষ্টি কৰিব।

মোৰ মৰমৰ দেশবাসী,

এই মাহত দেশৰ বহু ঠাইত নৱবৰ্ষকে ধৰি বহু উৎসৱ পালন কৰা হ’ল। কেইদিনমানৰ পিছত ৯ মে'ত আমি পোচ্চিছে বৈশাখ উপলক্ষে গুৰুদেৱ ঠাকুৰৰ জন্ম বাৰ্ষিকী উদযাপন কৰিম। গুৰুদেৱ আছিল বহুমুখী ব্যক্তিত্ব। তেওঁ কেৱল এজন মহান সাহিত্যিক আৰু চিন্তাবিদেই নহয়, বহুতো প্ৰখ্যাত প্ৰতিষ্ঠানো তেওঁ গঢ় দিছিল। গুৰুদেৱ ঠাকুৰে এনে উদ্যোগৰ পোষকতা কৰিছিল, যিয়ে বহনক্ষম কৰ্মসংস্থাপন প্ৰদান কৰে আৰু গাঁৱৰ কল্যাণৰ পোষকতা কৰে। তেওঁৰ ৰবীন্দ্ৰ সংগীতৰ প্ৰভাৱ বিশ্বজুৰি আছে। শান্তিনিকেতন ভ্ৰমণ মোৰ বাবে অবিস্মৰণীয় হৈ থাকিব। এইখনেই সেই প্ৰতিষ্ঠান, যাক তেওঁ সম্পূৰ্ণ নিষ্ঠাৰে লালন-পালন কৰিছিল আৰু গঢ় দিছিল। তেওঁলৈ আকৌ এবাৰ মোৰ বিনম্ৰ শ্ৰদ্ধাঞ্জলি।

বন্ধুসকল,

মে’ মাহে ১৮৫৭ চনৰ প্ৰথম স্বাধীনতা যুদ্ধৰ কথাও মনলৈ আনে। ৰাইজৰ মাজত দেশপ্ৰেমৰ মনোভাব জাগ্ৰত কৰা ভাৰত মাতৃৰ সকলো বীৰ সন্তানক প্ৰণাম জনাইছোঁ। এই সময়ত স্কুলীয়া ল’ৰা-ছোৱালীয়েও বন্ধৰ দিনবোৰ সম্পূৰ্ণৰূপে উপভোগ কৰাৰ লগতে নতুন কিবা এটা শিকিবলৈ চেষ্টা কৰাৰ সময়। এই গ্ৰীষ্মকালত আপোনালোক সকলোৱে নিজৰ স্বাস্থ্যৰ সম্পূৰ্ণ যত্ন লোৱা উচিত। অহা মাহত আমি আপোনালোকক পুনৰ লগ পাম কিছুমান নতুন বিষয় আৰু আমাৰ দেশবাসীৰ কিছু নতুন কৃতিত্বৰ সৈতে। আপোনালোকক অশেষ ধন্যবাদ।

****

MJPS/PRK/RT/KD